خبراردو:

مشترکہ مزاحمتی قیادت نے بھارتی تفتیشی ایجنسی این آئی اے اور ایس او جی کی جانب سے کچھ عرصہ قبل پوچھ تاچھ کی غرض سے حراست میں لئے گئے اونتی پورہ کے نوجوان رضوان اسعد پنڈت کی تفتیش کے دوران المناک موت پر شدید ردعمل کا اظہار کرتے ہوئے اس کھلی سرکاری دہشت گردی کی بھر پور مذمت کی ہے۔مذکورہ نوجوان جو پیشے سے ایک استاد تھا کو چند روز قبل حراست میں لیا گیا تھا اور دوران تفتیش اس کو شدید جسمانی اذیتوں سے گذارا گیا جس سے وہ جانبر نہ ہوسکا۔

مشترکہ قیادت نےنوجوان رضوان احمد پنڈت کو شاندار الفاظ میں خراج عقیدت ادا کرتے ہوئے کہا کہ موصوف کی زیر حراست ہلاکت کا سانحہ کوئی کشمیر میں اس نوعیت کا اکیلا واقعہ نہیں ہے بلکہ اس سے قبل بھی سرکاری فورسز کی حراست میں کئی کشمیری نوجوانوں کو شہادت کے درجے پر فائز کیا گیا ہے جس سے اُن لاتعداد زیر حراست مزاحمتی ،سیاسی قائدین اور کارکنوں کی سلامتی کے بارے میں شدید خدشات پیدا ہو گئے ہیں جو کشمیر اور بیرون کشمیر کی جیلوں میں مقید ہیں۔قیادت نے این آئی اے اور ایس او جی کی جانب سے کی جانے والی اس حراستی کیخلاف 20؍ مارچ2019بروز بدھوار‘ کو پورے جموں کشمیر میں ہمہ گیر احتجاجی ہڑتال، جمعرات21 مارچ کو زندگی کے تمام مکاتب فکر بشمول تاجر برادری، وکلاء، سول سوسائٹی اور جملہ شعبہ ہائے زندگی سے تعلق رکھنے والے لوگوں سے اس قتل ناحق کیخلاف بھر پور احتجاج کرنے کی اپیل کی ہے جبکہ22مارچ جمعتہ المبارک کو کشمیر کی تمام چھوٹی بڑی مساجد، آستانوں، خانقاہوں،اور امام باڑوں میں اس قتل ناحق،سرکاری سطح پر خوف و دہشت کا ماحول برپا کرنے، ایس او جی اور این آئی اے کی جانب سے مزاحمتی قائدین، کارکنوں اور معزز شہریوں اور نوجوانوں کیخلاف خوفناک مہم جوئی کیخلاف بھر پورصدائے احتجاج بلندکیا جائیگا۔

قیادت نے کہاکہ کشمیر میں جاری ریاستی دہشت گردی سے اب کوئی بھی فرد بشر محفوظ نہیں رہا ہے۔ ایک طرف بدنام زمانہ SOG کی جانب یہاں کے سیاسی کارکنوں کو ایس او جی کیمپوں اور تھانوں میں بلا کر شدید طور ہراساں کیا جا رہا ہے اور دوسری طرف این آئی اے اور انفورسمنٹ ڈائریکٹوریٹ کی آڑ میں یہاں کی مزاحمتی قیادت اور سیاسی کارکنوں کو من گھڑت اور فرضی کیسوں اور الزامات کے تحت گرفتار کرنے اور انہیں ہراساں و پریشان کرنے کی خوفناک مہم شروع کی گئی ہے۔قائدین نے کہا کہ مزاحمتی قیادت ہو یا سیاسی کارکن، بزرگ دینی شخصیات ہوںیا دینی جماعتیں یا مساجد کے اِمام صاحبان ، عام نوجوانوں ،طلباء غرض ہر ایک مکتبہ فکر سے وابستہ لوگوں کو خوف و دہشت کے عالم میں زندگی گزارنے پر مجبور کیا جارہا ہے اور شہر و گام گرفتاریوں اور ہراسانیوں کا ایک لامتناہی سلسلہ شروع کیا گیا ہے اور پورے کشمیر کو ایک پولیس ا سٹیٹ میں تبدیل کرکے رکھ دیا گیا ہے۔ قائدین نے کہا کہ کشمیری عوام کو ہر سطح پر آج جس طرح شدید طور ریاستی دہشت گردی کا سامنا کرنا پڑ رہا ہے وہ کشمیری عوام کے تئیں حکومت ہندوستان کے خوفناک منصوبوں اور عزائم کو ظاہر کررہا ہے۔قائدین نے عوام سے اپیل کی کہ وہ تاریخ اور تحریک کے اس نازک مرحلے پرہر سطح پر بھر پوراتحاد و یکجہتی کا مظاہرہ کریں اور ہزاروں شہیدوں کے خون سے مزین تحریک آزادی کو جس طرح دبانے کیلئے سرکاری سطح پر مختلف حربے اور ہتھکنڈے استعمال کئے جارہے ہیں اور قائدین اور کارکنوں میں خوف و ہراس کا ماحول پیدا کیا جارہا ہے اْس کا پوری ہمت اور حوصلے کے ساتھ مقابلہ کرکے تحریک مزاحمت کے تئیں اپنی بھر پور وابستگی اور استقامت کا مظاہرہ کریں۔

اس دوران قائدین نے شوپیاں ،ترال، پلوامہ اور دیگر علاقوں میں پولیس اور سرکاری فورسز کی جانب سے نوجوانوں کی پکڑ دھکڑ اور انہیں گرفتار کرکے انہیں تھانوں میں بند کئے جانے کے عمل کو فورسز کی جارحیت قرار دیتے ہوئے اسکی شدید مذمت کی ہے۔وادی بھر میں جاری پکڑ دھکڑ، گرفتاریوں کے چکر نیز پیر و جوانوں پر بے دریغ کالے قانون پبلک سیفٹی ایکٹ کے نفاذ کو جمہوریت کشی سے تعبیر کرتے ہوئے مشترکہ قیادت نے کہا کہ آج وادی کے طول و عرض میں آواز خلق کو دبانے کا جو سلسلہ دراز تر کردیا گیا ہے وہ جمہوری، اخلاقی،انسانی اور تہذیبی اقدار کی صریح بیخ کنی ہے جس کی جتنی بھی مذمت کی جائے کم ہے۔ ایمنسٹی انٹرنیشنل، آئی سی آر سی ،اقوام متحدہ کے انسانی حقوق کمیشن و کونسل اور دوسرے اداروں سے کشمیری اسیروں اور مظلوموں کی دادرسی کیلئے اقدامات اٹھانے کی اپیل کرتے ہوئے مشترکہ مزاحمتی قیادت نے کہا کہ عالمی برادری اگر کشمیریوں کو انصاف دلانے میں ناکام ہوئی تو مظلوم انسانیت کا اس پر سے اعتماد اٹھ جائے گا ۔