سیدعلی گیلانی ،میرواعظ عمرفاروق اورمحمدیاسین ملک پرمشتمل مشترکہ مزاحمتی قیادت کی جانب سے پلوامہ میں سنیچرکی صبح فورسزگولی باری کے نتیجے میں سات عام شہریوں کی ہلاکت کیخلاف دی گئی تین روزہڑتال کال اورسوموارکوبادامی باغ کنٹونمنٹ چلوپروگرام کے پیش نظرمسلسل دوسرے روزبھی شہرخاص اورسیول لائنزکے علاقوں میں بندشیں عائدرہیں ۔مجوزہ احتجاجی مارچ اورممکنہ احتجاجی مظاہروں کوروکنے کیلئے ضلع مجسٹریٹ سری نگرکی ہدایت پردفعہ 144کے تحت سوموارکوعلی الصبح سے ہی پولیس تھانوں رام منشی باغ ،رعناواری ،خانیار،نوہٹہ،مہاراج گنج ،صفاکدل اورمائسمہ کے تحت آنے والے درجنوں علاقوں میں مکمل اورجزوی بندشیں عائدرہیں ،اوران سبھی علاقوں میں صبح سے ہی پولیس وفورسزکے دستے تعینات رکھے گئے تھے اورسیکورٹی دستوں نے بندش والے علاقوں میں جگہ جگہ خاردارتاریں اوردیگررکاؤٹیں ڈال رکھی تھیں تاکہ لوگوں کی آواجاہی پرروک لگائی جاسکے ۔بندش زدہ علاقوں کے لوگوں نے بتایاکہ اُنھیں مسلسل دوسرے روزبھی گھروں سے باہرآکرکہیں جانے کی اجازت نہیں دی گئی ۔

انہوں نے کہاکہ ہم مسلسل دوسرے روزبھی گھروں میں محصوررہے ۔سٹی رپورٹرنے بتایاکہ لالچوک اورسیول لائنزکے دوسرے علاقوں سے سونہ واریابٹہ وارہ جانے والی سڑک پرپولیس وفورسزکاکڑاپہرہ بٹھادیاگیاتھا،اورصبح 12بجے تک یہاں سے کسی کوپیدل یاگاڑی میں سوارہوکرجانے کی اجازت نہیں دی گئی ۔سونہ وار،اندرانگراوردیگرنزدیکی علاقوں کے لوگوں نے بتایاکہ اُنھیں سوموارکوعلی الصبح ہدایت دی گئی کہ وہ گھروں سے باہرآنے کی کوشش نہ کریں ۔انہوں نے کہاکہ ان علاقوں میں کرفیونافذنہیں تھالیکن اندرون سڑکوں وگلی کوچوں پرپولیس وفورسزکے دستے جگہ جگہ تعینات کئے گئے تھے ،اسلئے لوگ گھروں میں رہے ۔اس دوران سیول لائنزمیں اُسوقت ٹیرگیس شلنگ اورنعرے بازی کی گونج سنائی دی جب بادامی باغ چلوپروگرام کے پیش نظرکئی دنوں سے روپوش سینئرمزاحمتی لیڈرمحمدیاسین ملک اپنے آبائی علاقہ مائسمہ سے درجنوں ساتھیوں بشمول خواتین کی قیادت کرتے ہوئے ایک جلوس لیکرنمودارہوئے۔سوموارکو صبح کے 11بجے لبریشن فرنٹ کے چیئرمین ملک یاسین بزرگوں،نو جوانوں،خواتین اور بچوں کی ایک بڑی تعداد کے ہمراہ بادامی باغ کنٹونمنٹ کی جانب روانہ ہوگئے ۔ پرامن عوامی ریلی میں شامل پرجوش خواتین تھیں جو کفن باندھے ،ہاتھوں میں ’بھارتی ظالمو ! آؤ ہم سبھی کو مادو‘ کی تحریر یں لئے اور قتل و غارت کے لامتناہی سلسلے کی سخت الفاظ میں مذمت کررہی تھیں ۔

بڈشاہ چوک کے نزدیک پہلے سے ہی پولیس وفورسزکے دستے تعینات تھے اورجب ملک یاسین کی قیادت میں برآمدکیاگیااحتجاجی جلوس نزدیک پہنچاتوپولیس وفورسزنے کارروائی عمل میں لائی ۔احتجاجی مظاہرین کومنتشرکرنے کیلئے آنسوگیس کے کئی گولے داغے گئے جبکہ اس دوران پولیس وفورسزنے محمدیاسین ملک کوکئی ساتھیوں لبریشن فرنٹ کے نائب چیئرمین مشتاق اجمل، محمد حنیف ڈار،امتیاز احمد ڈار،امتیاز احمد گنائی،شاکر احمد آہنگر،فیاض احمد ،بشارت احمد اور کئی دوسرے افرادسمیت گرفتارکرلیا۔لبریشن فرنٹ ترجمان نے کہاکہ گرفتاری کے دوران ملک یاسین زخمی ہوگئے اورپولیس اہلکاروں نے چیئرمین فرنٹ کونیم بے ہوشی کی حالت میں حراست میں لیکرساتھیوں سمیت پولیس تھانہ کوٹھی باغ منتقل کیا۔ گرفتاری سے قبل میڈیا سے باتیں کرتے ہوئے محمدیاسین ملک نے کہا کہ مشترکہ مزاحمتی قیادت نے فیصلہ کرلیا ہے کہ سبھی ایک ساتھ بادامی باغ آرمی کنٹونمنٹ جو کشمیر میں فوج کا مرکز ہے پر جاکر بھارتی آرمی اور ریاست سے کہیں کہ کشمیریوں کو روزانہ کی بنیاد پر ایک ایک کرکے قتل کرنے کے بجائے وہ ہم سبھی کو ایک ساتھ قتل کرڈالیں۔ انہوں نے کہا کہ بھارتی آرمی اور نوآبادیاتی ذہن والی فورسز کو کشمیریوں کے خون کی لت پڑچکی ہے اور ہم آج اپنے آپ کو پیش کرکے ان کی اس لت کو مطمئن کرنا چاہتے ہیں۔یاسین ملک نے کہا کہ پلوامہ میں کیا گیا قتل عام اپنی نوعیت کا پہلا اور واحد قتل عام نہیں ہے بلکہ بھارتی فوج اور فورسز نے اس سے قبل بھی ایسے کئی خونین واقعات رقم کررکھے ہیں۔انہوں نے کہا کہ کشمیری معصومین کا خون بہاتے بہاتے بھارتی فوج اور فورسز اب انسانی خون کے عادی بن چکے ہیں ۔ اس دوران مشترکہ مزاحمتی قیادت کی جانب سے پلوامہ ہلاکتوں کیخلاف بطور احتجاج بادامی باغ آرمی ہیڈ کواٹر سریگر چلو کال پروگرام کی پیروی میں مزاحمتی قائد میرواعظ محمد عمر فاروق نے اپنی خانہ نظر بندی توڑتے ہوئے کئی مزاحمتی لیڈروں اور کارکنان کے ہمراہ بادامی باغ کی طرف پیش قدمی کی کوشش کی تو پولیس اور فورسز کی ایک بھاری جمعیت نے اُنہیں گرفتار کرکے نزدیکی پولیس تھانہ نگین میں بند کردیا۔ گرفتاری سے قبل موقعہ پر موجود میڈیا سے بات کرتے ہوئے میرواعظ نے کہا سرکاری فورسز کشمیر میں لوگوں کو مارنے کی ایک میشین بن گئی ہے اور اس کیلئے انہیں باقاعدہ لائسنس حاصل ہے۔

انہوں نے کہا کہ صرف ایک دن میں دس کشمیریوں جن میں ایک 8 ویں جماعت کا طالب علم ، نونہال معصوم بچی کے والد بھی شامل ہیں نے کشمیریوں کے دل مجروح کردئے ہے اور پورا کشمیر ماتم کدہ بنا ہوا ہے۔ میرواعظ نے کہا کہ یہ المیہ ہے کہ ایک طرف ہمارے معصوم نوجوانوں کو اندھا دھند فائرنگ سے چن چن کے قتل کیا جارہا ہے وہیں دوسری جانب ان معصوموں کو دہشت گرداور بالائی ورکر کا نام دے کر ان کے قتل کا جواز پیش کیا جارہا ہے۔ میرواعظ عمر فاروق نے کہا کشمیر میں معصوموں کی ہلاکت کو دہشتگردی کارنگ دے کر درحقیت ہندوستان کے لوگوں کو یہ غلط تاثر دیا جارہا ہے تاکہ ان وؤٹ بنک کی سیاست کر کے آنے والے انتخابات میں فائدے حاصل کئے جاسکے۔ انہوں نے کہا تاہم دنیااصل حقیقت سے واقف ہے کہ کشمیری عوام جو تنازعہ کشمیر کا پُر امن حل چاہتے ہیں کے اومظالم اور پُر تشدد کارروائیوں میں روز مرہ کی بنیادوں پرتشویش ناک اضافہ ہوتا جارہا ہے۔ میرواعظ نے کہا کشمیری عوام اپنے لخت جگروں اور نہتے شہروں کو شہید کئے جانے پر پُر ہڑتال کے ذریعے تعزیت،ہمدردی اور اپنے دکھی جذبات کا اظہار کرتے ہیں کیونکہ احتجاج باقی تمام راستوں پر غدغنیں عائد ہیں۔ انہوں نے کہا قتل و غارت گری کے بعد فوج کی جانب سے یہ کہنا کہ ’’فوج عوام کے ساتھ ہے‘‘ ایک مضحکہ خیز دعویٰ ہے۔ انہوں نے کہا قیادت کشمیر میں دائمی امن و امان کی متمنی ہے تاہم قبرستان کی خاموشی ہمارے لئے ہرگز قابل قبول نہیں۔ انہوں نے کہا کشمیری عوام بھی امن و امان کی خواں ہے جس کے لئے مسئلہ کشمیر کا حل ناگزیر اور پورے خطے کے مفاد میں ہے۔دریں اثناء پولیس نے حریت(گ)کی خواتین اکائی مسلم خواتین مرکزکی جانب سے بادامی باغ تک جلوس لیکرجانے کی کوشش کاناکام بناتے ہوئے خاتون مزاحمتی لیڈریاسمین راجہ کوپریس کالونی سری نگرمیں کئی رفقاء سمیت حراست میں لیکرپولیس تھانہ منتقل کیا۔خیال رہے مجوزہ احتجاجی مارچ کے پیش نظرپولیس نے پہلے ہی سیدعلی گیلانی ،محمداشرف صحرائی ،انجینئرہلال احمدوار،جاویداحمدمیر،محمدیوسف نقاش ،ظفراکبر بٹ ،سیدامتیازحیدر،محمدیاسین عطائی ،بشیراحمدبٹ بڈگامی اوردیگرکئی مزاحمتی لیڈروں وکارکنوں کوگھروں اورمختلف پولیس تھانوں میں بندکردیاہے ۔