نئی دہلی، وینائک دامودر ساورکر کو مجاہد آزادی، سماجی مصلح اور دانشور قرار دیتے ہوئے مرکزی وزیر مملکت (آزادانہ چارج) ارجن رام میگھوال نے کہاکہ وہ چاہتے تھے کہ ہندو مسلمان اپنے تاریخی اختلافات کو فراموش کرکے وہ ہندوستان بنائیں جہاں سب کو یکساں حقوق حاصل ہوں۔ یہ بات انہوں نے قومی کونسل برائے فروغ زبان اردو (این سی پی یو ایل) کے زیر اہتمام شائع کتاب’ویر ساورکر اور تقسیم ہند کا المیہ‘کے رسم اجرا کے موقع پر کہی

انہوں نے کہاکہ وینائک دامودر ساورکے بارے میں بہت ساری غلط فہمیاں پھیلائی گئی ہیں اور اصل حقائق چھپائے گئے ہیں۔ یہ کتاب ان غلط فہیموں کا ازالہ کرے گی اور ان کے بارے میں نئی سمجھ پیدا کرنے میں مدد کرے گی۔ انہوں نے کوٹیشن کا حوالہ دیتے ہوئے کہاکہ بابا بھیم راؤ امبیڈکر اور ساور کے بارے میں بھی غلط باتیں پھیلائی گئی ہیں جب کہ دونوں کے تعلقات بہت اچھے تھے اور ایک دوسرے کا احترام کرتے تھے۔ انہوں نے کہاکہ وینائک دامودر ساورکر نے ہندوؤں میں پھیلی بہت سی برائیوں کے خلاف بھی لڑائی لڑی اور لوگوں میں اس کے خلاف بیداری پیدا کرنے کی بھرپور کوشش کی۔ انہوں نے کہاکہ سماجی مصلح کے طور پر انہوں نے 1931میں ایسا مندر قائم کیا تھا جہاں سب لوگ پوجا کرسکیں۔ ساتھ ہی انہوں نے کہاکہ وہ قومی ایکتا کے زبردست حامی اور تقسیم ہند کے سخت خلاف تھے۔ انہوں نے کہا کہ ویر ساورکر قومی ایکتا و اکھنڈتا کے تئیں نہایت حساس تھے اور اسی وجہ سے وہ تقسیمِ ہند کے شدید مخالف تھے،اگر ان کے وژن اور منصوبے پر عمل کیا جاتا تو ملک کو ٹوٹنے سے بچایا جاسکتا تھا۔انھوں نے کہا کہ آزادی کے بعد ایک خاص مقصد کے تحت ویر ساورکر کو بدنام کرنے کی کوششیں کی گئیں، ان کے افکار و نظریات کو توڑ مروڑ کر پیش کیا گیاجوکہ نہایت افسوسناک تھا۔

انہوں نے نئی تعلیمی پالیسی کے بارے میں اظہارخیال کرتے ہوئے کہا کہ نئی تعلیمی پالیسی میں اردو کے فروغ کی بات بھی بات کہی گئی ہے اور آٹھویں شیڈول کے تحت زبانوں کی ترقی پر زور دیا گیا ہے جس میں اردو بھی شامل ہے۔

جامعہ ملیہ اسلامیہ کے وائس چانسلر اور کتاب کے مترجم مظہر آصف نے کہا کہ ہندوستانی تہذیب ہزار سالہ تہذیب ہے اور دنیا میں بہت ساری تہذیبیں پیدا ہوئیں۔ وہ یا تو مٹ گئیں یا دوسرے نام سے موسوم ہوگئیں یا لیکن ہندوستانی تہذیب اپنی آن بان اور شان کے ساتھ اپنا جلوہ بکھیر رہی ہے۔ انہوں نے کہاکہ دوسری تہذیبوں ا ور سناتنی سنسکار میں بہت فرق ہے کیوں کہ سناتنی سنسکار ندیوں، پہاڑوں اور درختوں سے منسلک ہیں جو ہمارے لئے اور ہم ان کے لئے ضروری ہیں۔انہوں نے کہاکہ یہ کتاب تحریک آزادی اور تقسیم ہند کے المیہ پر مشتمل ہے اور حقائق کو جاننے کے لئے اس کتاب کو پڑھنا ضروری ہے۔

قومی کونسل برائے فروغ اردو زبان کے ڈائرکٹر ڈاکٹر شمس اقبال نے افتتاحی کلمات ادا کرتے ہوئے کہاکہ وینائک دامودر ساورکرپر لکھی اس کتاب میں تحریک آزادی میں ان کا کردار اور ملک کے لئے ان کی خدمات کا بھرپور احاطہ کیا گیا ہے۔ انہوں نے کہاکہ اس کتاب میں بہت ہی معروضی انداز میں ان کی زندگی پر بات کی گئی ہے۔ انہوں نے کہاکہ اردو کونسل مختلف اہم شخصیات پر اب تک دو ہزار سے زائد کتابیں شائع کرچکی ہے۔ جن میں داراہ شکوہ، مہاتما گاندھی، مولانا آزاد اور دیگر اہم شخصیات شامل ہیں۔

ڈاکٹر شمس اقبال نے کہا کہ یہ نہ صرف کونسل کے لیے بلکہ پوری اردو دنیا کے لیے ایک اہم موقع ہے، کیوں کہ اب تک اردو زبان میں ویرساورکر پر مستند اور غیرجانبدارانہ حقائق پر مبنی کتاب کی شدید کمی محسوس کی جارہی تھی،جسے قومی اردو کونسل نے دور کرنے کی کوشش کی ہے۔ مجھے امید ہے کہ اردو آبادی اس کتاب کا ضرور مطالعہ کرے گی اور آزاد ہندوستان کے غیر جانبدارانہ تاریخی بیانیے اور تحقیق و تفتیش پر مبنی جہت سے آگاہی حاصل کرے گی۔

کتاب کے مصنف اور سابق انفارمیشن کمشنر ادے ما ہولکر نے کہاکہ وینائک دامودر ساورکر کے بارے میں بتاتے ہوئے کہاکہ اس کتاب میں کس لئے لڑے تھے اور ان کا نظریہ کیا تھا اس کا ذکر کیا گیا ہے۔ انہوں نے کہاکہ ان کا نظریہ یکساں حقوق، آزاد ہندوستان میں اقلیتوں کی مذہبی آزادی کے بار ے میں ہے۔ ان کا خیال تھا کہ اقلیتوں کو مذہبی آزادی تو ہوگی لیکن انہیں اپنی مذہبی ریاست بنانے کی اجازت نہیں ہوگی۔ا س کتاب میں آزاد ہندوستان کی تاریخ میں پہلی بار ویرساورکر کے حوالے سے سچی اور غیر جانبدارانہ معلومات پیش کی گئی ہیں اور ان تمام غلط فہمیوں کو تاریخی حقائق کی روشنی میں دور کرنے کی کوشش کی گئی ہے جومخصوص سیاسی نظریے کے تحت پھیلائی گئی ہیں

کتاب کے شریک مصنف شری چرایو پنڈت اور شریک مترجم ڈاکٹر مسعود عالم نے بھی اظہار خیال کیا اور اس موقعے پر تمام مہمانوں کا شال، مومنٹو اور کتابیں پیش کرکے استقبال کیا گیا۔

پروگرام میں کثیر تعداد میں دانشوران،جامعات کے اساتذہ،میڈیا اہلکار، ریسرچ اسکالرز اور طلبہ و طالبات نے شرکت کی۔

یو این آئی۔ ع ا۔