سری نگر، پیپلز ڈیموکریٹک پارٹی (پی ڈی پی) کی صدر محبوبہ مفتی نے مرکزی وزیر داخلہ امیت شاہ سے اپیل کی ہے کہ وہ جموں و کشمیر کے ثقافتی شعبے کی بحالی اور اسے مضبوط بنانے کے لیے مداخلت کریں۔

انہوں نے دوردرشن اور آکاشوانی، بالخصوص ڈی ڈی کشمیر پر مقامی پروگراموں کی نشریات کے لیے مختص فنڈز فراہم کرنے اور مشکلات سے دوچار خطے کے فن کاروں کو مسلسل ادارہ جاتی تعاون دینے کا مطالبہ کیا ہے۔

امیت شاہ کو لکھے گئے خط میں محبوبہ مفتی نے زور دیا کہ جموں و کشمیر کے فن کار، موسیقار، ادیب، فلم ساز اور ثقافتی شعبے سے وابستہ افراد محض فن کا مظاہرہ کرنے والے نہیں، بلکہ خطے کے مالا مال ثقافتی ورثے کے محافظ اور ثقافتی سفیر بھی ہیں۔ انہوں نے کہا کہ یہ افراد ہندوستان کی مشترکہ تہذیبی شناخت، امن اور قومی یکجہتی کے فروغ میں اہم کردار ادا کرتے ہیں۔

محبوبہ مفتی نے مطالبہ کیا کہ ڈی ڈی کاشیر اور آکاشوانی کے مراکز کو مناسب اور مخصوص فنڈز فراہم کیے جائیں، تاکہ وہ مقامی زبانوں، لوک روایات، موسیقی، ادب، تھیٹر اور سنیما پر مبنی معیاری پروگرام باقاعدگی سے تیار کرکے نشر کرسکیں۔

فن کاروں کو باعزت اور پائیدار روزگار فراہم کرنے کی ضرورت پر زور دیتے ہوئے انہوں نے مرکزی وزارتِ ثقافت اور دیگر مرکزی ثقافتی اداروں سے بھی اپیل کی کہ مقامی فن کاروں کے لیے خصوصی پروگرام اور مالی اقدامات متعارف کرائے جائیں، تاکہ انہیں مستقل بنیادوں پر اپنی صلاحیتوں کے اظہار کے مواقع حاصل ہوسکیں۔

محبوبہ مفتی نے اپنے خط میں لکھاکہ ”ہمارے فن کاروں کی مدد کرنا اور ثقافتی اداروں کو مضبوط بنانا محض ایک ثقافتی ذمہ داری نہیں، بلکہ ہندوستان کی ثقافتی وحدت، قومی یکجہتی اور ہمارے مالا مال تہذیبی ورثے کے تحفظ میں سرمایہ کاری ہے۔”

محبوبہ مفتی نے اس خط کی نقول مرکزی وزرائے اطلاعات و نشریات اور ثقافت کو بھی روانہ کی ہیں۔ انہوں نے ان سے مشترکہ طور پر مداخلت کرنے کی اپیل کی، تاکہ ثقافتی اداروں کو مستحکم بنایا جاسکے اور جموں و کشمیر کے فن کاروں کو وہ شناخت، وسائل اور پلیٹ فارم فراہم کیے جاسکیں جن کے وہ مستحق ہیں۔

یواین آئی۔ ظ ا

سری نگر، نیشنل کانفرنس کے صدر فاروق عبداللہ نے پیر کو کہا کہ جموں و کشمیر کی وزارتی کونسل میں توسیع لیفٹیننٹ گورنر منوج سنہا کی واپسی کے بعد کی جائے گی۔

فاروق عبداللہ نے ضلع بڈگام میں صحافیوں سے بات کرتے ہوئے کہاکہ ”لیفٹیننٹ گورنر کی طبیعت ٹھیک نہیں تھی اور وہ بیمار تھے۔ جب وہ واپس آئیں گے تو حکومت میں توسیع کی جائے گی۔”

ان کا یہ بیان وزیر اعلیٰ عمر عبداللہ کی وزارتی کونسل میں طویل عرصے سے زیر التوا توسیع کے بارے میں جاری قیاس آرائیوں کے درمیان سامنے آیا ہے۔ نیشنل کانفرنس کی قیادت والی حکومت نے 16 اکتوبر کو اپنے دو سال مکمل کرلیے ہیں۔

اکتوبر 2024 میں اقتدار سنبھالنے والی حکومت نے اب تک کابینہ میں ردوبدل نہیں کیا ہے اور مجوزہ توسیع سیاسی حلقوں میں بحث کا موضوع بنی ہوئی ہے۔

اس دوران، نائب وزیر اعلیٰ سریندر چودھری نے حال ہی میں حکومت میں وزرا کے استعفوں سے متعلق قیاس آرائیوں کو مسترد کرتے ہوئے واضح کیا تھا کہ کسی بھی وزیر نے استعفیٰ نہیں دیا ہے۔

انہوں نے جموں میں صحافیوں سے کہا تھاکہ ”کسی وزیر نے استعفیٰ پیش نہیں کیا ہے۔”

نیشنل کانفرنس کی انتخابی اتحادی جماعت کانگریس بھی کابینہ میں توسیع سے متعلق بحث کا اہم حصہ رہی ہے۔

اگرچہ نیشنل کانفرنس نے کانگریس کو کابینہ میں ایک عہدہ دینے کی پیشکش کی تھی، لیکن پارٹی نے حکومت میں شامل ہونے سے انکار کردیا۔ کانگریس نے جموں و کشمیر کو مکمل ریاست کا درجہ بحال ہونے تک حکومت کو باہر سے حمایت دینے کا فیصلہ کیا ہے۔

اس سے قبل 7 اکتوبر کو عمر عبداللہ نے کہا تھا کہ اپنے والد اور نیشنل کانفرنس کے صدر فاروق عبداللہ سے مشاورت کے بعد وزارتی کونسل میں توسیع کے بارے میں جلد فیصلہ کیے جانے کا امکان ہے۔

یواین آئی۔ ظ ا

جموں، جموں و کشمیر پولیس نے ایک بڑی کامیابی حاصل کرتے ہوئے ضلع کشتواڑ میں لاپتہ ہونے والے اسپیشل پولیس آفیسر (ایس پی او) کے قتل کا معاملہ حل کرلیا اور اس سلسلے میں دو افراد کو گرفتار کیا ہے۔

پولیس کے ایک ترجمان نے اتوار کو یہاں بتایا کہ ایس پی او بشیر احمد کے اہل خانہ نے 15 اکتوبر کو پولیس چوکی تریگام سے ان کے سرکاری ہتھیار سمیت لاپتہ ہونے کی اطلاع دی تھی۔ اطلاع ملنے کے بعد متعدد پولیس ٹیموں پر مشتمل ایک وسیع تلاشی مہم شروع کی گئی۔

ترجمان نے کہاکہ ”اگلے روز تلاشی مہم کے دوران پولیس نے پہلے ایس پی او کا ہتھیار برآمد کیا اور اس کے بعد تریگام کے جنگلاتی علاقے میں واقع سیران وانی کے مقام پر ایک نالے میں گڑھے سے ان کی لاش برآمد کی، جسے وہاں دفن کیا گیا تھا۔”

انہوں نے مزید بتایا کہ لاش ملنے کے بعد کشتواڑ پولیس اسٹیشن میں متعلقہ قانونی دفعات کے تحت مقدمہ درج کیا گیا۔

تحقیقات کے دوران دو مشتبہ افراد کی شناخت بشیر احمد ڈار اور نذیر احمد ڈار کے طور پر کی گئی۔ دونوں سیران وانی، تریگام کے رہنے والے ہیں۔ ان سے پوچھ گچھ کے دوران ایس پی او کے قتل کی سازش اور اس کے محرکات کا انکشاف ہوا۔

پولیس ترجمان نے کہا کہ ملزمین کی جانب سے فراہم کردہ معلومات کی بنیاد پر واردات میں استعمال ہونے والا ہتھیار اور مقتول کا چھپایا گیا سامان بھی برآمد کرلیا گیا ہے۔

انہوں نے بتایا کہ معاملے میں مزید قانونی کارروائی جاری ہے۔

ضلع کشتواڑ پولیس نے اس عزم کا اعادہ کیا کہ وہ علاقے میں امن و قانون برقرار رکھنے اور مجرموں کو انصاف کے کٹہرے میں لانے کے لیے پرعزم ہے۔

یواین آئی۔ ظ ا