سری نگر، نیشنل کانفرنس کے صدر اور جموں و کشمیر کے سابق وزیر اعلیٰ فاروق عبداللہ نے جمعرات کو معروف اداکار نانا پاٹیکر کو اپنا ”بہت اچھا دوست” اور ”بہت اچھا انسان” قرار دیتے ہوئے کہا کہ انہوں نے اپنی زندگی غریبوں اور ضرورت مندوں کی مدد کے لیے وقف کردی تھی۔

75 سالہ نانا پاٹیکر جمعرات کی صبح گوا میں واقع اپنی رہائش گاہ پر دل کا دورہ پڑنے سے انتقال کرگئے۔
عبداللہ نے صحافیوں سے کہاکہ ”وہ میرے بہت اچھے دوست تھے اور سب سے بڑھ کر ایک بہت اچھے انسان تھے۔ انہوں نے اپنی پوری زندگی غریبوں اور ضرورت مندوں کی مدد کی۔” انہوں نے کہاکہ ”وہ قبائلی دیہات میں پسماندہ لوگوں کے درمیان رہتے تھے اور ضرورت مند افراد کے مسائل حل کرنے کے لیے کام کرتے تھے۔”

اداکار کے ساتھ اپنی وابستگی کو یاد کرتے ہوئے عبداللہ نے کہا کہ نانا پاٹیکر کئی مرتبہ جموں و کشمیر آئے تھے۔

انہوں نے کہاکہ ”وہ بار بار یہاں آتے تھے اور مجھ سے ملاقات کرتے تھے۔ ایک مرتبہ وہ میری ایک شادی میں بھی آئے تھے، جہاں مجھے ان کے ساتھ رقص کرنے کا موقع ملا۔”

سابق وزیر اعلیٰ نے کہا کہ اداکار میں ”نرم دلی” کی ایک نایاب خوبی تھی اور انہوں نے کبھی مذہبی معاملات کو لوگوں کی مدد کی راہ میں حائل نہیں ہونے دیا۔

انہوں نے کہاکہ ”وہ کبھی مذہب نہیں دیکھتے تھے، بلکہ کسی شخص کے درد کو دیکھتے تھے اور اسے زیادہ سے زیادہ کم کرنے کی کوشش کرتے تھے۔”

عبداللہ نے کہا کہ معاشرے کے لیے نانا پاٹیکر کی خدمات کو فراموش نہیں کیا جائے گا۔

انہوں نے کہاکہ ”اللہ نے انہیں بہت نوازا تھا۔ انہوں نے لوگوں کی مدد کے لیے جو کچھ کرسکتے تھے، کیا اور ان کی خدمات کو کوئی فراموش نہیں کرسکتا۔ ان کی یاد ہمیشہ ہمارے ساتھ رہے گی۔”

اداکار کے انتقال پر اظہارِ افسوس کرتے ہوئے عبداللہ نے کہا کہ جمعرات کی صبح یہ خبر سن کر انہیں بہت دکھ ہوا اور انہوں نے آنجہانی کی روح کے لیے دعا کی۔

نانا پاٹیکر کی اداکاری کی صلاحیتوں کی تعریف کرتے ہوئے عبداللہ نے انہیں ایک شاندار اداکار قرار دیا اور کہا کہ ان کی آخری فلم، جس کی شوٹنگ انہوں نے حال ہی میں گوا میں مکمل کی تھی، ان کی صلاحیتوں کی بھی عکاسی کرے گی۔

یواین آئی۔ ط ا

جموں، جموں کی اسپیشل آپریشن گروپ (ایس او جی) نے ایک بڑی کارروائی کرتے ہوئے جمعرات کو ‘خوف گینگ’ سے وابستہ گینگسٹرز کے دو ساتھیوں کو اسلحہ، گولہ بارود اور منشیات سمیت گرفتار کرلیا۔

سرکاری بیان کے مطابق، جموں ایس او جی نے جموں اور سانبہ میں کارروائی کرتے ہوئے دو افراد کو گرفتار کیا اور ان کے قبضے سے تین آتشیں ہتھیار، جن میں دو پستول اور ایک دیسی ساختہ پستول (کٹا) شامل ہے، کے علاوہ ہیروئن (چِٹا) برآمد کی۔

گرفتار ملزمان کی شناخت سانبہ ضلع کے باری برہمنہ کے پلی کے رہنے والے ونش شرما اور باری برہمنہ کے پالی ٹانڈہ کے رہنے والے یوگیشور سنگھ کے طور پر ہوئی ہے۔

تحقیقات کے دوران ونش شرما کے مبینہ طور پر وکاس سالتھیا عرف وکی خوف اور روہت کمار عرف مکھن سے وابستہ ہونے کا انکشاف ہوا ہے۔ یہ دونوں جموں خطے میں مبینہ طور پر اسلحہ کی سپلائی کے نیٹ ورک اور مجرمانہ سرگرمیوں سے منسلک ہیں۔

بیان میں کہا گیا ہے کہ تحقیقات سے ونش شرما کے پنجاب میں مقیم گینگسٹرز کے ساتھ مبینہ روابط کا بھی انکشاف ہوا ہے اور ان کا منصوبہ غیر قانونی ہتھیار حاصل کرنے اور پنجاب میں ایک ہدف بنا کر حملہ کرنے کا تھا۔

بیان کے مطابق، مکمل نیٹ ورک کا پتہ لگانے اور دیگر ساتھیوں کی شناخت کے لیے مزید تحقیقات جاری ہیں۔

یواین آئی۔ ظ ا

سری نگر، کانگریس کارکنوں نے جمعرات کو سری نگر میں احتجاج کرتے ہوئے انتخابی فہرستوں میں مبینہ بے ضابطگیوں کے معاملے پر چیف الیکشن کمشنر (سی ای سی) گیانیش کمار کو عہدے سے ہٹانے کا مطالبہ کیا۔

مظاہرین نے الیکشن کمیشن اور بی جے پی کے خلاف نعرے لگاتے ہوئے اس دن کو ”یوم سیاہ” قرار دیا اور الزام لگایا کہ انتخابی عمل کی سالمیت کو نقصان پہنچایا جا رہا ہے۔ احتجاج کانگریس کے ہیڈکوارٹر کے باہر کیا گیا، جہاں پولیس اور سی آر پی ایف اہلکاروں سمیت بھاری تعداد میں سکیورٹی اہلکار تعینات کیے گئے تھے۔

مظاہرین نے اپنی مانگیں پیش کرنے کے لیے مرکزی ایم اے روڈ کی جانب بڑھنے کی کوشش کی، تاہم سکیورٹی فورسز نے انہیں آگے بڑھنے سے روکنے کے لیے رکاوٹیں کھڑی کر رکھی تھیں۔ عینی شاہدین کے مطابق احتجاج کے دوران کشیدگی بڑھنے پر پولیس اہلکاروں نے مظاہرین کو دھکیل کر دوبارہ کانگریس ہیڈکوارٹر کی جانب پہنچا دیا۔

سری نگر ڈسٹرکٹ کانگریس کمیٹی (ڈی سی سی) کے صدر عادل فاروق میر نے کہا کہ نئی دہلی میں چیف الیکشن کمشنر گیانیش کمار کے خلاف احتجاج کے دوران لوک سبھا میں قائد حزب اختلاف راہل گاندھی، پرینکا گاندھی واڈرا اور کئی دیگر اپوزیشن ارکان پارلیمنٹ کو حراست میں لیے جانے کے خلاف کانگریس نے ”یوم سیاہ” منایا۔

میر نے حکومت پر آئین کی توہین کرنے کا الزام عائد کرتے ہوئے جنتر منتر کی جانب مارچ کرنے کی کوشش کے دوران راہل گاندھی اور دیگر اپوزیشن رہنماؤں کے خلاف پولیس کارروائی کا حوالہ دیا۔

میر نے کہاکہ ”کل آپ سب نے دیکھا کہ کس طرح حکومت نے ایک بار پھر آئین کا قتل کیا اور اس کی توہین کی۔”

انہوں نے کہا کہ کانگریس اس دن کو اس کے خلاف احتجاج کے طور پر منا رہی ہے جسے انہوں نے ”بدعنوان اور غیر جمہوری حکومت” قرار دیا۔

میر نے حکومت پر ”غیر قانونی سرگرمیوں” میں ملوث ہونے کا بھی الزام لگایا اور کہا کہ کانگریس جمہوری اداروں کے مبینہ زوال کے خلاف عوامی حمایت متحرک کرنے کی کوشش جاری رکھے گی۔

بدھ کے روز انڈیا بلاک کے مقامی رہنماؤں نے آئین، جمہوری اداروں اور انتخابی عمل کی سالمیت کے تحفظ کے لیے اپنے اجتماعی عزم کا اعادہ کیا تھا۔

یواین آئی۔ط ا