جموں وکشمیر نے ہندوستان کیساتھ مشروط الحاق کیا تھا
جیلوں اور گھر وں میں نظربند سیاسی لیڈران کی رہائی، 5اگست کے فیصلوں کو واپس لینے کیلئے قرارداد منظور

سرینگر: نیشنل کانفرنس نے کہا ہے کہ جموں وکشمیر میں جمہوریت نام کی کوئی چیز موجود نہیں، یہاں لوگ روز مررہے ہیں، نوجوان آئے روز موت کیبھینٹ چڑھ رہے ہیں اور مرکزی حکومت جھوٹے دعوے کررہی ہے کہ یہاں سب کچھ ٹھیک اور قابو میں ہے۔

پارٹی کے معاون جنرل سکریٹری ڈاکٹر شیخ مصطفےٰ کمال نے کہا کہ جموں وکشمیر نے ہندوستان کے آئین سے اپنا آئین حاصل کیا تھا، ہماری ریاست باقی ریاستوں کی طرح ملک میں ضم نہیں ہوئی تھی بلکہ مشروط الحاق کیا تھا۔

کشمیر نیوز سروس کے مطابق نوائے صبح کمپلیکس سرینگرمیں جمعرات کو مرزا محمد افضل بیگ اور حاجی غلام محی الدین شاہ کو برسوں پر خراج عقیدت پیش کرنے کیلئے منعقدہ ایک اجلاس سے خطاب ڈاکٹر شیخ مصطفےٰ کمال نے کہا’جموں وکشمیر نے ہندوستان کے آئین سے اپنا آئین حاصل کیا تھا، ہماری ریاست باقی ریاستوں کی طرح ملک میں ضم نہیں ہوئی تھی بلکہ مشروط الحاق کیا تھا، لیکن بدقسمتی اس بات ہے کہ نئی دلی میں براجمان حکمران یہ بات تسلیم کرنے کیلئے تیار نہیں اور انہوں نے غیر جمہوری اور جبری طریقہ کار اختیار کرکے ہماری خصوصی پوزیشن کو ختم کردیا‘۔ان کا کہناتھا ’جس آئین میں جموں وکشمیر کے عوام کی رائے کے بغیر ترمیم لانا بھی ممکن نہیں تھا اُسے بھاجپا حکومت نے غیر آئینی طور پر ختم کردیا اور جموں و کشمیر کے عوام کو کانوں کان خبر نہیں رکھی گئی‘۔

ڈاکٹر کمال نے کہا کہ افسوس اس بات ہے کہ نیشنل کانفرنس کے سربراہ ڈاکٹر فاروق عبداللہ، عمر عبداللہ اور حسنین مسعودی ایک روز قبل وزیر اعظم سے ملے اور انہوں نے وہاں پر یقین دہانی کرائی کہ وہ اس بارے میں سوچ بھی نہیں رہے ہیں اور ہم جموں و کشمیر میں الیکشن کی تیاری کررہے ہیں جبکہ یہاں کے گورنر بھی آخری پل تک جھوٹ بولتے رہے۔ انہوں نے کہا کہ مرکزی حکومت نے صرف جموں وکشمیر کے عوام کو ہی نہیں بلکہ پورے ملک کے عوام کو دھوکہ دیا جبکہ بھاجپا حکومت نے جموں وکشمیر کے آئین کے بار ے میں ملک کے عوام کو گمراہ کیا اور اسے بھی مذہبی رنگت دی۔

انہوں نے کہا کہ اب یہ معاملہ سپریم کورٹ میں ہے اور مرکز کو اس غیر آئینی اقدام کا جواب سپریم کورٹ میں دینا پڑے گا۔ان کا کہناتھا کہ آئین اور جمہوریت کی بالادستی کو مقدم رکھنے کا کام اب سپریم کورٹ میں ہے اور عوام کی نظریں ملک کی سب سے بڑی عدالت پر مرکوز ہیں۔ انہوں نے کہا کہ یہ حق اور باطل کی لڑائی ہے اور آخر پر حق کی ہی جیت ہوتی ہے۔

نیشنل کانفرنس نے بیش بہا قربانیاں دیکر اقتدار اور اختیار کو عوام تک منتقل کیا ہے اور عوام کو ہی جموں وکشمیر پر سرداری کا حق ہے۔ڈاکٹر کمال نے کہا کہ بھاجپانے مسلمانوں کیخلاف اعلان جنگ کر رکھا ہے،مسلمانوں کو نشانہ بنانے کیلئے بہانے ڈھونڈے جارہے ہیں، ملک میں اس وقت فرقہ پرستی کی لپیٹ میں آگیا ہے،گاندھی نے بھی اسی فرقہ پرستی کیخلاف آواز اُٹھائی اور اگلے ہی روز اُسے قتل کیا گیا۔

ڈاکٹر کمال نے کہا بھاجپا ملک کو مذہب کے نام پر بانٹ رہی ہے جو ملک کی سالمیت، جمہوریت اور آزادی کیلئے خطرہ ہے‘۔اجلاس میں پارٹی لیڈران محمد سعید آخون اور ایڈوکیٹ شوکت احمد میر نے ایک قرارداد پیش کی۔ جس میں جیلوں اور گھروں میں نظربند تمام سیاسی لیڈران کی فوری رہائی اور جموں وکشمیر میں 5اگست کے بعد لئے گئے فیصلوں کو واپس لینے کا مطالبہ کیا گیا ہے۔ قرارداد کو شرکاء نے یک زبان ہوکر منظور کیا۔

اجلاس میں دیگر لیڈران کے علاوہ پارٹی لیڈر احسان پردیسی، سید توقیر اور غلام نبی بٹ بھی موجود تھے۔اجلاس میں مرزا محمد افضل بیگ اور خواجہ محی الدین شاہ کی برسی پر اُن کو خراج عقیدت پیش کیا گیا۔ مقررین نے دونوں رہنماؤں کے بے مثال سیاسی وسماجی خدمات پر روشنی ڈالی اور مقررین نے کہا کہ مرحومین نے اپنے عظیم قاید مرحوم شیخ صاحب کے تئیں جو وفاداری کی وہ ہمارے لئے مشعل راہ ہے۔

اجلاس میں نائب صدر صوبہ محمد سعید آخون، صوبائی سکریٹری ایڈوکیٹ شوکت احمد میراور ضلع صدر سرینگر پیر آفاق احمدبھی موجود تھے۔ اجلاس میں کورونا وائرس کے پیش نظر تمام احتیاطی تدابیر اپنائے گئے تھے اور پروٹوکول کے مطابق شرکاء کے بیٹھنے کا انتظام کیا گیا تھا۔