کھیل

بنگلورو ٹیسٹ میں سرفراز خان کا جلوہ

Published

2 years ago

October 19, 2024

بنگلورو، کرکٹ کی دنیا کا وہ نام ‘سرفراز خان’ جس نے کامیابی کے ساتھ ہندوستانی ٹیم میں جگہ بنانے کا طویل انتظار کیا تھا، آج ان کا خواب بنگلورو کے چناسوامی اسٹیڈیم میں پورا ہوگیا۔ایم چناسوامی اسٹیڈیم میں کھیلے جارہے پہلے ٹیسٹ کے چوتھے دن سرفراز خان نے کیریئر کی پہلی بین الاقوامی سنچری اسکور کی۔ تیسرے دن اپنے اسکور 70 رنز سے آگے کھیلتے ہوئے سرفراز نے اپنی سنچری مکمل کی۔ سرفراز خان نے 195 گیندوں پر 150 رنز بنائے۔ سرفراز نے ایسے وقت میں شاندار کارکردگی کا مظاہرہ کیا جب ٹیم انڈیا اننگز ہارنے کے خطرے سے دوچار تھی ، تب سرفراز خان نے اپنے کیرئیر کی سب سے بڑی اننگز کھیل کر سب کا دل جیت لیا۔

ایک ایسے وقت میں جب ٹیم انڈیا مشکلات کے بھنور میں پھنسی ہوئی تھی، ایسے دباؤ کے لمحے میں سرفراز خان نےشاندار سنچری لگاکر ٹیم میں اپنی جگہ کو درست ثابت کیا اور ڈریسنگ روم کے ساتھ ساتھ پورا ملک ان کی شاندارکارکردگی کا جشن منانے لگا ۔ سرفراز نے جب اپنے بلے کوگھومایا اور اپنا ہیلمٹ ہٹا یا، اپنی پہلی ٹیسٹ سنچری کے بعد میدان میں خوشی کی جذباتی لہر دوڑ گئی۔ بنگلورو کے شائقین کھڑے ہو گئے، ان کے ساتھیوں نے پویلین سے خوشی کا اظہار کیا اور آسمان ان کی جیت کا گواہ بنا۔ سرفراز کے لیے یہ بے حد خاص لمحہ تھا۔

سرفراز کی نیوزی لینڈ کے خلاف آج کی سنچری نہ صرف ذاتی سنگ میل تھی بلکہ اس میچ میں ایک اہم موڑ بھی تھا جہاں ہندوستان300 سے زائد رنز کی کمی کے ساتھ بیک فٹ پر تھا۔

دباؤ بہت زیادہ تھا۔ ہندوستان پیچھے رہ گیا تھا اور ٹیم کو اننگز کی ذمہ داری سنبھالنے کے لیے کسی کی ضرورت تھی اس وقت ممبئی کے سرفراز، جو اپنی گھریلو کارکردگی کے لیے مشہور ہیں، نے کرکٹ کی دنیا میں شاندار ڈیبیو کیا۔ٹم ساؤتھی کی گیندپربیک فٹ سے گیند کو کور کے باہر سے پنچ کیا اور گیند باؤنڈری لائن کے پار چلی گئی۔ جیسے ہی گیندنے رسیوں کو پار کیا، سرفراز کا طویل انتظار کا لمحہ آگیا۔ یہ نہ صرف ان کی دباؤ میں کھیلنے کی مہارت کا بلکہ ذہنی طور پر مضبوط ہونے کا بھی ثبوت تھا۔

ڈومیسٹک کرکٹ میں کافی رنز بنانے کے بعد سرفراز کافی دیر تک اپنی باری کا انتظار کرتے رہے لیکن انہیں ٹیم انڈیا میں جگہ نہ مل سکی۔ حوصلہ شکنی کے بجائے وہ خود پر کام کرتے رہے۔ سنچری کے بعد سنچری اسکور کرتے رہے۔ آخر کار 15 فروری کو راجکوٹ میں انگلینڈ کے خلاف ڈیبیو کرنے کا موقع ملا۔ 62 رنز بنانے کے بعد وہ تیزی سے سنچری کی جانب بڑھ رہے تھے لیکن رویندرا جدیجا کی غلطی کے باعث وہ رن آؤٹ ہوگئے۔سرفراز خان بھلے ہی اپنے ڈیبیو ٹیسٹ میں سنچری بنانے سے محروم رہے لیکن اس بار انہوں نے بیک فٹ پر ٹم ساؤتھی کو شاندار پنچ دے کر یہ کارنامہ مکمل کیا۔ اس سنچری کی خوشی سرفراز کے چہرے پر صاف دیکھی جا سکتی تھی۔ جس طرح انہوں نے میدان میں دوڑ کر اس لمحے کا جشن منایا وہ خاص تھا۔

سرفراز کے لیے یہ سنچری کئ معنوں میں کافی اہم تھی۔ یہ ان کے سفر، ان کے خاندان کی قربانیوں اور سب سے بڑھ کر اپنے والد نوشاد خان کو خراج عقیدت پیش کرنے جیسی تھی ۔ ان کے والد، جنہوں نے بچپن سے ہی ان کی تربیت کی اور ان کی کافی حوصلہ افزائی کی۔

جب ٹیم کو سخت ضرورت تھی تو سرفراز کی مضبوطی سے کھڑے ہونے کی صلاحیت وہی ہے جس کے لیے یہ اننگز یاد رکھی جائے گی۔ انہوں نے ایسے وقت میں محتاط انداز میں میدان پر ڈٹ کر سامنا کیا جب ٹیم انڈیا دباؤ میں تھی۔

ہندوستان کے پرجوش وکٹ کیپر رشبھ پنت نے فوری طور پر سرفراز کو گلے لگایا، جو ٹیم کے اندر مشترکہ خوشی کی علامت ہے۔ پنت بخوبی جانتے تھے کہ سرفراز کے لیے اس لمحے کا کیا مطلب ہے اور ٹیم کے لیے اس کا کیا مطلب ہے۔ اس سنچری نے نہ صرف نوجوان بلے باز کا بلکہ پورے ہندوستانی کیمپ کا جوش بڑھا دیا۔ اعدادوشمار کے نقطہ نظر سے سرفراز کی سنچری اب ایک ایلیٹ کلب کا حصہ ہے۔ یہ 22 واں موقع تھا جب کسی ہندوستانی بلے باز نے ایک ہی ٹیسٹ میچ میں صفر اور سنچری دونوں ریکارڈ کیے۔ اس کلب میں حال ہی میں شبمن گل کا نام درج ہے جنہوں نے گزشتہ ماہ چنئی میں بنگلہ دیش کے خلاف یہ کارنامہ انجام دیا تھا۔نیوزی لینڈ کے معاملے میں، ایسا کرنے والے واحد دوسرے ہندوستانی کھلاڑی شیکھر دھون تھے، جنہوں نے 2014 میں ایڈن پارک، آکلینڈ میں 0 اور 115 رنز بنائےتھے۔

سرفراز کی اس سنچری نے ثابت کردیا ہے کہ جب داؤ بڑا ہوتو وہ عمدہ کارکردگی کا مظاہرہ کرسکتے ہیں اور ایسا کرکے انہوں نے یہ دکھادیا ہے کہ وہ مستقبل کے لئے ایک ایسے کھلاڑی ہیں جو ملک کی توقعات پر پورا اترسکتے ہیں اور ٹیم کو آگے بڑھا سکتے ہیں۔

یواین آئی۔ م س

کھیل

سروچی سنگھ اور کمل جیت سنگھ نے ہندوستان کو ایشیائی کھیلوں میں دوسرا طلائی تمغہ دلایا

Published

3 days ago

September 25, 2026

Online Desk

آئیچی-ناگویا (جاپان)، ہندوستان کی سروچی سنگھ اور کمل جیت سنگھ کی جوڑی نے جمعہ کو ایشیائی کھیلوں کے نشانہ بازی مقابلے میں 10 میٹر ایئر پسٹل مکسڈ مقابلے میں جنوبی کوریا کو پیچھے چھوڑتے ہوئے طلائی تمغہ حاصل کیا۔ یہ ایشیائی کھیلوں میں ہندوستان کا دوسرا تمغہ ہے۔

آج یہاں ہوئے مقابلے میں ہندوستانی جوڑی نے مجموعی طور پر 484.6 اسکور کے ساتھ سرفہرست مقام حاصل کیا۔ کمل جیت اور سروچی نے شروعات سے ہی اچھی برتری بنا لی تھی، لیکن جنوبی کوریا مسلسل ہندوستانی نشانہ بازوں پر دباؤ بنائے ہوئے تھا۔ تاہم ہندوستانی جوڑی نے دباؤ میں کوئی غلطی نہیں کی اور جنوبی کوریا کو 6.6 پوائنٹس کے فرق سے شکست دے کر طلائی تمغہ اپنے نام کرلیا۔ جنوبی کوریا 478 اسکور کے ساتھ دوسرے جبکہ ایران 415.8 اسکور کے ساتھ تیسرے مقام پر رہا۔

یو این آئی۔ ایم جے

کھیل

سلطان واریئرز بارہمولہ نے افتتاحی چنار پریمیئر لیگ کا خطاب جیت لیا

Published

2 weeks ago

September 15, 2026

Online Desk

سری نگر، سلطان واریئرز بارہمولہ نے افتتاحی چنار پریمیئر لیگ (سی پی ایل) کرکٹ ٹورنامنٹ 2026 کا خطاب جیت لیا۔ اس نے بارہمولہ کے جنرل بپن راوت اسٹیڈیم میں کھیلے گئے شاندار فائنل میں رمزی اسپورٹس سری نگر کو شکست دی۔

پہلے بلے بازی کرتے ہوئے سلطان واریئرز نے مقررہ اوورز میں 9 وکٹوں کے نقصان پر 182 رنز بنائے، جس کے جواب میں رمزی اسپورٹس سری نگر کی پوری ٹیم 142 رنز پر آؤٹ ہوگئی۔ اس طرح سلطان واریئرز نے شاندار کامیابی کے ساتھ خطاب اپنے نام کر لیا۔

سلطان واریئرز کے عاقب کھانڈے کو میچ جیتنے والی کارکردگی پر ’مین آف دی میچ‘ قرار دیا گیا، جبکہ ان کے ساتھی کھلاڑی عاصم بشیر کو پورے ٹورنامنٹ میں مسلسل عمدہ کارکردگی پر ’مین آف دی سیریز‘ کا اعزاز دیا گیا۔

فوج کی سری نگر چنار کور کی جانب سے منعقد کیے گئے اس ٹورنامنٹ میں ریکارڈ تعداد میں ٹیموں نے شرکت کی۔ مقابلے کے لیے 130 ٹیموں نے رجسٹریشن کرائی تھی، جن میں سے کشمیر وادی کے مختلف علاقوں سے 79 ٹیموں کا انتخاب کیا گیا۔

تقریب میں جموں و کشمیر کے چیف سیکریٹری اتل ڈلو کے علاوہ بارہمولہ میں تعینات ڈیگر ڈویژن کے جنرل آفیسر کمانڈنگ اور مقامی برادری کی ممتاز شخصیات نے شرکت کی۔

منتظمین نے کہا کہ سی پی ایل 2026 نے پوری کشمیر وادی کے کرکٹ ٹیلنٹ کو اپنی صلاحیتوں کے اظہار کا موقع فراہم کیا اور خاص طور پر نوجوانوں کے درمیان ہندوستانی فوج اور مقامی برادری کے تعلقات کو مضبوط بنانے کے لیے ایک پلیٹ فارم کے طور پر کام کیا۔

دفاعی ترجمان نے کہا کہ سی پی ایل 2026 کا کامیاب انعقاد خطے کے کھیلوں کے کیلنڈر میں ایک اہم سنگِ میل ہے۔ اس کے ذریعے وادی کے مختلف علاقوں سے تعلق رکھنے والے باصلاحیت نوجوان کرکٹرز کو اپنی صلاحیتیں دکھانے کا موقع ملا۔

یواین آئی۔ ظ ا

کھیل

بابر اعظم کی سات سال بعد ڈومیسٹک فرسٹ کلاس کرکٹ میں واپسی

Published

2 weeks ago

September 15, 2026

Online Desk

اسلام آباد، پاکستان کے ٹیسٹ کپتان بابر اعظم موجودہ پریذیڈنٹس ٹرافی گریڈ ون فرسٹ کلاس ٹورنامنٹ میں آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کی نمائندگی کریں گے۔ انہیں ٹیم نے بطور گیسٹ کھلاڑی شامل کیا ہے۔

ذرائع کے مطابق بابر نے پاکستان کرکٹ بورڈ (پی سی بی) سے درخواست کی تھی کہ انہیں کسی ٹیم میں شامل کیا جائے تاکہ وہ طویل فارمیٹ میں اپنی فارم بہتر کرسکیں۔ اس کے بعد بورڈ نے انہیں او جی ڈی سی ایل کے ساتھ جوڑ دیا۔ بابر نے دسمبر 2022 کے بعد سے ٹیسٹ کرکٹ میں کوئی سنچری نہیں بنائی۔ اس کے بعد سے 39 اننگز میں وہ صرف آٹھ نصف سنچریاں بناسکے ہیں، جبکہ 2023 کے آغاز سے ٹیسٹ میں ان کی اوسط 30.43 رہی ہے۔

ان کی خراب فارم پاکستان کرکٹ میں مسلسل بحث کا موضوع بنی ہوئی ہے۔ حالیہ انگلینڈ دورے میں پاکستان کو تین ٹیسٹ کی سیریز میں 0-3 سے شکست ہوئی، جبکہ لارڈز اور ایجبسٹن ٹیسٹ میں انگلینڈ کے تیز گیندبازوں نے شارٹ گیند کے خلاف بابر کی کمزوری کا فائدہ اٹھایا۔ تاہم گزشتہ پانچ ٹیسٹ میں وہ چار نصف سنچریاں بناچکے ہیں اور گزشتہ ماہ ویسٹ انڈیز کے خلاف دوسرے ٹیسٹ میں ان کا اسکور 88 رنز رہا، جس سے پاکستان نے جولائی 2023 کے بعد پہلی بار بیرون ملک ٹیسٹ جیتا۔

بابر نے آخری بار 2019 میں ڈومیسٹک فرسٹ کلاس ٹورنامنٹ کھیلا تھا، جب انہوں نے سینٹرل پنجاب کی کپتانی کرتے ہوئے فائنل میں ناردرن کو شکست دے کر قائداعظم ٹرافی جیتی تھی۔ حالیہ برسوں میں ٹیسٹ اور آئی سی سی ٹورنامنٹس میں پاکستان کی خراب کارکردگی کے بعد پاکستانی کھلاڑیوں کے ڈومیسٹک فرسٹ کلاس کرکٹ میں زیادہ حصہ لینے کا مطالبہ کیا جاتا رہا ہے۔ اس سیزن میں شاہین شاہ آفریدی اور سلمان آغا سمیت کئی دیگر بین الاقوامی کھلاڑی بھی پریذیڈنٹس ٹرافی میں حصہ لے رہے ہیں۔

پی سی بی کے سینٹرل کنٹریکٹ کے تحت اے کیٹیگری کے ٹیسٹ ماہر کھلاڑیوں کے لیے سالانہ کم از کم چھ، اے بی کیٹیگری کے ٹیسٹ اور ون ڈے ماہر کھلاڑیوں کے لیے چار، جبکہ بی سی کیٹیگری کے وائٹ بال ماہر کھلاڑیوں کے لیے کم از کم دو فرسٹ کلاس میچ کھیلنا ضروری ہے۔ پاکستان اس وقت آئی سی سی ٹیسٹ رینکنگ میں نویں نمبر پر ہے اور ورلڈ ٹیسٹ چیمپئن شپ کی نو ٹیموں کی جدول میں آخری مقام پر ہے۔ وہ گزشتہ چار آئی سی سی ٹورنامنٹس میں ناک آؤٹ مرحلے تک بھی نہیں پہنچ سکا ہے۔

یو این آئی۔ م س