محنت کش ترقی کی ضمانت اورفرض شناسی کی علامت
مزدورطبقے کو اپنے قانونی حقوق سے متعلق جانکاری رکھنی چاہئے:ڈائریکٹر عبدالرشیدوار
شگاگواور سری نگر کے شہیدوںکے مشن کی آبیاری ہماری ذمہ داری اورعزم:اعجاز احمدخان
سری نگر:یکم ،مئی، اپریل: جے کے این ایس : مزدوروں کے عالمی دن کے موقعہ پر منعقدہ ایک تقریب سے خطاب کرتے ہوئے مقررین نے محنت کشوں کو ترقی کی ضمانت اورفرض شناسی کی علامت قرار دیتے ہوئے اسبات پر زوردیاکہ محنت کشوں کو اپنے حقوق سے متعلق جانکاری رکھنی چاہئے تاکہ کوئی بھی ادارہ یا شخص اُنکے ساتھ کوئی ناانصافی نہ کرسکے ۔اس عالمی دن کے موقعہ پر1886میں شگاگوشہر اور21جولائی 1924میں سیلک فیکٹری سرینگرمیں جاں بحق ہوئے محنت کشوں کوخراج عقیدت پیش کرتے ہوئے اس عزم کااعادہ کیاگیاکہ محنت کشوں کے حقوق اورعزت نفس کیلئے اپنی جانوںکی قربانی دینے والوں کے مشن کی آبیاری جاری رہے گی ۔جے کے این ایس کے مطابق محکمہ خوراک ،سیول سپلائز اور امور صارفین کشمیر کے ملازمین کی نمائندہ تنظیم فوڈ اینڈسپلائز ایمپلائز ایسوسی ایشن جموں وکشمیرکی جانب سے عالمی یوم مزدوراں 2025کے موقعہ پر محکمہ کے صوبائی ہیڈکوارٹر شہیدگنج سری نگرمیں ایک تقریب کااہتمام کیا ،جس میں ڈائریکٹرمحکمہ خوراک ،سیول سپلائز اور امور صارفین کشمیرعبدالرشیدوارنے بطور مہمان خصوصی شرکت کی جبکہ اس موقعہ پر محکمہ کے ڈپٹی ڈائریکٹر محمدرفیق بٹ بھی موجود تھے جبکہ EJCCکے ترجمان خالد محمود خان سمیت کئی سینئر ملازم لیڈروں نے تقریب میںخصوصی طور پر شرکت کی ۔ سینئرٹریڈیونین رہنما اورفوڈ اینڈسپلائز ایمپلائز ایسوسی ایشن جموں وکشمیرکے صدر اعجاز احمدخان کی قیادت میں منعقدہ یوم مزدوران کی اس تقریب میں محکمہ کے تمام ملازمین کیساتھ ساتھ دیگر کچھ سرکاری محکموںکے ملازمین بھی موجودتھے ۔اس موقعہ پر ڈائریکٹرمحکمہ خوراک ،سیول سپلائز اور امور صارفین کشمیرعبدالرشیدوار،جو لیبر کمشنر رہے ہیں ،نے اسبات پر زوردیاکہ سماج کے تمام طبقوں کو اپنے حقوق سے متعلق قانونی ضمانتوں کے بارے میں جانکاری ہونی چاہئے اور اس مقصد کیلئے جانکاری اور بیداری کو پھیلانے کی ضرورت ہے ۔انہوںنے کہاکہ محنت کشوں کاہرسماج اور معاشرے میں ایک خاص مقام ہے ،کیونکہ محنت کشوںکی محنت ومشقت ہی کسی بھی نجی کام یا کسی بھی بڑے سرکاری پروجیکٹ کو پایہ تکمیل تک پہنچانے کیلئے اپنا پسینہ بہاتے ہیں ۔ڈائریکٹر عبدالرشیدوار نے کہاکہ وہی معاشرے باوقار کہلاتے ہیں ،جہاں مزدوروں اور دیگر محنت کشوں کے حقوق کاخیال رکھاجاتاہے اور اُن کے حقوق کومکمل تحفظ فراہم کیاجاتاہے ۔انہوںنے کہاکہ دورسرے سرکاری محکموںکی طرح ہی ہمارے اس محکمے میں کام کرنے والے محنت کشوںکی خدمات اوررول ناقابل فراموش رہاہے ۔ عبدالرشیدوارنے کہاکہ یہ محنت کش طبقے کی نمائندگی کرنے والی تنظیموںکی ذمہ داری ہے کہ وہ محنت کشوںکو اُنکے حقوق اورقانونی تحفظ کے بارے میں گاہے بیگاہے جانکاری فراہم کرتے رہیں تاکہ کوئی فرد یاکوئی ادارے ان کے حقوق کو سلب نہ کرسکے ۔بطورمیزبان اور منتظم سینئرٹریڈیونین رہنما اورفوڈ اینڈسپلائز ایمپلائز ایسوسی ایشن جموں وکشمیرکے صدر اعجاز احمدخان نے کہاکہ 1886میں مشہور شہر شگاگو اور 21جولائی 1924میں سیلک فیکٹری سرینگرمیں محنت کشوں کیلئے جدودجہد کرتے ہوئے اپنی جانوںکی قربانی دینے والوں کے مشن کی آبیاری ہماری ذمہ داری ہے اور ہم اُنکے عظیم مشن کی ہرصورت میں آبیارر کرتے رہیں ۔

انہوںنے اسبات پر سخت افسوس کااظہارکیاکہ آج بھی ملک کی دوسری ریاستوں اورعلاقوں کی طرح جموں وکشمیرمیں بھی محنت کش اپنے جائز اورآئینی وقانونی حقوق سے محروم ہیں ۔اعجاز خان نے کہاکہ ہماری تنظیم محنت کشوں کے حقوق کیلئے جدوجہد کرنے کی پابند ہے اور ہم اس عزم کااعادہ کرتے ہیں کہ ہم اپنے محنت کشوں کے سلب شدہ حقوق کیلئے اپنی جدوجہد جاری رکھیں گے ۔سینئر ٹریڈیونین رہنما اعجاز احمدخان نے مختلف سرکاری محکموںمیں برسہا برس سے معمولی اجرتوں پر کام کرنے والے عارضی ملازمین بشمول ڈیلی ویجروں ،کیجول لیبروں ،آنگن واڑی ورکروں ،کنڈ کلیوں اور فیئرپرائس شاپ ڈیلروں کے حق میں آوازبلند کرتے ہوئے اس مطالبے کو دوہرایاکہ عارضی ملازمین کیساتھ ساتھ نجی سیکٹرمیں کام کرنے والے محنت کشوں کے حقوق کے تحفظ کو یقینی بنانے کیساتھ ساتھ اُن کے جائز مطالبات کو جلد سے جلد پورا کیا جائے ۔انہوںنے کم تنخواہ والے ملازمین ،عارضی ملازمین اوردیگر محنت کشوں کوسماجی تحفظ فراہم کرنے کامطالبہ کرتے ہوئے حکومت سے مانگ کی کہ کمزور طبقوں اوراُنکے اہل خانہ کی حالت کو بہتر بنانے کی طرف توجہ دی جائے ۔فوڈ اینڈسپلائز ایمپلائز ایسوسی ایشن جموں وکشمیرکی جانب سے عالمی یوم مزدوراں 2025کے موقعہ پرتقریب میں حاجی عبدالقیوم بیگ ،شہنوازآہنگر،مسعود احمدنازکی ،فیروزاحمد،نور محمدبٹ ،منظور اشبری ،حاجی فدا محمد،محمداقبال کنٹھ ،محمدافضل پارمو،محمدسلیم شاہ ،صدر ضلع سری نگرپرویز راجہ ،شمیمہ جی ،محبوبہ جی ،اویس قریشی ،نظیر بڈگامی ،غلا م محمد لاسی پورہ اور محنت کشوں کی بھاری تعدادنے شرکت کی ۔