خبراردو:
سرینگر جموں شاہراہ پر رام بن کے مقام پر سنیچر صبح کو اُس وقت سڑک کا المناک حادثہ رپیش آیا جب مسافروں سے بھری میٹاڈار بانہال سے رام بن کی طرف آرہی تھی۔ اطلاعات کے مطابق میٹاڈار زیر نمبر JK19-1593سنیچر کی صبح رام بن کی طرف محو سفرتھی کہ اسی دوران کیلا موڈ رام بن کے مقام پر گاڑی ڈرائیور کے قابو سے باہر ہوکر 200فٹ گہری کھائی میں جاگری جس کے نتیجے میں گاڑی میں سوار 22مسافر موقعہ پر ہی جاں بحق ہوئے جبکہ 16مسافربری طرح زخمی ہوئے جن میں سے 11افراد کو نازک حالت میں جموں منتقل کردیاگیا۔

ویڈیو دیکھیں:

رام بن میں سڑک حادثے کے بعدہر سو صف ماتم بچھ گئی جس کے بعد فوج، پولیس، سیول انتظامیہ اور مقامی رضاکاروں کی ایک بڑی تعداد نے جائے حادثے پر پہنچ کر یہاں بچاؤ کارروائی کا آغاز کیا۔عینی شاہدین نے بتایا کہ بانہال سے آرہی گاڑی جونہی سڑک حادثے کی نذر ہوئی تو گاڑی میں سوار مسافروں نے چیخ و پکار شروع کی جس کے نتیجے میں یہاں موجود لوگ جائے حادثہ کی جانب دوڑ پڑے۔

انہوں نے بتایا کہ حادثے کے نتیجے میں گاڑی 200فٹ گہری کھائی میں جاگری جس کے نتیجے میں گاڑی کے پرخچے اُڑ گئے جبکہ گاڑی میں سوار مسافر حادثے کی جگہ پر دور تک بکھر تے ہوئے دیکھے گئے۔ ضلع انتظامیہ رام بن نے بتایا کہ حادثے کے فوراً بعد انتظامیہ نے بچاؤ کارروائی کا آغاز کرتے ہوئے ایس ڈی آر ایف کی ٹیموں کو یہاں روانہ کردیا جنہوں نے گاڑی پر رسائی حاصل کرکے ان میں پھنسے دیگر مسافروں کو باہر لایا ۔

انہوں نے بتایا کہ بچاؤ کارروائی کی نگرانی ڈپٹی کمشنر رام بن شوکت عزیز خود انجام دے رہے ہیں۔انہوں نے بتایا کہ جائے حادثہ پر فوج، پولیس، سی آر پی ایف، ایس ڈی آر ایف، تحصیل دار سمیت مقامی رضاکاروں کی خدمات حاصل کی گئی ہے ۔انہوں نے بتایا کہ حادثے کے دوران 20مسافر جاں بحق ہوئے ہیں جن کی شناخت مشکور احمد گیری ولد مرحوم محمد ایوب گیری ساکن بنکوٹ بانہال، محمد شفیع راتھر ولد غلام حسن راتھر ساکن ڈولی گام بانہال، سنیل سنگھ والد رتن سنگھ ساکن ڈگڈول رام بن، محمد عرفان ولد محمد سلیمان ساکن پنتھیال رام بن، منظور احمد ولد احمد اللہ بٹ ساکن گگرارا اُخرہال، نعیم احمد ولد محمد یاسین گنائی ساکن مالیگام اُخرہال، رکھشندا دختر محمد رفیق وانی ساکنچنجلو بانہال، ریاض احمد خان ولد عبدالرشید خان ساکن ٹیٹھار بانہال، محمد اقبال شیخ ولد نور الدین شیخ ساکن چکا راج گڑھ، محمد رمضان وانی ولد ممہ جو وانی ساکن ڈولی گام بانہال، ریشما دختر اسماعیل گوجر ساکن امکوٹ بانہال، تنویر احمد بیگ ولد محمد افضل بیگ ساکن کسکوٹ بانہال، کاجل دیوی دختر تیرتھ سنگھ ساکن ماروگ رام بن، رحمت اللہ راتھر ولد عبدالغنی راتھر ساکن تانترے پورہ بانہال (ڈرائیور)، مدثر احمد میر ولد عبدالجبار میر ساکن بنکوٹ بانہال، محمد اقبال ولد فتح محمد ساکن تترسو رام بن، محمد یوسف کمہار ولد احمد اللہ کمہار ساکن درشپورہ اور اتکار ناتھ منگوترا ولد سریش منگوترا ساکن اُدھم پور شامل ہیں۔

اس کے علاوہ حادثے میں جو 16افراد زخمی ہوگئے ان میں عبدالقیوم ولد محمد سلطان ساکن دردائی رام سو، دمن دیب ولد اشوک سنگھ ساکن مارگ، ماجد احد ولد عبدالماجد ساکن النداس اُخرہال (کنڈیکٹر)، شبیر احمد بیگ ولد احمد بیگ ساکن لمبر بانہال، شوکت حسین ولد منظور حسین ساکن سانبہ، جعفر علی ولد عبدالعلی ساکن دنر نوگام بانہال، عبدالاحد ساکن زانی ہل بانہال، محمد شریف ولد شمس الدین ساکن واگن چمل واس، محمد اسماعیل ولد نظام الدین ساکن چمل واس، رابعہ دختر محمد رفیع ساکن سونہ وار ، محمد اقبال ولد فتح محمد ساکن کھاری، بشیر احمد ولد محروم میر ساکن چمل واس، راجیش کمار ولد ہربنس لعل ساکن رام سو، رئیس احمد تانترے ولد غلام رسول تانترے ساکن بنیگام اور محمد رفیع ولد حبیب اللہ ساکن چنجلو بانہال شامل ہیں۔اس کے علاوہ حادثے میں ایک مسافر کی شناخت ہنوز نامعلوم ہے۔ انتظامیہ کے ایک اعلیٰ افسر نے بتایا کہ حادثے میں زخمی ہوئے مسافروں کو مختلف ہسپتالوں میں داخل کرایا گیا جن میں 6زخمیوں کو ڈسٹرکٹ ہسپتال رام بن جبکہ 11زخمیوں کو نازک حالت میں جموں کے ہسپتال ائر لفٹ کیا گیا۔ KNS