’5 دنوں میں ڈومیسائل اسناد اجرا کی جائیں‘
جموں وکشمیر حکومت کی تازہ ہدایت،جنرل ایڈمنسٹریشن ڈیپارٹمنٹ نے جار ی کیا حکمنامہ
خبراردو:-

سرینگر:ڈومیسائل اسناد کی اجرائی میں مزید تیزی لاتے ہوئے جموں وکشمیر حکومت نے منگلوار کو تازہ ہدایت جاری کرتے ہوئے متعلقہ محکمہ سے کہا ہے کہ وہ جموں وکشمیر کے مستقل رہائشی اسناد (پی آر سی) رکھنے والوں اور مہاجرین کو5ورکنگ ایام میں ہی ڈومیسائل اسناد جاری کرے۔

اس سلسلے میں جنرل ایڈمنسٹریشن ڈیپارٹمنٹ کی طرف سے باضابط طور پر ایک حکمنامہ بھی جاری کیا ہے۔کشمیر نیوز سروس کے مطابق جنرل ایڈمنسٹریشن ڈیپارٹمنٹ کی طرف سے جاری ایک حکمنامے زیر نمبر GAD/Mtg/RB-IV/9/2019بتاریخ 25اگست2020میں کہا گیا ہے’ضابطہ 5کی شق ایک (اے) اور 4 (اے) کے تحت ڈومیسائل سند کے اہل فرد کو صرف مستقل رہائشی سند کی بنیاد پر ڈومیسائل سرٹیفکیٹ اجرا کی جائے گی اور اس کی متعلقہ حکام کی طرف سے کوئی مزید تصدیق یا تفتیش نہیں ہوگی‘۔

حکمنامے میں مزید کہا گیا ہے کہ ایسے کیسز میں متعلقہ حکام درخواست موصول ہونے کے بعد 5 ورکنگ ایام(کام کرنے کے 5دن) میں ڈومیسائل اسناد جاری کریں گے۔نئے قانونِ اقامت کے تحت غیر مقامی افراد کو بھی کشمیر کی شہریت کی سند دی جا رہی ہے۔

ایک میڈیا رپورٹ کے مطابق اس قانون کے تحت اب تک چار لاکھ کے قریب شہریت کی سندیں جاری کی جا چکی ہیں۔ مبینہ طور پر ان میں ایک بڑی تعداد ان لوگوں کی ہے جو ریاست کے مستقل باشندے نہیں ہیں۔رپورٹس کے مطابق دہائیوں قبل سابقہ مغربی پاکستان سے ہجرت کر کے جموں کے مختلف سرحدی علاقوں میں سکونت اختیار کرنے والے ہزاروں ہندو پناہ گزینوں (مہاجرین) کو بھی مستقل رہائشی ہونے کی اسناد جاری کی جا رہی ہیں۔

میڈیا رپورٹ کے مطابق سول سروسز آئی اے ایس میں شامل بعض افسران، ان کے اہلِ خانہ، بالمیکی سماج خاکروبوں اور گورکھا برادری کے اراکین کو بھی ڈومسائل سرٹیفیکیٹ جاری کیے گئے ہیں۔مرکزی حکومت نے گزشتہ سال5 اگست کو جموں و کشمیر کی خصوصی آئینی حیثیت ختم کر کے ریاست کو براہِ راست مرکز کے کنٹرول والے دو حصوں میں تقسیم کیا تھا۔ اس کے بعد جموں اور وادی کشمیر جو اب یونین ٹریٹری آف جموں اینڈ کشمیر کہلاتے ہیں، کے لیے نیا قانونِ اقامت تشکیل دیا گیا ہے۔نئے قانونِ اقامت نے1927 سے لاگو ’اسٹیٹ سبجیکٹ لا‘کی جگہ لے لی، اسٹیٹ سبجکٹ لا ء کے تحت جموں و کشمیر کے پشتنی یا مستقل باشندے ہی غیر منقولہ جائیدار خرید سکتے تھے۔ جب کہ سرکاری ملازمتیں بھی مستقل باشندوں کیلئے مخصوص تھیں۔

اس قانون کے تحت جموں وکشمیرکے مستقل باشندوں کو ایک خصوصی دستاویز جاری کی جاتی تھی جو’اسٹیٹ سبجیکٹ سرٹیفیکیٹ‘ کہلاتی تھی۔حکام نے کچھ عرصہ قبل ’اسٹیٹ سبجیکٹ سرٹیفیکیٹ‘ جاری کرنا بند کر دیے تھے۔جموں وکشمیر کو آئین ہند کی دفعہ370 کے تحت خصوصی حیثیت حاصل تھی جسے 1950 میں ایک صدارتی فرمان کے ذریعے آئین میں شامل کیا گیا تھا۔

دفعہ 370 کی منسوخی کے ساتھ ہی اس کی ایک ذیلی شق دفعہ35(اے) بھی ختم ہو گئی تھی۔ دفعہ 35(اے) کے تحت جموں وکشمیر میں زمینیں اور دوسری غیر منقولہ جائیداد خریدنے، سرکاری نوکریاں اور وظائف حاصل کرنے، ریاستی اسمبلی کے لیے ووٹ ڈالنے اور دوسری مراعات کا قانونی حق صرف اس کے مستقل باشندوں کو حاصل تھا۔دفعہ 370 اور دفعہ35(اے) کی منسوخی کے بعد نہ صرف ریاست کا اپنا آئین، جھنڈا اور ترانہ ختم ہو گئے ہیں بلکہ اب بھارت کے آئین کے ساتھ ساتھ پارلیمان سے پاس کیے جانے والے قوانین کا جموں وکشمیر پر مکمل اور براہِ راست اطلاق ہو رہا ہے۔نئے قانونِ اقامت کے تحت جموں وکشمیر میں 7سے 15 سال تک رہنے والا کوئی بھی شخص ڈومیسائل سرٹیفیکیٹ یعنی مستقل اقامت کی سند حاصل کرنے کا حق دار ہے۔

یہ سند متعلقہ شخص کو جموں و کشمیر میں غیر منقولہ جائیداد کا مالک بننے، سرکاری نوکری اور دوسری مراعات حاصل کرنے کا اہل بناتی ہے۔رواں برس اپریل میں مرکزی حکومت کے جاری اعلامیے کے مطابق کوئی بھی شخص جو جموں و کشمیر میں 15 سال تک رہا ہو یا جس نے یہاں سات برس تک تعلیم حاصل کی ہو اور10ویں اور12ویں جماعت کے امتحانات میں یہاں قائم کسی ادارے سے حصہ لیا ہو۔ وہ ڈومیسائل سرٹیفیکیٹ کا حق دار اور جموں و کشمیر میں سرکاری نوکری کے لیے درخواست دینے کا اہل ہوگا۔

اعلامیے کے مطابق مرکزی حکومت کے وہ عہدیدار، افسران، بینک ملازمین، قومی سطح کی جامعات کے وہ عہدیدار وغیرہ جنہوں نے جموں وکشمیر میں 10 برس تک ملازمت کی ہوجموں و کشمیر کا ڈومیسائل حاصل کر سکتے ہیں۔ علاوہ ازیں مذکورہ افراد کے بچے بھی اقامتی سند حاصل کرنے کے اہل ہوں گے۔حال میں اخبارات میں شائع میں ایک رپورٹ کے مطابق ضلع جموں میں 14ہزار833 غیر مقامی افراد میں ڈومیسائل اسناد اجر ا کی گئیں ہیں جبکہ مجموعی طور پر ابتک 1لاکھ55ہزار358 شہریوں کے حق میں ڈومیسائل ڈومسائل اسناد اجراکی گئیں ہیں۔

صوبائی کمشنر جموں وجے کمار شرما نے کہا ہے کہ انتظامیہ کی کوشش ہے کہ شہریوں کو ڈومیسائل اسناد بغیر کسی تاخیر اور بغیر کسی رْکاوٹ کے فراہم کی جاسکیں۔انہوں نے کہا کہ محکمہ مال کے افسران اپنے وارڈوں میں جاکر پی آر سی ہولڈروں کو موقعے پر ہی ڈومیسائل سرٹیفکیٹ اجرا کرتے ہیں جبکہ غیر مقامی شہریوں کو پہلے مطلوبہ دستاویزات داخل کرنی پڑتی ہیں اور جانچ پڑتال کے بعد ہی ان کے حق میں ڈومیسائل سرٹیفکیٹ اجرا ہوتی ہیں۔

شرماء نے کہا ہے کہ غیر مقامی شہریوں کی یہاں پر گزارے گئے وقت کی مکمل جانچ ہوتی ہے اور اس سلسلے میں مطلوبہ اسناد کی جانچ پڑتال ہوتی ہے اور متعلقہ افسران موقعے پر جاکر مشاہدہ کرتے ہیں۔ انہوں نے کہا کہ موقعے پر اسناد کی اجرائی صرف پی آر سی ہولڈروں کیلئے ہی ہے۔ دریں اثناء تیز رفتار انٹر نیٹ کی عدم دستیابی کے سبب افسران کو ڈومیسائل اسناد کی اجرائی میں مشکلات درپیش ہیں۔کئی افسران نے بتایا کہ 2۔جی انٹر نیٹ کے سبب اُنہیں (او پی ٹی)