نئی دہلی؛ یوم اساتذہ کے موقع پر لوک سبھا کے اسپیکر اوم برلا نے آج دہلی یونیورسٹی کے ہنس راج کالج کے طلباء اور اساتذہ سے خطاب کیا اس موقع پر اسپیکر نے سب سے پہلے عظیم ماہر تعلیم ڈاکٹر سرو پلی رادھا کرشنن اور تمام گرووں کو خراج عقیدت پیش کیا طلباء کی زندگیوں اور قوم کی تعمیر میں اساتذہ کے تعاون کے بارے میں بات کرتے ہوئے مسٹر برلا نے کہا کہ ہندوستانی علمی روایت میں گرو کا مقام سب سے اوپر ہے۔ گرو وشوامتر، درون، کوٹیلیہ، کالی داس، مہارشی دیانند سرسوتی، مہاتما ہنسراج، مہاتما جیوتیبا پھولے، سوامی وویکانند اور ڈاکٹر اے پی جے عبدالکلام جیسی شخصیات کو یاد کرتے ہوئے مسٹر برلا نے کہا کہ ان تمام گرووں نے ہمارے ملک کو اپنے علم سے مالا مال کیا ہے۔ یہ تمام عظیم انسان ہماری ہندوستانی علمی روایت کی روشنی کی مانند ہیں۔ انہوں نے مزید کہا کہ کسی بھی ملک کے تعلیمی ادارے ملک کی سمت اور مستقبل کا تعین کرتے ہیں۔ ایک استاد کا کردار صرف تعلیم دینے تک ہی محدود نہیں ہے بلکہ وہ ہمیں تعلیم دینے کے ساتھ ساتھ ہماری شخصیت، اعتماد اور صلاحیتوں کو نکھارتے ہیں اور ہماری زندگی کو ایک نئی شکل دیتے ہیں۔ یہی وجہ ہے کہ ہمارے قدیم فلسفے میں گرو کو نہ صرف تعلیم کا ذریعہ سمجھا جاتا ہے بلکہ کردار سازی، شخصیت سازی، سماج کی تعمیر اور قوم کی تعمیر کا معمار بھی مانا جاتا ہے۔

یہ نوٹ کرتے ہوئے کہ مہاتما ہنسراج کی زندگی آج بھی ہم سب کے لیے تحریک کا ذریعہ ہے، لوک سبھا اسپیکر نے طلبہ سے اپیل کی کہ وہ مہاتما ہنسراج جیسے عظیم انسانوں کی سوانح حیات پڑھیں اور ان سے ترغیب حاصل کریں۔ انہوں نے یہ بھی کہا کہ ان عظیم ہستیوں نے اپنی زندگی میں جن جدوجہد کا سامنا کیا ان سے سیکھتے ہوئے طلباء کو چاہیے کہ وہ لوگوں کی زندگیوں کی بہتری کے لیے کام کرنے کے لیے عہد کریں، خاص طور پر تعلیمی میدان میں کام کرنے کا عہد کریں ۔

برلا نے کہا کہ آنے والے وقتوں میں چوتھا صنعتی انقلاب آئے گا اور مصنوعی ذہانت، بایو ٹکنالوجی اور دیگر نئے شعبوں میں نمایاں ترقی ہوگی۔ اس تناظر میں مسٹر برلا نے اس بات پر زور دیا کہ تحقیق کے ان جدید مضامین میں ملک کو آگے رکھنا ہر ایک کی ذمہ داری ہے۔
انہوں نے کہا کہ ہمارا ملک سماجی و اقتصادی طور پر پوری طرح بدل چکا ہے اور یہ تبدیلیاں گرووں کی وجہ سے ممکن ہوئی ہیں۔ ہندوستان آج تیزی سے ترقی کر رہا ہے کیونکہ اس نے نسل در نسل طلباء کی صلاحیت، کارکردگی اور معیاری تعلیم دی ہے۔ انہوں نے یہ بھی کہا کہ آج کی تیزی سے بدلتی ہوئی دنیا میں اساتذہ کا کردار اور بھی اہم ہو گیا ہے۔ ہمارے نوجوانوں کو مستقبل کے چیلنجز اور مواقع کے لیے تیار کرنے کی ذمہ داری اساتذہ کے کندھوں پر ہے۔ مسٹر برلا نے امید ظاہر کی کہ اساتذہ کی رہنمائی میں ہمارے نوجوان آنے والی تبدیلیوں کے مطابق نہ صرف خود کو ڈھالنا سیکھیں گے بلکہ تبدیلی کے اس انقلاب کی قیادت بھی کریں گے۔

اپنی تقریر کے دوران اسپیکر نے اس بات کا بھی تذکرہ کیا کہ آج قدیم زمانے سے تعلیم پر زور دینے کی وجہ سے ہندوستان ترقی کر رہا ہے۔ اس وقت ہندوستان کے نوجوان تقریباً تمام شعبوں میں آگے ہیں۔ انہوں نے یقین ظاہر کیا کہ بدلتی ہوئی عالمی صورتحال اور تعلیم کے میدان میں ہندوستان کی بڑھتی ہوئی طاقت کے ساتھ ہمارے نوجوان جلد ہی ترقی یافتہ ممالک میں اقتصادی ترقی کی قیادت کریں گے۔

ہنس راج کالج کی تاریخ اور تعلیم کے میدان میں اس کی نمایاں کامیابیوں کا ذکر کرتے ہوئے مسٹر برلا نے کہا کہ ہنسراج کالج جو 1948 میں قائم ہوا تھا، تعلیم کے میدان میں پیش پیش رہا ہے اور اس نے ملک کے اعلیٰ ادارے کے طور پر اپنی شناخت بنائی ہے۔ دہائیوں کے دوران، ہنسراج کالج نے تحقیق اور اختراع کی مسلسل حوصلہ افزائی کی ہے اور اپنے طلباء کو ایک ایسا تعلیمی ماحول فراہم کیا ہے جو قدر پر مبنی علم سکھاتا اور ذاتی ترقی کو فروغ دیتا ہے۔

انہوں نے امید ظاہر کی کہ ہنس راج کالج اپنی شاندار وراثت کے مطابق ملک کی تعمیر میں اہم کردار ادا کرتا رہے گا۔

اس موقع پر لوک سبھا اسپیکر کو مہاتما ہنسراج ایوارڈ سے نوازا گیا۔

لوک سبھا کے رکن نوین جندل نے بھی اس تقریب میں شرکت کی۔

یو این آئی ۔ ع خ