خبراردو:
جنوبی ضلع پلوامہ میں سال نوکے پہلے جنگجومخالف آپریشن کے دوران گلشن پورہ ترال علاقہ کے مضافاتی جنگل میں ایک خونین معرکہ آرائی میں حزب المجاہدین سے وابستہ 3مقامی جنگجونوجوان جاں بحق ہوگئے جن میں چرسواونتی پورہ کارہنے والاایک اعلیٰ تعلیم یافتہ جنگجونوجوان توسیف احمد وانی بھی شامل ہے ۔ ابتدائی جنگجو مخالف کارروائی کے دوران اندھا دھند فائرنگ کی زدمیں آکر فوج کے 3 اہلکار شدید زخمی ہوئے، جن میں سے بعد ازاں ایک فوجی ادھمپور میں واقع فوجی اسپتال میں زخموں کی تاب نہ لاکر دم توڑ بیٹھا ۔ اس دوران ترال قصبہ بٹہ گنڈ اور گلشن پورہ میں انکاؤنٹر مخالف مظاہرین اور پولیس و فورسز کے درمیان سنگباری ، آنسو گیس کے گولوں اور پیلٹ چھروں کا تبادلہ ہوا ، جس دوران نصف درجن سے زیادہ مظاہرین پیلٹ اور ٹیرگیس شیل لگنے سے زخمی ہوئے ۔

سال 2019 کے تیسرے روز جنوبی ضلع پلوامہ کے گلشن پورہ ترال علاقہ کے مضافاتی جنگل کو فوج کی 42 آر آر ، سی آر پی ایف اور ریاستی پولیس کے اسپیشل آپریشن گروپ سے وابستہ اہلکاروں نے علی الصبح یہ اطلاع ملتے ہی چاروں اطراف سے محاصرے میں لے لیا کہ یہاں قائم ایک کمین گاہ میں کچھ جنگجو چھپے بیٹھے ہیں ۔ پولیس ذرائع نے اس کی تصدیق کرتے ہوئے بتایا کہ صبح صادق سے پہلے پورے جنگل علاقہ کو محاصرے میں لیا گیا اور جب سیکورٹی اہلکار جنگجوؤں کی خفیہ کمین گاہ کے نزدیک پہنچے تو جنگجوؤں نے اندھا دھند فائرنگ کی ۔ ایڈیشنل ڈائریکٹر جنرل امن و قانون منیر احمد خان نے بتایا کہ جنگجوؤں کی گولی باری کی زد میں آکر 3 فوجی اہلکار زخمی ہوئے ۔ انہوں نے کہا کہ تینوں زخمی فوجیوں کو فوری طور بادامی باغ سرینگر میں واقع فوج کے 92 بیس اسپتال منتقل کیا گیا ۔

اُدھر سرینگر میں دفاعی ذرائع نے بتایا کہ ایک شدید زخمی فوجی اہلکار کو ہیلی کاپٹر میں سوار کرکے ادھمپور میں واقع فوج کے بڑے اسپتال منتقل کیا گیالیکن وہ یہاں زخموں کی تاب نہ لاکر دم توڑ بیٹھا ۔ پولیس و دفاعی ذرائع نے بتایا کہ محصور جنگجوؤں کی ابتدائی فائرنگ کے بعد فوج ، فورسز اور ایس اؤ جی اہلکاروں نے جوابی کارروائی عمل میں لائی اور طرفین کے درمیان شدید فائرنگ کا تبادلہ شروع ہوا جو کئی گھنٹوں تک جاری رہا ۔ انہوں نے کہا کہ جنگل میں بنائی گئی خفیہ کمین گاہ میں موجود جنگجوؤں اور سیکورٹی اہلکاروں کے درمیان ہوئی گولی باری کے دوران پہلے مرحلے میں 2 جنگجو مارے گئے جبکہ بعد ازاں ایک اور جنگجو بھی جھڑپ کے دوران اپنی جان گنوا بیٹھا ۔ پولیس ذرائع نے بتایا کہ تینوں جنگجوؤں کی نعشوں اور کمین گاہ سے بر آمد کئے گئے ہتھیار و دیگر سامان کو ترال پہنچایا گیا تاکہ مہلوک جنگجوؤں کی شناخت عمل میں لائی جاسکے ۔ غیر مصدقہ اطلاع کے مطابق گلشن پورہ ترال کے مضافاتی جنگل میں جھڑپ کے دوران جاں بحق ہوئے جنگجوؤں میں 14 مئی 2018 کو حزب المجاہدین میں شامل ہوا چرسو اونتی پورہ کا اعلیٰ تعلیم یافتہ نوجوان توسیف احمد وانی ولد غلام محی الدین وانی ، چرسو کا ہی رہنے والا زبیر احمد بٹ عرف حمزہ اورلری بل ترال کا رہنے والا شکور احمد عرف جعفر بھی شامل ہیں ۔

تاہم پولیس ذرائع نے جاں بحق ہوئے جنگجوؤں کی تادم تحریر شناخت ظاہر نہیں کی اور کہا کہ ابھی شناخت کا عمل جاری ہے ۔ اس دوران گلشن پورہ مضافاتی جنگل میں جنگجو مخالف آپریشن کی خبر پھیلتے ہی ترال قصبہ میں نوجوان سڑکوں پر نکل آئے اور انہوں نے پولیس و فورسز پر شدید سنگباری شروع کر دی ۔ مقامی لوگوں نے بتایا کہ سنگباری کرنے والے نوجوانوں کو منتشر کرنے کیلئے بٹہ گنڈ ترال کے نزدیک پولیس و فورسز نے اندھا دھند ٹیر گیس شیلنگ اور پیلٹ فائرنگ کی، جس کے نتیجے میں کم سے نصف درجن نوجوان زخمی ہوگئے ، جن کو اسپتال منتقل کیا گیا ۔

اس دوران ترال قصبہ میں مکمل ہڑتال رہی اور دن بھر یہاں کشیدگی اور تناؤ کی صورتحال بھی جاری رہی ۔ اُدھر معلوم ہوا کہ گلشن پورہ کے مضافاتی جنگل میں جنگجو مخالف آپریشن مکمل کرنے کے بعد جب فوجی ، فورسز اور ایس اؤ جی اہلکار اپنی گاڑیوں میں سوار ہوکر مہلوک عساکر کی نعشیں اور ضبط شدہ سامان لے کر ترال لوٹ رہے تھے تو راستے میں بٹہ گنڈ اور گلشن پورہ کے نزدیک مشتعل نوجوانوں نے سیکورٹی اہلکاروں کی گاڑیوں پر شدید پتھراؤ کیا ، جس کے جواب میں پولیس و فورسز نے ٹیر گیس شیلنگ کی تاہم یہاں تصادم آرائی کے دوران کسی کے زخمی ہونے کی ابھی تک اطلاع نہیں ملی۔

خیال رہے یہ سال نو میں پہلا جنگجو مخالف آپریشن تھا جبکہ گزشتہ برس یعنی سال 2018 کے دوران کشمیر وادی میں الگ الگ جھڑپوں کے دوران 250 سے زیادہ مقامی اور غیر مقامی جاں بحق ہوئے تھے اور یہ ایک دہائی بعد جاں بحق ہونے والے جنگجوؤں کی سب سے بڑی تعداد تھی ۔