سرینگر، جموں و کشمیر حکومت نے محکمہ محنت و روزگار کے انتظامی سکریٹری کمار راجیو رنجن کے خلاف ایک خاتون افسر کے ساتھ مبینہ بدسلوکی کے معاملے میں جمعہ کو تفصیلی انکوائری کا حکم دیا ہے۔ متاثرہ افسر جموں و کشمیر ایڈمنسٹریٹو سروس (جے کے اے ایس) کی اسسٹنٹ ڈائریکٹر، ایمپلائمنٹ، گاندربل ہیں۔

محکمہ جنرل ایڈمنسٹریشن کی جانب سے جاری حکم نامے کے مطابق، حکومت کے محکمہ ہاؤسنگ اینڈ اربن ڈیولپمنٹ کی کمشنر و سکریٹری مندیپ کور کو معاملے کی تحقیقات کے لیے انکوائری افسر مقرر کیا گیا ہے۔ یہ معاملہ پرنٹ اور الیکٹرانک میڈیا میں سامنے آیا تھا۔

حکومت نے انکوائری افسر کو ہدایت دی ہے کہ وہ حکم نامہ جاری ہونے کی تاریخ سے 15 دن کے اندر اپنی رپورٹ پیش کریں۔

حکم نامے میں مزید کہا گیا ہے کہ محکمہ جنرل ایڈمنسٹریشن میں حکومت کے ایڈیشنل سکریٹری امیت ورمانی، جو جے کے اے ایس افسر ہیں، اس معاملے میں پیش کرنے والے افسر (پریزنٹنگ آفیسر) کے طور پر خدمات انجام دیں گے۔

یہ حکم محکمہ جنرل ایڈمنسٹریشن کے آل انڈیا سروسز سیکشن کی جانب سے جاری کیا گیا ہے، جس پر حکومت کے کمشنر و سکریٹری ایم راجو کے دستخط ہیں۔

یہ تنازع اس وقت شروع ہوا جب سوشل میڈیا پر ایک ویڈیو وائرل ہوئی، جس میں مبینہ طور پر 2010 بیچ کے آئی اے ایس افسر راجیو رنجن کو مشن یوتھ اپ لفٹمنٹ اینڈ وائبرنٹ ایڈوانسمنٹ (یووا) کے جائزہ اجلاس کے دوران جے کے اے ایس کی خاتون افسر بینش وانی کے ساتھ مبینہ طور پر نازیبا زبان استعمال کرتے ہوئے دکھایا گیا ہے۔ راجیو رنجن اس وقت محکمہ محنت و روزگار کے انتظامی سکریٹری کے طور پر خدمات انجام دے رہے ہیں۔

سوشل میڈیا پر وائرل ہونے والی مبینہ ویڈیو میں رنجن کو آن لائن اجلاس کے دوران غصے میں آتے اور وانی کو مبینہ طور پر ”بلڈی شٹ” کہتے ہوئے سنا جا سکتا ہے۔ وہ مبینہ طور پر یہ بھی کہتے ہیں کہ وہ ان سے ”ہمیشہ اسی طرح بات کر سکتے ہیں”۔ ویڈیو میں آئی اے ایس افسر کو اپنے چیمبر میں موجود عہدیداروں کو فوری طور پر خاتون افسر کی معطلی کا حکم تیار کرنے کی ہدایت دیتے ہوئے بھی دکھایا گیا ہے۔

تاہم، رنجن کے انتظامی کنٹرول میں کام کرنے والے محکمہ محنت و روزگار نے وائرل ویڈیو کلپ کی صداقت پر سوال اٹھائے ہیں۔

اس سے قبل جمعہ کو جموں و کشمیر کے وزیر اعلیٰ عمر عبداللہ نے کہا کہ بادی النظر میں سینئر افسر کا طرزِ عمل ایک سینئر آئی اے ایس افسر سے متوقع معیار کے مطابق نہیں تھا۔ انہوں نے کہا کہ اس کے بعد ایک جونیئر جے کے اے ایس افسر کو دی جانے والی دھمکیوں نے معاملے کو مزید سنگین بنا دیا ہے۔

عمر عبداللہ نے سوشل میڈیا پلیٹ فارم ‘ایکس’ پر لکھاکہ ”میں نے یہ معاملہ چیف سکریٹری کے ساتھ انتہائی سختی سے اٹھایا ہے۔ بدقسمتی سے مرکز کے زیر انتظام علاقے میں آئی اے ایس افسران پر اختیار لوک بھون کا ہے، تاہم وزیر اعلیٰ کی حیثیت سے میں نے چیف سکریٹری کو ہدایت دی ہے کہ اس بات کو یقینی بنایا جائے کہ جے کے اے ایس خاتون افسر کو انتقامی کارروائی کا سامنا نہ کرنا پڑے۔”

انہوں نے کہا کہ اگر جموں و کشمیر ایک مکمل ریاست ہوتا تو نوجوان جے کے اے ایس خاتون افسر کو مبینہ طور پر گالیاں دینے والے آئی اے ایس افسر کو انکوائری مکمل ہونے تک محکمہ جنرل ایڈمنسٹریشن سے منسلک کر دیا جاتا۔

عمر عبداللہ نے مزید کہاکہ ”مرکز کے زیر انتظام علاقے کی حیثیت سے ہم ان حکام سے توقع کرتے ہیں جن کے پاس آئی اے ایس افسران پر اختیار ہے کہ وہ ایک درست مثال قائم کریں اور اس بات کو یقینی بنائیں کہ گالی گلوچ اور دھمکی آمیز رویے کو نظرانداز نہ کیا جائے۔”

یواین آئی۔ ط ا

سرینگر، لداخ کے لیفٹیننٹ گورنر ونے کمار سکسینہ نے جمعہ کو سانکو ضلع کے قیام کا اعلان کرتے ہوئے اسے علاقے کے عوام کی دیرینہ خواہش کی تکمیل قرار دیا۔

سوشل میڈیا پلیٹ فارم ایکس پر ایک پوسٹ میں سکسینہ نے کہا کہ یہ فیصلہ وزیر اعظم نریندر مودی اور مرکزی وزیر داخلہ امیت شاہ کے ”سب کا ساتھ، سب کا وکاس” کے وژن کے عین مطابق ہے۔

لیفٹیننٹ گورنر نے کہاکہ ”یہ علاقے کے عوام کی دیرینہ خواہش کی تکمیل ہے۔”

سانکو ضلع کے قیام کے ساتھ ہی لداخ میں اضلاع کی تعداد موجودہ سات سے بڑھ کر آٹھ ہو جائے گی۔
لیفٹیننٹ گورنر نے اس مطالبے کو حقیقت کا روپ دینے میں انجمن صاحب زمان کے تعمیری کردار اور اس کے سرپرست اعلیٰ سید محمد رضوی، جو عام طور پر آغا میگی اوتھ کے نام سے مشہور ہیں اور چیئرمین شیخ صادق بلاغی کی کوششوں کو سراہا۔

سکسینہ نے ضلع کے قیام میں کرگل کے چیف ایگزیکٹیو کونسلر ڈاکٹر جعفر اخون، لداخ کی رکن پارلیمنٹ حنیفہ جان اور لیہ کے سابق چیف ایگزیکٹیو کونسلر تاشی گیلسن کی خدمات کا بھی اعتراف کیا۔

انہوں نے اس مقصد کے حصول کے لیے کام کرنے والے تمام افراد کو مبارک باد دی۔

یہ اعلان لداخ کے ضلعی انتظامی ڈھانچے میں توسیع کے تناظر میں کیا گیا ہے۔ سال 2024 میں مرکزی حکومت نے مرکز کے زیر انتظام علاقے لداخ میں پانچ نئے اضلاع کے قیام کو منظوری دی تھی۔ ان پانچ اضلاع کے قیام کا باضابطہ نوٹیفکیشن 27 اپریل کو جاری کیا گیا تھا۔

یواین آئی۔ ط ا

سرینگر، جموں و کشمیر کے وزیر اعلیٰ عمر عبداللہ نے ایک سرکاری آن لائن اجلاس کے دوران سینئر آئی اے ایس افسر کی جانب سے جموں و کشمیر ایڈمنسٹریٹیو سروس (جے کے اے ایس) کی ایک خاتون افسر کے ساتھ مبینہ بدسلوکی کا سخت نوٹ لیا ہے۔ انہوں نے چیف سکریٹری کو خط لکھ کر اس بات کو یقینی بنانے کی ہدایت دی ہے کہ متعلقہ خاتون افسر کو اس معاملے کی وجہ سے کسی قسم کی انتقامی کارروائی کا سامنا نہ کرنا پڑے۔

نیشنل کانفرنس کے چیف ترجمان تنویر صادق نے اس بات پر زور دیا کہ جواب دہی کو یقینی بنایا جانا چاہیے اور کسی کو بھی اپنے عہدے کا ناجائز استعمال کرتے ہوئے دوسروں کو دھمکانے یا انہیں نشانہ بنانے کی اجازت نہیں دی جانی چاہیے۔

صادق نے سوشل میڈیا پلیٹ فارم ایکس پر کہاکہ ”وزیر اعلیٰ عمر عبداللہ نے اس معاملے کا سخت نوٹ لیا ہے اور چیف سکریٹری کو خط لکھ کر اس بات کو یقینی بنانے کے لیے کہا ہے کہ جے کے اے ایس افسر کو کسی قسم کی انتقامی کارروائی کا سامنا نہ کرنا پڑے۔ جواب دہی ضروری ہے اور کسی کو بھی اپنے عہدے کا ناجائز استعمال کرتے ہوئے دوسروں کو دھمکانے یا انہیں نشانہ بنانے کی اجازت نہیں دی جانی چاہیے۔”

یہ تنازع اس وقت شروع ہوا جب سوشل میڈیا پر ایک ویڈیو وائرل ہوئی، جس میں مبینہ طور پر 2010 بیچ کے آئی اے ایس افسر کمار راجیو رنجن کو ایک خاتون افسر کے ساتھ نازیبا زبان استعمال کرتے ہوئے دکھایا گیا ہے۔ راجیو رنجن اس وقت محکمہ محنت و روزگار کے انتظامی سکریٹری کے طور پر خدمات انجام دے رہے ہیں۔ ویڈیو میں مبینہ طور پر انہیں مشن یوتھ اپ لفٹمنٹ اینڈ وائبرنٹ ایڈوانسمنٹ (یووا) کے جائزہ اجلاس کے دوران گاندربل میں تعینات اسسٹنٹ ڈائریکٹر، ایمپلائمنٹ اینڈ کاؤنسلنگ بینش وانی کے ساتھ بدسلوکی کرتے ہوئے دیکھا جا سکتا ہے۔

سوشل میڈیا پر وائرل ہونے والی مبینہ ویڈیو میں رنجن کو آن لائن اجلاس کے دوران اپنا غصہ کھوتے ہوئے اور بینش وانی کے لیے انتہائی توہین آمیز الفاظ استعمال کرتے ہوئے سنا جا سکتا ہے۔ وہ مبینہ طور پر یہ کہتے بھی دکھائی دیتے ہیں کہ وہ ان سے ہمیشہ اسی طرح بات کر سکتے ہیں۔ ویڈیو میں آئی اے ایس افسر اپنے دفتر میں موجود عہدیداروں کو فوری طور پر خاتون افسر کی معطلی کا حکم تیار کرنے کی ہدایت دیتے ہوئے بھی نظر آتے ہیں۔

تاہم، رنجن کی انتظامی نگرانی میں کام کرنے والے محکمہ محنت و روزگار نے سوشل میڈیا پر وائرل ہونے والی ویڈیو کلپ کی صداقت پر سوال اٹھایا ہے۔

نیشنل کانفرنس کے ترجمان صادق نے کہا کہ یہ واقعہ جموں و کشمیر کو مکمل ریاست کا درجہ بحال کرنے کی اہمیت کو بھی اجاگر کرتا ہے۔

انہوں نے کہاکہ ”اگر جموں و کشمیر کو مکمل ریاست کا درجہ حاصل ہوتا تو کمار راجیو رنجن کے خلاف ان کے طرز عمل کی باضابطہ تحقیقات مکمل ہونے تک انہیں جنرل ایڈمنسٹریشن ڈپارٹمنٹ (جی اے ڈی) کے ساتھ منسلک کر دیا جاتا۔” صادق نے استدلال کیا کہ انتظامیہ میں جواب دہی کو مضبوط بنانے کے لیے ریاستی درجے کی بحالی ضروری ہے۔

انہوں نے الزام لگایا کہ بااثر عہدیدار بدستور جموں و کشمیر کو مکمل ریاست کا درجہ دینے کے مطالبے کو کمزور کرنے کی کوشش کر رہے ہیں۔ انہوں نے اس بات کا اعادہ کیا کہ بااختیار عہدوں پر فائز افراد کو اپنے طرز عمل کے لیے جواب دہ ہونا چاہیے۔

دریں اثنا، اسی اجلاس کی ایک اور ویڈیو کلپ بھی سامنے آئی ہے، جس میں ایک آئی اے ایس افسر کے مبینہ بیان نے جموں و کشمیر میں سول سروس میں بھرتی کے عمل کی شفافیت پر سوالات کھڑے کر دیے ہیں۔ ویڈیو میں مذکورہ افسر کو مبینہ طور پر یہ کہتے ہوئے سنا جا سکتا ہے کہ بعض امیدوار ان کے بقول ”سیٹنگ” کے طریقے سے سرکاری خدمات میں داخل ہوتے ہیں۔

یواین آئی۔ ظ ا