نئی دہلی، ‘انڈیا’ اتحاد کے رہنماؤں اور اراکینِ پارلیمنٹ نے ووٹ چوری کا الزام لگاتے ہوئے چیف الیکشن کمشنر گیانیش کمار کے خلاف کارروائی، ووٹر فہرستوں کی خصوصی تفصیلی نظرثانی (ایس آئی آر) پر روک لگانے اور ‘ووٹ چوری’ کے الزامات کی تحقیقات کے مطالبات کے حق میں پیر کے روز یہاں بارہ کھمبا روڈ سے سپریم کورٹ تک مارچ نکالا، جس میں بڑی تعداد میں مظاہرین نے شرکت کی۔

اپوزیشن اتحاد ایس آئی آر کے عمل پر روک لگانے، ووٹر فہرست سے مبینہ طور پر غلط طریقے سے ہٹائے گئے ناموں کے معاملے میں مداخلت کرنے اور انتخابی نظام میں شفافیت کو یقینی بنانے کا مطالبہ کر رہا ہے۔ اتحاد کا کہنا ہے کہ حقِ رائے دہی کے تحفظ اور انتخابی عمل میں عوام کا اعتماد برقرار رکھنے کے لیے ان مسائل پر عدالتی مداخلت ضروری ہے۔

‘انڈیا’ اتحاد کے اس مارچ میں کانگریس صدر ملکارجن کھرگے، لوک سبھا میں اپوزیشن لیڈر راہل گاندھی، پارٹی کی جنرل سکریٹری پرینکا گاندھی واڈرا، سماج وادی پارٹی کے صدر اکھلیش یادو، کرناٹک کے وزیر اعلیٰ اور کانگریس رہنما ڈی کے شیو کمار، تلنگانہ کے وزیر اعلیٰ ریونت ریڈی، کانگریس رہنما سچن پائلٹ، ہماچل پردیش حکومت کے وزیر وکرمادتیہ سنگھ، راشٹریہ جنتا دل کے تیجسوی یادو، نیشنلسٹ کانگریس پارٹی (شراد پوار) کی سپریا سولے، کانگریس کے جنرل سکریٹری کے سی وینوگوپال، سماج وادی پارٹی کے رکن پارلیمنٹ دھرمیندر یادو، شیو سینا (اودھو بالاصاحب ٹھاکرے) کے اراکینِ پارلیمنٹ سنجے راؤت اور اروند ساونت، جھارکھنڈ مکتی مورچہ کی رہنما مہوا مانجھی نیز ترنمول کانگریس کی رکن پارلیمنٹ مہوا موئترا سمیت متعدد اپوزیشن رہنما شامل ہوئے۔

مارچ کے دوران اپوزیشن اراکینِ پارلیمنٹ نے چیف الیکشن کمشنر گیانیش کمار کے خلاف نعرے بازی کی اور انہیں عہدے سے ہٹانے کا مطالبہ کرتے رہے۔ مظاہرین نے ‘ووٹ چوروں’ سے اقتدار چھوڑنے کا مطالبہ کرتے ہوئے الزام لگایا کہ ووٹر فہرستوں کی نظرثانی کے عمل میں بے ضابطگیوں کی وجہ سے اہل ووٹروں کے حقوق متاثر ہو سکتے ہیں۔

مسٹر وینوگوپال نے کہا کہ یہ طاقت کا مظاہرہ نہیں بلکہ چیف الیکشن کمشنر اور انتخابی نظام کے خلاف اب تک کی سب سے بڑی تحریک ہے۔ انہوں نے الزام لگایا کہ وزیراعظم نریندر مودی اور مرکزی وزیر داخلہ امت شاہ چیف الیکشن کمشنر کا استعمال ملک کی جمہوریت کو نقصان پہنچانے کے لیے کر رہے ہیں۔ انہوں نے واضح کیا کہ اپوزیشن کی لڑائی ہندوستان کے چیف جسٹس یا سپریم کورٹ کے خلاف نہیں بلکہ چیف الیکشن کمشنر، وزیراعظم نریندر مودی اور وزیر داخلہ امت شاہ کے خلاف ہے۔ انہوں نے الزام لگایا کہ ملک کی جمہوری اقدار اور اصولوں کو کمزور کیا جا رہا ہے۔

یواین آئی ایف اے

نئی دہلی، کانگریس کے جنرل سکریٹری انچارج مواصلات جے رام رمیش نے پیر کے روز نریندر مودی حکومت پر الزام لگایا ہے کہ وہ اپنی مجوزہ حلقہ بندی قانون سازی کے لیے ضروری حمایت حاصل کرنے میں ناکام رہنے کے بعد پارلیمنٹ کے سیشن کو باقاعدہ طور پرملتوی کرنے میں تاخیر کر رہی ہے، جبکہ مان سون سیشن 13 اگست کو غیر معینہ مدت کے لیے ملتوی کیے جانے کے بعد سے 60 دنوں سے معطل نہیں کیا گیا ہے۔

سوشل میڈیا پلیٹ فارم ایکس پر ایک پوسٹ میں رمیش نے کہا کہ پارلیمانی اجلاس کے ملتوی ہونے اور اس کے باقاعدہ التوا کے درمیان کا وقفہ “بہت پہلے ہی تمام ریکارڈ توڑ چکا ہے”، جو 2015 کے مان سون سیشن کے بعد کے 28 دن کے سابقہ ریکارڈ سے بھی آگے نکل گیا ہے۔

کانگریس رہنما نے الزام لگایا کہ حکومت اپنے مجوزہ حلقہ بندی بلوں کے لیے لوک سبھا میں ضروری دو تہائی اکثریت حاصل کرنے میں ناکام رہی ہے، نیز قومی جمہوری اتحاد (این ڈی اے) کے کئی اتحادیوں کے تحفظات نے اس کی کوششوں کو مزید پیچیدہ بنا دیا ہے۔ انہوں نے کہا کہ ان میں سے کچھ اتحادی اب مجوزہ قانون سازی کی مخالفت میں زیادہ کھل کر بولنے لگے ہیں۔

رمیش نے اس پارلیمانی تعطل کو “گیانیش گیٹ” سے جوڑا، جو چیف الیکشن کمشنر گیانیش کمار کے خلاف اپوزیشن کی مہم اور الیکشن کمیشن آف انڈیا (ای سی آئی) کے کام کاج سے متعلق اس کے الزامات کا حوالہ ہے۔

رمیش نے کہا، “وزیراعظم اور وزیر داخلہ کے ناپاک ارادے اپوزیشن کے اتحاد اور یکجہتی کی وجہ سے 17 اپریل کو لوک سبھا میں بری طرح ناکام ہو گئے تھے۔” انہوں نے الزام لگایا کہ اپوزیشن نے وزیراعظم نریندر مودی اور مرکزی وزیر داخلہ امت شاہ کی جانب سے اپنے ایجنڈے کو آگے بڑھانے کی کوششوں کی سخت مزاحمت کی ہے۔ انہوں نے یہ دعویٰ بھی کیا کہ اپوزیشن کی کچھ رکن جماعتوں کو تقسیم کرنے کی کوششوں کے باوجود ان کا اتحاد برقرار رہا۔

کانگریس رہنما نے حکومت سے مطالبہ کیا کہ وہ پارلیمنٹ کے دونوں ایوانوں کوملتوی کرے اورحلقہ بندی پر ایک بامعنی کل جماعتی بات چیت کا آغاز کرے، جس میں انتخابی حلقوں کی ازسرنو حد بندی شامل ہے۔ انہوں نے دلیل دی کہ سیاسی نمائندگی پر دور رس اثرات مرتب کرنے والے اس عمل کو وسیع تر مشاورت اور جامع سیاسی تفہیم کے بغیر آگے نہیں بڑھایا جا سکتا۔

حلقہ بندی تنازع حکومت اور اپوزیشن کے درمیان ایک اہم تنازع بن کر ابھرا ہے، جس میں مجوزہ قانونی ڈھانچے، پارلیمانی نمائندگی کی تقسیم اور حلقوں کی حد بندی کے اثرات سے متعلق سوالات شامل ہیں۔ اس عمل کے لیے ضروری آئینی ترمیمات کو پارلیمانی اکثریت حاصل کرنا ہوگی، جس کی وجہ سے سیاسی اتفاقِ رائے اور حکومت کی حمایت حاصل کرنے کی صلاحیت اس کے قانون سازی کے منصوبوں کے لیے انتہائی اہم ہو گئی ہے۔

تاہم، رمیش نے اس بات پر زور دیا کہ حکومت کو پہلے الیکشن کمیشن اور انتخابی عمل کی ساکھ کے حوالے سے اپوزیشن کے خدشات کو دور کرنا چاہیے۔ کانگریس نے چیف الیکشن کمشنر گیانیش کمار سے استعفیٰ، ووٹر فہرستوں کی خصوصی تفصیلی نظرثانی (ایس آئی آر) کے عمل کو ملتوی کرنے اور انتخابی نظام پر عوام کا اعتماد بحال کرنے کے لیے اصلاحی اقدامات کا مطالبہ کیا ہے۔

انتخابی نظام کو “بہت بری طرح متاثر” کرنے کا الزام لگاتے ہوئے، رمیش نے سوال اٹھایا کہ جن پر اپوزیشن کی جانب سے اسے کمزور کرنے کا الزام لگایا گیا ہے، کیا ان سے خود اصلاحی کارروائی کی امید کی جا سکتی ہے۔ کانگریس نے الیکشن کمیشن کے ووٹر فہرستوں کی نظرثانی اور متعلقہ فیصلوں پر بار بار تشویش ظاہر کی ہے، اور یہ دلیل دی ہے کہ عدم شفافیت اور مناسب تحفظات کی کمی کی وجہ سے اہل ووٹروں کو فہرستوں سے خارج کیا جا سکتا ہے۔

دوسری طرف الیکشن کمیشن اور حکومت کا موقف ہے کہ ووٹر فہرستوں کی نظرثانی آئینی عمل کا حصہ ہے جس کا مقصد درست ووٹر فہرستوں کو یقینی بنانا ہے۔ اپوزیشن نے اس عمل میں زیادہ شفافیت، تحفظ اور جواب دہی کا مطالبہ کیا ہے۔

رمیش نے کانگریس کے اس موقف کا اعادہ کرتے ہوئے کہا، “بالآخر آئین ہی غالب آئے گا اور عوام کا عزم فتح یاب ہوگا،” کہ حکومت کو مناسب مشاورت کے بغیر آگے بڑھنے کے بجائے اپوزیشن کے خدشات کا جواب دینا چاہیے۔

اس تازہ ترین بیان نے پارلیمانی طریقہ کار، حلقہ بندی اور انتخابی ساکھ کے مسائل کو ایک مشترکہ سیاسی تصادم میں بدل دیا ہے۔ جہاں کانگریس حلقوں کی ازسرنو حد بندی پر کل جماعتی بات چیت کا دباؤ ڈال رہی ہے، وہیں اس نے یہ بھی واضح کر دیا ہے کہ الیکشن کمیشن اور ووٹر فہرستوں کی نظرثانی سے متعلق اس کے مطالبات حکومت کے خلاف اس کی وسیع تر مہم کا مرکزی حصہ ہیں۔

یواین آئی ایف اے

نئی دہلی، کانگریس کے سابق صدر اور لوک سبھا میں اپوزیشن لیڈر راہل گاندھی نے کہا ہے کہ ووٹ چوری کے خلاف ان کی عوامی تحریک رکنے والی نہیں ہے اور اپوزیشن جماعتیں مل کر اس معاملے میں لڑائی لڑیں گی اور سپریم کورٹ میں مشترکہ طور پر عرضی دائر کریں گی۔

مسٹر گاندھی نے پیر کے روز یہاں کانگریس ہیڈ کوارٹر میں منعقدہ ایک خصوصی پریس کانفرنس میں کہا کہ دہلی میں گزشتہ پانچ چھ دنوں سے انصاف کی لڑائی لڑی جا رہی ہے اور ووٹ چوری کے خلاف عوامی تحریک چلائی جا رہی ہے۔ اس تحریک کو روکنے کی کوشش کی جا رہی ہے اور لوگوں کو آنے جانے سے روکا جا رہا ہے۔ چاروں طرف پولیس تعینات کر کے دہلی کو چھاؤنی میں تبدیل کر دیا گیا ہے۔ اسی کی مخالفت میں ‘انڈیا’ اتحاد کے رہنما مارچ کر رہے ہیں۔

انہوں نے کہا کہ یہ تحریک ملک کی روح پر حملہ کرنے والوں کے خلاف ہے اور اس تحریک کے ذریعے نوجوانوں پر ظلم و ستم کیا جا رہا ہے۔ انہوں نے کہا کہ اس تحریک میں شامل نوجوانوں کو مارا پیٹا جا رہا ہے، خواتین کے ساتھ بدسلوکی کی جا رہی ہے۔ انہوں نے نوجوانوں سے اپیل کی کہ وہ انصاف ملنے تک تحریک جاری رکھیں اور آئین اور جمہوریت کی حفاظت کے لیے متحد ہو کر سب کی آواز اٹھائیں۔

مسٹر گاندھی نے الزام لگایا کہ پولیس نوجوانوں کو پٹواری ہے اور آر ایس ایس کے لوگوں کو کھلے عام گھومنے کی اجازت دی جا رہی ہے۔ انہوں نے کہا کہ حکومت کے خلاف کھڑے ہونے اور آئین کے تحفظ کی لڑائی لڑنے والوں کو روکا جا رہا ہے لیکن اپوزیشن پیچھے ہٹنے والی نہیں ہے۔

کانگریس رہنما نے الزام لگایا کہ وزیراعظم نریندر مودی، وزیر داخلہ امت شاہ اور چیف الیکشن کمشنر گیانیش کمار ووٹ چوری کروا رہے ہیں۔ انہوں نے سوال کیا کہ گیانیش کمار استعفیٰ کیوں نہیں دے رہے ہیں۔ اپوزیشن الیکشن کمیشن سے اور حکومت سے سوال کر رہی ہے اور اسی وجہ سے سوال کرنے والوں کو نشانہ بنایا جا رہا ہے۔ انہوں نے کہا کہ آئین اور جمہوریت کی حفاظت کرنا ہی ان کا دھرم ہے۔

مسٹر گاندھی نے کہا کہ یہ تحریک طویل ہو سکتی ہے اور اس میں کئی دن یا مہینے لگ سکتے ہیں لیکن اسے روکا نہیں جائے گا۔ انہوں نے کہا، “ہماری تحریک کے سامنے حکومت جھک جائے گی، اس کے افسران تھک جائیں گے اور اس کی پولیس بھی تھک جائے گی، لیکن ہماری تحریک نہیں رکے گی۔ ”

انہوں نے کہا کہ ملک کی روح اور آئین پر حملہ ہو رہا ہے اور تمام اپوزیشن جماعتیں متحد ہو کر اس کی مخالفت کریں گی۔ انہوں نے دعویٰ کیا کہ حکومت کے تقریباً 200 افسران ان کے رابطے میں ہیں اور آئین کو بچانے کی لڑائی میں ان کے ساتھ کھڑے ہیں۔

مسٹر گاندھی نے کہا کہ انہوں نے چیف جسٹس سے ملنے کا وقت مانگا تھا لیکن چیف جسٹس نے انہیں عرضی دائر کرنے کے لیے کہا ہے اور اپوزیشن جماعتیں مل کر سپریم کورٹ جائیں گی۔ انہوں نے کہا کہ یہ لڑائی ملک کے مستقبل اور آنے والی نسلوں کے لیے ہے، وہ نوجوانوں سے اپیل کرتے ہیں کہ وہ ملک میں ہونے والے واقعات کے خلاف اپنی آواز بلند کریں اور جمہوریت کے تحفظ کے لیے آگے آئیں۔ ان کا کہنا تھا کہ نوجوان انصاف ملنے تک پیچھے نہیں ہٹیں گے اور آئین کو بچانے کی لڑائی جاری رکھیں گے۔

مسٹر گاندھی نے کہا کہ ملک کے عوام کی آواز بیریکیڈ لگا کر روکی نہیں جا سکتی۔ انہوں نے کہا کہ سچائی ہی ملک کی بنیاد ہے اور اپوزیشن کی لڑائی جمہوریت اور آئین کو بچانے کے لیے ہے۔
یواین آئی ایف اے