تاشقند کیمپ آفس/نئی دہلی، لوک سبھا کے اسپیکر اوم برلا نے آج کہا کہ بیرون ملک تعلیم حاصل کرنے والے ہندوستانی طلباء ہندوستانی اقدار اور ثقافت کے سفیر ہیں انہوں نے کہا کہ ہزاروں میل دور رہنے کے باوجود یہ طلباء ہندوستانی اقدار سے وابستہ رہتے ہیں اور اپنے میزبان ممالک میں بھی ان کا پرچار کرتے ہیں۔ مسٹر برلا نے ازبکستان کے اپنے چار روزہ دورے کے دوران سمرقند میڈیکل یونیورسٹی میں ہندوستانی طلباء سے بات چیت کرتے ہوئے ان خیالات کا اظہار کیا ۔ مسٹر برلا فی الحال بین پارلیمانی یونین ( آئی پی یو ) کی 150ویں اسمبلی میں ہندوستانی پارلیمانی وفد ( آئی پی ڈی ) کی قیادت کر رہے ہیں۔

لوک سبھا اسپیکر نے کہا کہ نیا ہندوستان ” نئے مواقع کی سرزمین” کے طور پر جانا جاتا ہے، جہاں ہر شعبے میں تیزی سے اصلاحات ہو رہی ہیں۔ انہوں نے یہ بھی کہا کہ آیوشمان بھارت جیسے قومی اقدامات نے ملک بھر میں صحت کی دیکھ بھال کے شعبے میں وسیع مواقع فراہم کیے ہیں۔ آیوشمان بھارت نیٹ ورک میں سرکاری اسپتالوں کے ساتھ نجی اسپتالوں کی شمولیت کے ساتھ یہ اسکیم ایف ایم جی ڈاکٹروں کو بےش قیمت تجربہ حاصل کرنے اور ملک کے صحت کی دیکھ بھال کے نظام میں اپنا حصہ ڈالنے کے بے پناہ مواقع فراہم کرتی ہے۔ انہوں نے کہا کہ ہندوستان میں طبی تحقیق اور تعلیم کی تیز رفتار ترقی کے ساتھ طلباء کے لیے تعلیمی اور تحقیقی اداروں میں کام کرنے کے بہت سے مواقع موجود ہیں۔

مسٹر برلا نے طلباء سے کہا کہ ہندوستان دنیا کے ہر کونے میں رہنے والے ہندوستانیوں کے بارے میں یکساں طور پر فکر مند ہے۔ انہوں نے کہا کہ ہندوستان بیرون ملک ہندوستانی طلباء کی مدد اور تعاون کے لئے ہمہ وقت تیار ہے۔ ’’ مدد‘‘ ( ‘MADAD’) پورٹل جیسے اقدامات اور بیرون ملک ہندوستانی سفارت خانوں کی فعال مشغولیت کے ذریعہ حکومت اس بات کو یقینی بناتی ہے کہ ہندوستانی طلباء کو اپنی تعلیم، تحفظ اور کیریئر کے امکانات میں کسی قسم کی رکاوٹ کا سامنا نہ کرنا پڑے۔ انہوں نے فخریہ انداز میں کہا ’’ہندوستانی ڈاکٹروں کی عالمی پہچان ہے اور آپ کو اس روایت کو آگے بڑھانا چاہیے۔‘‘ انہوں نے یہ بھی کہا کہ ہندوستان نے ہمیشہ بہترین ڈاکٹر پیدا کیے ہیں اور یہ طلباء اپنے علم اور مہارت سے دنیا بھر میں صحت کی دیکھ بھال کی خدمات کو مضبوط بنائیں گے۔ مسٹر برلا نے کہا کہ طلباء کا عالمی تجربہ ان کے طبی کیریئر میں مزید کامیابی کی راہ ہموار کرے گا۔

لوک سبھا اسپیکر نے طلباء پر زور دیا کہ وہ اپنے علم اور ہنر کو بڑھانے کے ساتھ ساتھ اپنے اندر لگن اور ہمدردی جیسی اقدار کو بھی بیدار کریں۔ انہوں نے طلبا سے کہا کہ ان کی محنت صحت کی عالمی خدمات کو ایک نئی سمت دے گی۔ انہوں نے یہ بھی کہا کہ ہندوستان کے ثقافتی اور تعلیمی نمائندوں کے طور پر طلباء ہندوستان اور ازبکستان کے درمیان دوستی اور تعاون کو مضبوط بنانے میں بھی اہم رول ادا کر رہے ہیں۔

مسٹر اوم برلا نے گزشتہ روز و این آر آئیز کے ساتھ بات چیت کرتے ہوئے کہا کہ ازبکستان میں مقیم ہندوستانی تارکین وطن کی محبت اور پیار ہندوستان کے لیے متاثر کن ہے، جنہوں نے ہندوستانی برادری کی کوششوں نے ہندوستان کی عالمی شناخت کو مضبوط کرنے میں مدد کی ہے۔

ہندوستان کی بڑھتی ہوئی اقتصادی طاقت کے بارے میں بات کرتے ہوئے مسٹر برلا نے کہا کہ ہندوستان آج دنیا کی سب سے تیزی سے ترقی کرنے والی معیشت ہے اور اس کی عالمی شہرت اور اختراعات نے بے شمار نئے مواقع پیدا کیے ہیں۔ انہوں نے یہ بھی کہا کہ این آر آئیز سرمایہ کاری اور اختراع کے ذریعے ملک کی ترقی میں اپنا حصہ ڈال سکتے ہیں۔ لوک سبھا اسپیکر نے این آر آئیز کو ’ ترقی یافتہ ہندوستان ‘ کی مہم کے تحت دستیاب مواقع سے بھرپور فائدہ اٹھانے کی بھی ترغیب دی۔

مسٹر برلا نے اس بات پر زور دیا کہ ہندوستان اور ازبکستان کے درمیان تعلقات صرف سرکاری دوروں اور دستاویزات تک ہی محدود نہیں ہیں بلکہ دونوں ممالک کے لوگوں کے درمیان باہمی روابط، تعلقات، ثقافتی تبادلے اور باہمی احترام پر بھی مبنی ہیں۔ انہوں نے کہا کہ ہندوستان اور ازبکستان کے درمیان تاریخی تعلقات کو مضبوط بنانے میں ہندوستانی تارکین وطن کا کردار اہم رہا ہے کیونکہ انہوں نے اپنی محنت اور لگن کے ذریعہ دونوں ممالک کی ترقی میں حصہ ڈالا ہے۔ مسٹر برلا نے کہا کہ زبان، خوراک، روایات اور ثقافتی تبادلے ان مضبوط رشتوں کی بنیاد ہیں۔ انہوں نے یہ بھی کہا کہ سائنس، صحت، تعلیم، تجارت اور ٹیکنالوجی کے شعبوں میں ہندوستان اور ازبکستان کے درمیان بڑھتی ہوئی ساجھیداری دونوں ممالک کی ترقی کے لیے اہم ثابت ہو رہی ہے۔

تاشقند میں بین پارلیمانی یونین کی 150ویں اسمبلی کے موقع پر لوک سبھا کے اسپیکر اوم برلا نے جارجیا کی پارلیمنٹ کے چیئرمین شلوا پاپوشولی سے ملاقات کی۔ اس موقع پر مسٹر برلا نے پارلیمانی سفارت کاری کو مضبوط بنانے اور تجارت، سیاحت اور اختراع میں تعاون بڑھانے پر اپنے خیالات کا اظہار کیا۔ انہوں نے کثیرجہتی فورمز میں ہندوستان کی وکالت کی۔

یو این آئی ۔ ع خ