تل ابیب، اسرائیلی وزیر اعظم بنیامین نیتن یاہو نے زخمی ہندوستانی کمرشل پائلٹ کیپٹن سمیت مچھر کو 174 مسافروں کی جانیں بچانے پر ’’ہیرو‘‘ قرار دیتے ہوئے کہا ہے کہ فلائی دبئی کی تل ابیب جانے والی پرواز پر دورانِ پرواز ہونے والے حملے میں ایران کے ملوث ہونے یا نہ ہونے کے بارے میں کچھ کہنا ابھی قبل از وقت ہے۔

فوکس نیوز کو دیے گئے ایک انٹرویو میں نیتن یاہو نے کہا کہ پرواز ایف زیڈ 1073 پر حملہ کرنے کے مشتبہ معاون پائلٹ سے سعودی عرب میں پوچھ گچھ کی جا رہی ہے اور بعد میں اسے متحدہ عرب امارات منتقل کیا جا سکتا ہے۔ ان کے مطابق اسرائیل تحقیقات پر گہری نظر رکھے گا اور ممکنہ طور پر اس میں حصہ بھی لے سکتا ہے۔

نیتن یاہو نے شواہد کے بغیر اس واقعے کو تہران سے جوڑنے سے گریز کیا، تاہم انہوں نے ایران سے لاحق وسیع تر خطرے پر زور دیا۔ انہوں نے کہا، ’’یہ کوئی راز نہیں کہ ایران بیرون ملک اسرائیلیوں کو نشانہ بنانا چاہتا ہے۔‘‘ انہوں نے مزید کہا کہ اسرائیلی انٹیلی جنس نے ایسے شواہد کا پتہ لگایا ہے کہ ایران کے حمایت یافتہ گروپ، خصوصاً حماس اور حزب اللہ، انتخابات سے قبل حملے کرنے کی کوشش کر رہے ہیں۔

تاہم فلائی دبئی کے واقعے کا اس کوشش سے کوئی تعلق تھا یا نہیں، یہ ابھی معلوم نہیں ہے۔ نیتن یاہو نے کہا، ’’میرے خیال میں ہمیں بہت جلد اس کا پتہ چل جائے گا۔‘‘

نیتن یاہو کے مطابق طیارے کے اسرائیل کے قریب پہنچنے پر صورتحال بگڑی۔ ایک پائلٹ نے دوسرے پر حملہ کیا اور اسے چاقو یا کسی نوکیلی چیز سے زخمی کیا۔ شدید خون بہنے کے باوجود زخمی کپتان سمیت مچھر نے کسی طرح کاک پٹ کا دروازہ کھول دیا، جبکہ طیارہ تیزی سے نیچے جا رہا تھا۔

مسافر الموگ اٹالی نے سی بی ایس نیوز کو بتایا کہ طیارہ 20 سے 30 سیکنڈ تک انتہائی تیزی سے نیچے گیا، پھر سنبھلا اور دوبارہ نیچے جانے لگا۔ اس کے بعد مسافروں نے طیارے کے اگلے حصے میں افراتفری دیکھی۔

قطار 16 میں بیٹھے اسرائیلی مسافر یانیو حیون کاک پٹ کی طرف دوڑے۔ طیارے کے اچانک جھٹکے سے وہ گر پڑے، تاہم طیارے کے عارضی طور پر متوازن ہونے پر وہ کاک پٹ میں داخل ہونے میں کامیاب ہوگئے۔ ان کے مطابق حملہ آور طیارے کے کنٹرولز کو جام کرنے کی کوشش کر رہا تھا۔ حیون نے پیچھے سے اسے ہٹایا، پائلٹ کی نشست سنبھالی اور کنٹرول اسٹک کو پیچھے کھینچا۔

اس کے بعد دو دیگر افراد نے حملہ آور کو قابو کرلیا، جبکہ مسافروں کے طور پر سفر کرنے والے آف ڈیوٹی عملے کے ارکان نے طیارے کو مستحکم کرنے میں مدد کی۔ طیارے کا رخ موڑ کر سعودی عرب کے تبوک میں بحفاظت اتارا گیا۔ بعد میں مسافروں کو دوسرے طیارے کے ذریعے تل ابیب پہنچایا گیا۔

نیتن یاہو نے بتایا کہ بعد میں انہوں نے حیون سے ملاقات کی اور پوچھا کہ اس وقت ان کے ذہن میں کیا تھا۔ ان کا جواب تھا کہ انہیں کارروائی کرنا ضروری تھا، کیونکہ طیارے میں خاندان اور 174 افراد سوار تھے جنہیں بچانا تھا۔ حیون پیشے کے اعتبار سے پلمبر ہیں۔ نیتن یاہو نے ان سے کہا، ’’اس بار آپ نے یقیناً ایک بہت بڑی رکاوٹ دور کردی۔‘‘

نیتن یاہو نے کہا کہ پرواز میں موجود بچوں نے انہیں بتایا کہ طیارے کے نیچے جانے کے دوران وہ چھت سے جا ٹکرائے تھے اور مسافر پہلے ہی دعائیں مانگ رہے تھے۔ ان کے مطابق سمیت مچھر اپنی زندگی کی جنگ لڑ رہے ہیں۔ انہوں نے کہا، ’’ان کی بہادری کے بغیر ہمیں ناقابل تصور حد تک بڑے سانحے کا سامنا کرنا پڑتا۔‘‘

اس واقعے نے نیتن یاہو کے ذاتی ماضی کو بھی اجاگر کیا۔ ان کے بڑے بھائی لیفٹیننٹ کرنل یوناتان نیتن یاہو 1976 میں عنتیبے میں یرغمالیوں کو چھڑانے کے آپریشن کے دوران مارے گئے تھے، جبکہ نیتن یاہو خود بھی اس سے قبل ہائی جیک کیے گئے سبینا طیارے کے مسافروں کو آزاد کرانے کی کارروائی میں زخمی ہوئے تھے۔

انہوں نے 11 ستمبر کے حملوں کا حوالہ دیتے ہوئے ڈینیئل لیون کا بھی ذکر کیا، جو اکامائی کے بانی اور اسی ایلیٹ یونٹ کے سابق افسر تھے اور ہائی جیکروں کا مقابلہ کرنے کی کوشش کے دوران مارے گئے تھے۔ نیتن یاہو نے کہا کہ انہوں نے امریکی صدر ڈونلڈ ٹرمپ سے بھی اس واقعے پر بات کی ہے۔

حملہ آور کے محرکات کے بارے میں نیتن یاہو نے کوئی حتمی بات نہیں کہی۔ انہوں نے کہا کہ وہ اس شخص کے پس منظر سے واقف نہیں ہیں، تاہم جو شخص تقریباً 170 اسرائیلیوں کو قتل کرنے اور ان کے ساتھ خود بھی مرنے پر آمادہ ہو، وہ ’’ناقابلِ تصور حد تک شدید‘‘ نفرت سے متاثر ہوگا۔

اسرائیلی حکام اور مسافروں کے بیانات، جنہیں بین الاقوامی میڈیا نے رپورٹ کیا ہے، کے مطابق معاون پائلٹ نے سمت مچھر پر چاقو سے حملہ کیا اور مبینہ طور پر طیارے کا کنٹرول سنبھالنے کی کوشش کی۔ اس دوران طیارہ تیزی سے نیچے گیا اور تقریباً 37 سیکنڈ میں 14,300 فٹ کی بلندی کھو دی، فلائٹ ٹریکنگ ڈیٹا کے مطابق۔ اس کے بعد ہنگامی سگنل بھیجے گئے اور طیارے کا رخ تبوک کی جانب موڑ دیا گیا۔

شدید زخمی ہونے کے باوجود مچھر نے مبینہ طور پر کاک پٹ کا دروازہ کھول دیا، جس سے مسافروں، عملے کے ارکان اور مسافروں کے طور پر سفر کرنے والے دو دیگر پائلٹوں کو اندر داخل ہوکر حملہ آور پر قابو پانے میں مدد ملی۔ اس کے بعد طیارے کو دوبارہ قابو میں لایا گیا اور بحفاظت تبوک پہنچایا گیا۔ متعدد میڈیا رپورٹس کے مطابق فلائی دبئی کے دونوں پائلٹ، جو مسافروں کے طور پر سفر کر رہے تھے، نے ہنگامی صورتحال کے دوران طیارہ چلانے میں بھی مدد کی۔

نیتن یاہو نے مچھر کی تعریف کرتے ہوئے کہا کہ ان کے اقدامات نے دورانِ پرواز ایک بڑے سانحے کو روکنے میں اہم کردار ادا کیا۔ سعودی عرب میں لینڈنگ کے بعد مسافروں کی مدد کی گئی اور بعد میں انہیں تل ابیب پہنچانے کے انتظامات کیے گئے۔

ہنگامی لینڈنگ کے بعد مچھر کو تبوک کے ایک اسپتال منتقل کیا گیا۔ ریاض میں بھارتی سفارتخانے نے بتایا کہ وہ زیر علاج اور مستحکم حالت میں ہیں۔ سعودی عرب میں ہندوستانی سفارتی مشنز ان کی حالت پر نظر رکھے ہوئے ہیں اور ان کے اہل خانہ سے مسلسل رابطے میں ہیں۔

یو این آئی۔ ع ا۔

دبئی، متحدہ عرب امارات (یو اے ای) نے دبئی سے تل ابیب جانے والی فلائی دبئی کی پرواز میں پائلٹ پر چاقو سے حملے کی تحقیقات کا حکم دیا ہے۔ حکام اس بات کا جائزہ لے رہے ہیں کہ آیا یہ واقعہ ’’دہشت گردانہ سرگرمی‘‘ سے منسلک تھا یا پہلے سے اس کی منصوبہ بندی کی گئی تھی۔

متحدہ عرب امارات کے اٹارنی جنرل حمد سیف الشمسی نے بدھ کو فلائٹ ایف زیڈ 1073 میں پیش آنے والے واقعے کی تحقیقات کا حکم دیا۔ کاک پٹ میں جھگڑے کے بعد طیارے کا رخ سعودی عرب کے تبوک کی جانب موڑ دیا گیا تھا۔

متحدہ عرب امارات کی سرکاری خبر رساں ایجنسی نے جمعرات کو بتایا کہ تحقیقات میں واقعے کے حالات اور محرکات کا جائزہ لیا جائے گا، جس میں یہ بھی معلوم کیا جائے گا کہ آیا اس کا ’’دہشت گردانہ سرگرمی‘‘ سے کوئی تعلق تھا یا اس کے پیچھے پہلے سے کوئی منصوبہ بندی یا ہدایت کارفرما تھی۔

یو اے ای نے کہا کہ طیارہ ملک میں رجسٹرڈ اور اسی کے پرچم کے تحت پرواز کرتا ہے، اس لیے اس کے عدالتی حکام کو تحقیقات کا اختیار حاصل ہے۔ اماراتی حکام کے مطابق ملکی قانون کسی طیارے میں کیے گئے جرائم پر بھی لاگو ہوتا ہے، ’’خواہ وہ ملک کی سرحدی حدود سے باہر ہی کیوں نہ پیش آئے ہوں۔‘‘

فلائی دبئی نے کہا کہ کاک پٹ میں ’’جھگڑا‘‘ ہوا تھا، جس کے بعد طیارے کا رخ تبوک کی جانب موڑ دیا گیا جہاں اس نے بحفاظت لینڈنگ کی۔ ایئرلائن نے کہا کہ واقعے کی وجوہات ابھی معلوم نہیں اور تحقیقات جاری رہنے کے دوران ’’قبل از وقت قیاس آرائیوں‘‘ سے گریز کیا جائے۔

یو اے ای کی جنرل سول ایوی ایشن اتھارٹی نے کہا کہ پرواز کو ’’ایک سکیورٹی واقعے کا سامنا ہوا جس پر قابو پالیا گیا۔‘‘

اسرائیلی حکام کے مطابق دورانِ پرواز معاون پائلٹ نے ہندوستانی شہری کیپٹن سمیت مچھر پر حملہ کیا اور کاک پٹ میں انہیں چاقو مارا۔ اس کے بعد طیارہ 30 سیکنڈ سے بھی کم وقت میں تقریباً 14 ہزار فٹ نیچے آ گیا، تاہم مسافروں اور عملے نے مداخلت کی۔

مسافروں اور عملے کے ارکان نے کاک پٹ میں داخل ہوکر معاون پائلٹ پر قابو پالیا، جبکہ فلائی دبئی کے دو دیگر پائلٹ، جو اسی پرواز میں مسافروں کے طور پر سفر کر رہے تھے، نے طیارے کا کنٹرول دوبارہ حاصل کرنے میں مدد کی، جس کے بعد اسے تبوک میں بحفاظت اتارا گیا۔ بعد میں مسافر متبادل فلائی دبئی طیارے کے ذریعے تل ابیب پہنچے۔ واقعے کے 10 گھنٹے سے زائد وقت بعد وہ اپنی منزل پر پہنچ سکے۔

اسرائیلی وزیر اعظم بنیامین نیتن یاہو نے کہا کہ اسرائیل حملے کے پس پردہ محرکات کا پتہ لگانے کی کوشش کرے گا، جس میں یہ بھی معلوم کیا جائے گا کہ آیا معاون پائلٹ کے کوئی ساتھی تھے یا ایران اس میں ملوث تھا۔

نیتن یاہو نے فوکس نیوز کو انٹرویو میں کہا، ’’ہم اس حملہ آور کے معاملے کی تہہ تک پہنچیں گے، یہ بھی معلوم کریں گے کہ آیا اس کے کوئی ساتھی تھے اور آیا ایران اس کے پیچھے تھا۔ میرے خیال میں ہمیں بہت جلد اس کا پتہ چل جائے گا۔‘‘

ایران کے ممکنہ ملوث ہونے کے بارے میں پوچھے جانے پر انہوں نے کہا، ’’یہ کہنا ابھی قبل از وقت ہے۔

حملہ آور پائلٹ سے اس وقت سعودی عرب میں تحقیقات کی جا رہی ہیں۔ میرے خیال میں اسے امارات لے جایا جائے گا، جہاں سے وہ آیا ہے یا کم از کم جہاں سے اس نے پرواز کی تھی۔ ہم تحقیقات پر نظر رکھیں گے اور ممکنہ طور پر اس میں حصہ بھی لیں گے۔‘‘

ایک اسرائیلی عہدیدار نے معاون پائلٹ کی شناخت عمانی شہری کے طور پر کی ہے۔ عمان کی جانب سے فوری طور پر کوئی تبصرہ سامنے نہیں آیا۔

نیتن یاہو نے اس واقعے کو ’’سنگین سکیورٹی واقعہ‘‘ قرار دیتے ہوئے کہا کہ سعودی حکام معاون پائلٹ سے پوچھ گچھ کریں گے۔

جاری۔ یو این آئی۔ ع ا۔

واشنگٹن، امریکی وزیر جنگ پیٹ ہیگستھ نے امریکی فوج کو جدید تقاضوں سے ہم آہنگ کرنے کے لیے چھ بڑے تزویراتی اقدامات کا اعلان کیا ہے، جن میں خودکار جنگی صلاحیتوں، فوجی تیاری، دفاعی تنصیبات، سپلائی چین اور نئی ٹیکنالوجی پر خصوصی توجہ دی جائے گی۔

میرین کور بیس کوانٹیکو میں خطاب کرتے ہوئے ہیگستھ نے کہا کہ محکمہ جنگ یکم اکتوبر 2027 تک چار ستارہ سطح کی ’’آٹونومس وارفیئر کمانڈ‘‘ قائم کرے گا، جو مشترکہ فوج میں خودکار جنگی نظام کی توسیع کی نگرانی کرے گی۔ اس منصوبے کے تحت ’’پروجیکٹ ایجنکورٹ‘‘ اور ڈرون صلاحیتوں کو بھی فروغ دیا جائے گا۔

’’امریکاز کور آف کیڈٹس‘‘ پروگرام کے ذریعے مزید یونیورسٹیوں میں کل وقتی کور آف کیڈٹس پروگرام شروع کرکے فوج میں نئے افسران کی بھرتی کا دائرہ وسیع کیا جائے گا۔ لوزیانا اسٹیٹ یونیورسٹی، لبرٹی یونیورسٹی، ٹسکیگی یونیورسٹی، مسیسیپی اسٹیٹ یونیورسٹی اور ہلزدیل کالج نئے شراکت دار ہوں گے۔

ہیگستھ نے ’’فورٹریس امریکہ‘‘ پروگرام کا بھی اعلان کیا، جس کا مقصد فوجی اڈوں کو بجلی کے شہری گرڈ سے زیادہ خودمختار بنانا، نایاب معدنیات، سیمی کنڈکٹرز اور خصوصی دھاتوں کی ملکی پیداوار بڑھانا اور گولہ بارود، ایندھن، ادویات و دیگر اہم ذخائر مضبوط کرنا ہے۔ پروگرام میں سائبر حملوں، تخریب کاری اور ڈرون خطرات سے فوجی تنصیبات کے تحفظ پر بھی توجہ دی جائے گی

’’نیکسٹ گریٹ امریکن بیس‘‘ منصوبے کے تحت ایک نیا بڑا فوجی اڈہ قائم کیا جائے گا، جس میں آزاد توانائی، خودکار نظام اور جدید فضائی دفاعی صلاحیتیں شامل ہوں گی۔ ریاستی حکومتوں کو اس کی میزبانی کے لیے مسابقت میں حصہ لینے کی دعوت دی جائے گی۔

اس کے علاوہ ’’آفس آف ریلیجس افیئرز‘‘ قائم کیا جائے گا، جو فوجی اہلکاروں کے لیے مذہبی آزادی اور رضاکارانہ مذہبی معاونت سے متعلق امور دیکھے گا۔

چھٹے اقدام ’’پروجیکٹ میریڈیئن‘‘ کے تحت مستقبل کی جنگی ٹیکنالوجی اور صلاحیتوں کا جائزہ لیا جائے گا، جس میں زیر زمین کارروائیوں سے لے کر زمین اور چاند کے درمیان خلائی ماحول تک مختلف شعبے شامل ہوں گے۔ محکمہ کے مطابق ایلون مسک، پالمر لکی اور نیوٹ گنگرچ منصوبے کی مشترکہ قیادت کریں گے اور 120 دن میں سفارشات پیش کریں گے۔

ہیگستھ نے کہا کہ ان اقدامات کا مقصد ’’جنگجو جذبے‘‘ کی بحالی، امریکی فوج کی تعمیر نو اور ملک کی بازداریت مضبوط کرنا ہے۔

یو این آئی۔ ع ا۔