خبراردو:
سیکورٹی فورسز نے آپریشن آل آؤٹ کے تحت جنوبی کشمیر کے ریشی پورہ ترال اور ریڈونی کیموہ میں 2الگ الگ آپریشنوں میں فورسز کو انتہائی مطلوب ترین 3جنگجوؤں کو جاں بحق کردیا ۔ اطلاعات کے مطابق فوج کی 1آر آر، سی آر پی ایف اور ایس او جی کی مشترکہ جمعیت نے 26اور 27کی درمیانی شب کو ایک مصدقہ اطلاع ملنے کے بعد ریڈونی کیموہ کا محاصرہ عمل میں لایا جس دوران فورسز نے علاقے میں تمام راستوں پر سخت پہرے بٹھاتے ہوئے لوگوں کی نقل و حمل مسدود بنائی۔ معلوم ہوا ہے کہ سیکورٹی فورسز نے دوران شب 3بجے ریڈونی کا کڑا محاصرہ کرکے یہاں گھر گھر تلاشیوں کا آغاز کیا۔ فورسز اہلکاروں نے جونہی مشتبہ مقام کی جانب پیش قدمی شروع کی تو یہاں چھپے بیٹھے جنگجوؤں نے تلاشی پارٹی پر خودکار ہتھیاروں سے فائرنگ شروع کی۔
ادھر فورسز اہلکاروں نے بھی مورچہ سنبھالتے ہوئے جنگجوؤں کی فائرنگ کا جواب دیا جس کے ساتھ ہی علاقے میں جھڑپ شروع ہوئی جس کے بعد علاقہ گولیوں کی گن گرج سے دہل اُٹھا۔ پولیس نے بتایا کہ ایک مصدقہ اطلاع ملنے کے بعد سیکورٹی فورسز اور پولیس نے درمیانی رات کو ریڈونی کولگام میں تلاشی آپریشن شروع کیا جس دوران علاقے میں موجود جنگجوؤں نے حفاظتی عملے پر اندھا دھند فائرنگ شروع کی۔انہوں نے بتایا کہ ابتدائی گولیوں کے تبادلے میں فسٹ آر آر اور 163بٹالین سی آر پی ایف سے وابستہ 3 اہلکار زخمی ہوئے جنہیں علاج ومعالجہ کی خاطر فوری طورپر نزدیکی اسپتال منتقل کیا گیا تاہم فوجی جوان زخموں کی تاب نہ لا کر دم توڑ بیٹھا جبکہ2ہلکاروں کی حالت مستحکم ہے۔پولیس نے مارے گئے فوجی اہلکار کی شناخت پرکاش یادو کے بطور کی جبکہ 2زخمی سی آر پی ایف اہلکاروں میں سب انسپکٹر امت کمار اور کانسٹیبل اویناش شامل ہیں۔انہوں نے بتایا کہ فورسز اہلکاروں نے بھی جوابی کارروائی کی جس کے نتیجے میں 2جنگجو ہلاک ہوئے جن کی شناخت اعجاز احمد مکرو ولد مرحوم غلام رسول ساکنہ کیموہ اور وارث احمد ملک ولد بشیر احمد ساکنہ آرونی کے بطور ہوئی ہے۔ پولیس نے بتایا کہ مہلوک جنگجوکالعدم تنظیم لشکر طیبہ سے وابستہ تھے اور وہ پولیس وفورسز کو کئی کیسوں میں مطلوب تھے۔ پولیس نے بتایا کہ مارے گئے جنگجوپولیس وفورسز پر حملوں ، عام شہریوں کو تشدد کا نشانہ بنانے کی کارروائیوں اور دیگر تخریبی سرگرمیوں میں پیش پیش تھے۔ پولیس ریکارڈ کے مطابق اعجاز احمد مکرو نامی عسکریت پسندکے خلاف سال 2017سے جرائم کی ایک لمبی فہرست موجود ہے اور وہ نوید جھاٹ اور آزاد دادا کے قریبی ساتھیوں میں شمار ہوتا تھا۔
مارے گئے جنگجوکے خلاف ایف آئی آر زیر نمبر 60/2016ایف آئی آر زیر نمبر 45/2017، ایف آئی آر زیر نمبر 100/2017، ایف آئی آر زیر نمبر 10/2018، ایف آئی آر زیر نمبر 13/2018کے تحت پولیس اسٹیشن کولگام میں کیس درج ہیں۔ سیکورٹی فورسز کے ساتھ تصادم میں مارے گئے دوسرے جنگجو وارث بھی کئی تخریبی کیسوں میں پولیس کو مطلوب تھا۔ ادھر ترال کے ریشی پورہ علاقے میں بھی درمیانی شب کو فوج اور جنگجوؤں کے درمیان خونین تصادم آرائی ہوئی جس میں چیف انصار غزوۃ الہند کے سربراہ ذاکر موسیٰ کے نائب کو جاں بحق کردیا گیا۔ تفصیلات کے مطابق 42آر آر، 180بٹالین سی آر پی ایف اور ایس او جی نے ہفو ریشی پورہ نامی گاؤں کا ایک مصدقہ اطلاع ملنے کے بعد محاصرہ کیا جس دوران یہاں مکان میں چھپے بیٹھے جنگجوؤں نے فورسز اہلکاروں پر شدید فائرنگ کی۔ معلوم ہوا ہے کہ سیکورٹی فورسز نے گاؤں میں 2سے3جنگجوؤں کی چھپے بیٹھے کی مصدقہ اطلاع کے بعد یہاں کڑا محاصرہ عمل میں لایا جس کے بعد یہاں گھر گھر تلاشی آپریشن شروع کیا گیا۔ اس دوران فورسز نے دوران شب ہی گاؤں میں فورسز کی بھاری کمک کو طلب کرتے ہوئے یہاں کسی بھی احتجاجی منصوبے کو ناکام بنانے کی خاطر تمام چوراہوں اور گلیوں کو سیل کردیا۔ تلاشی پارٹی نے جونہی گاؤں میں گھر گھر تلاشیوں کا آغاز کرتے ہوئے یہاں چھپے بیٹھے جنگجوؤں کو ڈھونڈ نکانے کی کوشش کی تو یہاں موجود قریبی مکان سے جنگجوؤں نے فورسز پر جدید ہتھیاروں سے فائرنگ کی۔

معلوم ہوا ہے کہ فورسز نے بھی جنگجوؤں کی کارروائی کا بھر پور جواب دیتے ہوئے گاؤں میں محاصرے کو مزید سخت کردیا۔ اس دوران طرفین کی گولہ باری کے نتیجے میں چیف انصار غزوۃ الہند کے سربراہ کے نائب اور قریبی ساتھی شاکر احمد ڈار ولد غلام حسن ڈار ساکن رٹھسونہ ترال جاں بحق ہوئے جبکہ گولی باری اور دھماکوں کے نتیجے میں 2رہائشی مکانات، ایک گاؤ خانہ سمیت غسل خانہ مکمل طور پر زمین بوس ہوگیا۔پولیس نے بتایا کہ ترال ہفوریشی پورہ میں علی الصبح سیکورٹی فورسز اورپولیس نے ایک مصدقہ اطلاع ملنے پر تلاشی آپریشن شروع کیا جس دوران علاقے میں موجودجنگجوؤں نے تلاشی پارٹی پر فائرنگ کی۔ تلاشی پارٹی نے بھی جوابی کاروائی کی جس کے نتیجے میں ایک جنگجو ہلاک ہوا جس کی شناخت شاکر حسن ڈار ولد غلام حسن ساکنہ رٹھسنہ ترال کے بطور ہوئی ہے۔ پولیس نے بتایا کہ مارا گیا جنگجو ذاکر موسیٰ گروپ کے ساتھ وابستہ تھااور اُس کے خلاف بھی سال 2015سے جرائم کی ایک لمبی فہرست موجود ہے۔ شاکر حسن نامی جنگجو پولیس وفورسز پر حملوں اور عام شہریوں کو تشدد کا نشانہ بنانے کی کارروائیوں میں ملوث رہ چکا ہے۔ پولیس نے اس سلسلے میں کیس درج کرکے تحقیقات شروع کی ہے۔

جھڑپ کی جگہ بڑی مقدار میں اسلحہ و گولہ بارود اور قابل اعتراض مواد برآمد کرکے ضبط کیا گیا۔اس دوران پولیس نے عوام الناس سے اپیل کی کہ وہ جھڑپ کی جگہ جانے گریز کریں کیوں کہ وہاں پر ممکنہ بارودی مواد موجود ہونے کے باعث خطرہ لاحق ہوسکتا ہے۔ ’لوگوں سے گذارش کی جاتی ہے کہ وہ پولیس کے ساتھ اس سلسلے میں تعاون کریں اور جب تک جھڑپ کی جگہ کو صاف کرکے محفوظ قرار نہ دیا جائے تب تک تصادم کی جگہ جانے سے اجتناب کیا جائے‘۔اس دوران متعلقہ علاقوں میں جھڑپ شروع ہونے کے ساتھ ہی دوران شب نوجوانوں کی مختلف ٹولیوں نے سڑکوں پر نکل کر فورسز کارروائی کے خلاف احتجاج کیا۔ مظاہرین نے یہاں تعینات فورسز کی مختلف ٹولیوں پر سنگ باری کی جس کے جواب میں فورسز نے بھی مظاہرین کو منتشر کرنے کی خاطر ہوا میں گولیوں کے کئی راؤنڈ فائر کرنے کے علاوہ پیلٹ فائرنگ کی جس کے نتیجے میں ایک درجن کے قریب افراد کے زخمی ہونے کی اطلاع ہے۔ریڈونی کیموہ میں جونہی جھڑپ شروع ہوئی تو یہاں فورسز کارروائی میں رخنہ ڈالنے کے لیے نوجوانوں نے سڑکوں پر نکل کر زور دار احتجاج اور پتھراؤ کیا۔ فورسز نے بھی جوابی کارروائی کرتے ہوئے پیلٹ فائرنگ کی جس کے جواب میں کئی افراد زخمی ہوئے جنہیں پبلک ہیلتھ سنٹر فرصل منتقل کیا گیا۔ پی ایچ سی فرصل کے ذرائع نے بتایا کہ فورسز کارروائی کے نتیجے میں کئی افراد زخمی ہوئے جنہیں علاج و معالجے کی خاطر یہاں منتقل کیا گیا تھا تاہم بعد میں انہیں بہتر طبی سہولیات کی فراہمی کے لیے ڈسٹرکٹ ہسپتال اننت ناگ منتقل کیا گیا۔ علاوہ ازیں انتظامیہ نے جنوبی کشمیر میں 2الگ الگ جھڑپوں کے مابعد کی صورتحال کو مدنظر رکھتے ہوئے ضلع کولگام اور پولیس ڈسٹرکٹ اونتی پورہ میں موبائل انٹرنیٹ خدمات کو اگلے احکامات تک معطل رکھنے کا فیصلہ کیا۔ادھر جنگجوؤں کی ہلاکت کے خلاف جنوبی ضلع کولگام سمیت پلوامہ کے ترال، اونتی پورہ، ڈاڈسرہ، آری پل، کیگام میں مکمل ہڑتال رہی جس دوران یہاں معمولات زندگی بری طرح متاثررہے۔

معلوم ہوا ہے کہ متعلقہ علاقوں میں عوامی، تجارتی، کاروباری اور غیر سرکاری سرگرمیاں پوری طرح مفلوج رہیں جبکہ سڑکوں پر سے ٹریفک کی نقل و حمل بھی ٹھپ ہوکر رہ گئی۔ادھر ریلوے حکام نے بھی جنوبی کشمیر میں سیکورٹی صورتحال کے پیش نظر سرینگر سے بانہال چلنے والی ریل سروس کو اگلے احکامات تک معطل کردیا۔ ریلوے حکام نے بتایا کہ جنوبی کشمیر میں سیکورٹی صورتحال کے پیش نظر ریل سروس کو احتیاطی طور پر بند رکھا گیا ہے تاہم سرینگر سے بارہمولہ ٹریک پر ریل سروس شیڈول کے مطابق چلے گی۔