سری نگر،سری نگر اور بارہمولہ لوک سبھا سیٹوں کی ریکارڈ توڑ پولنگ کے بعد اننت ناگ – راجوری لوک سبھا سیٹ کے لئے ہفتے کو مجموعی طور پر 53 فیصد پولنگ ریکارڈ ہوئی ہے جو گذشتہ لوک سبھا پولنگ کی شرح کے مقابلے میں لگ بھگ چار گنا زیادہ ہے۔یہ انیس سو نوے کی دہائی میں ملی ٹینسی شروع ہونے کے بعد جنوبی کشمیر میں سب سے زیادہ ووٹر ٹرن آوٹ ہے۔

سال 2019 کے لوک سبھا الیکشن میں اننت ناگ لوک سبھا سیٹ کے لئے صرف 9 فیصد ووٹنگ ریکارڈ ہوئی تھی جبکہ راجوری – پونچھ علاقے جو اس وقت جموں لوک سبھا سیٹ کا حصہ تھا، میں زائد از 72 فیصد پولنگ ریکارڈ ہوئی تھی۔

سال 2019 سے قبل جنوبی کشمیر الگ پارلیمانی حلقہ تھا تاہم سر نو حد بندی کے بعد اننت ناگ – راجوری لوک سبھا سیٹ کو معرض وجود میں لایا گیا جو صوبہ جموں کے 7 اور کشمیر کے 11 اسمبلی حلقوں پر مشتمل ہے۔

جنوبی کشمیر کی لوک سبھا سیٹ کے لئے سال 2014، 2009، 2004، 1999، 1998، 1996، 1989 اور 1984 میں پولنگ کی شرح بالترتیب 28.8 فیصد، 27.1 فیصد، 14.7 فیصد، 14.3 فیصد، 28.15 فیصد،50.2 فیصد،5.07 فیصد، 70.1 فیصد ریکارڈ ہوئی تھی۔

پی ڈی پی صدر اور اننت ناگ – راجوری لوک سبھا سیٹ کی امید وار محبوبہ مفتی کے بجبہاڑہ میں ان کی پارٹی ورکروں کی مبینہ گرفتاری کے خلاف احتجاجی دھرنے کے بجز پیر پنچال کے آر پار پھیلی اس نشست پر مجموعی طور پر امن طریقے سے پولنگ ہوئی۔اننت ناگ پولیس نے ان الزامات کو رد کرکے کہا ہے کہ ‘انتہائی کم گرفتاریاں کی گئی ہیں اور یہ وہ لوگ ہیں جن کا ماضی داغدار ہے’۔

پولیس نے اپنے بیان میں کہا: ‘ایک سیاسی جماعت کی طرف سے ان کے ورکروں کو بند کرنے کا دعویٰ کیا گیا ہے’انہوں نے کہا: ‘پہلی بات یہ ہےکہ بہت کم گرفتاریاں کی گئی ہیں اور ان کو گرفتار کیا گیا ہے جن کا ماضی داغدار ہے نیز یہ گرفتاریاں ان معتبر ذرائع پر عمل میں لائی گئیں ہیں کہ جن کے مطابق الیکشن دن پر امن و قانون اور سیکورٹی کو خطرات لاحق تھے’۔ان کا کہنا تھا: ‘گرفتار شدگان میں سے بیشتر اوور گراونڈ ورکرس ہیں جن کو پر امن الیکشن کے انعقاد کو یقینی بنانے کے لئے احتیاطی طورپر حراست میں لیا گیا ہے۔‘

چیف الیکٹورل آفیسر پے کے پولے نے کہا کہ خوشگوار پولنگ کے لئے کہیں کہیں کچھ اقدام کرنا پڑتے ہیں اور ایسے افراد جن کا ماضی کا کچھ ریکارڈ ہے یا جو او جی ڈبلیو ہیں، ان کو حراست میں لیا گیا ہے۔انہوں نے کہا” ‘تاہم ہماری کوشش رہتی ہے کہ گرفتاریاں کم سے کم ہوں اور ایسا کسی شخص کو حراست میں نہ لیا جائے جس کا ماضی کا کوئی ریکارڈ نہ ہو’۔

بعد ازاں ایک پریس کانفرنس میں محبوبہ مفتی نے الزام لگایا کہ اننت ناگ راجوری پارلیمانی نشست پر جموں وکشمیر کی ایل جی انتظامیہ کے کہنے پر دھاندلیاں کی گئیں۔

محبوبہ مفتی نے کہا :’گرفتاریوں کے باوجود بھی لوگوں کا حوصلہ نہیں ٹوٹا اور انہوں نے اپنے ووٹ کا استعمال کیا جس کے لئے میں عوام کی شکر گزار ہوں۔ ‘انہوں نے کہاکہ پولنگ کے دن انتظامیہ نے اننت ناگ میں خوف ودہشت کا ماحول قائم کیا، کئی علاقوں میں فوج نے کارڈن اینڈ سرچ آپریشن لانچ کئے جس وجہ سے لوگوں کو ڈرایا دھمکایا گیا۔

جنوبی کشمیر کے پارلیمانی حلقے کے تین اضلاع شوپیاں، کولگام اور اننت ناگ میں پھیلے ہوئے پولنگ اسٹیشنوں کے آس پاس کا ماحول پر سکون تھا، نوجوان اور بوڑھے ووٹرز صبح سے ہی قطاروں میں بیٹھے ہوئے تھے۔

قابل ذکر بات یہ ہے کہ علیحدگی پسندوں کے گڑھ آرونی ، کیموہ ، کھڈونی ، سری گفوارہ، اننت ناگ ، بجبہاڑہ سمیت متعدد علاقوں میں متاثر کن ووٹنگ ہوئی ۔جنوبی کشمیر کے کئی علاقوں میں کالعدم جماعت اسلامی اور پیپلز لیگ کے ارکان نے بھی اپنی رائے دہی کا استعمال کیا۔

کیموہ کولگام کے ایک ہائر سکنڈری اسکول میں واقع چار پولنگ اسٹیشنوں پر 1718 ووٹوں میں سے 886 ووٹ دوپہر 3.30 بجے تک پول ہوئے تھے۔ یہ علاقہ کبھی عسکریت اور انتہا پسندی کا گڑھ مانا جاتا تھا۔

پولنگ اسٹیشن کے باہر ایک ووٹر اعجاز احمد نے کہا :”ہمیں امید ہے کہ ہمارے ووٹوں سے صورتحال بدلے گی اور بے روزگاری ختم ہو جائے گی۔ ہم یہ بھی امید کرتے ہیں کہ جو لوگ سلاخوں کے پیچھے ہیں انہیں رہا کر دیا جائے گا“۔جنوبی ضلع کولگام کھڈونی گاوں میں بھی لوگ ووٹ ڈالنے کے لئے نکلے جو پچھلے انتخابات کے بالکل برعکس تھا۔

بیجبہاڑہ اننت ناگ میں، جو مفتی کا آبائی گاوں ہے، ووٹروں کی ایک بڑی تعداد پولنگ اسٹیشن میں داخل ہونے کے لیے اپنی باری کا انتظار کرتے ہوئے دیکھے گئے۔ ایک مقامی رہائشی طارق احمد نے کہا، “ہم نے اس امید کے ساتھ ووٹ دیا کہ روزمرہ کی زندگیوں میں عام لوگوں کو کچھ راحت ملے گی۔”

کولگام ضلع کے کئی حصوں میں لوگوں کی ایک بڑی تعداد نے اپنی حق رائے دہی کا استعمال کیا۔اگست 2019 میں آرٹیکل 370 کی منسوخی کے بعد 2024 کے لوک سبھا انتخابات جموں و کشمیر میں ہونے والے پہلے بڑے انتخابات ہیں۔

سرکاری ذرائع نے کہا کہ اننت ناگ-راجوری لوک سبھا سیٹ پر ابتک کی سب سے زیادہ پولنگ ریکارڈ کی گئی ہے۔انہوں نے کہاکہ اہم عوامل جو کہ پولنگ میں اضافہ کی وجہ بنا وہ لا اینڈ آرڈر کی صورتحال میں بہتری اور پر امن ماحول ہے۔اننت ناگ راجوری پارلیمانی نشست پر محبوبہ مفتی ، میاں الطاف اور ظفر اقبال منہاس کے درمیان کانٹے دار مقابلے کی توقع ہے۔

دریں اثنا چیف الیکٹورل افسر پی کے پولے نے اننت ناگ راجوری لوک سبھا نشست کی مجموعی پولنگ شرح کا اعلان کرتے ہوئے کہا کہ اس نشست پر ہفتے کو مجموعی طور پر 53 فیصد پولنگ ہوئی ہےانہوں نے کہا کہ جموں وکشمیر کی پانچ پارلیمانی نشستوں پر کل ملا کر 58فیصد ووٹنگ ریکارڈ کی گئی جو گزشتہ 35برسوں میں سب سے زیادہ ہے۔

یو این آئی، ارشید بٹ