سری نگر، جموں و کشمیر پولیس نے بارہمولہ ضلع میں دہشت گردانہ سرگرمیوں کی حمایت سے متعلق ایک معاملے میں غیر قانونی سرگرمیاں (روک تھام) قانون (یو اے پی اے) کی دفعہ 25 کے تحت 2 منزلہ رہائشی عمارت ضبط کرلی ہے۔

پولیس نے بتایا کہ بارہمولہ کے شیری علاقے کے نمبلان گاؤں میں واقع یہ جائیداد ملزم اعجاز احمد گنی کی ہے۔

یہ کارروائی شیری تھانے میں درج ایف آئی آر نمبر 37/2026 کے سلسلے میں کی گئی، جو اسلحہ قانون کی دفعہ 7/25 اور یو اے پی اے کی دفعات 13، 18، 19، 20، 23، 38 اور 39 کے تحت درج کی گئی تھی۔

پولیس کے مطابق، معاملے کی تحقیقات میں پتہ چلا کہ اس جائیداد کا ابتدائی طور پر دہشت گردوں کو پناہ اور رسد فراہم کرنے اور دہشت گردانہ سرگرمیوں میں مدد کے لیے استعمال کیا گیا تھا۔ یہ کارروائی جموں و کشمیر کے پولیس ڈائریکٹر جنرل کی منظوری کے بعد کی گئی ہے۔

جائیداد پر ایک عوامی اطلاع بھی چسپاں کی گئی تھی، جس میں اس کی فروخت، منتقلی، لیز، گروی رکھنے یا کسی تیسرے فریق کا حق قائم کرنے پر پابندی عائد کی گئی تھی۔

پولیس نے کہا کہ یہ کارروائی ان رسدی اور معاون بنیادی ڈھانچوں کی شناخت اور انہیں ختم کرنے کی جاری کوششوں کا حصہ ہے، جن کا مبینہ طور پر دہشت گرد نیٹ ورک استعمال کرتے ہیں۔ اس کے ساتھ ہی اس کارروائی کا مقصد ان لوگوں اور جائیدادوں کے خلاف قانونی کارروائی کرنا بھی ہے جو دہشت گردانہ سرگرمیوں میں مدد کرتے ہیں۔

یو این آئی۔ ایم جے

سری نگر، مختلف سرکاری محکموں میں کام کرنے والے عارضی اور یومیہ اجرت پر کام کرنے والے ملازمین نے منگل کو سری نگر میں احتجاج کیا اور اپنی خدمات کو مستقل کرنے، اجرتوں میں نظرثانی اور پرانی پنشن اسکیم بحال کرنے کا مطالبہ کیا۔

یہ احتجاج جموں و کشمیر کیژول/ڈیلی ویجرز فورم کے بینر تلے منعقد کیا گیا، جس کی قیادت فورم کے صدر سجاد احمد پرے نے کی۔ مظاہرین نے کہا کہ وہ کئی برسوں سے اپنے مطالبات پورے ہونے کا انتظار کر رہے ہیں اور حکومت سے اپنے مسائل حل کرنے کے لئے فوری اقدامات کرنے کی اپیل کی۔

پرے نے جموں و کشمیر حکومت سے سوال کیا کہ ملازمین اور کارکنوں کے حوالے سے اس کی ترجیحات میں تبدیلی کیوں آئی ہے۔

انہوں نے سوال کیا، ’’اگر دوسری کمیٹیوں کی رپورٹ پیش کی جا سکتی ہے تو ہماری کمیٹی کی رپورٹ کیوں پیش نہیں کی جا سکتی؟‘‘ انہوں نے عارضی اور یومیہ اجرت پر کام کرنے والے ملازمین کے ساتھ یکساں طور پر غور کرنے کا مطالبہ کیا۔

انہوں نے عارضی مزدوروں کی اجرت میں اضافہ کرنے کا بھی مطالبہ کیا اور کہا کہ بڑھتی ہوئی مہنگائی کے درمیان کارکنوں کے لئے اپنے اخراجات پورے کرنا دن بہ دن مشکل ہوتا جا رہا ہے۔

مظاہرین نے منتخب نمائندوں، سول سوسائٹی گروپوں، سماجی تنظیموں، مذہبی تنظیموں اور سیاسی جماعتوں سے بھی اپیل کی کہ وہ ان کے مطالبات کی حمایت کریں اور جاری اسمبلی اجلاس کے دوران یہ معاملہ حکومت کے سامنے اٹھائیں۔

پرے نے سوال کیا، ’’ارکان اسمبلی خاموش کیوں ہیں؟‘‘ انہوں نے قانون سازوں سے عارضی اور یومیہ اجرت پر کام کرنے والے ملازمین کے مسائل اسمبلی میں اٹھانے کی اپیل کی۔

فورم نے اپنے ارکان سے مجوزہ قانون ساز اسمبلی کے قریب ہونے والے احتجاج میں شرکت کرنے کی بھی اپیل کی اور کہا کہ ان کی شرکت پُرامن اور جمہوری رہے گی۔

مظاہرین نے مزید الزام لگایا کہ ان کی آوازوں کو دبایا جا رہا ہے اور سرکاری افسران سے اپیل کی کہ وہ اپنے مطالبات کو اجاگر کرنے کی کوششوں میں رکاوٹیں پیدا کرنے سے گریز کریں۔

فورم نے کہا کہ مستقل ملازمت، اجرتوں میں نظرثانی اور پنشن سے متعلق فوائد ایسے دیرینہ مسائل ہیں، جن سے مختلف سرکاری محکموں میں کام کرنے والے بڑی تعداد میں ملازمین متاثر ہو رہے ہیں۔

مظاہرین نے کہا کہ حکومت کی جانب سے ان کے مطالبات کے حل کے لئے ٹھوس اقدامات کئے جانے تک وہ پُرامن اور جمہوری طریقوں سے اپنے مطالبات کے لئے جدوجہد جاری رکھیں گے۔

جموں و کشمیر میں تقریباً 1.05 لاکھ عارضی اور یومیہ اجرت پر کام کرنے والے ملازمین کئی برسوں سے مستقل کئے جانے کے منتظر ہیں۔ جموں و کشمیر حکومت نے اس معاملے کا جائزہ لینے کے لئے ایک کمیٹی تشکیل دی ہے۔

حکومت نے پیر کو اسمبلی میں بتایا، ’’کمیٹی کو ان ملازمین کو مستقل کرنے سے متعلق انسانی ہمدردی، قانونی اور مالی امور سمیت مختلف مسائل کا جائزہ لینے کی ذمہ داری سونپی گئی ہے۔ یہ معاملہ مختلف محکموں میں مختلف اوقات میں مختلف شرائط اور ضوابط کے تحت کام کرنے والے مختلف قسم کے ملازمین سے متعلق ہے۔

اس لئے مجوزہ پالیسی کو متعلقہ قانونی دفعات، قانونی صورت حال اور مقررہ بھرتی کے طریقہ کار کے مطابق ہونا ضروری ہے، ساتھ ہی اس کے نتیجے میں پڑنے والے مالی اثرات کو بھی مدنظر رکھنا ہوگا۔‘‘

حکومت نے کہا کہ کمیٹی ایک یکساں طریقہ کار وضع کرنے کے لئے جامع جائزہ لے رہی ہے، جو قانونی طور پر قابل عمل ہو اور تمام محکموں میں انتظامی طور پر نافذ کیا جا سکے۔

یو این آئی۔ م س۔ م الف

سری نگر، جموں و کشمیر حکومت نے منگل کو بتایا کہ مرکز کے زیر انتظام علاقے کے سرکاری ڈگری کالجوں میں اب تک 21.8 لاکھ سے زیادہ کتابوں اور اشاعتوں کی جانچ کی جا چکی ہے، جب کہ کتب خانوں کے مواد کے جاری جائزے کے تحت 4,249 کتابیں گردش سے ہٹا دی گئی ہیں۔

حکومت نے جموں و کشمیر قانون ساز اسمبلی میں لنگیٹ کے رکن اسمبلی خورشید احمد شیخ کی جانب سے سرکاری کالجوں اور کتب خانوں میں کتابوں کی جانچ سے متعلق پوچھے گئے ایک ستارہ دار سوال کے جواب میں یہ معلومات دی۔ یہ جانچ 9 جولائی 2026 کے سرکلر نمبر 02-JK(HE) کے تحت کی جا رہی ہے۔
جولائی میں جموں و کشمیر حکومت نے تمام سرکاری اور نجی اسکولوں کے سربراہان کو ہدایت دی تھی کہ وہ اپنے کتب خانوں، دفاتر، کلاس رومز اور عملے کے کمروں میں موجود کتابوں کو ’نامناسب یا قابل اعتراض مواد‘ کے لئے جانچیں۔ یہ سرکلر بی جے پی کی جانب سے سرکاری اسکولوں کی طرف سے بعض علیحدگی پسند رہنماؤں کی مبینہ تعریف کرنے والی کتابوں کی خریداری کے خلاف احتجاج کے چند روز بعد جاری کیا گیا تھا۔

اگست 2025 میں جموں و کشمیر کے محکمہ داخلہ نے کشمیر سے متعلق 25 کتابوں کی اشاعت پر پابندی عائد کی تھی، جن میں اے جی نورانی، اروندھتی رائے، کرسٹوفر سنیڈن اور سوماترا بوس کی تحریر کردہ کتابیں بھی شامل تھیں۔

جموں و کشمیر کے وزیر تعلیم کی جانب سے اسمبلی میں دیئے گئے جواب کے مطابق حکومت نے قابل اعتراض مواد کی نشاندہی کے لئے ’واضح اور معروضی معیار‘ مقرر کئے ہیں، جب کہ ان معیارات کی تفصیلات سرکلر میں دی گئی ہیں۔

تاہم کتابوں کی جانچ کا عمل ابھی جاری ہے۔ حکومت نے کہا کہ چلن سے ہٹائے جانے والے مواد کی نشاندہی ایک ’محنت طلب عمل‘ ہے اور اس میں مزید وقت لگ سکتا ہے۔

تفصیلات کے مطابق جموں و کشمیر کے جموں اور کشمیر دونوں ڈویژنوں کے سرکاری ڈگری کالجوں میں اب تک مجموعی طور پر 21,81,582 کتابوں اور اشاعتوں کی جانچ کی جا چکی ہے۔

ان میں سے 518 کتابیں 5 اگست 2025 کے ایس او 203 کے تحت پابندی عائد کتابیں تھیں، جنہیں گردش سے ہٹا دیا گیا۔ ان میں 19 عنوانات شامل ہیں۔

اعداد و شمار کے مطابق جموں ڈویژن میں 8 عنوانات کی 140 کتابیں، جبکہ کشمیر ڈویژن میں 18 عنوانات کی 478 کتابیں گردش سے ہٹائی گئیں۔

پابندی عائد کتابوں کے علاوہ مزید 4,249 کتابیں بھی گردش سے ہٹا دی گئی ہیں۔ ان میں جموں ڈویژن کی 253 اور کشمیر ڈویژن کی 3,996 کتابیں شامل ہیں۔

محکمہ نے 1,752 کتابوں کو ماہرین کی جانچ کے لئے ڈائریکٹر کالجز کے پاس بھی بھیجا ہے۔ ان میں جموں ڈویژن کی 538 اور کشمیر ڈویژن کی 1,214 کتابیں شامل ہیں۔

حکومت نے کہا کہ اس کارروائی کا مقصد اعلیٰ تعلیمی اداروں کے اعلیٰ تعلیم، تحقیق اور تعلیمی برتری کے مراکز کے طور پر کردار سے متعلق ہے۔

حکومت نے اپنے جواب میں کہا، ’’اس طرح کی کارروائی شروع کرنے کی وجہ یہ ہے کہ اعلیٰ تعلیمی ادارے اعلیٰ تعلیم، تحقیق اور تعلیمی برتری کے مراکز ہیں اور ان سے توقع کی جاتی ہے کہ وہ ایسا ماحول قائم کریں جو آئینی اقدار، تعلیمی آزادی، تنقیدی سوچ، سائنسی مزاج، ذمہ دار شہری ہونے اور ہندوستان کی خودمختاری، اتحاد اور سالمیت کے احترام کو فروغ دے۔‘‘

خورشید شیخ نے منگل کی شام کہا کہ جموں و کشمیر حکومت کی جانب سے ان کے سوالات کے مکمل جواب نہیں دیئے گئے ہیں۔

انہوں نے سری نگر میں ایک پریس کانفرنس میں کہا، ’’میں چاہتا تھا کہ حکومت اعلیٰ تعلیم کے محکمے کے کتب خانوں اور کالجوں سے ہٹائی گئی کتابوں کی مکمل فہرست فراہم کرے، جس میں ان کے مصنفین، عنوانات، موضوعات اور ناشرین کی تفصیلات شامل ہوں۔ یہ ایک سنگین معاملہ ہے۔ جب اسمبلی کا اجلاس دوبارہ شروع ہوگا تو ہم ایک بار پھر حکومت سے ان کتابوں کی مکمل فہرست فراہم کرنے کا مطالبہ کریں گے۔‘‘

خورشید شیخ نے منتخب حکومت کی ذمہ داری پر بھی سوال اٹھایا اور کہا کہ انتظامیہ کو واضح کرنا چاہئے کہ کتابیں ہٹانے کی اجازت کس نے دی اور یہ فیصلے کس پالیسی یا معیار کے تحت کئے گئے۔

اسی دوران انہوں نے جموں و کشمیر میں کتابوں اور ادب کے حوالے سے جسے انہوں نے مرکزی حکومت کا پابندی والا رویہ قرار دیا، اس پر بھی سوال اٹھایا۔

خورشید شیخ نے ’دی کشمیر فائلز‘ جیسی فلموں کی تشہیر کا حوالہ دیتے ہوئے بھی تقابل کیا۔ انہوں نے کہا کہ اس فلم میں کشمیری پنڈت برادری کی تکالیف کو اجاگر کیا گیا ہے، جب کہ ان کے بقول کشمیر کی وسیع تاریخ اور سیاسی حقیقت سے متعلق ادب کو ہٹایا یا دبایا جا رہا ہے۔

انہوں نے کہا کہ کشمیر کی تاریخ اور ادب کو منتخب انداز میں پیش یا تبدیل نہیں کیا جا سکتا۔

یو این آئی۔ م س۔ م الف