بھارت کا چین کو پیغام
فوجی افسران سے لی سرحدی صورتحال پر بریفنگ،فوجی جوانوں سے کیا خطاب کہا ’توسیع پسند طاقتیں یا تو ہار گئیں یا واپس گئیں‘
خبراردو:-
سرینگر،لہیہ: ہند۔چین کے درمیان جاری سرحدی کشیدگی اور تناؤ کے بیچ جمعہ کو اچانک اور غیر متوقع طور پر وزیر اعظم ہند نریندر مودی لہیہ لداخ پہنچ گئے،جہاں انہوں نے سرحدی صورتحال کے حوالے سے فوجی افسران سے بریفنگ لی۔ یک روزہ ”سر پرائز دورے‘‘ کے دوران نریندر مودی نے فوجی اہلکاروں سے خطاب کرتے ہوئے کہا کہ توسیع پسندی کا دور ختم ہوگیا کیونکہ توسیع پسند طاقتیں یا تو ہار گئی ہیں یا انہیں واپس جانے کیلئے مجبور ہونا پڑا ہے۔

انہوں نے فوجی جوانوں سے مخاطب ہوکر کہا’آپ کا جذبہ ہمالیہ کی بلندیوں سے بھی اونچا ہے‘۔کشمیر نیوز سروس کے مطابق وزیر اعظم ہند نریندر مودی نے جمعہ کی صبح لہیہ لداخ پہنچ کر سب کو حیران کردیا۔اچانک اور غیر متوقع دورے کے دوران جہاں اعلیٰ فوجی عہدیداروں نے انہیں تازہ ترین سرحدی صورتحال کی تفصیلات فراہم کیں۔

وزیر اعظم ہند کے ہمراہ چیف آف ڈیفنس اسٹاف جنرل، بپن راوت اور فوج کے سربراہ، جنرل منوج مکند ناروانے بھی تھے۔ قابل ذکر ہے کہ نریندرمودی نے یہ دورہ اس وقت کیا، جب چین اور ہندوستان کے درمیان حقیقی کنٹرول لائن پر ماہ مئی سے کشیدگی جاری ہے جس نے حالیہ دنوں کے دوران شدت اختیار کی ہوئی ہے۔ اس تناظر میں وزیر اعظم ہند کا یہ اچانک دورہ انتہائی اہمیت کا حامل قرار دیا جارہا ہے۔

دفاعی ترجمان نے بتایا کہ وزیر اعظم جمعہ کی صبح حقیقی کنٹرول لائن پر”نمو نامی فارورڈ ایریا“اچانک پہنچے اور وہاں فوج، فضائی فورس اور آئی ٹی بی ٹی کے اہلکاروں کے ساتھ بات چیت کی۔ انہوں نے کہا کہ وزیر اعظم کو فوج کے اعلیٰ عہدیداروں نے حقیقی کنٹرول لائن کی تازہ ترین سر حدی صورتحال کے حوالے سے مکمل تفصیلات فراہم کیں۔ ان کا کہناتھا کہ اس موقع وزیر اعظم فوجی جوانوں سے بھی ملے اور انہیں مشکل حالات میں جانفشانی سے فرائض انجام دینے پر حوصلہ افزائی کی۔

https://www.facebook.com/Khabarurdu/videos/270980927679110/?t=1

یاد رہے کہ مرکزی وزیر دفاع راجناتھ سنگھ کا جمعہ کے روز متوقع دورہ لیہہ موخر کیا گیا۔اس سے قبل آرمی چیف جنرل ناروانے نے 24 جون کو مشرقی لداخ میں حقیقی کنٹرول لائن کا دورہ کر کے موجودہ زمینی صورتحال کا جائزہ لیا تھا۔ واضح رہے کہ لداخ میں حقیقی کنٹرول لائن پر15 اور16 جون کی درمیانی شب کو چین اور بھارت کی افواج کے درمیان شدید جھڑپ ہوئی جس میں ایک کرنل سمیت 20 ہندوستانی فوجی اہلکار ہلاک جبکہ درجنوں دیگر زخمی ہوگئے تھے۔

چین کا بھی بڑی تعداد میں جانی نقصان ہوا تھا لیکن وہ اسے تسلیم کرنے سے انکاری ہے۔ایک میڈیا رپورٹ کے مطابق فوج نے موجودہ صورتحال اور کسی بھی دفاعی کارروائی کے لئے جنگی ساز و سامان بشمول توپیں، میزائل، ٹینک اور لڑاکا طیارے سری نگر۔لیہہ شاہراہ اور بھارتی فضائیہ کے ہوائی جہازوں کے ذریعے حقیقی کنٹرول لائن کے نزدیک پہنچا دیے ہیں۔ تاہم دفاعی ذرائع کا کہنا ہے کہ لداخ میں جنگی ساز و سامان کو دفاع کے لئے لایا جارہا ہے جنگ کے لئے نہیں۔

ہندوستان مذاکرات کے ذریعے مسئلے کا حل تلاش کرنے کے حق میں ہے۔لداخ میں وزیر اعظم نے سیکیورٹی بریفنگ حاصل کرنے کے بعد فوجی اسپتال کا دورہ کیا،جہاں انہوں نے زخمی اہلکاروں کی عیادت کی۔ایک میڈیا رپورٹ کے مطابق اس دورے کے دوران وزیرا عظم ہند نریندرمودی نے چین پر نشانہ سادھتے ہوئے کہا کہ توسیع پسندی کا دور ختم ہوگیا ہے، یہ تری کا دور ہے۔ان کا کہناتھا کہ تاریخ گواہ ہے کہ توسیع پسند طاقتیں یا تو ہار گئی ہیں یا انہیں واپس جانے کیلئے مجبور ہونا پڑا ہے۔

وزیر اعظم نے کہا کہ جو کمزور ہیں وہ کبھی بھی امن کی پہل نہیں کرسکتے، بہادری کیلئے امن ضروری ہے۔ انہوں نے کہا کہ جنگ ہو یا امن، جب بھی ضرورت پڑی ہے، دنیا نے ہمارے بہادروں کی جیت اور امن کی کوششوں کو دیکھا ہے،ہم نے انسانیت کی بھلائی کیلئے کام کیا ہے۔جوانوں سے خطاب کرتے ہوئے وزیر اعظم مودی نے کہا کہ آپ کا جذبہ ان اونچائیوں سے زیادہ ہے جہاں آپ تعینات ہیں۔ وزیر اعظم نے کہا کہ خود کفیل ہندوستان کا عہد آپ کی قربانی اور دلیری کی وجہ سے مزید مضبوط ہوتا ہے۔

لیہہ میں وزیر اعظم مودی نے کہا کہ14 کور کی بہادری کے بارے میں ہر جگہ بات کی جائے گی، آپ کی بہادری اور دلیری کے قصے ملک کے ہر گھر میں گونج رہے ہیں۔ انہوں نے کہا کہ بھارت ماتا کے دشمنوں نے آپ کی آگ کو مزید بھڑکا دی ہے۔