خبراردو:

جنوبی کشمیرمیں فوج و فورسز نے جنگجو مخالف آپریشنز میں تیزی لاتے ہوئے منگلوار شام دیر گئے مہمند پورہ کولگام میں جنگجوﺅں سے متعلق مصدقہ اطلاع موصول ہونے کے بعد یہاں سخت محاصرہ عمل میں لایا۔ معلوم ہوا کہ فوج کی 9آر آر، ایس او جی اور سی آر پی ایف کی بھاری جمعیت نے جنگجوﺅں سے متعلق مصدقہ اطلاع موصول ہونے کے بعد ضلع کے مہمند پورہ گاﺅں کا چاروں اطراف سے کڑا محاصرہ عمل میں لایا۔ اس دوران فورسز نے رات کے 11بجے سے ہی علاقے میں تلاشی کارروائی کا آغاز کرتے ہوئے یہاں چھپے بیٹھے جنگجوﺅں کو ڈھونڈ نکالنے کی کوشش کی۔ادھر پولیس ذرائع نے بتایا کہ علاقے میں کسی بھی جنگجوﺅں کو نہ پانے کے بعد فورسز نے گاﺅں سے آپریشن کو منسوخ کردیا۔

ایس پی کولگام گرندر پال سنگھ کا کہنا تھا کہ علاقے میں جیش نامی تنظیم کے 3جنگجو چھپے بیٹھے تھے جو ابتدائی فائرنگ کےساتھ ہی علاقے سے فرار ہونے میں کامیاب ہوگئے۔ انہوں نے بتایا کہ ہم نے بدھوار کی دوپہر کو جائے جھڑپ کی باریک بینی سے تلاشی لی تاہم یہاں ہم نے کسی بھی جنگجو کی لاش کو برآمد نہیں کیا جس کے بعد گاﺅں سے جنگجو مخالف آپریشن کو منسوخ کیا گیا۔اس دوران انہوں نے ان خبروں کو مسترد کردیا کہ مقامی لوگوں نے جائے جھڑپ سے تین جنگجوﺅں کو نکالنے میں مدد کی۔ادھر مقامی لوگوں کا کہنا ہے کہ علاقے میں رات بھر وقفے وقفے سے گولیوں کی آوازیں سنی گئیں تاہم صبح ہونے کے ساتھ ہی یہاں گولی باری میں شدت آنے لگی۔ لوگوں کے مطابق فورسز نے علاقے کو مکمل طور پر اپنی تحویل میں لے لیا تھا جس دوران گاﺅں کی تمام اندرون و بیرون سڑکوں پر فورسز نے اضافی دستوں کو تعینات کردیا تھا۔انہوں نے بتایا کہ فورسز اہلکاروں نے گاﺅں میں منگلوار کی شام دیر گئے داخل ہوکر قریباً11بجے سے ہی تلاشی مہم شروع کردی۔ ادھر معلوم ہوا کہ بدھوار کی دوپہر کو یہاں اُس وقت فورسز نے آپریشن کو منسوخ کردیا جب یہاں عوامی احتجاج میں انتہائی شدت آگئی۔

عینی شاہدین نے بتایا کہ علاقے میں جنگجو مخالف آپریشن شروع ہونے کے ساتھ ہی علاقے میں نوجوانوں کی بڑی تعداد نے سڑکوں پر نکل کر فورسز کارروائی کے خلاف جم کر احتجاج کیا۔ مظاہرین نے اس دوران اسلام، آزادی اور جنگجوﺅں کے حق میں زور دار نعرے لگانے کےساتھ ساتھ یہاں تعینات فورسز اہلکاروں پر سنگ باری کی۔ انہوں نے بتایا کہ بدھوار کی صبح سے ہی علاقے میں مظاہرین نے فورسز کو خاطر میں نہ لاتے ہوئے جائے جھڑپ کی جانب پیش قدمی شروع کرنے کی کوشش کی۔ مظاہرین نے اس دوران فورسز پر چہار سو پتھراﺅ کیا جس کے جواب میں فورسز نے پیلٹ فائرنگ، آنسو گیس کے گولوں کےساتھ ساتھ گولیوں کا استعمال کیا۔ اس دوران معلوم ہوا کہ فورسز کارروائی کے نتیجے میں 55کے قریب افراد پیلٹ، شل اور گولیاں لگنے سے زخمی ہوئے ہیں جنہیں فوری علاج و معالجے کی خاطر ضلع بھر کے مختلف طبی مراکز میں منتقل کردیا گیا۔ چیف میڈیکل افسر کولگام ڈاکٹر فاضل کوچک نے میڈیا کو بتایا کہ بدھوار کے روز قریباً 50زخمیوں کوپبلک ہیلتھ سنٹر مہمند پورہ منتقل کیا گیا جن میں سے 44کو معمولی زخم آئے تھے تاہم ان کا علاج یہاں پر جاری ہے۔ انہوں نے بتایا کہ زخمیوں میں سے 6افراد کو ڈسٹرکٹ ہسپتال کولگام منتقل کیا گیا جن کی شناخت ندیم احمد(پیلٹ متاثر بائیں آنکھ)، نواز احمد (پیلٹ متاثر دائیں آنکھ)، عدنان احمد (پیلٹ متاثر بائیں آنکھ)، محسن احمد (پیلٹ متاثر)، باسط احمد (پیلٹ متاثر) جبکہ یاور احمد شامل ہیں جن کے پیٹ میں گولی پیوست ہوئی ہیں۔ڈاکٹر کوچک کے بقول 6افراد میں سے 4کو مزید علاج و معالجے کی خاطر سرینگر کے ایس ایم ایچ ایس ہسپتال منتقل کیا گیا۔

انہوں نے بتایا کہ جن زخمیوں کو سرینگر منتقل کیا گیا اُن میں ندیم احمد، نوا زاحمد، عدنان احمد اور یاور احمد شامل ہیں۔اس دوران انتظامیہ نے علاقے میں امن و قانون کی صورتحال کو برقرار رکھنے کےلئے ضلع بھر میں معمول کے مطابق موبائل انٹرنیٹ سروس کو معطل کردیا ہے۔ معلوم ہوا کہ انتظامیہ نے جنگجو مخالف آپریشن شروع ہونے کےساتھ ہی ضلع بھر میں بے لگام افواہ باری پر بریک لگانے کی خاطر ضلع کے حدود میں آنے والے علاقوں میں موبائل انٹرنیٹ خدمات کو بند کرنے کا فیصلہ لیا ۔ادھر مہمند پورہ نامی گاﺅں میں جھڑپ کی خبر پھیلتے ہی مضافاتی علاقوں میں معمول کی سرگرمیاں متاثر رہیں جبکہ سڑکوں پر سے گاڑیوں کی نقل و حرکت بھی مکمل طور پر ٹھپ ہوکر رہ گئیں۔ادھر پہاڑی ضلع شوپیان کے پنجورہ نامی گاﺅں میں بدھوار کی سہ پہر اُس وقت حالات کشیدہ ہوگئے جب یہاں فورسز کی مشترکہ پارٹی پر مظاہرین نے سنگ باری شروع کردی۔