خبراردو: حریت کانفرنس (ع) چیرمین میر واعظ عمر فاروق نے جموں وکشمیرمیں منشیات کے بڑھتے استعمال کو تشویشناک قرار دیتے ہوئے کہا کہ کشمیرمیں جاری نامساعد حالات کی وجہ سے یہاں کی نوجوان نسل ذہنی پریشانیوں کی شکار ہوئی ہے جو نوجوانوں میں منشیات کے استعمال کے ایک محرم کے طور پر سامنے آیا ہے۔

حریت کانفرنس(ع) چیرمین میرواعظ عمر فاروق نے مرکزی جامع مسجد سرینگر میں نما زجمعہ سے قبل ایک بھاری عوامی اجتماع سے خطاب کرتے ہوئے جموںوکشمیر میں منشیات کے استعمال کی بڑھتی ہوئی وبا کوحد درجہ تشویشناک صورتحال قرار دیتے ہوئے کہا ہے کہ آئے دن سماج کے مختلف طبقوں کی جانب سے اطلاعات موصول ہو رہی ہیں ، وفود بھی مل رہے ہیں اور لوگوں کے خطوط بھی آرہے ہیں کہ کشمیر میں منشیات کااستعمال ایک ناسور کی شکل اختیارکرتا جارہا ہے ۔میرواعظ نے کہا کہ منشیات کا کاروبار اب یہاں کھلے عام ہو رہا ہے خاص کر شام کے وقت مرغزاروں، میدانوں، پارکوں یہاں تک کہ قبرستانوں میںبھی منشیات کی خرید و فروخت ہو رہی ہے اور یہاں کی نوجوان نسل تیزی کے ساتھ اس وبا کی شکار ہو رہی ہے ۔انہوں نے کہا کہ گزشتہ کچھ عرصہ سے کشمیرمیں جاری نامساعد حالات کی وجہ سے یہاں کی نوجوان نسل ذہنی پریشانیوں کے شکار ہوئی ہے جو نوجوانوں میں منشیات کے استعمال کے ایک محرک کے طور پر سامنے آیا ہے۔انہوںنے کہا کہ سب سے زیادہ افسوسناک پہلو یہ ہے کہ اب کالج اور سکول کی لڑکیاں بھی اس لت میں مبتلا ہو رہی ہیں اور یہ تعداد اب سینکڑوں نہیں بلکہ ہزاروں میں ہو گئی ہے ۔

میرواعظ نے کہا کہ اگر یہی صورتحال رہی تو خدانخواستہ جموںوکشمیر کی صورتحال ایک دن بھارت کی ریاست پنجاب جیسی ہو جائیگی جہاں لاکھوں کی تعداد میں لوگ اس لت میں مبتلا ہو رگئے ہیں ۔انہوں نے کہا کہ شہر خاص میں یہ وبا تیزی سے پھیل رہی ہے اور یہ ہم سب بالخصوص والدین کی ذمہ داری ہے کہ وہ اپنے بچوں پر نظر رکھیں کہ ان کی روزانہ کی سرگرمیاں کس نوعیت کی ہےں۔ شہر خاص کے علاقوںبالخصوص مخدوم صاحبؒ کے ارد گرد کے علاقوں میں اس وبا کے پھیلنے کی مسلسل شکایتیں مل رہی ہیں اس کے علاوہ عیدگاہ، ملہ کھاہ ، کھیل کے میدانوں اور قبرستانوں میں منشیات کا کاروبار بڑے پیمانے پر پھیل رہا ہے اور اگر اس قوم کے نوجوان نسل میں یہی رحجان رہا تو یہ ہمارے مستقبل اور ہمارے سماج کو کھوکھلا کرکے رکھ دیگا۔

میرواعظ نے کہا کہ ایک طرف یہ قوم مختلف سطحوں پر شدید مصائب کا سامنا کررہی اور دوسری طرف تیزی سے پھیل رہی منشیات کی وبا نے پوری قوم کیلئے نئی مشکل کھڑی کردی ہے۔ میرواعظ نے والدین ، اساتذہ، علمائے کرام، محلہ کمیٹیوں اور مساجد کمیٹیوںپر زور دیا ہ کہ وہ اپنی ذمہ داریوں کو سمجھیں اور مساجد کے رکھ کھاﺅ کے ساتھ ساتھ سماج میں تیزی سے پنپ رہی برائیوں خصوصاً منشیات کے سدباب اور اس کے قلع قمع کیلئے بھی اجتماعی طور اقدامات اٹھانے کی کوشش کرےں۔

انہوں نے کہا کہ اگر ریاستی انتظامیہ منشیات کا دھندہ کرنے والوں یا ڈرگ اڈیکشن کے شکار لوگوں کیخلاف کوئی کارروائی کرتی ہے یا ان کو سزا دینے کیلئے کوئی قدم اٹھاتی ہے تو یہاں کے عوام اس اقدام میں بھر پور تعاون کریںگے اور یہ ریاستی انتظامیہ کی بھی ذمہ داری بنتی ہے کہ وہ ریاست سے اس وبا کے خاتمے کیلئے اقدامات اٹھائے اور ملوث افراد کو کڑی سے کڑی سزا دے تاکہ جموںوکشمیر سے ڈرگ مافیا کی سرگرمیوں پر روک لگائی جاسکے ۔