واشنگٹن، امریکی وزیر خارجہ مارکو روبیو پیر کی شب آئس لینڈ پہنچے تاکہ گرین لینڈ سے متعلق واشنگٹن کے ایک معاہدے کے بعد قطب شمالی میں امریکی اثر و رسوخ کو بڑھانے کے لیے تین یورپی ممالک کا دورہ شروع کر سکیں۔

امریکی محکمہ خارجہ نے اس دورے کا اعلان کرتے ہوئے ایک بیان میں کہا کہ روبیو ، ریک یاوِک میں حکام سے ملاقات کریں گے تاکہ “اقتصادی اور سیکیورٹی تعاون پر تبادلہ خیال” کیا جا سکے۔

یہ برق رفتار دورہ، جو جتنا سیاسی ہے اتنا ہی علامتی بھی ہے، نیویارک میں اقوامِ متحدہ کی جنرل اسمبلی کے حاشیے پر ستمبر کے آخر میں ڈنمارک اور گرین لینڈ کے ساتھ امریکہ کے ایک سیکیورٹی معاہدے پر دستخط کرنے کے بعد ہو رہا ہے۔ اس معاہدے نے بظاہر صدر ڈونلڈ ٹرمپ کی جانب سے گرین لینڈ کو خریدنے یا اپنے ساتھ ضم کرنے کی دھمکیوں کا خاتمہ کر دیا ہے ۔

روانگی سے قبل، روبیو نے آئس لینڈ کو “امریکہ کا ایک اچھا دوست” قرار دیا۔

اس معاہدے کے تحت، واشنگٹن گرین لینڈ پر دو نئے فوجی اڈے قائم کرنے کا منصوبہ بنا رہا ہے، جس سے ڈنمارک کا یہ خودمختار علاقہ امریکی مدار میں مزید گہرائی تک چلا جائے گا۔

آرکٹک میں بڑھتے ہوئے مقابلے کے ساتھ، آئس لینڈ نے ایک اسٹریٹجک کھلاڑی کے طور پر دوبارہ اپنا مقام حاصل کر لیا ہے، حالانکہ یہ ملک سیکیورٹی کے لیے اب بھی کافی حد تک امریکہ پر انحصار کرتا ہے۔

ستمبر کے آغاز میں، ٹرمپ نے ایک بار پھر مصنوعی ذہانت) سے تیار کردہ نقشہ شیئر کر کے ایک نیا تنازعہ کھڑا کیا تھا جس میں شمالی امریکہ، کیریبین، گرین لینڈ اور آئس لینڈ کو “ریاستہائے متحدہ امریکہ” کے طور پر دکھایا گیا تھا۔

جواب میں، آئس لینڈ نے امریکی سفیر کو طلب کیا تاکہ “ایک واضح پیغام پہنچایا جا سکے کہ یہ تصویر سراسر نامناسب تھی۔

آئس لینڈ کے عوام نے اگست کے آخر میں یورپی یونین میں شامل ہونے کے مذاکرات کو دوبارہ شروع کرنے کے خلاف 52.8 فیصد بمقابلہ 47.2 فیصد ووٹ دیا تھا، جو کہ 2013 سے منجمد ہیں۔

آئس لینڈ کا دورہ کرنے والے آخری امریکی وزیر خارجہ انٹونی بلنکن تھے جنہوں نے 2021 میں دورہ کیا تھا۔
1944 میں آزادی حاصل کرنے کے بعد سے آئس لینڈ کی کبھی کوئی فوج نہیں رہی۔

یہ اپنی سیکیورٹی کے لیے ناٹو اور 1951 میں امریکہ کے ساتھ دستخط کیے گئے ایک دوطرفہ دفاعی معاہدے پر انحصار کرتا ہے۔

واشنگٹن کا آئس لینڈ میں کوئی مستقل اڈہ نہیں ہے، لیکن وہ آرکٹک کے اُن راستوں پر اپنا کنٹرول مضبوط کرنے کی کوشش کر رہا ہے جن پر روس اور چین کی نظریں ہیں۔

ٹرمپ نے اتوار کے روز اپنی سوشل میڈیا پلیٹ فارم ‘ٹروتھ سوشل’ پر گرین لینڈ کے مناظر کے اوپر اپنی ایکاے آئی سے تیار کردہ تصویر پوسٹ کر کے گرین لینڈ کے بارے میں اپنے جنون کا دوبارہ اشارہ دیا، جس کے ساتھ “ہیلو، گرین لینڈ!” کے الفاظ لکھے ہوئے تھے۔

محکمہ خارجہ نے بتایا کہ آئس لینڈ کے بعد، روبیو ایتھنز جائیں گے تاکہ نیٹو کے رکن ملک یونان کے ساتھ علاقائی اور توانائی کی سیکیورٹی پر “اسٹریٹجک ڈائیلاگ” میں حصہ لے سکیں۔

یہ دورہ یونان میں امریکی سفیر کمبرلی گلفائل سے متعلق مفادات کے ممکنہ تصادم کی میڈیا رپورٹس کے بعد ہو رہا ہے۔

روبیو کے نام ایک خط میں، کانگریس مین گریگوری میکس نے وال اسٹریٹ جرنل کی اس رپورٹ کی وضاحت طلب کی جس میں الزام لگایا گیا تھا کہ کمبرلی گلفائل نے مبینہ طور پر کہا تھا کہ امریکہ یورپی ممالک میں “سیاسی تبدیلی” پیدا کر سکتا ہے۔

روبیو بعد میں لزبن میں ایک مختصر قیام کے ساتھ اپنے یورپی دورے کا اختتام کریں گے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے نیبراسکا کے گرینڈ آئی لینڈ میں ایک انتخابی ریلی کو ایران کے خلاف امریکہ-اسرائیل کی فوجی مہم کو عالمی بچاؤ مہم کے طور پر پیش کرنے کے لیے استعمال کیا اور کہا کہ یہ تنازع جلد ہی ختم ہو جائے گا۔

مسٹر ٹرمپ نے کہا، “ہم مغربی ایشیا، اسرائیل اور پوری دنیا کو ایک ایسی صورت حال سے بچا رہے ہیں، جو اب تک کے سب سے بھانک سانحات میں سے ایک ہو سکتی تھی۔” انہوں نے ایک بار پھر زور دے کر کہا کہ ایران کو ایٹمی ہتھیار حاصل کرنے کی اجازت نہیں دی جائے گی۔

اس کے بعد امریکی صدر نے فوجی مہم کے حوالے سے مزید جارحانہ انداز میں کہا، “ویسے، ہم ایران کی جم کر دھلائی کر رہے ہیں۔ آپ جانتے ہیں، ہے نہ؟ یہ کسی نہ کسی طرح ختم ہو گا۔ یہ بہت جلد ختم ہونے والا ہے۔”

مسٹر ٹرمپ نے امریکہ میں قیمتوں میں کمی کو بھی جنگ کے خاتمے سے جوڑا اور کہا، “اور آپ کی قیمتیں کم ہونے والی ہیں۔”

یو این آئی/اسپوتنک۔ الف الف

ریاض، سعودی وزیر دفاع خالد بن سلمان نے کہا کہ سعودی عرب، پاکستان اور ترکی نے مملکت پر حملہ کرنے والوں کا مشترکہ طور پر مقابلہ کرنے کے لیے اپنی تیاری کا اظہار کیا ہے۔

بن سلمان نے پیر کے روز ‘ایکس’ پر کہا، “مکہ دفاعی معاہدے کے تحت اسٹریٹجک، سیاسی اور دفاعی کمیٹی کے ہنگامی اجلاس میں مملکت اور مقدس مقامات کے خلاف کیے گئے گھناؤنے حملوں کا مقابلہ کرنے میں ہمارے ممالک کے اتحاد اور یکجہتی کا اعادہ کیا گیا۔ کمیٹی نے حملوں اور ان کے ذمہ داروں کے جواب میں اتحاد کے دائرہ کار میں اجتماعی دفاعی اقدامات کے نفاذ پر اتفاق کیا۔”

اسی دن، ہنگامی اجلاس کے بعد ترکیہ کی وزارتِ خارجہ نے ایک مشترکہ بیان جاری کیا جس میں کہا گیا کہ انقرہ، ریاض اور اسلام آباد الائنس کے پہلے سیکرٹری جنرل کی تقرری پر متفق ہو گئے ہیں۔

بیان میں مزید کہا گیا، “مکہ دفاعی معاہدے کے ادارہ جاتی ارتقاء کے حصے کے طور پر، کمیٹی نے اسلامی جمہوریہ پاکستان کے لیفٹیننٹ جنرل نعمان محمود (ریٹائرڈ) کو تین سال کی مدت کے لیے پہلا سیکرٹری جنرل مقرر کرنے کا فیصلہ کیا ہے۔”

واضح رہے کہ اس دفاعی معاہدے پر 7 اگست کو سعودی عرب، پاکستان اور ترکیہ نے دستخط کیے تھے۔

دستاویز کے مطابق، کسی بھی رکن ملک پر مسلح حملہ تینوں ممالک پر حملہ تصور کیا جائے گا۔

یواین آئی/اسپوتنک۔الف الف