دس جنوری سالگرہ کے موقع پر

ممبئی، ریتک روشن ایک ایسے اداکار ہیں جو بالی وڈ میں نہ صرف اپنی شاندار اداکاری کے لیے مشہور ہیں بلکہ ڈانسنگ کی اپنی غیر معمولی صلاحیت، دلکش شخصیت اور ہر کردار میں ڈھل جانے کی اہلیت کے باعث بھی بالی وڈ میں ایک منفرد مقام رکھتے ہیں۔انہوں نے بالی ووڈ میں کئی کامیاب فلمیں دی ہیں اور اپنی ایک منفرد شناخت قائم کی ہے۔ ان کا فلمی کریئر بہت کامیاب رہا ہے۔ انہیں 6 بار فلم فیئر ایوارڈز سے بھی نوازا جا چکا ہے۔ ریتک کا شمار ہندوستان سب سے پرکشش سیلیبریٹیز میں ہوتا ہے۔ ان کے ذریعے ادا کیے گئے کرداروں کی نہ صرف ناقدین بلکہ عوام نے بھی خوب تعریف کی ہے۔ وہ ہر طرح کے رول بڑی خوبی اور آسانی سے ادا کرلیتے ہیں۔ اداکاری کے علاوہ انہوں نے اپنے ڈانس مووز سے بھی لوگوں کے دل جیتے اور بالی ووڈ میں انہیں ایک بہترین ڈانسر کے طور پر بھی پہچانا جاتا ہے۔

ریتک روشن کو اداکاری وراثت میں ملی ۔ ان کی پیدائش 10 جنوری 1974 کو بمبئی میں بالی ووڈ سے وابستہ ایک ممتاز خاندان میں ہوئی تھی۔ ان کے والد راکیش روشن بالی ووڈ کے معروف اداکار اور ہدایت کار ہیں، جبکہ والدہ پنکی روشن گھریلو خاتون ہیں۔ ان کے دادا روشن لال ناگرتھ (روشن) بھی اپنے زمانے کے معروف موسیقاروں میں سے ایک تھے اور ریتک کے چچا راجیش روشن نے بھی اپنے والد کے نقش قدم پر چلتے ہوئے فن موسیقی میں نام کمایا۔ ان کے نانا جے اوم پرکاش بھی بالی وڈ کے معروف فلمساز و ہدایت کار رہے ہیں۔ ریتک کی ایک بڑی بہن سنینا ہیں۔ ریتک نے ابتدائی تعلیم بامبے اسکاٹش اسکول سے حاصل کی اور بعد میں سڈنہم کالج سے کامرس میں گریجویشن کیا۔ ماسٹرز کی تعلیم کے لیے وہ امریکہ بھی گئے۔

رتيك کو بچپن میں ہکلاہٹ کی وجہ سے لوگوں کے سامنے بات کرنے میں دشواری ہوتی تھی۔ اسکول میں زبانی امتحانات سے بچنے کے لیے وہ کبھی چوٹ یا بیماری کا بہانہ کرلیا کرتےتھے۔ انہیں روزانہ اسپیچ تھراپی دی گئی جس سے ان کا کھویا ہوا اعتماد لوٹ آیا ۔

ریتک روشن اکثر اپنے والد راکیش روشن کے ساتھ شوٹنگ پر جایا کرتے تھے۔ ریتک روشن کے نانا پرکاش نے انہیں پہلی بار چھ سال کی عمر میں فلم آشا (1980) میں پردۂ اسکرین پر متعارف کرایا۔ انہوں نے جیتندر پر فلمائے گئے ایک گیت میں رقص کیا، جس کے لیے پرکاش نے انہیں 100 روپے معاوضہ دیا تھا۔ روشن نے اپنے والد کی پروڈیوس کردہ فلم آپ کے دیوانے (1980) سمیت مختلف خاندانی پروجیکٹ کی فلموں میں بغیر پیسوں کے اداکاری کی۔نانا پرکاش کی فلم آس پاس (1981) میں ریتک گیت “شہر میں چرچا ہے” میں نظر آئے۔ اس دوران بطور اداکار ان کا واحد مکالماتی کردار اس وقت سامنے آیا جب وہ 12 سال کے تھے؛ انہیں اپنے نانا پرکاش کی فلم بھگوان دادا (1986) میں مرکزی کردار کے منہ بولے بیٹے گووند کے طور پر پیش کیا گیا۔بعد ازاں وہ اسسٹنٹ ڈائریکٹر بنے اور اپنے والد کی فلموں کرن ارجن (1995) اور کوئلہ (1997) کی تیاری میں ان کے ساتھ کام کیا۔

ریتک روشن نے فیصلہ کیا کہ وہ اداکاری میں ہی اپنا ہنر آزمائیں گے، تاہم ان کے والد نے اصرار کیا کہ پہلے وہ اپنی تعلیم پر توجہ دیں۔ اسی دوران وہ اسکولیوسس (ریڑھ کی ہڈی کا ٹیڑھاپن) کا شکار ہوئے ، جس کے باعث انہیں رقص یا اسٹنٹس کرنے کی اجازت نہیں تھی۔ وقتی طور پر وہ صدمے کا شکار ضرور ہوئے لیکن انہوں نے ہمت نہ ہاری ۔ تشخیص کے تقریباً ایک سال بعد، جب وہ ذہنی دباؤ کا شکار تھے، انہوں نے ساحلِ سمندر پر چہل قدمی کے دوران خود کو آزمایا۔ انہیں کوئی درد محسوس نہ ہوا اور مزید اعتماد کے ساتھ وہ اپنی رفتار بڑھانے میں کامیاب رہے۔ ریتک اس دن کو “زندگی کا ایک اہم موڑ” قرار دیتے ہیں۔

ریتک روشن نے باقاعدہ طور پر سال 2000 میں اپنے والد راکیش روشن کی فلم ’کہو نا پیار ہے‘ سے بالی ووڈ میں قدم رکھا، اس فلم میں ان کی ہیروئن امیشا پٹیل تھیں۔ اس فلم کی کامیابی سے وہ شہرت کی بلندیوں پر پہنچ گئے۔ اپنے کردار کی پیش کش کے لیے انہوں نے سخت ریاضت کی، اپنے تلفظ کو بہتر بنانے پر کام کیا اور اداکاری، گائیکی، رقص، تلوار بازی اور گھڑسواری بھی سیکھی۔ اس فلم میں ریتک فلم میں ڈبل رول ادا کیا۔ ان کے ڈانس اور پرفارمنس کو شائقین نے کافی پسند کیا اور وہ راتوں رات اسٹار بن گئے۔ اس کے بعد انہوں نے ’مشن کشمیر‘، ’لکشئے‘، ’کوئی مل گیا‘، ’کرش‘، ’جودھا اکبر‘، ’دھوم 2‘، ’زندگی نہ ملے گی دوبارہ‘، ’اگنی پتھ‘، ’سپر 30‘، اور ’وار‘ جیسی فلموں میں شاندار اداکاری کے جوہر دکھائے۔

ریتک روشن نے تجربات کا سلسلہ جاری رکھا اور اس کے بعد وہ ودھو ونود چوپڑا کی ایکشن ڈرامہ فلم مشن کشمیر (2000) میں سنجے دت، پریتی زنٹا اور جیکی شروف کے ساتھ نظر آئے۔ ہند–پاکستان تنازعہ کے دوران کشمیر کی وادی میں بنی اس فلم میں دہشت گردی اور جرائم جیسے موضوعات کو اجاگر کیا گیا تھا اور یہ فلم کمرشل طور پر کامیاب رہی۔ آدرش کے مطابق، ریتک اپنی مقناطیسی موجودگی سے اسکرین کو روشن کر دیتے ہیں۔ ان کی باڈی لینگویج اور طرز ادا ناظرین کے دل جیت لیتا ہے۔‘‘

سال 2001میں وہ دو فلموں میں نظر آئے۔ پہلی سبھاش گھئی کی رومانوی ڈرامہ فلم ’یادیں‘ تھی، جس میں وہ کرینہ کپور کے ساتھ دکھائی دیے۔ دوسری کرن جوہر کی میلو ڈرامہ فلم کبھی خوشی کبھی غم تھی، جس میں انہوں نے امیتابھ بچن، جیا بچن، شاہ رخ خان، کاجول اور کرینہ کپور کے ساتھ اداکاری کی۔ کبھی خوشی کبھی غم ہندوستان میں اُس سال کی دوسری سب سے زیادہ کمائی کرنے والی فلم ثابت ہوئی۔ سال 2002–2003 میں وکرم بھٹ کی رومانوی فلم آپ مجھے اچھے لگنے لگے میں وہ ایک بار پھر امیشا پٹیل کے ساتھ نظر آئے۔ اس کے علاوہ ریتک کو اَرجن سبلوک کی رومانوی فلم نہ تم جانو نہ ہم، مجھ سے دوستی کروگے! اور سورج آر برجاتیا کی فلم میں پریم کی دیوانی ہوں میں بھی دیکھا گیا۔

سال 2003کی سائنس فکشن فلم کوئی مل گیا، جس کے لیے روشن نے دو فلم فیئر ایوارڈز جیتے، جو ان کے فلمی کریئر کا ایک اہم موڑ ثابت ہوئی۔ اس کے بعد انہوں نے اسی سیریز کی فلم کرش (2006) اور کرش 3 (2013) میں مرکزی ہیرو کے طور پر اداکاری کی۔ انہوں نے دھوم 2 (2006) میں ایک چور، جودھا اکبر (2008) میں مغل بادشاہ اکبر اور گزارش (2010) میں ایک کوآڈری پلیجک کا کردار ادا کرکے خوب داد حاصل کی۔ انہوں نے 2011 کی ڈرامہ فلم ’زندگی نہ ملے گی دوبارہ‘، 2012 کی اگنی پتھ، 2014 کی ایکشن تھرلر بینگ بینگ!، 2019 کی بایوپک سپر 30 اور 2019 کی ایکشن تھرلر وار میں مرکزی کردار ادا کر کے زبردست کامیابی حاصل کی؛ ان میں سے وار ان کی سب سے زیادہ کمائی کرنے والی فلم ثابت ہوئی۔

روشن نے اسٹیج پر بھی پرفارم کیا ہے اور رقص پر مبنی ریئلٹی شو جسٹ ڈانس (2011) کے ساتھ ٹیلی وژن پر اپنے سفر کا آغاز کیا۔ وہ کئی فلاحی اور انسانی سرگرمیوں سے وابستہ ہیں، متعدد برانڈز اور مصنوعات کی تشہیر کرتے ہیں اور انہوں نے اپنے ملبوسات کا ذاتی برانڈ بھی لانچ کیا ہے۔روشن کی شادی چودہ برس تک سوزین خان سے رہی، جن سے ان کے دو بچے ہیں۔ ریتک کی پہلی اہلیہ سوزین خان سے طلاق کے بعد صبا آزاد ان کی زندگی میں آئیں۔ دونوں نے گھر بسانے کا فیصلہ کر لیا ہے اور جلد شادی کرنے والے ہیں۔

یو این آئی۔ این یو۔