سری نگر، مختلف سرکاری محکموں میں کام کرنے والے عارضی اور یومیہ اجرت پر کام کرنے والے ملازمین نے منگل کو سری نگر میں احتجاج کیا اور اپنی خدمات کو مستقل کرنے، اجرتوں میں نظرثانی اور پرانی پنشن اسکیم بحال کرنے کا مطالبہ کیا۔

یہ احتجاج جموں و کشمیر کیژول/ڈیلی ویجرز فورم کے بینر تلے منعقد کیا گیا، جس کی قیادت فورم کے صدر سجاد احمد پرے نے کی۔ مظاہرین نے کہا کہ وہ کئی برسوں سے اپنے مطالبات پورے ہونے کا انتظار کر رہے ہیں اور حکومت سے اپنے مسائل حل کرنے کے لئے فوری اقدامات کرنے کی اپیل کی۔

پرے نے جموں و کشمیر حکومت سے سوال کیا کہ ملازمین اور کارکنوں کے حوالے سے اس کی ترجیحات میں تبدیلی کیوں آئی ہے۔

انہوں نے سوال کیا، ’’اگر دوسری کمیٹیوں کی رپورٹ پیش کی جا سکتی ہے تو ہماری کمیٹی کی رپورٹ کیوں پیش نہیں کی جا سکتی؟‘‘ انہوں نے عارضی اور یومیہ اجرت پر کام کرنے والے ملازمین کے ساتھ یکساں طور پر غور کرنے کا مطالبہ کیا۔

انہوں نے عارضی مزدوروں کی اجرت میں اضافہ کرنے کا بھی مطالبہ کیا اور کہا کہ بڑھتی ہوئی مہنگائی کے درمیان کارکنوں کے لئے اپنے اخراجات پورے کرنا دن بہ دن مشکل ہوتا جا رہا ہے۔

مظاہرین نے منتخب نمائندوں، سول سوسائٹی گروپوں، سماجی تنظیموں، مذہبی تنظیموں اور سیاسی جماعتوں سے بھی اپیل کی کہ وہ ان کے مطالبات کی حمایت کریں اور جاری اسمبلی اجلاس کے دوران یہ معاملہ حکومت کے سامنے اٹھائیں۔

پرے نے سوال کیا، ’’ارکان اسمبلی خاموش کیوں ہیں؟‘‘ انہوں نے قانون سازوں سے عارضی اور یومیہ اجرت پر کام کرنے والے ملازمین کے مسائل اسمبلی میں اٹھانے کی اپیل کی۔

فورم نے اپنے ارکان سے مجوزہ قانون ساز اسمبلی کے قریب ہونے والے احتجاج میں شرکت کرنے کی بھی اپیل کی اور کہا کہ ان کی شرکت پُرامن اور جمہوری رہے گی۔

مظاہرین نے مزید الزام لگایا کہ ان کی آوازوں کو دبایا جا رہا ہے اور سرکاری افسران سے اپیل کی کہ وہ اپنے مطالبات کو اجاگر کرنے کی کوششوں میں رکاوٹیں پیدا کرنے سے گریز کریں۔

فورم نے کہا کہ مستقل ملازمت، اجرتوں میں نظرثانی اور پنشن سے متعلق فوائد ایسے دیرینہ مسائل ہیں، جن سے مختلف سرکاری محکموں میں کام کرنے والے بڑی تعداد میں ملازمین متاثر ہو رہے ہیں۔

مظاہرین نے کہا کہ حکومت کی جانب سے ان کے مطالبات کے حل کے لئے ٹھوس اقدامات کئے جانے تک وہ پُرامن اور جمہوری طریقوں سے اپنے مطالبات کے لئے جدوجہد جاری رکھیں گے۔

جموں و کشمیر میں تقریباً 1.05 لاکھ عارضی اور یومیہ اجرت پر کام کرنے والے ملازمین کئی برسوں سے مستقل کئے جانے کے منتظر ہیں۔ جموں و کشمیر حکومت نے اس معاملے کا جائزہ لینے کے لئے ایک کمیٹی تشکیل دی ہے۔

حکومت نے پیر کو اسمبلی میں بتایا، ’’کمیٹی کو ان ملازمین کو مستقل کرنے سے متعلق انسانی ہمدردی، قانونی اور مالی امور سمیت مختلف مسائل کا جائزہ لینے کی ذمہ داری سونپی گئی ہے۔ یہ معاملہ مختلف محکموں میں مختلف اوقات میں مختلف شرائط اور ضوابط کے تحت کام کرنے والے مختلف قسم کے ملازمین سے متعلق ہے۔

اس لئے مجوزہ پالیسی کو متعلقہ قانونی دفعات، قانونی صورت حال اور مقررہ بھرتی کے طریقہ کار کے مطابق ہونا ضروری ہے، ساتھ ہی اس کے نتیجے میں پڑنے والے مالی اثرات کو بھی مدنظر رکھنا ہوگا۔‘‘

حکومت نے کہا کہ کمیٹی ایک یکساں طریقہ کار وضع کرنے کے لئے جامع جائزہ لے رہی ہے، جو قانونی طور پر قابل عمل ہو اور تمام محکموں میں انتظامی طور پر نافذ کیا جا سکے۔

یو این آئی۔ م س۔ م الف

سری نگر، جموں و کشمیر کی طبی اور صحت تعلیم کی وزیر سکینہ ایتو نے منگل کو بتایا کہ جموں و کشمیر حکومت نے کینسر کے بڑھتے معاملات سے نمٹنے، مربوط اور جامع اقدامات کو مضبوط بنانے اور بیماری کی روک تھام، جانچ اور علاج کے لئے رہنمائی فراہم کرنے کے مقصد سے ایک اعلیٰ سطح کی کمیٹی تشکیل دی ہے۔

اسمبلی میں میر سیف اللہ کی جانب سے پوچھے گئے ایک سوال کا جواب دیتے ہوئے وزیر نے بتایا کہ جموں و کشمیر میں اس وقت کینسر کے تقریباً 51,000 معاملات ہیں۔ مرکز کے زیر انتظام علاقے میں خصوصی کینسر علاج کی سہولت فراہم کرنے کے لئے حکومت نے 2 ریاستی کینسر ادارے قائم کئے ہیں۔

وزیر نے بتایا کہ حکومت ہند کی صحت اور خاندانی بہبود کی وزارت کے مالی اور تکنیکی تعاون سے ’غیر متعدی بیماریوں کی روک تھام اور کنٹرول کے قومی پروگرام‘ کے تحت جموں و کشمیر حکومت نے 2 ریاستی کینسر ادارے قائم کئے ہیں، جن میں ایک شیر کشمیر انسٹی ٹیوٹ آف میڈیکل سائنسز صورہ میں اور دوسرا سرکاری میڈیکل کالج جموں میں قائم کیا گیا ہے۔

انہوں نے کہا کہ ان اداروں کے قیام کا مقصد تشخیص، علاج اور کینسر سے متعلق دیگر خدمات سمیت جامع اور خصوصی کینسر علاج کو یقینی بنانا ہے، تاکہ مرکز کے زیر انتظام علاقے کی کینسر کے علاج کی اہم ضروریات پوری کی جا سکیں۔ منظور شدہ معیار اور وسائل کی دستیابی کے مطابق بنیادی ڈھانچے، آلات، انسانی وسائل اور خصوصی علاج کی خدمات کے لحاظ سے موجودہ سہولتوں کو وقتاً فوقتاً مضبوط کیا جا رہا ہے۔ عام طور پر سامنے آنے والے کینسر کے معاملات میں معدے اور نظام ہاضمہ، پھیپھڑوں اور چھاتی کے کینسر کے معاملات کا بڑا حصہ ہے۔

وزیر نے ایوان کو بتایا کہ جموں و کشمیر انتظامیہ قابل رسائی، سستا اور معیاری کینسر علاج فراہم کرنے کو یقینی بنانے کے لئے پابند عہد ہے، خاص طور پر معاشرے کے اقتصادی طور پر کمزور طبقوں کے لئے۔ انہوں نے بتایا کہ اہل کینسر مریضوں کو آیوشمان بھارت اسکیم کے تحت فہرست میں شامل سرکاری اور نجی صحت اداروں میں مقررہ اہلیت کے معیار، علاج کے پیکیج اور رہنما اصولوں کے مطابق بغیر نقد رقم ادا کئے مفت علاج فراہم کیا جا رہا ہے۔

انہوں نے واضح کیا کہ اس اسکیم کے تحت منظور شدہ پیکیجوں میں مختلف تشخیصی، علاج اور اسپتال میں داخل ہونے سے متعلق خدمات شامل ہیں۔ اس کے علاوہ مقررہ اہلیت کے معیار اور فنڈ کی دستیابی کی بنیاد پر ’کینسر ٹریٹمنٹ اینڈ مینجمنٹ فنڈ فار پور‘ اسکیم کے تحت غریب اور ضرورت مند کینسر مریضوں کو مالی امداد فراہم کی جا رہی ہے۔ وزیر نے کہا کہ ان اقدامات کا مقصد اہل مریضوں اور ان کے اہل خانہ پر مالی بوجھ کم کرنا اور بروقت مناسب کینسر علاج کی سہولت فراہم کرنا ہے۔

یو این آئی۔ م س۔ م الف

سری نگر، جموں و کشمیر کی وزیر تعلیم اسکول سکینہ ایتو نے منگل کو جموں و کشمیر قانون ساز اسمبلی میں ایک قرارداد پیش کی، جس میں تعلیم کا حق (آر ٹی ای) ایکٹ میں ترمیم کرکے 31 اکتوبر 2019 سے قبل مقرر کیے گئے اساتذہ کو ٹیچر اہلیتی ٹیسٹ (ٹی ای ٹی) میں شرکت سے مستثنیٰ قرار دینے کا مطالبہ کیا گیا ہے۔

ایوان میں پیش کی گئی قرارداد میں کہا گیا ہے کہ ’’یہ ایوان متفقہ طور پر مرکزی حکومت سے اپیل کرتا ہے کہ وہ بچوں کو مفت اور لازمی تعلیم کے حق (آر ٹی ای) ایکٹ 2009 کی دفعہ 23 میں ضروری قانونی ترمیم کرے، تاکہ 31 اکتوبر 2019 سے قبل مقرر کیے گئے تمام اساتذہ کو ٹیچر اہلیتی ٹیسٹ (ٹی ای ٹی) میں شرکت سے مستثنیٰ قرار دیا جاسکے۔‘‘

قرارداد میں مزید کہا گیا ہے کہ ’’یہ ایوان مرکزی حکومت سے یہ بھی اپیل کرتا ہے کہ وہ ٹیچر اہلیتی ٹیسٹ (ٹی ای ٹی) سے استثنیٰ کے لیے تمام ضروری قانونی اقدامات کرے اور نیشنل کونسل فار ٹیچر ایجوکیشن (این سی ٹی ای) کے ذریعے مطلوبہ نوٹیفکیشن جاری کرے۔‘‘

ارکان اسمبلی بلونت سنگھ منکوٹیا، رنبیر سنگھ پٹھانیا، وحید پرہ اور خورشید احمد شیخ نے بحث میں حصہ لیا اور قرارداد کے مختلف پہلوؤں پر اظہار خیال کیا۔

قرارداد پر بحث اسمبلی کے اگلے کام کے دن بھی جاری رہے گی۔

یواین آئی۔ط ا