نئی دہلی، کاکروچ جنتا پارٹی (سی جے پی) کے بانی ابھیجیت دپکے کو ہفتے کی شام خصوصی ایگزیکٹو مجسٹریٹ نے کچھ شرائط پر ضمانت پر رہا کرنے کا حکم دیا۔

انہیں یہاں کناٹ پلیس میں منعقدہ ‘لہرا دو ترنگا’ مارچ کی کال کے دوران جمعہ کے روز انسدادی دفعات کے تحت گرفتار کیا گیا تھا۔ اس مارچ سے پہلے حراست میں لیے گئے مسٹر دپکے کے خلاف بھارتیہ ناگرک سرکشا سنہتا (بی این ایس ایس) کی دفعہ 126/170 کے تحت کارروائی شروع کی گئی تھی۔

مسٹر دپکے کے علاوہ آل انڈیا اسٹوڈنٹس ایسوسی ایشن (آئیسا) کی صدر نیہا بورا کو بھی ہفتے کے روزعلی الصبح رہا کر دیا گیا۔ پولیس کے مطابق محترمہ بورا کو دہلی پولیس ایکٹ کی دفعہ 65 کے تحت ضابطے کی کارروائی کے بعد رہا کیا گیا۔

اس سے قبل جمعہ کو سی جے پی نے دعویٰ کیا تھا کہ مسٹر دپکے کو کسی نامعلوم مقام پر لے جایا گیا تھا۔

تنظیم کے قومی آرگنائزنگ انچارج اجنکیہ شندے نے جمعہ کی دیر رات کہا تھا کہ انہیں حراست میں لیے جانے کے آٹھ گھنٹے سے زائد وقت گزرنے کے بعد بھی ان کے جائے وقوع کا علم نہیں تھا اور انہیں وکیل یا پارٹی ٹیم سے بات کرنے کی اجازت نہیں دی جا رہی تھی۔

پولیس نے بتایا کہ امن و امان برقرار رکھنے اور ٹریفک کی ہموار نقل و حمل کو یقینی بنانے کے لیے جمعہ کے روز تقریباً 150 افراد کو حراست میں لیا گیا تھا۔

سی جے پی کے شریک-کنوینر سوربھ داس اور آشوتوش رانکا پہلے ہی سے پانچ دن کی عدالتی تحویل میں ہیں۔

مسٹر داس، مسٹر رانکا اور 12 دیگر افراد کو منگل (13 اکتوبر) کی صبح جنتر منتر کے بند گیٹ پر چڑھ کر احاطے میں داخل ہونے کے بعد حراست میں لیا گیا تھا۔ جنتر منتر کو حال ہی میں احتجاج کے لیے نامزد مقامات کی فہرست سے باہر کر دیا گیا تھا۔ بعد میں سی جے پی کے اجنکیہ شندے اور 11 دیگر افراد کو رہا کر دیا گیا تھا۔

یو این آئی ایف اے

نئی دہلی، کانگریس نے الزام لگایا ہے کہ مردم شماری 2027 کے درمیان شمار کنندگان کی اہلیت میں توسیع، بیلگام میں آر ایس ایس کا مردم شماری سے متعلق تربیتی کیمپ اور ڈیموگرافک یاآبادیاتی تبدیلیوں پر مرکزی حکومت کی اعلیٰ سطحی کمیٹی کی سرگرمیاں کئی سوالات کھڑے کرتی ہیں۔

کانگریس کے شعبۂ مواصلات کے انچارج جے رام رمیش نے ہفتے کے روز سوشل میڈیا پلیٹ فارم ‘ایکس’ پر کہا کہ آر ایس ایس نے بیلگام میں 10 سے 12 جولائی تک مردم شماری 2027 کےتعلق سے ایک تربیتی کیمپ منعقد کیا تھا۔ اس کے بعد مرکزی حکومت نے شمار کنندگان کے لیے اہلیت کا دائرہ بڑھایا ہے۔

انہوں نے سوال اٹھایا کہ ان واقعات کو الگ الگ کر کے نہیں دیکھا جا سکتا اور الزام لگایا کہ اہلیت میں یہ توسیع آر ایس ایس اور بی جے پی سے وابستہ ہزاروں کارکنوں کے لیے روزگار کی فراہمی کی ایک مشق ہو سکتی ہے۔

مسٹر رمیش نے 26 مئی کو تشکیل دی گئی آبادیاتی تبدیلیوں پر اعلیٰ سطحی کمیٹی اور 14 اکتوبر کو اس کی جانب سے تجاویز طلب کیے جانے کا بھی ذکر کیا۔ انہوں نے اندیشہ ظاہر کیا کہ ان پیش رفت کا اثر مردم شماری کی غیر جانبدارانہ شفافیت پر پڑ سکتا ہے۔

یو این آئی ایف اے

نئی دہلی، ‘گلوبل ٹریڈ اینڈ ٹیکنالوجی کونسل (انڈیا)’ (جی ٹی ٹی سی آئی) نے ‘شری دھرمک لیلا کمیٹی’ کے اشتراک سے، نئی دہلی میں تاریخی لال قلعے کے احاطے میں واقع مادھو داس پارک میں ‘عالمی یومِ خوراک 2026’ منایا۔ اس تقریب کا بنیادی مقصد غذائی تحفظ، خوراک کی حفاظت اور سب کے لیے محفوظ اور غذائیت سے بھرپور خوراک کی دستیابی کو یقینی بنانے کی اہمیت کے بارے میں بیداری پیدا کرنا تھا۔ اس تقریب نے ممتاز سفارت کاروں، بین الاقوامی نمائندوں اور منتظم کمیٹیوں کے اراکین کو ایک ہی پلیٹ فارم پر اکٹھا کیا۔ انہوں نے خوراک سے متعلق چیلنجوں سے نمٹنے کے لیے عالمی تعاون کی اہمیت پر زور دیا۔ یہ اقدام بین الاقوامی اہمیت کے حامل مسائل کے بارے میں بیداری پیدا کرنے میں ہندوستان کی بھرپور ثقافتی روایات کے کردار کو بھی اجاگر کرتا ہے۔

‘شری دھرمک لیلا کمیٹی’ جو گزشتہ 103 سالوں سے تاریخی لال قلعے میں روایتی ‘رام لیلا’ کا اہتمام کرتی آ رہی ہے – نے اس موقع کے لیے ایک بامعنی ثقافتی پلیٹ فارم فراہم کیا۔ ‘عالمی یومِ خوراک’ کے پیغام کو ہندوستان کی ایک دیرینہ ثقافتی روایت سے جوڑ کر، اس اقدام نے یہ واضح کیا کہ کس طرح ثقافتی ورثہ، عوامی شمولیت اور بین الاقوامی تعاون، غذائی تحفظ کے بارے میں عوامی شعور بیدار کرنے اور اجتماعی ذمہ داری کے احساس کو فروغ دینے میں معاون ثابت ہو سکتے ہیں۔ ‘شری دھرمک لیلا کمیٹی’ کے جنرل سکریٹری شری دھیرج دھر گپتا اور جی ٹی ٹی سی آئی (GTTCI) کے بانی صدر ڈاکٹر گورو گپتا نے تقریب میں موجود سفارت کاروں اور معزز مہمانوں کا استقبال اور اعزاز کیا۔ مہمانوں کے سامنے ایک ایسا پیغام پیش کیا گیا جس میں حکومتوں، اداروں، برادریوں اور افراد کی اس اجتماعی ذمہ داری پر زور دیا گیا کہ وہ غذائی تحفظ کو فروغ دیں اور ایک ایسے مستقبل کی جانب کام کریں جہاں ہر شخص کو محفوظ اور غذائیت سے بھرپور خوراک تک رسائی حاصل ہو۔ اس تقریب میں جمہوریہ چاڈ کے سفیر، یونین آف کوموروس کے اعزازی قونصل جنرل، چین، یونان، نائجر اور نکاراگوا کے سفارت خانوں کے سفارت کاروں کے ساتھ ساتھ ہندوستان میں یونیسکو کے ڈائریکٹر ڈاکٹر بینو بوئر نے شرکت کی۔

انڈیا ہیبی ٹیٹ سینٹر کے ڈائریکٹر پروفیسر کے جی سریش بھی اس موقع پر موجود تھے۔ ایتھوپیا، ایران اور زیمبیا سے تعلق رکھنے والے تارکینِ وطن برادریوں کے ارکان نے بھی اس تقریب میں حصہ لیا، جس سے اس کی بین الاقوامی حیثیت مزید مستحکم ہوئی اور یہ سب کے لیے ‘غذائی تحفظ’ کے مشترکہ مقصد پر مبنی عالمی یکجہتی اور ثقافتوں کے مابین رابطے کی عکاسی کرتا ہے۔ ‘شری دھرمک لیلا کمیٹی’ کے سیکرٹری پردیپ شرن نے کمیٹی کے دیگر ارکان کے ہمراہ معزز مہمانوں کا اعزاز کیا اور شریک سفارتی نمائندوں کا خیرمقدم کیا۔ ان کی موجودگی کمیٹی کے اس عزم کی عکاسی کرتی ہے کہ وہ نہ صرف بھارت کے ثقافتی ورثے کو محفوظ رکھنے کے لیے کوشاں ہے، بلکہ عصری عالمی مسائل پر بامعنی مکالمے کو فروغ دینے کے لیے بھی پرعزم ہے۔

جی ٹی ٹی سی آئی کے بورڈ ممبران، جناب کپل کھنڈیلوال اورمسٹر سمیت ورما نے بھی اس تقریب میں شرکت کی۔ انہوں نے بین الاقوامی تعاون کو فروغ دینے اور مشترکہ عالمی ترجیحات کو آگے بڑھانے کے لیے سفارتی مشنز، صنعتی رہنماؤں اور ثقافتی اداروں کو ایک پلیٹ فارم پر اکٹھا کرنے کے اپنے ادارے کے عزم کا اعادہ کیا۔ ‘عالمی یومِ خوراک’ جو ہر سال 16 اکتوبر کو منایا جاتا ہے، ہمیں غذائی نظاموں کو مضبوط بنانے، غذائی تحفظ کو بہتر بنانے، غذائی عدم تحفظ کو کم کرنے، اور خوراک کی پیداوار و تقسیم کے لیے پائیدار طریقے اپنانے کی اہمیت کی یاد دلاتا ہے۔ لال قلعہ کے میدان میں منعقدہ اس تقریب نے ان اہداف کے حصول کے لیے اجتماعی کوششوں اور بین الاقوامی تعاون کی اہمیت کو اجاگر کیا۔ اس مشترکہ اقدام کے ذریعے، جی ٹی ٹی سی آئی اور ‘شری دھرمک لیلا کمیٹی’ نے یہ دکھایا کہ کس طرح بھارت کے ثقافتی پلیٹ فارمز عالمی ترقیاتی ترجیحات کے بارے میں بیداری پیدا کرنے کا ذریعہ بن سکتے ہیں۔ اس تقریب میں بھارتی روایات کی لازوال اقدار کو یکجہتی کے عالمی پیغام کے ساتھ ہم آہنگ کیا گیا۔ اس نے مختلف اقوام اور برادریوں کے لوگوں کو ایک ساتھ مل کر ایسی دنیا تعمیر کرنے کی ترغیب دی جہاں ہر فرد کو محفوظ، غذائیت سے بھرپور اور کافی مقدار میں خوراک تک رسائی حاصل ہو۔ یہ تقریب اس مشترکہ عزم کے ساتھ اختتام پذیر ہوئی کہ بیداری پیدا کی جائے، بین الاقوامی افہام و تفہیم کو مضبوط کیا جائے، اور سب کے لیے غذائی تحفظ کے مشترکہ مقصد کو آگے بڑھایا جائے۔

یو این آئی۔ ظ ا۔ م الف