معمو لات زندگی متاثر،کئی رابطہ سڑکیں بند
ہوائی سروسز میں خلل، جموں ائر پورٹ سے کئی اڑانیں منسوخ،مسافروں کو شدید مشکلات کا سامنا

سرینگر:’سال نو کی آمدپر وادی کشمیر میں درمیانہ درجے کی برفباری‘سے معمولات زندگی متاثر ہوگئے جبکہ کئی رابطہ سڑکیں بند ہوگئیں۔ادھر گہری دھند اور خراب موسم کی وجہ سے سرینگر اور جموں میں ہوائی سروسز میں بھی خلل پڑا جسکی وجہ سے مسافروں کو مشکلات کا سامنا کرنا پڑا۔

کشمیر نیوز سروس کے مطابق محکمہ موسمیات کی پیش گوئی کے عین مطابق وادی کشمیر میں منگل کے روز دارالحکومت سرینگر سمیت شمال وجنوب کے سبھی 10اضلاع میں برفباری ہوئی۔برفباری سے اگرچہ مفی درجہ حرارت سے لوگوں نے کسی حد تک راحت کا سانس لیا،تاہم برفباری سے ہر طرح کے معمولات زندگی متاثر ہوگئے۔

سرینگر میں منگلوار کی علی الصبح سے ہلکی برفباری شروع ہونے لگی اور یہ سلسلہ دوپہر تک جاری رہا۔برفباری کے سبب سرینگر بھی سفید رنگ میں رنگ گیا۔سٹی رپورٹر کے مطابق سرینگر میں منگلوار کی صبح 7بجے برفباری کا سلسلہ شروع ہوا،جو مسلسل کئی گھنٹوں تک جاری رہا۔سرینگر میں برف کی ہلکی چادر بچھ گئی جسکے نتیجے میں قدرتی نظارے دلفریب تو ہوئے لیکن معمولات زندگی متاثر ہوئے۔

اس دوران وادی کے دیگر اضلاع سے بھی برفباری کی اطلاعات موصول ہوئی ہیں۔حکام کے مطابق شمالی کشمیر میں عالمی شہرت یافتہ سکینگ مرکز گلمرگ میں کم و بیش7 انچ تازہ برفباری ریکارڈ ہوئی ہے جبکہ جنوبی کشمیر میں واقع سیاحتی مقام پہلگام میں 3 انچ کے آس پاس برف باری درج کی گئی۔

ادھر شمالی کشمیر کے گریز میں بھی برف باری ہوئی اور وہاں 3 انچ تازہ برف ریکارڈ کی گئی ہے۔پیر پنچال خطے میں بھی برفباری ہوئی۔جواہر ٹنل کے آس پاس اور پتنی ٹاپ میں برفباری ہونے کی اطلاعات ہیں۔حکام نے کہا کہ اگر چہ جواہر ٹنل کے آس پاس بھی تازہ برف باری ہوئی ہے تاہم وادی کشمیر کو جموں سے ملانے والی شاہراہ پر ٹریفک کا نقل و حمل جاری ہے۔

محکمہ موسمیات کے مطابق پہلگام میں کم سے کم درجہ حرارت منفی3ڈگری سیلشیس اورگلمرگ میں منفی7.5ڈگری سیلشیس ریکارڈ کیا گیا ہے۔سرینگر میں رات کا درجہ حرارت 0.0ڈگری سیلشیس،گیٹ وے آف کشمیر میں رات کا درجہ حرارت منفی0.4ڈگری سیلشیس ریکارڈ کیا گیا،سیاحتی مقام جوکہ امرناتھ یاتریوں کا بیس کیمپ بھی ہے،میں کم سے کم درجہ حرارت منفی3.0ڈگری سیلشیس درج کیا گیا۔

سرحدی ضلع کپوارہ میں کم سے کم درجہ حرارت منفی1.0ڈگری سیلشیس،کوکرناگ میں منفی3.0ڈگری سیلشیس،جموں میں کم سے کم درجہ حرارت 3.7ڈگری سیلشیس،بانہال میں 0.4ڈگری سیلشیس،بٹوت میں رات کا درجہ حرارت منفی1.5ڈگری سیلشیس،کٹرا میں کم سے کم درجہ حرارت میں 4.5ڈگری سیلشیس اوربھدرواہ میں منفی1.9ڈگری سیلشیس ریکارڈ کیا گیا۔یہ رواں چلہ کلان کی پہلی وادی گیر برف باری ہے۔

وادی کشمیر میں منگل کی صبح چلہ کلان کے نویں روز جب لوگ گھروں سے باہر نکلے تو میدانی و بالائی علاقوں میں جم کر برف باری ہورہی تھی۔ بالائی علاقوں میں اگر چہ برف باری کا سلسلہ منگل کی علی الصبح ہی شروع ہوا تھا تاہم سری نگر میں قریب سات بجے صبح سے برف باری شروع ہوئی۔

صبح کے دس بجنے تک پوری وادی، میدانوں، پارکوں، صحنوں، اشجار سے لے کر مکانوں کے چھتوں تک، نے سفید چادر اوڑھ لی تھی تاہم میدانی علاقوں میں بارہ بجنے سے قبل ہی برف باری کا سلسلہ تھم گیا۔

اس قبل بالائی علاقوں میں کہیں کہیں درمیانہ درجے کی برف باری ہوئی تھی لیکن میدانی علاقوں موسم خشک ہی رہا تھا۔منگلوار کو وادی کے دیگر9اضلاع پلوامہ،کولگام،شوپیان،اننت ناگ،بڈگام،گاندر بل،کپوارہ،بانڈی پورہ اور بارہمولہ میں بھی برفباری ہوئی۔

اطلاعات کے پہاڑی علاقوں میں 6انچ سے لیکر ایک فٹ تک برفباری ہوئی۔محکمہ موسمیات کے مطابق وادی کشمیر میں 30 دسمبر سے موسم بہتر ہونے کی پیش گوئی کی ہے۔محکمہ موسمیات کے ایک ترجمان نے بتایا کہ وادی میں 30 دسمبر سے یکم جنوری تک موسم خشک رہنے کا امکان ہے۔

ہوائی سروسز میں خلل:

ایک اطلاع کے مطابق سرمائی دارالحکومت جموں میں منگل کو گہری دھند کی وجہ سے معمولات زندگی متاثر ہوئے یہاں تک کہ ہوائی سروس بھی متاثر ہوئی اور کئی اڑانیں منسوخ جبکہ سات میں تاخیرہوئی۔

جموں ائر پورٹ ڈائریکٹر پریاوت رنجن بیوریا کے مطابق دھند کے نتیجے میں کم روشنی کے باعث جموں ہوائی اڈے پرہوائی سروس پوری طرح بحال نہیں ہوسکی۔انہوں نے کہا کہ آج صبح چار اڑانوں کو منسوخ کیا گیا جبکہ کئی ایک میں تاخیر ہوئی۔

انہوں نے مزید کہا کہ صبح نو بجے جموں ائر پورٹ پر روشنی بہت ہی کم تھی تاہم بعد میں ایک بجے اس میں کچھ بہتری آئی۔ اس دوران کئی مسافروں جن میں ریاض بٹ بھی شامل ہیں، نے بتایا کہ وہ جموں سے سرینگر ”گو۔ائر“ نامی ہوائی جہاز سے سفر کرنے والے تھے اور اُنکی پرواز کا وقت 2بجکر20منٹ تھا،لیکن ائر پورٹ پر کئی گھنٹوں تک انتظار کرنے کے بعد پرواز منسوخ کرنے کا اعلان کیا گیا۔

ایک مسافر شو کت جان نے بتایا کہ وہ جموں سے سرینگر وستارا نامی پرواز سے سفر کرنے والے تھے،تاہم پرواز کے نمائندے نے ائر پورٹ کے مرکزی در وازے پر آکر قطار میں بیٹھے مسافر وں کو بتایا کہ جو مسافر اُنکی پرواز دوپہر2جموں سے سرینگر کی طرف سفر کرنے والے ہیں،اُنہیں اطلاع دی جاتی ہے کہ پرواز منسوخ کی گئی کیوں کہ دہلی ائر پورٹ سے پرواز نے اُڑان نہیں بھری۔

انہوں نے کہا کہ اس پرواز سے درجنوں افراد جموں سے سرینگر کی طرف سفر کرنے والے تھے،تاہم اُنہیں یہاں سے مایوس ہو کر واپس ہوٹلوں اور دیگر مقامات کی طرف رخ کرنا پڑا۔ادھر ذرائع سے معلوم کہ سرینگر ائرپورٹ سے بھی کئی پروازوں میں یا تو تاخیر ہوئی یا پھر منسوخ کی گئیں۔تاہم سرینگر ائر پورٹ کے ڈائریکٹر شرد کمار نے کوئی تفصیلات دینے سے احتراض کیا۔دریں اثناء کئی علاقوں سے لوگوں نے بتایا کہ برقی رو کی سپلائی متاثر ہوئی۔

اطلاعات کے مطابق کئی سرحدی اضلاع کے سرحدی علاقے ہیڈ کواٹروں سے کٹ کر رہ گئے کیوں کہ برفباری سے پیدا شدہ پھسلن کے باعث کئی رابطہ سڑکیں ٹریفک کی آواجاہی کے حوالے سے بند کی گئیں۔جن رابطہ سڑکوں کو بند کیا گیا،اُن گریز۔بانڈی پورہ،مژھل۔کپوارہ وغیرہ شامل ہے۔(کے این ایس)