سری نگر،جموں و کشمیر کے وزیر اعلیٰ عمر عبداللہ نے بدھ کو انتخابی عمل سے متعلق خدشات پر ’’اصلاحی کارروائی‘‘ کا مطالبہ کرتے ہوئے کہا کہ اگر لوگوں کا انتخابات پر اعتماد ختم ہو گیا تو ’’پھر جمہوریت میں کیا باقی رہ جائے گا؟‘‘ وہیں پی ڈی پی صدر محبوبہ مفتی نے خبردار کیا کہ اگر انتخابی فہرستوں سے نام مبینہ طور پر حذف اور شامل کیے جانے کا سلسلہ جاری رہا تو ہندوستان آخرکار ’’بنانا ریپبلک‘‘ جیسا بن سکتا ہے۔

دونوں رہنماؤں نے ’دی انڈین ایکسپریس‘ میں شائع ہوئی ایک خبر پر ردعمل ظاہر کیا، جس میں کہا گیا تھا کہ الیکشن کمشنروں سکھبیر سنگھ سندھو اور وویک جوشی نے 10 ماہ کی مدت کے دوران ایسے فیصلوں اور بیانات پر کم از کم 14 اعتراضات درج کیے جن کے بارے میں ان کا کہنا تھا کہ وہ ان کے علم یا منظوری کے بغیر جاری کیے گئے تھے۔

مسٹر عمر عبداللہ نے کہا کہ انتخابی ادارے کے کام کاج پر پہلے بھی اٹھائے گئے خدشات کے پس منظر میں یہ رپورٹ اہم ہے۔

انہوں نے سری نگر میں نامہ نگاروں سے کہاکہ ’’الیکشن کمیشن کے کام کرنے کے طریقے پر ہمیں مسلسل شکایات رہی ہیں۔ ایس آئی آر (خصوصی جامع نظرثانی) ملک کے باقی حصوں کے لیے مسئلہ بننے سے پہلے، ہمارے لیے حد بندی ایک مسئلہ تھی۔‘‘

انہوں نے الزام لگایا کہ اگست 2019 میں مرکز کی جانب سے دفعہ 370 ختم کیے جانے کے بعد جموں و کشمیر میں کرائی گئی حد بندی کا عمل شفاف نہیں تھا اور اس میں خامیاں تھیں اور دعویٰ کیا کہ اسے ’’ایک سیاسی جماعت اور اس کے دوستوں کو فائدہ پہنچانے کے لیے تیار کیا گیا تھا۔‘‘

انہوں نے کہاکہ ’’جو کچھ سامنے آیا ہے، اسے دیکھتے ہوئے الیکشن کمیشن کے اندرونی اختلافات واضح طور پر بتاتے ہیں کہ کچھ گڑبڑ ہے۔‘‘ انہوں نے مزید کہا کہ خبر کے بعد انتخابی ادارے کی جانب سے جاری کیا گیا بیان ’’اس سے بھی زیادہ سنگین‘‘ تھا۔

مسٹر عمر نے زور دے کر کہا کہ انتخابات پر عوام کا اعتماد جمہوریت کے لیے ضروری ہے۔

انہوں نے سوال کیاکہ ’’کچھ اصلاحی کارروائی کرنے کی ضرورت ہے۔ بصورت دیگر، اگر لوگوں کا انتخابات پر اعتماد ختم ہو جائے تو جمہوریت میں کیا باقی رہ جائے گا؟‘‘

مسٹر عمر نے کہاکہ ’’جمہوریت کی بنیاد انتخابات ہیں اور اگر لوگوں کا انتخابات پر اعتماد ختم ہو جائے تو لوگ انتخابات میں حصہ کیوں لیں گے؟‘‘ انہوں نے الیکشن کمیشن اور مرکزی حکومت سے اس معاملے کو دیکھنے کی اپیل کی۔

مسٹر عمر نے لوک سبھا میں اپوزیشن لیڈر راہل گاندھی کے اس بیان کی بھی حمایت کی، جس میں انہوں نے حکمراں بی جے پی اور انتخابی ادارے پر ملک سے غداری کا الزام لگایا تھا۔

انہوں نے کہاکہ ’’اگر آپ کسی شخص کو ووٹ دینے سے روک رہے ہیں، جبکہ ووٹ دینا اس کا حق ہے اور وہ ووٹ دینا چاہتا ہے اور بدقسمتی سے ووٹر فہرست سے ہٹائے گئے کچھ لوگوں کو پاسپورٹ نہ دینے کا بہانہ بنا دیا گیا، تو اگر یہ آئین پر حملہ نہیں ہے تو پھر کیا ہے؟‘‘

مسٹر عمر نے مزید کہاکہ ’’راہل نے جو کہا وہ بالکل درست ہے۔ اب ہمیں دیکھنا ہوگا کہ اس کی اصلاح کے لیے کیا اقدامات کیے جائیں گے۔‘‘

خبر پر ردعمل ظاہر کرتے ہوئے سابق وزیر اعلیٰ اور پی ڈی پی صدر محبوبہ نے کہا کہ اگر انتخابی فہرستوں سے نام مبینہ طور پر حذف اور شامل کیے جانے کا سلسلہ جاری رہا تو ہندوستان آخرکار ’’بنانا ریپبلک‘‘ جیسا بن سکتا ہے۔

صحافیوں سے بات کرتے ہوئے محبوبہ نے کہا کہ ہندوستان اور پاکستان، جنہیں انہوں نے ’’بہن ریاستیں‘‘ قرار دیا، اپنے ہی لوگوں کو نقصان پہنچانے میں ایک دوسرے سے مقابلہ کرتے ہوئے نظر آتے ہیں۔

انہوں نے کہاکہ ’’ہمارا ملک ہندوستان، جسے دنیا کی سب سے بڑی جمہوریت سمجھا جاتا ہے اور جس کے بارے میں ہمارے وزیر اعظم بیرون ملک جانے پر فخر کے ساتھ اسے جمہوریت کی ماں کہتے ہیں۔ آج وہ ہندوستانی جمہوریت کی اسی بنیادی بنیاد، یعنی انتخابی عمل کو کمزور کرنے کی کوشش کر رہے ہیں۔‘‘

انہوں نے الزام لگایا کہ انتخابی فہرستوں میں ’’ہیرا پھیری‘‘ کی جا رہی ہے اور کہا کہ 2 الیکشن کمشنروں نے اس معاملے پر سوال اٹھائے ہیں۔

انہوں نے کہاکہ ’’اگر یہ اسی طرح جاری رہا، یعنی بی جے پی کی جانب سے انتخابی فہرستوں سے نام حذف اور شامل کیے جاتے رہے، تو یہ خطرہ ہے کہ کسی وقت ہمارا ملک، جو دنیا کی سب سے بڑی جمہوریت ہے، بنانا ریپبلک جیسا نظر آنے لگے گا۔‘‘

پاکستان کا حوالہ دیتے ہوئے پی ڈی پی سربراہ نے کہا کہ یہ ملک بین الاقوامی سطح پر خود کو امن قائم کرنے والا اور ثالث کے طور پر پیش کرتا ہے، لیکن ’’اپنے ملک کے اندر اختلاف رائے کو سختی سے کچل رہا ہے۔‘‘

انہوں نے پاکستان کے سابق وزیر اعظم عمران خان کی بہنوں کی حراست کا حوالہ دیتے ہوئے الزام لگایا کہ انہیں غیر مسلح اور پرامن احتجاج کرنے کے باوجود حراست میں لیا گیا۔

انہوں نے کہاکہ ’’آپ دنیا بھر میں امن قائم کرنے والے کے طور پر گھوم رہے ہیں اور اپنے ہی ملک میں ان خواتین کو ان کے گھروں میں حراست میں لے رہے ہیں جن کے ہاتھوں میں کوئی ہتھیار نہیں ہے۔‘‘

تاہم محبوبہ نے کہا کہ ہندوستان کے ادارہ جاتی نظام میں ایسے لوگوں کی موجودگی جو اقتدار میں موجود افراد سے سوال کر سکتے ہیں، ایک ’’امید کی کرن‘‘ ہے۔

انہوں نے کہاکہ ’’واحد امید کی کرن جو مجھے نظر آتی ہے وہ یہ ہے کہ ہندوستان میں اب بھی ہمارے پاس ان 2 الیکشن کمشنروں جیسے لوگ موجود ہیں، جن میں اقتدار میں موجود لوگوں سے سوال کرنے کی ہمت اور دیانت داری ہے۔‘‘

انہوں نے پاکستان کے اداروں میں ایسی ہی آوازوں کی عدم موجودگی پر تشویش کا اظہار کیا جو، ان کے مطابق، عمران خان کی بہن کی حراست پر سوال اٹھا سکیں۔

انہوں نے کہاکہ’’اگر ہمارے پاس ان 2 الیکشن کمشنروں جیسے لوگ نہیں ہوں گے، میں اس وقت ان کے نام نہیں لینا چاہتی، مجھے نہیں معلوم کہ اگر وہ ای ڈی یا محکمہ انکم ٹیکس کے دفتر جائیں گے تو انہیں کن مشکلات کا سامنا کرنا پڑے گا اور ان کے ساتھ کیا ہوگا۔‘‘ انہوں نے مزید کہاکہ ’’لیکن اگر ہم اسی طرح چلتے رہے تو ایک وقت آئے گا جب ہم بنانا ریپبلک جیسے نظر آئیں گے، جمہوریت باقی نہیں رہے گی۔‘‘

یو این آئی۔ این یو۔

سری نگر، انسپکٹر جنرل آف پولیس، کشمیر زون، سوجیت کمار نے بدھ کو باندی پورہ میں سلامتی کی صورتحال، انسداد دہشت گردی کے نظام، امن و قانون کی تیاری اور عملی تیاری کا جائزہ لیا اور پولیس اہلکاروں کو عوام دوست پولیسنگ کو مضبوط بنانے اور ابھرتے ہوئے سلامتی کے چیلنجوں کے خلاف چوکس رہنے کی ہدایت دی۔

پولیس نے بتایا کہ آئی جی پی کشمیر کے ہمراہ ڈپٹی انسپکٹر جنرل، شمالی کشمیر، ڈاکٹر ونود کمار بھی موجود تھے۔

باندی پورہ کے ایس ایس پی اعجاز احمد زرگر نے آئی جی پی کشمیر کو ضلع میں مجموعی سلامتی کی صورتحال، انسداد دہشت گردی کے اقدامات، خفیہ اطلاعات، علاقے میں غلبہ قائم کرنے کی کارروائی، حساس مقامات کی سلامتی، امن و قانون کی تیاری اور جرائم کی صورتحال کے بارے میں اطلاع دی۔

اجلاس کے دوران آئی جی پی کشمیر نے عوام دوست پولیسنگ کو مضبوط بنانے، جرائم کے معاملات کو نمٹانے میں بہتری لانے اور زمینی ضروریات کے مطابق عملی تیاری بڑھانے پر زور دیا۔ مسٹر کمار نے تمام عہدوں کے اہلکاروں سے چوکس رہنے اور سلامتی اور امن و قانون سے متعلق ابھرتے ہوئے چیلنجوں کا فوری اور مؤثر جواب یقینی بنانے کی اپیل کی۔

آئی جی پی کشمیر نے پولیس اہلکاروں کی لگن اور پیشہ ورانہ صلاحیت کی تعریف کی اور انہیں عوام کی حفاظت اور سلامتی یقینی بنانے کے لیے پوری وابستگی کے ساتھ اپنی ذمہ داریاں انجام دیتے رہنے کی ہدایت دی۔

یو این آئی۔ این یو۔

سری نگر، جموں و کشمیر کے وزیر اعلیٰ عمر عبداللہ نے بدھ کو جمہوریت میں کتابوں پر پابندی عائد کرنے کے طریقہ کار پر سوال اٹھاتے ہوئے کہا کہ اس وقت منتخب حکومت کو ایسے فیصلے لنے کا اختیار حاصل نہیں ہے۔

مسٹر عمر عبداللہ جموں و کشمیر بھر کی لائبریریوں اور عوامی اداروں سے کتابیں ہٹائے جانے سے متعلق سوالات کا جواب دے رہے تھے۔ عمر عبداللہ حکومت نے منگل کو اسمبلی کو بتایا تھا کہ وسیع پیمانے پر جانچ کے بعد لائبریریوں اور دیگر عوامی اداروں سے 4767 کتابیں ہٹا دی گئی ہیں۔

وزیر اعلیٰ نے کہا کہ یہ معاملہ جمہوری نظام میں کتابوں پر پابندی عائد کرنے کے وسیع تر سوال کو جنم دیتا ہے۔

انہوں نے سری نگر میں نامہ نگاروں سے کہا کہ ’’کتابوں پر پابندی عائد کی جانی چاہیے یا نہیں، اس بارے میں میری اپنی رائے ہے۔ لیکن بدقسمتی سے موجودہ نظام میں منتخب حکومت کے طور پر ہمیں ان معاملات کا فیصلہ کرنے کا اختیار نہیں ہے۔ اس لیے ہمیں صرف اس صورت حال کے بدلنے کا انتظار کرنا ہوگا۔ ہم جو کچھ ہو رہا ہے، اس کا نئے سرے سے جائزہ لیں گے۔‘‘

ان کا یہ بیان جموں و کشمیر حکومت کی جانب سے ایک دن پہلے قانون ساز اسمبلی کو دی گئی اس اطلاع کے بعد آیا کہ مرکز کے زیر انتظام علاقے کے سرکاری ڈگری کالجوں میں 21.81 لاکھ سے زیادہ کتابوں اور مطبوعات کی جانچ کے بعد 4249 کتابیں سرکولیشن سے ہٹا دی گئی ہیں۔ ہٹائی گئی کتابوں میں سے 3996 کشمیر اور 253 جموں سے ہیں۔ مزید 1752 کتابیں ماہرین کی جانچ کے لیے بھیجی گئی ہیں۔

حکومت نے کہا ہے کہ قابل اعتراض مواد کی شناخت کے لیے ’’واضح اور معروضی‘‘ معیار اپنایا گیا ہے اور اس بات پر زور دیا ہے کہ اعلیٰ تعلیمی اداروں سے آئینی اقدار، تعلیمی آزادی، تنقیدی سوچ، سائنسی مزاج اور ہندوستان کی خودمختاری، اتحاد اور سالمیت کے احترام کو برقرار رکھنے کی توقع کی جاتی ہے۔

تاہم اس انکشاف کے بعد ہٹائی گئی کتابوں کی شناخت اور ان پر لاگو کیے گئے معیار کے بارے میں سوالات اٹھنے لگے ہیں۔

کشمیر کے اعلیٰ مذہبی پیشوا اور حریت چیئرمین میر واعظ عمر فاروق نے زیادہ شفافیت کا مطالبہ کرتے ہوئے سوال کیا کہ اتنی بڑی تعداد میں کتابوں کو قابل اعتراض کیوں قرار دیا گیا۔

میر واعظ نے ایکس پر کہا کہ ’’قانون ساز اسمبلی میں حکومت کی جانب سے یہ انکشاف کہ اعلیٰ تعلیم محکمہ نے جموں و کشمیر کے کالجوں اور لائبریریوں سے 4249 ’قابل اعتراض‘ کتابیں ہٹا دی ہیں، جن میں سے تقریباً 4000 صرف کشمیر سے ہیں، تشویش اور افسوس کی بات ہے۔ آخر ان کتابوں کو قابل اعتراض بنانے والی چیز کیا تھی؟ ان کے کتابوں کے نام اور انہیں ہٹانے کی وجوہات عوام کے سامنے لائی جانی چاہئیں۔‘‘

انہوں نے کہا کہ یونیورسٹیوں اور کالجوں میں تعلیمی آزادی اور مختلف نقطہ نظر تک رسائی تعلیم اور معاشرے کی ترقی کے لیے بنیادی حیثیت رکھتی ہے۔

انہوں نے کہاکہ ’’طلبہ کیا پڑھ سکتے ہیں اور کیا نہیں پڑھ سکتے، اسے نظریاتی طور پر منظم کرنے کی کوششیں تعلیم اور تنقیدی سوچ کو محدود کرتی ہیں۔‘‘

انہوں نے مزید کہاکہ ’’ان کتابوں کو ہٹا کر منتخب حکومت کس کے ایجنڈے پر عمل درآمد کر رہی ہے — اپنے ایجنڈے پر یا کسی اور کے؟ لوگوں کو اس بارے میں وضاحت ملنی چاہیے۔‘‘

میر واعظ نے کہا کہ تعلیمی اداروں اور علم تک رسائی سے متعلق اس قدر اہم معاملے میں شفافیت ضروری ہے اور عوام کو یہ جاننے کا حق ہے کہ اتنی بڑی تعداد میں کتابوں کو سرکولیشن سے ہٹانے کی بنیاد کیا تھی۔

تازہ تنازع جموں و کشمیر میں تعلیمی مواد کی جاری جانچ کے پس منظر میں سامنے آیا ہے۔ جولائی میں حکام نے اسکولوں کو ہدایت دی تھی کہ لائبریریوں، دفاتر، کلاس رومز اور عملے کے کمروں میں رکھی کتابوں کی ’’نامناسب یا قابل اعتراض مواد‘‘ کے لیے جانچ کی جائے۔ یہ اقدام اسکول کی لائبریریوں کے لیے حاصل کی گئی 2 کتابوں پر پیدا ہوئے تنازع کے بعد کیا گیا تھا، جن میں مبینہ طور پر علیحدگی پسند اور عسکریت پسند شخصیات کے حوالے تھے۔

یہ معاملہ اگست 2025 میں کشمیر پر 25 کتابوں پر پابندی عائد کرنے کے نوٹیفکیشن کے بعد بھی سامنے آیا ہے، جن میں اے جی نورانی اور اروندھتی رائے جیسے مصنفین کی تصانیف شامل تھیں۔

یو این آئی۔ این یو۔