کھیل

جنوبی افریقی کھلاڑیوں کی نئی نسل سے کیگیسو ربادا پُرجوش

Published

1 year ago

August 8, 2025

جوہانسبرگ، کیگیسو ربادا کو اپنے بچپن کی یاد آ جاتی ہے جب وہ موجودہ جنوبی افریقی ڈریسنگ روم کو دیکھتے ہیں، جہاں کھلاڑی آسٹریلیا کے خلاف اتوار سے شروع ہونے والی تین ٹی20 اور تین ون ڈے میچوں کی سیریز کی تیاری کر رہے ہیں۔

دونوں ٹیمیں آخری بار آئی سی سی ورلڈ ٹیسٹ چیمپئن شپ کے فائنل میں آمنے سامنے ہوئی تھیں، جہاں جنوبی افریقہ کے زیادہ تجربہ کار کھلاڑیوں نے عمدہ کارکردگی دکھائی تھی۔

لیکن اب 2026 میں ہونے والے ٹی20 ورلڈ کپ اور 2027 میں ہونے والے گھریلو ون ڈے ورلڈ کپ کو مدنظر رکھتے ہوئے ان کی توجہ نوجوان صلاحیتوں کو نکھارنے پر مرکوز ہو گئی ہے تاکہ بڑے میچوں کے دباؤ میں وہ جان سکیں کہ انہیں کیا کرنا ہے۔

بین الاقوامی کرکٹ میں دس سال مکمل کر چکے کیگیسو ربادا نے جمعرات کو کہا، ’’جب آپ ان ابتدائی دنوں کی بات کرتے ہیں جب میں پہلی بار ٹیم میں آیا تھا، تو مجھے آج کے نوجوان کھلاڑیوں کی حالت دیکھ کر اپنا وقت یاد آتا ہے۔ میں یقین سے کہہ سکتا ہوں کہ وہ بس اپنا بہترین کھیل پیش کرنا چاہتے ہیں۔ انہیں کسی چیز کا خوف نہیں ہے۔ جب آپ نوجوان ہوتے ہیں تو آپ کو کسی چیز سے ڈر نہیں لگتا۔ اور ہاں، میں بہت پرجوش ہوں کہ دیکھوں یہ نوجوان اپنے کیریئر میں کیسے آگے بڑھتے ہیں۔‘‘

ڈارون میں موجود جنوبی افریقہ کی وائٹ بال ٹیم میں لوآن-ڈرے پریٹوریئس جیسے کھلاڑی شامل ہیں، جو سال کے آغاز میں ’ساوتھ افریقہ 20‘ لیگ میں سب سے زیادہ رن بنانے والے بلے باز تھے؛ ڈیوالڈ بریوس، جنہیں 2022 انڈر-19 ورلڈ کپ میں شاندار کارکردگی کے بعد بہت عزت ملی؛ اور کوینا مافاکا، جن کی بائیں ہاتھ کی تیز گیند بازی نے انہیں 17 سال کی عمر میں آئی پی ایل معاہدہ اور 18 سال کی عمر میں قومی ٹیم میں جگہ دلوائی۔

اپنی ٹیم کے نوجوان کھلاڑیوں کو “پُرجوش اور نڈر” قرار دیتے ہوئے کپتان ایڈن مارکرم نے کہا: ’’آپ جانتے ہیں کہ 19-20 سال کی عمر میں زندگی کی زیادہ فکریں نہیں ہوتیں اور یہی ان کے کھیل اور ٹریننگ میں جھلکتا ہے۔ یہ واقعی بہت دلچسپ ہے… ہر ملک کے نوجوان کھلاڑی سامنے آ رہے ہیں اور اس دورے پر ہمیں بھی کچھ ایسے کھلاڑی ملے ہیں۔

یہ ہمارے لیے ایک زبردست موقع ہے کہ ہم ان کی صلاحیت کو جانچ سکیں اور انہیں مداحوں کو متاثر کرنے کا موقع دیں۔‘‘

کیگیسو ربادا نے جون میں ورلڈ ٹیسٹ چیمپئن شپ کے فائنل کے بعد سے کوئی کرکٹ نہیں کھیلی، جس میں انہوں نے نو وکٹیں حاصل کی تھیں۔ یونان میں چھٹیاں گزار کر وہ تازگی محسوس کر رہے ہیں اور اب “مکمل طور پر فٹ” ہیں۔ وہ نوجوان کھلاڑیوں کو اپنا تجربہ دینے کے لیے بھی پرجوش ہیں۔ انہوں نے مافاکا کو ’’نہایت دلچسپ باصلاحیت‘‘ قرار دیا۔

کیگیسو ربادا نےکہا، ’’چونکہ وہ بھی ایک گیندباز ہیں، اس لیے مجھے لگتا ہے کہ مجھے اس پر خاص توجہ دینی ہو گی۔ لیکن میرا ماننا ہے کہ وہ اپنے تجربات اور سفر سے سیکھیں گے۔ ہم صرف ایک رہنما بننے کے لیے موجود ہیں، ان کے کیریئر میں ضرورت سے زیادہ مداخلت کرنے کے لیے نہیں، بلکہ رہنمائی کے لیے۔‘‘

ابھی صرف 19 سال کے مافاکا نے جنوبی افریقی ٹیم میں تیزی سے جگہ بنا لی ہے۔ وہ اب تک دو ٹیسٹ، دو ون ڈے اور آٹھ ٹی20 میچ کھیل چکے ہیں، جن میں انہوں نے 18 وکٹیں حاصل کی ہیں۔ شکرے کونراڈ کو اب وائٹ بال کرکٹ کی کوچنگ بھی سونپی گئی ہے، اور پوری ٹیم نئے لیڈرشپ سے ہم آہنگ ہو رہی ہے۔ کیگیسو رباداکوچ کی کچھ ’عارضی‘ حکمت عملیوں سے کافی متاثر نظر آئے کیونکہ وہ آنے والے عالمی ٹورنامنٹس کی تیاری کر رہے ہیں۔

انہوں نے کہا، ’’آپ اس ٹیم کو اگلے ڈیڑھ سال میں آگے لے جانے کی منصوبہ بندی کر رہے ہیں۔ 2027 کا ون ڈے ورلڈ کپ ایک بڑا ہدف ہے، لیکن 2026 کا ٹی20 ورلڈ کپ ایک قریبی اور فوری ہدف ہے۔ ڈیوڈ ملر، جو فی الحال انگلینڈ میں ’دی ہنڈریڈ‘ کھیل رہے ہیں، جیسے کھلاڑی واپس آئیں گے۔ مارکو یانسن (جو زخمی ہیں) بھی جلد واپس آئیں گے۔ ان کی واپسی سے ٹیم کو خاص طور پر تجربے کے لحاظ سے مزید تقویت ملے گی۔‘‘

’’لیکن ہاں، یہ میچ (آسٹریلیا کے خلاف) ساتھی کھلاڑیوں کو سمجھنے کے لیے ہوں گے – کہ ہم ایک ساتھ کیسے آگے بڑھیں گے۔ اور دراصل، یہ ایک عمل ہے، جیتنے یا ہارنے کا کوئی خوف نہیں۔ اگرچہ ہم 100 فیصدجیتنے کے لیے کھیلتے ہیں، مگر اصل بات یہ ہے کہ یہ سیکھنے اور جانچنے کا عمل ہے۔‘‘

یواین آئی۔ م س

کھیل

پاکستان کو 19 رن سے شکست دے کر ہندوستان نے ایشیائی کھیلوں کی کرکٹ کا طلائی تمغہ جیتا

Published

3 weeks ago

October 3, 2026

Online Desk

نشین، (جاپان) ابھیشیک شرما (61)، تلک ورما (ناٹ آؤٹ 51) اور شیوم دوبے (27 رن/2 وکٹ) کی شاندار کارکردگی کی بدولت ہندوستان نے ہفتہ کو ایشیائی کھیل 2026 کی کرکٹ مقابلے کے فائنل میں روایتی حریف پاکستان کو 19 رن سے شکست دے کر خطاب اپنے نام کر لیا۔

212 رن کے ہدف کا تعاقب کرنے اتری پاکستان کی ٹیم کے لیے کپتان صاحبزادہ فرحان اور ماجد صاداقت کی افتتاحی جوڑی نے پہلی وکٹ کے لیے 33 رن جوڑے۔ چوتھے اوور میں واشنگٹن سندر نے صاحبزادہ فرحان (10) کو آؤٹ کرکے ہندوستان کو پہلی کامیابی دلائی۔ اگلے ہی اوور میں اکشر پٹیل نے عثمان خان (3) کو آؤٹ کردیا۔ پاکستان کی تیسری وکٹ ساتویں اوور میں ماجد صاداقت (23) کے طور پر گری۔ اس کے بعد حسن نواز اور صائم ایوب کی جوڑی نے پاکستان کی اننگز کو سنبھالا۔ دونوں بلے بازوں نے چوتھی وکٹ کے لیے 87 رن جوڑ کر پاکستان کی میچ میں واپسی کرائی۔ 15ویں اوور میں شیوم دوبے نے صائم ایوب (29) کو آؤٹ کرکے اس شراکت داری کا خاتمہ کیا۔ 18ویں اوور میں واشنگٹن سندر نے عبدالصمد (9) کو آؤٹ کرکے پاکستان کو پانچواں جھٹکا دیا۔ اس دوران حسن نواز نے ایک سرا سنبھالے رکھتے ہوئے تیزی سے رن بنائے۔

شیوم دوبے نے انہیں میچ کی آخری گیند پر وکٹ کیپر سنجو سیمسن کے ہاتھوں کیچ آؤٹ کرایا۔ انہوں نے 51 گیندوں میں 5 چوکے اور 7 چھکوں کی مدد سے 96 رن کی اننگز کھیلی۔ پاکستان کی ٹیم مقررہ 20 اوور میں 6 وکٹ پر 192 رن ہی بنا سکی اور مقابلہ 19 رن سے ہار گئی۔ہندوستان کی جانب سے شیوم دوبے، واشنگٹن سندر اور اکشر پٹیل نے 2-2 وکٹیں حاصل کیں۔

اس سے پہلے آج یہاں ابھیشیک شرما (61) اور تلک ورما (ناٹ آؤٹ 51) کی جارحانہ نصف سنچری اننگز کی بدولت ہندوستان نے پاکستان کو جیت کے لیے 212 رن کا ہدف دیا تھا۔ ہندوستانی کپتان شریئس ایئر نے ٹاس جیت کر پہلے بلے بازی کرنے کا فیصلہ کیا۔ بلے بازی کے لیے اتری ہندوستانی ٹیم کو تیسرے اوور کی پہلی گیند پر وائبھو سوریہ ونشی (15) کے طور پر پہلا جھٹکا لگا۔ اگلے ہی اوور میں سنجو سیمسن (2) رن بناکر پویلین لوٹ گئے۔ اس کے بعد کپتان شریئس ایئر نے ابھیشیک شرما کے ساتھ اننگز کو سنبھالا۔ دونوں بلے بازوں کے درمیان تیسری وکٹ کے لیے 42 رن کی شراکت داری ہوئی۔ آٹھویں اوور میں عرفات منہاس نے ابھیشیک شرما کو اسٹمپ آؤٹ کرکے اس شراکت داری کو توڑا۔ ابھیشیک نے 28 گیندوں میں 3 چوکے اور 7 چھکے لگاتے ہوئے 61 رن کی اننگز کھیلی۔

13ویں اوور میں ایشان کشن (20) رن اور اگلے اوور میں شریئس ایئر (21) رن بناکر آؤٹ ہوئے۔ شیوم دوبے نے 15 گیندوں میں 2 چوکے اور 2 چھکوں کی مدد سے 27 رن بنائے۔ ہندوستان نے مقررہ 20 اوور میں 6 وکٹ پر 211 رن کا چیلنجنگ اسکور کھڑا کیا۔ تلک ورما نے 22 گیندوں میں 3 چوکے اور 4 چھکے لگاتے ہوئے ناٹ آؤٹ 51 رن کی اننگز کھیلی۔ پاکستان کی جانب سے عرفات منہاس اور احمد دانیال نے 2-2 وکٹیں حاصل کیں۔ صائم ایوب اور ابرار احمد نے ایک ایک بلے باز کو آؤٹ کیا۔

یو این آئی۔ ایم جے

کھیل

ڈوگرا اور مظفر نے جموں و کشمیر کی اننگز کو سنبھالا

Published

3 weeks ago

October 2, 2026

Online Desk

سری نگر، موجودہ رنجی ٹرافی چیمپئن جموں و کشمیر نے سری نگر میں ایرانی کپ کے دوسرے دن زبردست حوصلے کا مظاہرہ کرتے ہوئے دو مشکل حالات سے نکل کر ’ریسٹ آف انڈیا‘ کے خلاف پہلی اننگز میں 41 رنز کی برتری حاصل کر لی۔

صبح 37 رنز پر چار وکٹ اور لنچ کے بعد 166 رنز پر آٹھ وکٹ کے مشکل مرحلے سے گزرنے والی موجودہ رنجی ٹرافی چیمپئن ٹیم کو تجربہ کار پارس ڈوگرا (75 رنز) اور نمبر 10 پر کھیلنے والے لون ناصر مظفر (58 گیندوں پر جارحانہ 64 رنز) نے سنبھالا اور ٹیم کو 278 رنز تک پہنچا دیا۔

’ریسٹ آف انڈیا‘ کی ٹیم پہلے دن 237 رنز پر آل آؤٹ ہوگئی تھی۔ جموں و کشمیر کی برتری حاصل کرنے کی امیدوں کو اس وقت ابتدائی دھچکا لگا جب مکیش چودھری نے اوور نائٹ بلے باز شبھم کھجوریہ اور کامران اقبال کو پہلے ہی پانچ اووروں میں آؤٹ کر دیا۔

اس کے بعد ڈوگرا اور عبدالصمد نے 97 رنز کی شراکت قائم کرکے اننگز کو سنبھالا اور لنچ تک جموں و کشمیر کا اسکور 134 رنز پر چار وکٹ تک پہنچا دیا۔ صمد (57 رنز) اس جوڑی میں زیادہ جارحانہ رہے اور وقفے سے عین قبل انہوں نے فرسٹ کلاس کرکٹ میں اپنی 12ویں نصف سنچری مکمل کی۔

تاہم لنچ کے بعد ’ریسٹ آف انڈیا‘ نے واپسی کرتے ہوئے صمد کو آؤٹ کر دیا۔ اس کے بعد کنہیا ودھاون، عابد مشتاق اور ساحل لوٹرا بھی 11 اوور کے دوران آؤٹ ہوگئے۔ 166 رنز پر آٹھ وکٹ گرنے کے بعد بھی جموں و کشمیر 71 رنز پیچھے تھی۔

اس کے بعد ڈوگرا اور مظفر نے نویں وکٹ کے لیے 64 رنز کی شراکت قائم کرکے اننگز کا رخ بدل دیا۔

ڈوگرا 75 رنز بناکر آؤٹ ہوئے، جس کے ساتھ ہی چودھری نے اننگز میں اپنی پانچویں وکٹ حاصل کی، لیکن مظفر نے جارحانہ کھیل جاری رکھا اور آخری وکٹ کے لیے سنیل کمار کے ساتھ 48 رنز جوڑ کر جموں و کشمیر کو برتری دلا دی۔ مظفر بالآخر 64 رنز پر آؤٹ ہوئے اور جموں و کشمیر کی پوری ٹیم 278 رنز پر سمٹ گئی۔ چودھری نے 78 رنز دے کر پانچ وکٹ حاصل کیے، جبکہ آکاش دیپ نے 43 رنز دے کر تین وکٹ لیے۔

جواب میں ’ریسٹ آف انڈیا‘ نے اسٹمپس تک ایک وکٹ پر 24 رنز بنا لیے تھے اور وہ اب بھی 17 رنز پیچھے تھی۔ سودیپ گھرامی اور سَنَت سانگوان ناٹ آؤٹ تھے، جبکہ سست اوور ریٹ کے باعث 15 اوورز کا کھیل نہیں ہو سکا۔

مختصر اسکور:
ریسٹ آف انڈیا: 237 اور 1/24 (سنیل کمار 1/9)، جموں و کشمیر: 278 (پارس ڈوگرا 75، لون ناصر مظفر 64، عبدالصمد 57؛ مکیش چودھری 5/78، آکاش دیپ 3/43) — 17 رنز پیچھے۔

یواین آئی۔ ظ ا

کھیل

رضوان کو این سی سی آئی اے کا پراسس فالو کرنا چاہیے: یونس خان

Published

3 weeks ago

October 2, 2026

Online Desk

کراچی، پاکستان کرکٹ ٹیم کے سابق کپتان یونس خان نے کہا ہے کہ وہ بطور کرکٹر محمد رضوان کے ساتھ کھڑے ہیں، تاہم رضوان سے متعلق جاری معاملے پر بات کرتے ہوئے احتیاط کا مظاہرہ کرنا چاہیے۔پاکستانی میڈیا رپورٹ کے مطابق یونس خان نے ایک پروگرام میں کہا کہ کرکٹرز پاکستان کرکٹ بورڈ (پی سی بی) سے بڑے نہیں ہوسکتے اور اس معاملے میں محتاط انداز میں گفتگو کی ضرورت ہے۔

انہوں نے کہا کہ نیشنل سائبر کرائم انویسٹی گیشن ایجنسی (این سی سی آئی اے) ایک معتبر ادارہ ہے اور محمد رضوان کو متعلقہ قانونی طریقہ کار پر عمل کرنا چاہیے۔ ان کے بقول، ”ہم کسی کے وکیل نہیں ہیں اور نہ ہی ہمیں اس کیس سے متعلق مکمل معلومات ہیں۔”

یونس خان نے کہا کہ محمد رضوان سے متعلق معاملہ ایک سرکاری دورے کے دوران پیش آیا ہے، اس لیے کیس کا نتیجہ سامنے آنے تک اس پر گفتگو میں احتیاط ضروری ہے۔

سابق کپتان نے بتایا کہ ماضی میں انہیں بھی اسی نوعیت کی صورتحال کا سامنا کرنا پڑا تھا اور ان کے معاملات تقریباً چار ماہ تک جاری رہے تھے۔

واضح رہے کہ پاکستانی کرکٹ ٹیم کے کھلاڑیوں محمد رضوان اور امام الحق سے متعلق این سی سی آئی اے کی تحقیقات جاری ہیں۔

یو این آئی۔ م س