خبراردو: سید علی گیلانی کی قیادت والی حریت کانفرنس (گ) کی طرف سے انصار غزوة الہند کے مقامی جنگجو کمانڈر ذاکر موسیٰ اور نائرہ پلوامہ میں گزشتہ دنوں مارے گئے جنگجو کمانڈر کے بھائی ظہور احمد کو جاں بحق کئے جانے کےخلاف وادی بھر میں مکمل ہڑتال سے معمولات کی زندگی ٹھپ ہوکر رہ گئی جبکہ اس دوران انتظامیہ نے وادی بھر میں ممکنہ احتجاجی مظاہروں کے پیش نظر سرینگر، پلوامہ اور کولگام کے کئی علاقوں میں اعلانیہ کرفیونافذ رکھا۔

جمعرات کی شام دیر گئے ڈاڈسرہ ترال میں فورسز اور جنگجوﺅں کے مابین مسلح تصادم آرائی کے نتیجے میں انصار غزوة الہند کے مقامی جنگجو کمانڈر ذاکر موسیٰ اور نائرہ پلوامہ میں جنگجو کمانڈر کے بھائی ظہور احمد کی گزشتہ دنوں ہلاکت کےخلاف دی گئی ہڑتالی کال کے نتیجے میں وادی بھر میں معمولات زندگی بری طرح سے متاثر رہے۔ ہڑتالی کال سے سرینگر سمیت شمال و جنوب میں عوامی، تجارتی، کاروباری، اسکولی اور غیر سرکاری سرگرمیاں ٹھپ رہیں جبکہ سڑکوں پر ٹریفک کی نقل و حرکت مکمل طور پر بند رہی جس کے نتیجے میں وادی کے مختلف حصوں سے ہسپتالوں اور طبی مراکز تک پہنچنے والے مریضوں اور تیمارداروں کو سخت مشکلات کا سامنا کرنا پڑا۔اس دوران انتظامیہ نے بھی جنگجو کمانڈر کی ہلاکت کے بعد ممکنہ احتجاجی مظاہروں کے پیش نظر سنیچر وار کو دوسرے روز بھی وادی بھر بندشیں عائد رکھیں جبکہ سرینگر، پلوامہ اور کولگام کے کئی علاقوں میں اعلانیہ طور پر کرفیونافذ رہا۔ تفصیلات کے مطابق انتظامیہ نے وادی کے بیشتر مقامات پر دوسرے روز بھی کرفیو جاری رکھا جس کے نتیجے میں شہر سرینگر سمیت وادی کے دیگر حصوں میں بھی لوگوں کو دوسرے روز بھی گھروں کے اندر ہی رہنا پڑا۔

معلوم ہوا کہ انتظامیہ نے پائین شہر کے کئی پولیس تھانوں کے تحت آنے والے علاقوں میں دوسرے روز بھی اعلانیہ کرفیو نافذ رکھا جبکہ پلوامہ اور کولگام میں بھی کرفیو کی وجہ سے لوگوں کو مشکلات کا سامناکرنا پڑا۔انتظامیہ نے جنگجو کمانڈر ذاکر موسیٰ کی ہلاکت کے مابعد وادی کے شمال و جنوب میں ممکنہ عوامی احتجاج سے نمٹنے کی خاطرسنیچر وار کو دوسرے روز بھی تمام تعلیمی اداروں میں تدریسی عمل کو معطل رکھنے کا فیصلہ کیا۔صوبائی انتظامیہ نے اس سلسلے میں جمعہ کی شام دیر گئے حالات و واقعات کا باریک بینی سے جائزہ لینے اور سیکورٹی ایجنسیوں سے صلاح و مشورہ کے بعد سنیچر وار کو وادی بھر کے تعلیمی اداروں میں تدریسی عمل معطل رکھنے کا فیصلہ صادر کیا۔ اس دوران امن و قانون کی صورتحال کو برقرار رکھنے اور بے لگام افواہ بازی پر روک لگانے کی خاطر صوبائی انتظامیہ نے ٹیلی کام آپریٹروں کو ہدایت کی کہ وہ سنیچر کو دوسرے روز بھی وادی بھر میں موبائل انٹرنیٹ سروس کو معطل رکھیں جبکہ انتظامیہ کے حکم پر اہم اور حساس موصلاتی نظام براڈبینڈ کی رفتار پر بھی لگام کسی لی گئی ۔ معلوم ہوا کہ سیکورٹی وجوہات کو مدنظر رکھتے ہوئے جو قدغن براڈ بینڈ سسٹم پر بھی عائد رہی اُس کے نتیجے میں وادی سے شائع ہونے والے اخبارات کے کام کاج پر بھی منفی اثرات پڑے ہیں۔

ذرائع کا کہنا تھا کہ عمومی طور پر حالات کی سنگینی کو مدنظر رکھتے ہوئے انتظامیہ معمول کے مطابق موبائل انٹرنیٹ سروس پر پابندی عائد کرتی تھی تاہم اب کی بار براڈ بینڈ سروس کی رفتار کو کم کرنے سے میڈیائی اداروں، تجارت پیشہ افراد کےساتھ ساتھ طلبہ برادری کو بھی سخت مشکلات کا سامنا کرنا پڑا۔اس دوران ممکنہ احتجاجی مظاہروں کے پیش نظر ریلوے حکام نے بھی سنیچر کو دوسرے روز بھی وادی بھر میں ریل خدمات کو بند رکھا۔ ریلوے حکام کے بقول پلوامہ کے ڈاڈسرہ علاقے میں جنگجو کمانڈر کی ہلاکت کے بعد عوامی احتجاج کا خدشہ برقرار تھا جس کے بعد ریلوے کے اعلیٰ حکام نے سیکورٹی خدشات کو مدنظر رکھتے ہوئے ریل سروس کو دوسرے روز بھی معطل رکھنے کافیصلہ کیا۔ادھر ذرائع نے بتایا کہ انتظامیہ نے احتیاطی تدابیر کے طور پر وادی کے کئی حصوں میں سنیچر کو دوسرے روز بھی سخت بندشیں عائد رکھیں تاکہ امن و قانون کی صورتحال کو زک نہ پہنچے۔انہوں نے بتایا کہ شہرسرینگر کے نوہٹہ، رعناواری، خانیار، صفاکدل اور مہارج گنج پولیس تھانوں کے تحت آنے والے علاقوں میں پولیس نے سخت بندشیں عائدکی تھیں جبکہ مائسمہ اور کراکہ کھڈ پولیس تھانہ کے تحت آنے والے علاقوں میں جزوی طور پر بندشیں عائد کی گئی تھیں۔عینی شاہدین کے مطابق انتظامیہ نے سنیچر کو دوسرے روز بھی شہر خاص کے کئی علاقوں میں فورسز کی اضافی ٹکڑیوں کو تعینات کرتے ہوئے سخت بندشیں عائد کیں جس دوران لوگوں کو گھروں سے باہر آنے کی اجازت نہیں دی گئی۔

عینی شاہدین کا کہنا تھا کہ شہر خاص کے کئی علاقوں میں لوگوں کو ضروریات زندگی کا سامنا بھی مہیا نہیں ہوا کیوں کہ فورسز اہلکاروں نے صبح سویرے سے ہی لاٹھیوں اور بندقوں سے لوگوں کو باہر آنے سے منع کیا۔ اس دوران ذرائع کے مطابق وادی کے دیگر حصوں جن میں پلوامہ اور کولگام شامل ہیں ، میں بھی انتظامیہ کے احکامات پر سخت بندشوں کا نفاذ عمل میں لایا گیا تھا۔انتظامیہ نے یہاں کسی بھی گڑبڑ سے نمٹنے اور حالات کوقابو میں رکھنے کےلئے فورسز کی بھاری نفری کو حساس مقامات پر تعینات کیا ہوا تھا۔خیال رہے انصار غزوة الہند کے مقامی جنگجو کمانڈر ذاکرموسیٰ کو فورسز نے ایک جھڑپ کے دوران جمعرات کی شام ترال کے ڈاڈسرہ علاقے میں جاں بحق کیاجس کے بعد وادی بھر میں انتظامیہ نے احتیاطی تدابیر کے پیش نظر سخت بندشیں عائد کرنے کےساتھ ساتھ پوری وادی میں انٹرنیٹ بریک ڈاﺅن کا نفاذ عمل میں لایا ۔دفاعی ذرائع کا کہناتھا کہ ڈاڈسرہ علاقے میں جونہی کارڈن اینڈ سرچ آپریشن عمل میں لایا گیا اور مشتبہ مکان کے ارد گرد جب فورسز اہلکاروں نے گھیراﺅ سخت کیا تو اندر چھپے بیٹھے انصار غزوة الہند کے کمانڈر ذاکر موسیٰ کو خود سپردگی کی پیش کش کی گئی تاہم انہوں نے سرینڈر کی پیش کش کو مسترد کرتے ہوئے فورسز اہلکاروں پر ہتھ گولہ داغا جس کےساتھ ہی علاقے میں جھڑپ کا باضابطہ آغاز ہوگیا۔

ذرائع کے مطابق مکان میں چھپے بیٹھے جنگجو کمانڈر کو جمعہ کی علی الصبح مار اگیا ۔اس دوران جنگجو کی ہلاکت کے خلاف پلوامہ سمیت پائین شہر کے چند ایک علاقوں میں معمولی نوعیت کے پتھراﺅ پر مبنی واقعات رونما ہوئے تاہم فورسز نے یہاں جوابی کارروائی کرتے ہوئے مظاہرین کو منتشر کیا۔ ادھر پولیس ذرائع نے دن بھر کی صورتحال کو مجموعی طور پر پرامن قرار دیا ہے۔