خبراردو:

فوجی سربراہ جنرل بپن راوت نے پاکستان کوکڑا انتباہ دیتے ہوئے کہا کہ اگر پاکستان نے سرحد پر دہشت گرد کارروائیاں بند نہیں کیں تو فوج لائن آف کنٹرول پر پاکستان کے خلاف سخت قدم اُٹھانے سے نہیں ہچکچائے گی۔ انہوں نے کہا کہ ملک کی مغربی سرحد سے لگنے والا ملک پاکستان دہشت گردوں کی مسلسل حمایت کررہا ہے تاہم فوج و فورسز انہیں منہ توڑ جواب دے رہی ہے۔ کشمیرنیوز سروس

فوجی سربراہ جنرل بپن راوت نے پڑوسی ملک پاکستان کو سخت پیغام ارسال کرتے ہوئے کہا کہ لائن آف کنٹرول اور بین الاقوامی سرحد پر فوج پاکستان کے خلاف ٹھوس کارروائی کرنے سے نہیں ہچکچائے گی۔ انہوں نے پاکستان پر سیدھا نشانہ سادھتے ہوئے کہا کہ ہماری مغربی سرحد سے جڑا ملک پاکستان دہشت گرد گروپوں کی مسلسل حمایت کررہا ہے تاہم فوج و فورسز اہلکار ان کی کارروائیوں کا منہ توڑ جواب دے رہے ہیں۔ جنرل بپن راوت کا کہنا تھا کہ فوج مشرقی سرحد پر صورتحال پر باریک بینی سے نظر رکھے ہوئی ہے اور کسی بھی امکانی گڑ بڑ سے نمٹنے کی بھر پور صلاحیت رکھتی ہے۔ ’ہماری فوج مشرقی سرحد پر انتہائی چوکس ہے اور صورتحال کا گہرائی کا لگاتار جائزہ لے رہی ہے۔ مشرقی سیکٹر پر دراندازوں کی نقل و حمل کو ناممکن بنانے اور امن و امان کی صورتحال کو قائم رکھنے کے لیے فوج نئے ضابطے کی پیروی کررہی ہے‘۔ نئی دہلی میں منعقدہ آرمی ڈے کے موقعے پر فوجی افسروں اور جوانوں کی بھاری تعداد سے خطاب کرتے ہوئے فوجی سربراہ جنرل بپن راوت نے پاکستان کو سخت انتباہ کرتے ہوئے کہا کہ فوج سرحد پر کسی بھی دراندازی کا منہ توڑ جواب دے گی۔

انہوں نے کہا کہ فوج سرحد پار دہشت گردی کو کسی بھی صورت میں برداشت نہیں کرے گی اور اگر پاکستان نے اپنی دہشت گرد کارروائیاں بند نہ کیں تو فوج سخت اقدام اُٹھانے پر مجبور ہوگی۔ فوجی سربراہ نے کہا کہ ہم جموں وکشمیر میں پاکستان کے ساتھ لگنے والی سرحد پر اخلاقی برتری کو یقینی بناناچاہتے ہیں تاہم پاکستان ہماری اس مہذبانہ کوشش کو ہماری کمزوری تصور کرتے ہوئے آئے روز لائن آف کنٹرول اور بین الاقوامی سرحد پر جنگجوؤں کو اس پار دھکیلنے کی کوشش کررہا ہے ۔ انہوں نے کہا کہ پاکستان اس بات کا ادراک حاصل کرے کہ وہ ہماری دوستانہ اور اخلاق پر مبنی کوششوں کو کمزور ی تصور نہ کریں کیوں کہ فوج سرحد پار دہشت گرد کارروائیوں کا سختی سے مقابلہ کرنے کی صلاحیت رکھتی ہے۔ انہوں نے کہا کہ فوج مشرتی سرحد پر امن و امان کو قائم رکھنے کے لیے نئی مرتب شدہ ہدایات پر سختی سے عمل پیرا ہے۔ ’فوج مشرقی سرحد پر کسی بھی دراندازی کو ناممکن بنانے اور یہاں امن و امان کی فضا کو قائم رکھنے کے لیے نئے ضابطے پر سختی سے کاربند ہیں‘۔ فوجی سربراہ کا کہنا تھا کہ مشرقی سرحد پر فوج مسلسل حالات کا گہرائی سے جائزہ لے رہی ہے تاکہ کسی بھی امکانی گڑ بڑ سے بروقت نمٹا جائے۔فوج سربراہ نے دوٹوک الفاظ میں بتایا کہ ہمارے جوان سرحدوں کی حفاظت کو یقینی بنانے کے لیے کسی بھی سطح پر کمپرومائز کرنے کے روادار نہیں ہے۔

فوجی سربراہ کا کہنا تھا کہ آنے والے دنوں میں فوج کو جدید خطوط پر استوار کیا جائیگا اور فوجی کیڈر میں بڑے پیمانے پر ردوبدل ہونے والا ہے۔خیال رہے کہ چند روز قبل فوجی سربراہ جنرل بپن راوت نے صحافیوں سے گفتگو کرتے ہوئے کہا کہ پاکستان میں عمران خان کی حکومت تشکیل پانے کے ساتھ ہی وہاں سیاسی و سیکورٹی صورتحال میں کافی تبدیلیاں رونما ہوئی ہیں۔ فوجی سربراہ نے کہا تھا کہ پاکستانی وزیر اعظم عمران خان کے قول و فعل میں کافی تضاد پایا جاتا ہے کیوں کہ دہشت گردی کا قلع قمع کرنے کی خاطر انہوں نے جو وعدے کئے تھے اُن کا زمینی سطح پر کہیں بھی نام و نشان نہیں ہے۔ فوجی سربراہ کا کہنا تھا کہ ابھی بھی سرحد پر بڑی تعداد میں دہشت گرد دراندازی کی کوششوں میں ہیں اور پاکستانی فوجی انہیں دراندازی میں بھر پور تعاون فراہم کرتی ہے جس کی وجہ سے سرحد پر مسلسل جنگ بندی معاہدے کی خلاف ورزیاں ہوتی رہتی ہے۔