خبراردو:-

سرینگر:کریر ی بارہمولہ میں سوموار کے روز پولیس وسی آر پی ایف کی مشترکہ پارٹی پر شدید فائرنگ کے دوران شروع ہوئی شدید جھڑپ اور جنگجو مخالف آپریشن منگلوار کو مسلسل دوسرے روز بھی دن بھر جاری رہا۔دن بھر جاری رہنے والے اس آپریشن کے دوران علاقے میں موجود مزید جنگجوؤں اور فورسز کے درمیان وقفے وقفے سے گولیوں کا تبادلہ ہوتا رہا۔

کشمیر نیوز سروس کو ذرائع سے معلوم ہوا ہے کہ کریری بارہمولہ میں سوموار کو مسلح حملے کے بعد جوابی کارروائی کے بطور شروع کیا گیا ’کارڈن اینڈ سرچ آپریشن‘ منگلوار کو بھی جاری رہا۔

ذرائع نے بتایا کہ فورسز پارٹی پر فائرنگ کرکے راہ فرار اختیار کرنے والے جنگجوؤں کو ڈھونڈ نے نکالنے کیلئے سوموار کو آپریشن شروع کیا گیا،جس دوران سوموار کو ہی ایک جھڑپ کے دوران لشکر طیبہ کے ایک اعلیٰ کمانڈر سمیت 2جنگجو مارے گئے جبکہ علاقے میں مزید جنگجوؤں کی موجودگی کے حوالے سے تلاشی آپریشن رات دیر گئے تک جاری رہا۔

تاریکی کے باعث اس آپریشن کو منگل کی صبح تک ملتوی کیا گیا۔ذرائع نے بتایا کہ روشنی کی پہلی کرن زمین پر پڑنے کیساتھ ہی منگلوار کو فوج وفورسز نے علاقے میں دوبارہ آپریشن شروع کیا۔ذرائع نے بتایا کہ فورسز اُس مقام تک پہنچنے میں کامیاب رہی،جہاں جنگجوؤں نے پنا ہ لی تھی۔ذرائع نے بتایا کہ اس دوران طرفین کے مابین دوبارہ گولیوں کا سلسلہ شروع ہوا،جو وقفے وقفے سے کئی گھنٹوں تک جاری رہا۔

ذرائع نے بتایا کہ طویل ترین آپریشن کے بعد فورسز نے جنگجوؤں کی اُس کمین گاہ بارود سے اُڑا دیا،جس میں جنگجو ؤں نے پنا ہ لی تھی۔ذرائع نے بتایا کہ اس کارروائی میں ایک اور جنگجو مارا گیا اور اس طرح گزشتہ روز جاری اس آپریشن میں 3جنگجو مارے گئے۔تاہم آزاد ذرائع نے ابھی اسکی تصدیق نہیں کی اور ناہی جائے جھڑپ سے لاش برآمد کی گئی تھی علاقے میں آپریشن جاری ہے۔تاہم ذرائع نے بتایا کہ تیسرے مارے گئے جنگجو کے بارے میں بتایا جاتا ہے کہ وہ غیر مقامی ہے۔

یاد رہے کہ سوموار کو مسلح حملے اور بعد میں شروع ہوئی جھڑپ کے دوران6افراد ہلاک ہوئے جن میں 2سی آر پی ایف اہلکار،ایک پولیس اہلکار،ایک فوجی اہلکار اور دو لشکر طیبہ جنگجو شامل ہیں۔ ڈائریکٹر جنرل آف پولیس دل باغ سنگھ کے مطابق جنگجو کمانڈرسجاد حیدر مرکزی علاقوں میں سرفہرست 10کمانڈروں میں شامل تھا۔ ڈی جی پی نے بتایا کہ وہ 2016 میں عسکری تنظیم میں شامل ہوا اورحزب المجاہدین کے سابق کمانڈربرہان وانی کی طرح سرگرم تھا۔

پیر کے روز جموں و کشمیر پولیس کے خصوصی پولیس افسر (ایس پی او)، ڈسٹرکٹ پولیس بارہمولہ کے مظفر علی، کانسٹیبل لوکیش شرما اور119 بٹالین سی آر پی ایف کے کانسٹیبل خورشید خان ہلاک ہوگئے۔ادھر بعض میڈ یا رپورٹس کے مطابق سوموار کی شام کو ہی جھڑپ کے نزدیک نامعلوم مقام سے فورسز پارٹی پر فائرنگ کی گئی،جس میں فوج کے دو اہلکار زخمی ہوئے جن میں سوموار کو اہی ایک اہلکار فوجی اسپتال میں زخموں کی تاب نہ لاکر دم توڑ بیٹھا جبکہ دوسرا اہلکار منگلوار کی دوپہر کو زخموں کی تاب نہ لا کر دم توڑ بیٹھا۔

تاہم دفاعی ترجمان نے ان رپورٹس کی تصدیق یا تردید نہیں کی۔ اس دوران مسلح حملے میں ہلاک ہونے والے پولیس اور سی آر پی ایف اہلکاروں کے اعزاز میں تعزیتی وگلباری کی ایک تقریب منعقد ہوئی،جس میں ڈی جی(آپریشن) سی آر پی ایف ذولفقار اور لیفٹیننٹ گور نر کے مشیر کے علاوہ دیگر فورسز افسران نے شرکت کی۔