نئی دہلی، کانگریس صدر ملکارجن کھرگے نے گزشتہ سال 24 ستمبر کو لیہ میں تحریک کے دوران مارے گئے چار نوجوانوں کو خراج عقیدت پیش کرتے ہوئے واقعے کی عدالتی تحقیقات کر کے پوری سچائی سامنے لانے، جواب دہی طے کرنے اور بغیر کسی خوف یا جانب داری کے انصاف یقینی بنانے کا مطالبہ کیا ہے۔

سوشل میڈیا ایکس پر بدھ کے روز مسٹر کھرگے نے کہا کہ ایک سال پہلے لداخ کے جمہوری اور آئینی حقوق کے لیے چلی تحریک کے دوران لیہ میں چار نوجوانوں کو گولی ماری گئی تھی۔ انہوں نے کہا کہ یوم شہداء پر وہ انہیں خراج عقیدت پیش کرتے ہیں اور ان کے خاندانوں کے ساتھ مکمل یکجہتی کے ساتھ کھڑے ہیں۔

انہوں نے کہا کہ لداخ کے لوگوں نے اپنی جائز خواہشات کی تکمیل کے لیے طویل عرصے تک انتظار کیا ہے۔ کانگریس زمین، روزگار، نازک ماحولیات، ثقافت اور شناخت کے تحفظ کے لیے چھٹے شیڈول سمیت بامعنی آئینی تحفظ کے ان کے مطالبے کے ساتھ مضبوطی سے کھڑی ہے۔

مسٹر کھرگے نے کہا کہ جمہوریت اور نمائندہ اداروں کو مکمل طور پر بحال کیا جانا چاہیے اور لوگوں کو اپنے مستقبل کے تعین میں موثر آواز ملنی چاہیے۔

یواین آئی ایف اے

نئی دہلی، وزیر خارجہ ایس جے شنکر نے کہا ہے کہ ترقی پذیر ممالک عالمی بحرانوں کا سب سے زیادہ سامنا کررہے ہیں، لیکن فیصلہ سازی کے عمل میں وہ سب سے پیچھے ہیں۔

مسٹر جے شنکر نے منگل کو نیویارک میں اقوام متحدہ کی جنرل اسمبلی کے اجلاس سے الگ ’’ہم خیال ترقی پذیر ممالک اور دوست ممالک کے اعلیٰ سطحی وزارتی اجلاس‘‘ سے خطاب کرتے ہوئے کہا کہ موجودہ حالات کو دیکھتے ہوئے ترقی پذیر ممالک کا متحد ہونا انتہائی ضروری ہے۔

انہوں نے رسد کے سلسلوں، مالیات اور رابطے کے نظام میں رکاوٹوں کو قبول نہ کرنے، توانائی اور غذائی تحفظ یقینی بنانے، منصفانہ تجارتی نظام، بحری سلامتی اور مصنوعی ذہانت سے پیدا ہونے والی نئی عدم مساوات کو روکنے پر زور دیا۔ انہوں نے کہا کہ ترقی پذیر ممالک کو اپنے مستقبل سے متعلق معاملات پر فیصلہ کرنے والے اداروں کا حصہ ہونا چاہیے۔

مسٹر جے شنکر نے ترقی پذیر ممالک کے درمیان اقتصادی تعاون بڑھانے، مصنوعی ذہانت کے مقامی طور پر تیار کردہ آلات اور طریقہ کار ایک دوسرے کے ساتھ بانٹنے اور بین الاقوامی شمسی اتحاد اور آفات سے محفوظ بنیادی ڈھانچے کے اتحاد جیسے پلیٹ فارموں کے ذریعے موسمیاتی اقدامات کو آگے بڑھانے کی تجویز دی۔ انہوں نے اقوام متحدہ اور کثیر ملکی نظام میں اصلاحات کو بھی ضروری قرار دیا۔

انہوں نے 5 تجاویز بھی پیش کیں۔ پہلی، موجودہ پلیٹ فارموں کا استعمال کرتے ہوئے ترقی پذیر ممالک کے خدشات کو ترجیح کے ساتھ اٹھایا جانا چاہیے، تاکہ انہیں نظر انداز نہ کیا جائے۔

دوسری، عالمی بحرانوں کے اثرات سے بچاؤ کے لیے ترقی پذیر ممالک کے درمیان اقتصادی تعاون بڑھانا ضروری ہے۔ تیسری، مصنوعی ذہانت کے شعبے میں ترقی پذیر ممالک کے لیے مقامی طور پر تیار کردہ آلات اور ٹیکنالوجی ایک دوسرے کے ساتھ بانٹنی چاہیے اور یہ یقینی بنانا چاہیے کہ مصنوعی ذہانت انسانوں کو مرکز میں رکھ کر کام کرے۔

چوتھی، موسمیاتی تبدیلی سے نمٹنے کے لیے صرف عالمی شمال پر انحصار کرنے کے بجائے بین الاقوامی شمسی اتحاد جیسے پلیٹ فارموں کے ذریعے مزید کام کرنا چاہیے، اور پانچویں، ترقی پذیر ممالک کی ترجیحات پوری کرنے کے لیے اقوام متحدہ اور پورے کثیر ملکی نظام میں اصلاحات ضروری ہیں۔

یو این آئی۔ ایم جے

وایناڈ، (کیرالہ)، کانگریس کی جنرل سکریٹری پرینکا گاندھی واڈرا نے بہار کے جموئی میں طالبہ کے ساتھ پیش آئے واقعے پر خواتین کی سکیورٹی کے حوالے سے تشویش کا اظہار کرتے ہوئے کہا ہے کہ اگر سڑکوں پر خواتین کی سکیورٹی یقینی نہیں بنائی جا سکتی تو بڑے بڑے منصوبوں اور پروگراموں کی بات کرنے کا کوئی مطلب نہیں ہے۔

محترمہ گاندھی نے منگل کے روز اپنے پارلیمانی حلقے کیرالہ کے وایناڈ میں صحافیوں کے سوالات کے جواب میں کہا کہ خواتین کے خلاف جرائم اور تشدد کے واقعات مسلسل بڑھ رہے ہیں اور خواتین خود کو غیر محفوظ محسوس کر رہی ہیں۔ انہوں نے کہا کہ ریاستی حکومتوں اور خاص طور پر مرکزی حکومت کو اس بات پر غور کرنا چاہیے کہ خواتین کو محفوظ کیسے محسوس کرایا جائے۔

انہوں نے کہا کہ سڑکوں پر خواتین کی سکیورٹی یقینی بنانا ضروری ہے اور جب یہ بھی یقینی نہیں بنایا جا سکتا تو بڑے منصوبوں اور پروگراموں کی بات کرنے کا کوئی مطلب نہیں ہے۔

یواین آئی ایف اے