سعودی عرب میں سب سے اعلیٰ مذہبی تنظیم نے دنیا بھر کے مسلمانوں سے اپیل کی ہے کہ کورونا وائرس کی وبا کے پیش نظر وہ رمضان کےمقدس ماہ میں گھروں میں رہ کر عبادت کریں تا کہ کورونا وائرس کے پھیلاوَ کو روکا جا سکے ۔ اس مذہبی تنظیم نے کہا ہے کہ مسلمانوں کو اجتماع سے گریز کرنا چاہیے ۔

برصغیر میں رمضان 25اپریل یعنی آج (سنیچروار) سے شروع ہوا ۔ کورونا وائرس کی وبا کے پیش نظر ملک بھر کیساتھ ساتھ کشمیر میں بھی مکمل لاک ڈاوَن ہے اور ملک بھر کی طرح یہاں بھی مساجد بند ہیں ۔ سعودی عرب نے بھی اپنی مساجد بند کر رکھی ہیں جن میں مسلمانوں کے لیے دنیا کی سب سے مقدس مذہبی عبادت گاہ مسجد الحرام بھی شامل ہے ۔ ایران کی اسلامی حکومت نے کہا ہے کہ اگر مسلمان لاک ڈاوَن کی وجہ سے روزہ نہ رکھ پائیں تو کوئی حرج نہیں ہے ۔ ادھر بھارت کی بھی سرکردہ اسلامی تنظیموں اور مدارس نے ملک کے مسلمانوں سے رمضان میں مساجد نہ جانے کے بجائے گھر پر رہ کر نماز اور تراویح ادا کرنے کی ہدایت دی ہے ۔

اس کے علاوہ ملک کی مختلف مساجد کی جانب سے لاک ڈاوَن کا احترام کرنے کی اپیل کی جارہی ہے ۔ مسلمانوں نے رمضان کی تیاریاں شروع کر دی ہیں ۔ لوگوں سے بات کرنے پر اندازہ ہوتا ہے کہ اس لاک ڈاوَن کے دوران وہ کھانے پینے کے بجائے روحانی تیاریوں میں مصروف ہیں ۔ سرینگر کے ایک تاجر بشیر احمدزر گر کے مطابق یہ وقت مساجد میں بھیڑ جمع کرنے کا نہیں ہے ۔ انہو ں نے کہا ’اس لاک ڈاوَن نے ہ میں یہ موقع فراہم کیا ہے کہ گھروں میں رہ کر پورے دھیان سے عبادت کریں ۔

‘رمضان کا مہینہ مسلمانوں کےلئے ایک بڑا چیلنج ہو گا، کیونکہ گھر پر رہ کر نماز پڑھنا اور اس مقدس ماہ کا روایتی طور پر اہتمام نہ کرنا، اس کا تصور کرنا مشکل ہے ۔ غلام محمد نامی شہری کہتے ہیں ، ’جو لوگ عام دنوں میں مسجد میں نہیں جاتے وہ رمضان میں جاتے ہیں ۔ انہیں لگتا ہے کہ اس مبارک ماہ میں اگر مسجد نہیں گئے تو گناہ ہو گا، ان گاءءڈ لائنز میں یہ بتانے کی کوشش کی گئی ہے کہ اگر مکہ کی مسجد میں تالا لگ سکتا ہے تو یہ مساجد تو بہت چھوٹی ہیں ‘ ۔ سینئر صحافی رشید راہل کہتے ہیں ’ رمضان عبادت کا مہینہ ہے، عبادت گھروں میں کی جا سکتی لیکن یہ بات سچ ہے کہ رمضان کے مہینے میں مساجد میں زیادہ لوگ آتے ہیں ، یوں تو لاک ڈاوَن کے دوران ہر ملک کے مسلمانوں کو مشکلات کا سامنا ہو گا لیکن علما نے گائیڈ لائن جاری کر کے اس بات کو یقینی بنایا ہے کہ مسلمان لاک ڈاوَن کا احترام کریں ‘ ۔

اس دوران صوبائی انتظامیہ کشمیر کا کہنا ہے کہ لوگوں کو ماہ رمضان کی ہر طرح کی سہولیات فراہم کی جائیں گی ۔ صوبائی کمشنر کشمیر ،پی کے پولے کا کہنا ہے کہ ماہ رمضان میں لوگوں کو ہر طرح کی بنیادی سہولیات گھروں کی دہلیز پر پہنچا ئی جائیں گی ۔ انہوں نے کہا کہ بجلی ،پانی ،غذائی اجناس ،سبزی اور دیگر بنیادی ضروریات کی تما م چیزیں لاک داءون کے دوران دستیاب رہیں گی ،تاہم لوگ لاک ڈاءون اور سرکاری ہدایات ومشوروں پر عمل پیرا ہو کر کورونا وائرس کو شکست دیں ۔

گذشتہ دنوں ایک بیان میں انجمن اوقاف جامع مسجد سرینگر نے ماہ رمضان المبارک کی آمد پر ملت اسلامیہ خصوصاً مسلمانان جموں وکشمیر کو مبارک باد پیش کرتے ہوئے اپنی نیک خواہشات کا اظہار کیا ہے ۔ بیان کے مطابق کووڈ ۔ 19 کی بڑھتی ہوئی وبا کے پیش نظر طبی ماہرین اور ڈاکٹروں کی’ ایڈ وائزی‘ کو مدنظر رکھ کر انجمن اوقاف جامع مسجد نے سردست جامع مسجد میں نہ صرف نماز جمعہ بلکہ نماز تراویح بھی موقوف کردی ہے ۔ تاہم حالات سازگار ہوتے ہی جامع مسجد میں حسب سابق نمازوں کا اہتمام ہوگا ۔ لہٰذا مسلمانوں کو تلقین کیا جاتا ہے کہ وہ پنچگانہ نمازوں کے ساتھ ساتھ تراویح کی نماز بھی اپنے اپنے گھروں میں ہی پڑھیں اور اللہ رب العزت سے اس سنگین وبا کے خاتمہ کیلئے دعائیں کریں ۔

یہاں یہ بات قابل ذکر ہے کہ کورونا وائرس کے باعث احتیاطی تدابیر کو مدنظر رکھتے ہوئے مسجد الحرام اور مسجد نبوی;248; میں نماز تراویح کو10 رکعت تک محدود کردیا گیا ہے ۔ عرب خبر رساں ادارے کے مطابق حرمین جنرل پریذیڈنسی کےسربراہ اعلی شیخ ڈاکٹر عبدالرحمان السدیس نے اپنے ایک بیان میں بتایا تھا کہ دونوں مساجد میں رمضان کے دوران نمازیوں پر پابندی برقرار رہےگی اور احتیاطی اقدامات کے تحت اس سال رمضان کے دوران اعتکاف بھی نہیں ہوگا ۔

سربراہ اعلیٰ شیخ ڈاکٹر عبدالرحمان السدیس نے کہا تھاکہ تراویح کی رکعت 20 کے بجائے 10 ہوں گی جسے دو امام پڑھائیں گے جن میں سے پہلا امام6 رکعت اور دوسرا امام 4 رکعت اور وتر پڑھائیں گے، تہجد کی نماز بھی ہوگی جب کہ ختم قرآن 29 ویں شب کو ہوگا ۔