سری نگر، نئی کار پالیسی کو حتمی شکل دینے میں طویل تاخیر کا سنجیدگی سے نوٹس لیتے ہوئے قانون ساز اسمبلی کے اسپیکر عبدالرحیم راتھر نے بدھ کو حکومت کو ہدایت دی کہ پالیسی کو 15 دن کے اندر حتمی شکل دے کر نافذ کیا جائے۔

یہ ہدایت وزیر ٹرانسپورٹ ستیش شرما کی جانب سے کار پالیسی سے متعلق صورت حال کی رپورٹ پیش کیے جانے کے بعد دی گئی۔ انہوں نے بتایا کہ محکمہ ضروری بین المحکماتی مشاورت کرے گا اور پالیسی کو حتمی شکل دینے کے لیے مطلوبہ کارروائی مکمل کرے گا۔

اسپیکر نے 24 ستمبر کو جموں و کشمیر اسمبلی کے خزاں اجلاس کے دوران نئی کار پالیسی کی تشکیل میں طویل تاخیر کا نوٹس لیتے ہوئے متعلقہ وزیر کو جاری اجلاس میں اس معاملے پر صورت حال کی رپورٹ پیش کرنے کی ہدایت دی تھی۔

اسپیکر نے کہا، ’’نئی کار پالیسی کو 15 دن کے اندر حتمی شکل دے کر نافذ کیا جانا چاہیے۔ اس معاملے کو مزید زیرِ التوا نہیں رہنے دیا جا سکتا۔ سرکاری وسائل کے غلط استعمال سے متعلق شکایات سنگین تشویش کا معاملہ ہیں اور سرکاری گاڑیوں کے حق اور استعمال سے متعلق واضح اور تازہ ترین قواعد کی ضرورت کو اجاگر کرتی ہیں۔‘‘

اسپیکر نے کہا کہ مقررہ حق سے زیادہ متعدد سرکاری گاڑیوں کا استعمال سرکاری وسائل کا غلط استعمال قرار دینے میں وہ ہچکچاہٹ محسوس نہیں کریں گے۔ تاہم، انہوں نے واضح کیا کہ معاملہ سرکاری افسران کے خلاف نہیں ہے، جنہیں مقررہ قواعد کے تحت جائز طور پر حاصل گاڑیاں اور سہولیات فراہم کی جانی چاہئیں۔

اسپیکر نے اپنے مشاہدات میں کہا کہ معاملے کی اہمیت کے باوجود یہ تقریباً 5 سال سے ایک محکمہ سے دوسرے محکمہ کے درمیان گردش کر رہا ہے۔ انہوں نے خاص طور پر سرکاری وسائل کے مناسب اور دانش مندانہ استعمال سے متعلق خدشات کے پیش نظر پالیسی کو جلد حتمی شکل دینے کی ضرورت پر زور دیا۔

اسپیکر نے کہا کہ حکومت اصولی طور پر نئی کار پالیسی متعارف کرانے کی ضرورت پہلے ہی تسلیم کر چکی ہے اور سوال کیا کہ تجویز کو بار بار مختلف محکموں کے درمیان منتقل کرنے کی ضرورت کیوں پیش آ رہی ہے، جس میں معاملے کو دوبارہ محکمہ خزانہ کو بھیجنا بھی شامل ہے۔

انہوں نے زور دیا کہ سرکاری عہدیداروں کے لیے گاڑیوں کے حق کو ایک جامع پالیسی کے تحت واضح طور پر متعین کیا جانا چاہیے اور معاملے کو حتمی شکل دینے میں مزید تاخیر نہیں ہونی چاہیے۔

24 ستمبر کو اسپیکر راتھر نے افسران کی جانب سے متعدد سرکاری گاڑیوں کے مسلسل استعمال پر وزیر ٹرانسپورٹ شرما سے سخت سوالات کیے تھے۔ یہ معاملہ سوالیہ وقفے کے دوران بی جے پی کے رکن اسمبلی رنبیر سنگھ پٹھانیا نے اٹھایا تھا، جنہوں نے جاننا چاہا تھا کہ کیا حکومت تمام محکموں میں ’’ایک افسر، ایک گاڑی‘‘ کی پالیسی نافذ کرنے کا ارادہ رکھتی ہے۔

راتھر نے یکم ستمبر کو ان کے دفتر کو موصول ہونے والی رپورٹ پر کارروائی میں تاخیر پر بھی سوال اٹھایا اور ان افسران کو الگ الگ گاڑیاں فراہم کیے جانے پر بھی اعتراض کیا جو 2 محکموں کا اضافی چارج سنبھال رہے ہیں۔

یو این آئی۔ الف الف۔ م الف

نئی دہلی، روس-ایران پابندیوں کے قانون کے تحت امریکہ کی طرف سے ہندوستان پر مجوزہ 100 فیصد برآمدی ڈیوٹی کے تعلق سے دونوں ممالک کے درمیان جاری تبادلۂ خیال کے درمیان وزیرِ اعظم نریندر مودی اور امریکی صدر ڈونلڈ ٹرمپ نے بدھ کے روز بات چیت کے دوران مختلف شعبوں میں تعاون کا جائزہ لیا۔
اس بات چیت کے بعد مسٹر مودی نے سوشل میڈیا پر ایک پوسٹ میں کہا کہ دونوں نے دوطرفہ تعلقات کے ساتھ ساتھ علاقائی اور بین الاقوامی امور پر بھی تبادلۂ خیال کیا۔

انہوں نے کہا، “صدر ٹرمپ کے ساتھ مثبت بات چیت ہوئی۔ ہم نے تجارت، دفاع، توانائی، اہم ٹیکنالوجی اور دیگر شعبوں میں اپنے باہمی تعاون کا جائزہ لیا۔ ہم اپنی ‘جامع اسٹریٹجک شراکت داری’ کو آگے بڑھانے کے لیے قریبی رابطہ برقرار رکھنے پر متفق ہوئے۔ ہم نے علاقائی اور بین الاقوامی امور پر بھی خیالات کا تبادلہ کیا، جن میں عالمی امن اور سکیورٹی کو فروغ دینے کے لیے جاری کوششیں بھی شامل ہیں۔”

وزیرِ اعظم کے دفتر نے بتایا کہ دونوں رہنماؤں نے ہند-امریکہ جامع عالمی اسٹریٹجک شراکت داری کو آگے بڑھانے کے تئیں اپنے عزم کو دہرایا اور دونوں ممالک کے لوگوں کے فائدے کے لیے تعاون کو مزید مضبوط بنانے کے مقصد سے قریب رابطہ برقرار رکھنے پر اتفاق کیا۔

قابلِ ذکر ہے کہ امریکی پارلیمنٹ کی طرف سے منظور شدہ یہ قانون امریکی صدر کو روس سے خام تیل یا قدرتی گیس خریدنے والے سرفہرست پانچ ممالک پر 100 فیصد تک برآمدی ڈیوٹی عائد کرنے کا اختیار دیتا ہے۔

یواین آئی ایف اے

نئی دہلی، لوک سبھا میں قائد حزب اختلاف راہل گاندھی نے الزام لگایا ہے کہ بیلا کلسٹر کچی آبادیوں کے ووٹر لسٹ سے 729 میں سے 728 ووٹروں کا نام ہٹانا ووٹ چوری کا واضح ثبوت ہے، اس کے باوجود کوئی کارروائی نہیں کی گئی۔

مسٹر گاندھی نے بدھ کو سوشل میڈیا پر کہا کہ ہندوستانی شہریت کے تمام دستاویزات اور ثبوت ہونے کے باوجود یہ لوگ دفاتر اور عہدیداروں کے ارد گرد چکر لگا رہے ہیں۔ انہوں نے کہا کہ یہ لوگ نسلوں سے وہاں رہ رہے ہیں، زرعی مزدور کے طور پر کام کرتے ہیں اور ہر الیکشن میں ووٹ دیتے ہیں۔

انہوں نے سوال کیا کہ کیا کسی شہری سے ووٹ کا حق صرف اس لیے چھین لیا جا سکتا ہے کہ وہ غریب یا بے گھر ہے۔ انہوں نے کہا کہ آئین ایک شخص، ایک ووٹ کی ضمانت دیتا ہے اور ایک ووٹ کو بھی حذف کرنا محض ایک فعل نہیں بلکہ ووٹ چوری ہے۔

مسٹر گاندھی نے کہا کہ 728 ووٹوں کے حذف ہونے پر افسوس کا ایک ٹکڑا بھی نہیں ہے اور اسی ڈھٹائی کے ساتھ ملک بھر میں لاکھوں ووٹوں کی چوری ہو رہی ہے۔ انہوں نے کہا کہ “ہم ایک ووٹ کو بھی حذف نہیں ہونے دیں گے” اور ذمہ داروں کو نتائج کا سامنا کرنے کی تنبیہ کی۔

یو این آئی۔ الف الف۔ م الف