باغی بی جے پی لیڈر نے مہاگٹھ بندھن کی حمایت کا کیا اعلان

Published

8 years ago

January 1, 2019

خبراردو:
گزشتہ 6 دسمبر کو بی جے پی کی پرائمری ممبرشپ سے استعفیٰ دینے والی دلت رکن پارلیمنٹ ساوتری بائی پھولے نے 2019 کے لوک سبھا انتخابات میں مہاگٹھ بندھن کی حمایت پر اپنی راضامندی ظاہر کر دی ہے۔ انھوں نے واضح لفظوں میں کہہ دیا ہے کہ وہ بی جے پی کو شکست دینے کے لیے کچھ بھی کر سکتی ہیں۔ حالانکہ میڈیا میں یہ خبریں بھی آ رہی ہیں کہ وہ کسی سیاسی پارٹی میں شامل ہو سکتی ہیں، لیکن اس سلسلے میں میڈیا سے بات چیت کرتے ہوئے ساوتری کہتی ہیں کہ ’’میں کسی سیاسی تنظیم سے جڑنے کی خبروں کی تردید کرتی ہوں کیونکہ یہ غلط افواہ ہے۔ یہ کچھ شرارتی عناصر کے ذریعہ پھیلائی جا رہی ہیں۔ کچھ میڈیا والے بھی ان خبروں کو نشر کر رہے ہیں، لیکن میں ان سب کے خلاف ضروری کارروائی کروں گی۔‘‘

دراصل ساوتری بائی پھولے نے گزشتہ 29 دسمبر کو سماجوادی پارٹی کے سربراہ اکھلیش یادو سے ملاقات کی تھی۔ اس کے بعد سے ہی کچھ نیوز چینلز پر خبر دکھائی جانے لگی کہ وہ سماجوادی پارٹی میں شامل ہو سکتی ہیں۔ اس تعلق سے میڈیا سے بات چیت کے دوران دلت لیڈر ساوتری نے بتایا کہ ’’بی جے پی کو شکست دینے کے لیے مہاگٹھ بندھن سے متعلق کافی پہلے بات چیت ہوئی تھی، لیکن میں سماجوادی پارٹی میں شامل نہیں ہو رہی۔‘‘ اکھلیش سے ملاقات کے تعلق سے وہ کہتی ہیں کہ ’’میں نے اکھلیش کے ساتھ ہوئی ملاقات میں بی جے پی کے ذریعہ درج فہرست ذات اور پسماندہ طبقہ مخالف فیصلوں کے تعلق سے باتیں کیں۔ پارلیمنٹ کے باہر آئین کی کاپیاں جلائی گئیں لیکن اس پر کوئی سخت قدم نہیں اٹھایا گیا جو افسوسناک ہے۔‘‘

بی جے پی سے اپنی ناراضگی ظاہر کرتے ہوئے ساوتری بائی پھولے کہتی ہیں کہ ’’چونکہ بی جے پی درج فہرست ذات، درج فہرست قبائل اور اقلیتوں کے خلاف کام کر رہی ہے، اس لیے اسے شکست دینے کے لیے میں مہاگٹھ بندھن کی حمایت کروں گی۔‘‘ اس سے قبل انھوں نے یہ بھی بیان دیا تھا کہ ’’میں جب تک زندہ ہوں اس وقت تک بی جے پی میں واپس نہیں جاؤں گی۔ دلت ہونے کی وجہ سے پارٹی میں میری بات کبھی نہیں سنی گئی۔‘‘ اتر پردیش کے وزیر اعلیٰ یوگی آدتیہ ناتھ کے تعلق سے انھوں نے کہا کہ ’’یوگی کا دلت پریم محض نمائش ہے۔ اگر وہ دلتوں سے محبت کرتے ہیں تو وزیر اعلیٰ انھیں گلے لگا کر دکھائیں۔ وہ ان کی عزت کیوں نہیں کرتے؟‘‘

واضح رہے کہ ساوتری بائی پھولے نے بی جے پی کی پرائمری ممبر شپ سے استعفیٰ تو دے دیا ہے لیکن انھوں نے پارلیمنٹ کی رکنیت نہیں چھوڑی ہے۔ بی جے پی میں رہتے ہوئے وہ پارٹی کی دلت مخالف پالیسیوں کے خلاف آواز اٹھاتی رہی ہیں لیکن پارٹی نے کبھی بھی ان کی بات کو اہمیت نہیں دی۔ ان سب باتوں سے ناراض ہو کر ہی ساوتری بائی پھولے نے پارٹی کی رکنیت سے استعفیٰ دینے کا فیصلہ لیا تھا، اور اب وہ پوری طرح سے مہاگٹھ بندھن کی حمایت میں کھڑی ہو گئی ہیں۔

جموں و کشمیر

سینٹرل ایشیا کے دورے پر مودی کی روانگی سے قبل محبوبہ نے خطے سے دوبارہ جڑنے کے لیے جموں و کشمیر کے تاریخی راستوں کی وکالت کی

Published

3 hours ago

August 28, 2026

Online Desk

سری نگر، وزیراعظم نریندر مودی کے 29 اگست سے شروع ہونے والے سینٹرل ایشیا کے چار روزہ دورے سے قبل پی ڈی پی صدر اور جموں و کشمیر کی سابق وزیراعلیٰ محبوبہ مفتی نے جمعہ کے روز اس خطے کے سینٹرل ایشیا سے جڑنے والے تاریخی راستوں کو دوبارہ کھولنے کا مطالبہ کیا اور کہا کہ جموں و کشمیر کی اہم جغرافیائی موقعیت اسے تجارت، رابطے اور تعاون کا ایک بڑا ذریعہ بنا سکتی ہے۔ ایکس پر ایک پوسٹ میں محبوبہ نے کہا کہ مودی اپنے دورے کے دوران جنوبی ایشیا کو سینٹرل ایشیا سے دوبارہ جوڑنے کے لیے جموں و کشمیر کے تاریخی راستوں کو استعمال کرنے کے تصور پر بات کریں۔ انہوں نے کہا، “جب وزیراعظم مودی سینٹرل ایشیا کے دورے پر جا رہے ہیں، تو انہیں جنوبی ایشیا کو سینٹرل ایشیا سے دوبارہ جوڑنے کے لیے جموں و کشمیر کے تاریخی راستوں کو استعمال کرنے کی تجویز پر بات چیت کرنی چاہیے۔

جموں و کشمیر کا اہم جغرافیائی موقع نہ صرف اس خطے بلکہ پورے ملک کے لیے ایک قیمتی سرمایہ ثابت ہو سکتا ہے۔” انہوں نے مزید کہا، “خوتان، یارقند اور کاشغر کی طرف راستے کھولنے سے جموں و کشمیر تنازع کے علاقے سے بدل کر تجارت، رابطے اور تعاون کا ایک مرکزی ذریعہ بن سکتا ہے۔ جغرافیائی مواقع کو امن اور خوشحالی کے لیے استعمال کرنے دیں تاکہ کشمیر میں ایک نیا سورج طلوع ہو۔”

واضح رہے کہ وزیراعظم مودی ایس سی او سمٹ کے لیے ازبکستان کے ساتھ ساتھ کرغزستان کے دورے پر جا رہے ہیں۔

یو این آئی۔ ایف اے۔ م الف

پاکستان

کویت کے ساتھ معاہدے سے پاکستان کا مشرق وسطیٰ میں دفاعی حصار وسیع

Published

5 hours ago

August 28, 2026

Online Desk

اسلام آباد، پاکستان اور کویت نے جمعرات کو ایک نئے دفاعی معاہدے پر دستخط کیے۔ پاکستان کی وزارت دفاع کے مطابق یہ معاہدہ 2023 سے موجود فوجی تعاون کے فریم ورک کو نمایاں طور پر وسعت دیتا ہے۔

پاکستان کے وزیر دفاع خواجہ آصف اور کویت کے وزیر دفاع شیخ عبداللہ علی عبداللہ السالم الصباح نے راولپنڈی میں ’پروٹوکول ایگریمنٹ 2026‘ پر دستخط کیے۔

معاہدے کے تحت پاکستانی مسلح افواج کویت کی فوج کی تربیت، دفاعی صلاحیتوں میں اضافے اور سرحدی انتظام میں معاونت کریں گی۔یہ معاہدہ جون 2023 میں طے پانے والے ایک بنیادی معاہدے کی بنیاد پر کیا گیا ہے، جس کی کویت نے گزشتہ ماہ باضابطہ طور پر توثیق کی تھی۔

یہ پاکستان اور خلیجی ممالک کے درمیان دفاعی تعاون کے بڑھتے ہوئے سلسلے میں تازہ ترین پیش رفت ہے۔

حالیہ برسوں میں پاکستان نے سعودی عرب کے ساتھ باہمی دفاعی معاہدہ کیا، سعودی عرب اور ترکی کے ساتھ ’مکہ پیکٹ‘ کے نام سے سہ فریقی اجتماعی سلامتی کے معاہدے میں شمولیت اختیار کی، سعودی عرب میں ہزاروں فوجی اور ایک جنگی طیاروں کا اسکواڈرن تعینات کیا اور قطر کے ساتھ فوجی تربیتی تعاون کو بھی وسعت دی ہے۔

پاکستان کئی دہائیوں سے خلیجی ممالک کی افواج کو تربیت اور افرادی قوت فراہم کرتا آیا ہے۔ تاہم اب فرق اس تعاون کی رفتار اور نمایاں حیثیت میں آیا ہے اور خلیجی دارالحکومت خاموش تعاون کے بجائے باضابطہ معاہدوں کے ذریعے اسے ادارہ جاتی شکل دینے پر آمادہ نظر آتے ہیں۔

معاہدوں کے اس سلسلے سے یہ سوال پیدا ہوتا ہے کہ آخر خلیجی ممالک مسلسل پاکستان کا رخ کیوں کر رہے ہیں اور پاکستان ان معاہدوں کے ذریعے کیا حاصل کر رہا ہے؟

کویت اسلام آباد کے ساتھ دفاعی تعاون کو نئی سطح پر لے جانے والا تازہ ترین خلیجی ملک ہے۔

کویت کے ساتھ پاکستان کا دفاعی تعاون 1960 کی دہائی کے اواخر سے جاری ہے۔ 1990-91 کی خلیجی جنگ کے دوران بھی پاکستان نے سعودی عرب میں ایک بڑا فوجی دستہ بھیجا تھا، جو 1990 میں عراق کی جانب سے کویت پر حملے کے بعد مکہ اور مدینہ کے اطراف دفاعی پوزیشنوں پر تعینات کیا گیا تھا۔

پاکستان کے سابق دو ستارہ جنرل اور اب دفاعی تجزیہ کار زاہد محمود نے کہا کہ یہی تاریخ جمعرات کو ہونے والے معاہدے کا پس منظر ہے۔انہوں نے کہا، ’’پاکستان اور کویت کے درمیان دفاعی تعاون کوئی نئی بات نہیں ہے۔‘‘

محمود کے مطابق کویت کے ساتھ ہونے والے معاہدے کا موازنہ گزشتہ ستمبر میں سعودی عرب کے ساتھ پاکستان کے دستخط کردہ ’اسٹریٹجک میوچوئل ڈیفنس ایگریمنٹ‘ (ایس ایم ڈی اے) سے نہیں کیا جاسکتا۔ کویت معاہدے میں مکہ پیکٹ یا ایس ایم ڈی اے جیسی کوئی شق شامل نہیں، جن کے تحت کسی ایک فریق پر جارحیت کو تمام فریقوں پر حملہ تصور کیا جاتا ہے۔

جاری۔ یو این آئی۔ ع ا۔

دنیا

جنگ کے آغاز کے بعد ایران کا آبنائے ہرمز پر سابقہ کنٹرول بڑی حد تک کم ہوا: امریکہ کا دعویٰ

Published

5 hours ago

August 28, 2026

Online Desk

واشنگٹن/تہران، امریکہ نے دعویٰ کیا ہے کہ اس کی فوج نے جنگ کے آغاز کے بعد سے آبنائے ہرمز پر ایران کی گرفت کو بتدریج کمزور کر دیا ہے۔ واشنگٹن کے مطابق جو کارروائی ابتدا میں ایران کی میزائل اور جوہری صلاحیتوں کے خلاف مہم کے طور پر شروع ہوئی تھی، وہ اب دنیا کی اہم ترین توانائی گزرگاہوں میں سے ایک پر کنٹرول حاصل کرنے کی طویل جنگ میں تبدیل ہو چکی ہے، جو جنگ کے آغاز سے ہی تہران کا سب سے مؤثر دباؤ کا ذریعہ رہی ہے۔

امریکی حکام کا خیال ہے کہ آبنائے ہرمز کی بدلتی ہوئی صورتحال جنگ میں ایک اہم موڑ ثابت ہو سکتی ہے، جس سے عالمی توانائی منڈیوں پر دباؤ کم ہوگا اور واشنگٹن کو تہران کے ساتھ مستقبل کے مذاکرات میں زیادہ اثر و رسوخ حاصل ہوگا۔

صدر ڈونلڈ ٹرمپ نے جمعرات کو ایک فون انٹرویو میں ’ایکسِیوس‘ سے کہا، ’’وہ جگہ کھلی ہوئی ہے۔ ایرانی ردعمل بہت معمولی ہے۔ وہ نہیں چاہتے کہ ہم دوبارہ ان پر حملہ کریں۔ یہی پوری بات ہے، باقی کسی چیز کی اہمیت نہیں۔‘‘

جنگ شروع ہونے کے وقت آبنائے ہرمز کھلی ہوئی تھی، عالمی سطح پر تیل کی ترسیل معمول کے مطابق جاری تھی اور برینٹ خام تیل کی قیمت تقریباً 72 ڈالر فی بیرل تھی۔

دو اسرائیلی حکام کے مطابق آبنائے ہرمز کو بند کرنے کا فیصلہ اس وقت پاسداران انقلاب کی بحریہ کے کمانڈر جنرل علی رضا تنگسیری نے کیا تھا۔ جنگ کے پہلے 72 گھنٹوں کے اندر ایران نے آبی گزرگاہ کی بندش کا اعلان کیا اور خبردار کیا کہ گزرنے کی کوشش کرنے والے ٹینکروں کو نشانہ بنایا جائے گا۔

اسرائیلی اور امریکی حکام کا کہنا ہے کہ اس کے بعد تنگسیری نے ایرانی افواج کو آبنائے ہرمز کے اندر ’ٹریفک سیپریشن اسکیم‘ یعنی بین الاقوامی جہاز رانی کے مرکزی راستے میں بحری سرنگیں بچھانے کا حکم دیا۔ تنگسیری تین ہفتے بعد بندر عباس میں اسرائیلی فضائی حملے میں مارے گئے۔

حملوں اور سمندری سرنگوں کے خطرے کے باعث آبنائے ہرمز سے تجارتی جہازوں کی آمدورفت تقریباً رک گئی۔ اس کے نتیجے میں برینٹ خام تیل کی قیمت بڑھ کر 126 ڈالر فی بیرل تک پہنچ گئی اور عالمی توانائی منڈیوں پر شدید دباؤ پڑنے لگا۔

ٹرمپ نے 8 اپریل کو جنگ بندی پر اتفاق کیا، جس کی ایک وجہ امریکہ میں ایندھن کی قیمتوں میں بڑے اضافے اور توانائی منڈیوں کے دباؤ کو بھی قرار دیا گیا۔ یہ بالکل اسی نوعیت کا معاشی خلل تھا جسے ایران پیدا کرنا چاہتا تھا۔

دو ماہ بعد امریکہ اور ایران کے درمیان طے پانے والے مفاہمتی یادداشت (ایم او یو) میں آبنائے ہرمز کو دوبارہ کھولنا مرکزی معاملہ بن گیا۔ تاہم آبی گزرگاہ مکمل طور پر معمول پر نہ آسکی اور جلد ہی یہ معاہدہ بھی ناکام ہوگیا۔

مفاہمتی یادداشت کے خاتمے کے بعد امریکی فوج نے آبنائے ہرمز کو اپنے طور پر دوبارہ کھولنے کی کوشش شروع کردی۔ امریکہ نے متحدہ عرب امارات کے تعاون سے ایک ٹاسک فورس تشکیل دی، جس نے جنوبی راستے سے تجارتی جہازوں کی رہنمائی شروع کی، انہیں فضائی تحفظ فراہم کیا اور ایرانی ڈرونز اور کروز میزائلوں کو روکنے کی کارروائیاں کیں۔

جاری۔ یو این آئی۔ ع ا۔