اُن سینئر پارٹی رہنماؤں کو شرکت کیلئے مدعو کیا گیا جو حکومت کے مطابق آزاد ہیں
خبراردو:-

سرینگر:نیشنل کانفرنس نے کہا ہے کہ پارٹی نے جموں وکشمیر کی حکومت کی جانب سے عدالت عالیہ میں اپنائے گئے موقف کا جائزہ لیتے ہوئے آج یعنی جمعرات کوشام 5بجے پارٹی کے 4سینئر عہدیداران کا ایک غیر معمو لی اجلاس طلب کیا ہے۔

اس متوقع اجلاس میں اُن سینئر پارٹی رہنماؤں کو شرکت کیلئے مدعو کیا گیا،جو حکومت کے مطابق خانہ نظر بند نہیں ہیں اور نقل وحمل کے حوالے سے آزاد ہیں۔کشمیر نیوز سروس کے مطابق نیشنل کانفرنس کے صدر ڈاکٹر فاروق عبداللہ اور پارٹی کے نائب صدر عمر عبداللہ نے پارٹی کے مختلف رہنماؤں کی خانہ نظر بندی کو عدالت عالیہ میں حبس بیجا کے تحت چیلنج کیا ہے،تاکہ اُنکی آزاد نقل وحرکت کو یقینی بنایا جاسکے۔

نیشنل کانفرنس کے مطابق اس سلسلے میں ایک سماعت کے دوران حکومت نے عدالت عالیہ کو تحریری طور بتایا ہے کہ جن لیڈران کی خانہ نظر بندی کے حوالے سے یہاں عرضیاں دائر کی گئی ہیں،وہ لیڈرخانہ نظر بند نہیں ہیں اور وہ ضروری سیکیورٹی انتظامات کے تحت آزاد ونقل حمل کے حوالے سے آزاد ہیں۔اس سلسلے میں بدھ کو نیشنل کانفرنس نے اس کا نوٹس لیا اور حکومت موقف کو جاننے کیلئے آج یعنی جمعرات بتاریخ20اگست کو ایک غیر معمولی اجلاس طلب کیا ہے۔

پارٹی کے ایک عہدیداران نے بتایا کہ اب جبکہ حکومت نے عدالت عالیہ میں واضح کیا کہ نیشنل کانفرنس کا کوئی بھی رہنما نظر بند نہیں ہے،کے حوالے سے ایک اجلاس طلب کیا گیا اور پارٹی کے صدر ڈاکٹرفاروق عبداللہ نے اُن پارٹی کے سینئر رہنما ؤں جن میں علی محمد ساگر،عبدالرحیم راتھر،محمد شفیع اوڑی اور محمد اسلم وانی شامل ہیں،کو 20اگست کی شام5بجے متوقع اجلاس میں شرکت کرنے کی باضابط طور پر دعوت دی ہے۔پارٹی کا کہنا ہے کہ موجودہ کورونا بحران کو ملحوظ نظر رکھ کر یہ متوقع اجلاس صرف پارٹی کے4رہنماؤں پر مشتمل ہوگا۔

پارٹی کے ترجمان کا کہنا ہے کہ متوقع اجلاس کے دوران کووڈ۔19کے تمام ایس اوپیز کا خاص خیال رکھا جائیگا۔انہوں نے کہا کہ پارٹی پرامید ہے کہ اب یہ اجلاس کامیابی سے منعقد ہو گا اور اس میں وہ رہنما ضرور شرکت کریں گے،جو حکومت کے مطابق نظر بند نہیں بلکہ آزاد ہیں۔ترجمان نے ایک بیان بھی جاری کیا جس میں بتایا گیا ہے کہ نیشنل کانفرنس نے حکومت کے اُس موقف کا نوٹس لیا ہے جو پارٹی صدر اور نائب صدر کی طرف سے پارٹی کے مختلف رہنماؤں کی غیر قانونی خانہ نظربندی ختم کرنے کو یقینی بنانے کے لئے حبس بیجا کے تحت دائر عرضی کے معاملات میں حکومت نے ہائی کورٹ کے سامنے اختیار کیا ہے۔

عدالت عالیہ میں حکومت کی طرف سے دائر جواب کا مطالعہ کرنے کے بعد پارٹی نے اس بات کا نوٹس لیا ہے کہ حکومت نے اپنے جواب میں کہا ہے کہ نیشنل کانفرنس کا کوئی بھی لیڈر نظربند نہیں ہے اور تمام لیڈران ضروری سیکورٹی انتظامات کے تحت کہیں بھی آنے جانے کیلئے آزاد ہیں۔

عدالت عالیہ میں اختیار کئے گئے حکومتی مؤقف پر مکمل طورپر انحصار کرتے ہوئے نیشنل کانفرنس کے صدر ڈاکٹر فاروق عبداللہ نے پارٹی کے سینئر لیڈران بشمول علی محمدساگر، عبدالرحیم راتھر، محمد شفیع اوڑی اور ناصر اسلم وانی کو 20اگست2020شام کے 5بجے اپنی رہائش گاہ پر ایک میٹنگ کیلئے مدعو کیا ہے اور توقع کی ہے کہ حکومت اس بار کوئی رکاوٹ کیلئے ہیلے بہانے یا بے تکی باتیں نہیں کرے گی۔

پارٹی موجودہ وبائی صورتحال کو ذہن میں رکھے ہوئے ہے اور احتیابی تدابیر کو ملحوظ نظر رکھتے ہوئے فی میٹنگ 4ممبران کے درمیان کی جائے گی اور تمام متعلقین کی طرف سے ہر قسم کے رہنما خطوط پر سختی سے عملدرآمد ہوگا۔ پارٹی کو امید ہے کہ حراست میں رکھے گئے ممبروں کی آزادی اب مطلق ہے اور اجلاس مقررہ دن پر کامیابی کے ساتھ منعقد ہوگا۔یاد رہے کہ گذشتہ برس5اگست جموں وکشمیر کی تقسیم وتنظیم نو کے فیصلہ جات سے قبل سینکڑوں سیاسی رہنماؤں کو حراست میں لیکر نظر بند رکھا گیا،جن میں سے اب بیشتر خانہ نظر بند ہیں۔