دبئی، آبنائے ہرمز سے باہر کی جانب سفر کرنے والے ایک بحری جہاز کو منگل کے روز نامعلوم پروجیکٹائل نے نشانہ بنایا، جس سے اس کا انجن روم متاثر ہوا اور عملے کا ایک رکن زخمی ہوگیا۔

برطانیہ کے میری ٹائم ٹریڈ آپریشنز (یو کے ایم ٹی او) مرکز نے یہ اطلاع دی۔ یو کے ایم ٹی او نے ایک بیان میں کہا، ’’کمپنی کے سکیورٹی افسر نے اطلاع دی ہے کہ آبنائے ہرمز سے باہر کی جانب سفر کے دوران بحری جہاز نامعلوم پروجیکٹائل کی زد میں آیا۔‘‘ بیان کے مطابق حملے کے نتیجے میں انجن روم کو نقصان پہنچا اور عملے کا ایک رکن متاثر ہوا۔ باقی عملے کے ارکان کو عمانی کوسٹ گارڈ کی جانب سے امداد فراہم کی جا رہی تھی۔

یو کے ایم ٹی او نے کہا کہ واقعے کے نتیجے میں ماحول پر کسی اثر کی اطلاع نہیں ہے، جبکہ حکام واقعے کی تحقیقات کر رہے ہیں۔ ادارے نے آبنائے ہرمز سے گزرنے والے بحری جہازوں کو محتاط رہنے اور کسی بھی مشتبہ سرگرمی کی اطلاع دینے کا مشورہ دیا ہے۔

یہ واقعہ ایسے وقت پیش آیا ہے جب امریکہ اور ایران کے درمیان جنگ کے باعث اس اہم آبی گزرگاہ کے گرد کشیدگی میں اضافہ ہوا ہے، جس سے تجارتی جہازرانی اور عالمی توانائی کی رسد میں خلل کے خدشات بڑھ گئے ہیں۔ آبنائے ہرمز، جہاں سے دنیا کی ایک بڑی مقدار میں خام تیل اور مائع قدرتی گیس کی ترسیل ہوتی ہے، تنازع کے دوران کشیدگی کا ایک اہم مرکز بن چکی ہے۔

بحری ٹریفک سے متعلق اعداد و شمار کے مطابق اس آبی گزرگاہ سے گزرنے والی جہازرانی میں نمایاں کمی آئی ہے اور گزشتہ 24 گھنٹوں کے دوران صرف چند تجارتی بحری جہازوں کے وہاں سے گزرنے کی اطلاع ملی ہے۔

یہ واقعہ آبنائے ہرمز میں آزادانہ جہازرانی برقرار رکھنے کے لیے جاری سفارتی کوششوں کے دوران بھی پیش آیا ہے۔ عمان نے آبی گزرگاہ کے ذریعے جہازرانی بحال رکھنے کے معاملے پر واشنگٹن اور تہران کے درمیان مذاکرات میں کردار ادا کیا ہے۔

قابل ذکر ہے کہ امریکی صدر ڈونلڈ ٹرمپ نے عمان کو بمباری کی دھمکی بھی دی تھی، بظاہر اس لیے کہ عمان ایران کے ساتھ مذاکرات کے ذریعے آبنائے ہرمز سے جہازرانی بحال کرانے کی کوشش کر رہا تھا۔ آبنائے ہرمز سے جہازرانی کی بحالی اس مفاہمتی یادداشت (ایم او یو) کی ایک شرط بھی تھی، جسے ٹرمپ نے ماضی میں مشرق وسطیٰ کا ’’اب تک کا سب سے عظیم امن معاہدہ‘‘ قرار دیا تھا۔ حکام نے ابھی تک یہ شناخت نہیں کی ہے کہ بحری جہاز کو کس قسم کے پروجیکٹائل نے نشانہ بنایا اور نہ ہی یہ بتایا ہے کہ اس واقعے کا ذمہ دار کون ہوسکتا ہے۔ بحری جہاز کی قومیت اور زخمی ہونے والے عملے کے رکن کی حالت کے بارے میں بھی معلومات فراہم نہیں کی گئیں۔

یو این آئی۔ ع ا۔

سرینگر، جموں و کشمیر کرائم برانچ کے اکنامک آفینسز ونگ (ای او ڈبلیو) کشمیر نے تحقیقات پر اثر انداز ہونے کی مبینہ کوشش کے معاملے میں بڈگام کے ایک رہائشی کے خلاف اسپیشل جج، اینٹی کرپشن، سرینگر کی عدالت میں چارج شیٹ دائر کی ہے۔ حکام نے منگل کے روز یہ معلومات فراہم کیں۔

حکام نے بتایا کہ رواں سال درج کی گئی ایف آئی آر میں یہ چالان بڈگام ضلع کے میر گنڈ کے رہائشی غلام احمد غنی کے خلاف داخل کیا گیا۔ اس پر پریوینشن آف کرپشن ایکٹ کی دفعہ 8 اور بھارتیہ نیاۓ سنہیتا (بی این ایس) کی دفعات 228 اور 229 کے تحت قابلِ سزا جرائم کا الزام ہے۔

حکام نے بتایا کہ یہ تحقیقات ایک تحریری شکایت کے بعد شروع کی گئی تھیں۔ شکایت میں الزام لگایا گیا تھا کہ ملزم نے تحقیقات کو متاثر کرنے کی نیت سے ایک تفتیشی افسر کے بینک اکاؤنٹ میں 10 ہزار روپے منتقل کیے تھے۔ ملزم کے خلاف کرائم برانچ کشمیر (جو اب ای او ڈبلیو کشمیر ہے) کی ایک ایف آئی آر کے تحت پہلے سے ہی تفتیش جاری ہے۔

شکایت ملنے کے بعد کرائم برانچ نے معاملے کی تحققیات کے احکامات دیے۔ حکام نے بتایا کہ تفتیش کے دوران الزامات کا باریک بینی سے جائزہ لیا گیا اور ثبوت اکٹھے کیے گئے۔ تحقیقات میں اس مبینہ واقعے میں ملزم کی ملوث ہونے کی تصدیق ہوئی۔

اس کے بعد، چالان تیار کیا گیا اور قانون کے مطابق عدالتی فیصلے کے لیے عدالت میں پیش کیا گیا۔

یواین آئی۔الف الف

سرینگر، جموں و کشمیر کے ضلع کولگام میں منگل کو ایک سڑک حادثے میں سینٹرل ریزرو پولیس فورس (سی آر پی ایف) کے چار جوان اور ایک عام شہری ٹرک ڈرائیور زخمی ہو گئے۔

حکام نے بتایا کہ یہ حادثہ سرینگر-جموں نیشنل ہائی وے پر لیووڈورا کے قریب ایک ٹرک اور سی آر پی ایف کی گاڑی کے درمیان ٹکر کے بعد پیش آیا۔ انہوں نے بتایا کہ تیز رفتار ٹرک نے سی آر پی ایف کی گاڑی کو ٹکر ماری، جس سے وہ الٹ گئی۔ اس واقعے میں دونوں گاڑیوں کو نقصان پہنچا۔

حادثے میں سی آر پی ایف کے چار جوان (جن میں ایک سب انسپکٹر بھی شامل ہے) اور ٹرک ڈرائیور زخمی ہو گئے۔ زخمیوں کو فوری علاج کے لیے قاضی گنڈ کے سب ڈسٹرکٹ ہسپتال (ایس ڈی ایچ) لے جایا گیا۔ تاہم بعد میں ڈاکٹروں نے انہیں بہتر علاج کے لیے اننت ناگ کے گورنمنٹ میڈیکل کالج (جی ایم سی) ریفر کر دیا۔

قاضی گنڈ پولیس اسٹیشن نے معاملہ درج کر لیا ہے اور واقعے کی مزید تحقیقات شروع کر دی گئی ہیں۔

یواین آئی۔الف الف