خبراردو: حریت (گ) چیرمین سید علی گیلانی نے حکومت اور پولیس کی طرف سے کشمیر یونیورسٹی میںمنعقدہ کتاب میلے میں شرکت کی اجازت نہ دئے جانے کی شدید مذمت کرتے ہوئے کہا کہ ریاست جموں وکشمیر کے اس خطہ بے آئین میں نہ صرف سیاسی سرگرمیوں پر قدغن عائد ہے بلکہ یہاں نجی اور علمی سرگرمیوں کے حوالے سے نقل و حمل پر بھی بندشیں عائد کی جاتی ہے۔

حریت (گ)چیرمین سید علی گیلانی کو اپنے طے شدہ پروگرام کے تحت کشمیر یونیورسٹی میں اردو میلے میں شرکت اور وہاں موجود طلباءوطالبات سے بات کرنے کے لیے گھر سے باہر نکلنے کی اجازت نہیں دی گئی۔ انہوں نے ریاستی سرکار کی اس پولیس گردی اور دھونس دباوکی مذمت کرتے ہوئے کہا کہ میں اپنے لخت ہائے جگروں سے ملاقات کے لیے پُرامن طریقے سے جانا چاہتا تھا، لیکن اس خطہ بے آئین میں سیاسی ہی نہیں، بلکہ نجی اور علمی سرگرمیوں پر بھی قدغن لگادی گئی ہے۔ سروں پر پہرے تو پہلے ہی تھے اور زبانوں پر بھی تالے چڑھائے جاچُکے ہیں۔ بھارتی جمہوریت کا ایسا بھیانک اور انوکھا چہرہ شاید ہی کسی نے دیکھا ہوگا، جہاں 90سال کے ایک شخص کو پچھلے 10سال سے گھر کی چار دیواری میں قید کرکے اُس کی تمام سیاسی، سماجی، ذاتی اور مذہبی سرگرمیوں پر روک لگا کر بھارتی حکمران خود ہی اپنی نام نہاد جمہوریت کا جنازہ نکال کر اس پر فخر محسوس کرتے ہیں۔

موصولہ بیان کے مطابق حریت(گ) چیرمین نے دانش گاہ کشمیر میں انتظار میں بیٹھے اپنے جگرگوشوں کے نام اپنے پیغام میں کہا کہ ظلم وستم کی اس سیاہ رات کی سحر ضرور ہوگی۔ اردو کے حوالے سے اپنے تاثرات بیان کرتے ہوئے حریت راہنما نے کہا کہ ہمارا دینی، ملی، ثقافتی اور معاشرتی لٹریچر کا تقریباً 90فیصد حصہ اردو میں ہی ہے اور اگر اس زبان کے حوالے سے لاپرواہی اور تساہل برت کر اس کو ہماری زندگیوں سے دور کرنے والی طاقتیوں کو پذیرائی ملی تو وہ وقت دور نہیں جب ہم اس زبان کے ایک ایک نقطہ کو برابر اسی طرح ترس رہے ہوں گے جس طرح ہم فارسی زبان اب ہمارے لیے انجانی اور غیر مانوس ہوکے رہ گئی ہے۔ انہوں نے ملّت کے بہی خواہوں، ذی شور جوانوں، ملی درد رکھنے والے طلباءوطالبات سے دردمندانہ اپیل کی کہ قوم کے اس گرانقدر اثاثے کی حفاظت کریں۔ آنے والی نسلوں کو اردو سے روشناس کرکے ان کو اس کی اہمیت اور افادیت سے آگاہ کریں اور اس کو کمزور کرنے کی کسی بھی سازش اور منصوبے کے خلاف صف آرا ہوجائیں۔

انہوںنے کہا کہ اس زبان کو صرف اور صرف مسلمانوں کی طرف منسوب کرکے اس کے ساتھ بھی اقلیتوں جیسا سلوک کیا جارہا ہے، لیکن یہ زبان اپنے بولنے اور ماننے والوں کو بلالحاظ مذہب وملّت اپنی مٹھاس اور اپنائیت سے محظوظ کرتی ہے۔ آزادی پسند راہنما نے کہا کہ آج کل ہمارے گھروں میں ہماری نئی نسل اردو بول تو سکتی ہے، لیکن لکھ اور پڑھ نہیں سکتی ہے جو پریشان کُن ہی نہیں، بلکہ تشویشناک بھی ہے۔ اردو میلہ منعقد کرنے والوں کو اپنے دل کی عمیق گہرائیوں کے ساتھ مبارکباد دینا چاہتاہوں کہ بھارت کے کونے کونے سے اردو کے دیوانے اس وادی پُرخار میں تقریباً ایک ہفتے سے اپنے اسٹال لگائے ہوئے ہیں۔ ہم ان کی اس کوشش کو قدر کی نگاہ سے دیکھتے ہیں اور دُعا کرتے ہیں کہ اردو کے تئیں ان نیک جذبات اور کوششوں کو ہم عملی جامہ پہنا کر نایاب بنائی جارہی اس زبان کو ایک نئی زندگی اور نئی روح بھر کر اپنی نئی نسل کو اس سے ہم آہنگ کریں تاکہ انہیں اپنے دین اور اپنی شناخت کو سمجھنے میں آسانی ہو۔

طلباءوطالبات سے دردمندانہ اپیل کرتے ہوئے انہوں نے کہا کہ علم وتحقیق کی بلندیوں پر کمند ڈالنے کے لیے انتھک محنت اور لگن کے ساتھ ساتھ اپنی جڑوں سے جڑے رہنے کی بھی ضرورت ہے۔ ہمیں دشمنوں کا مقابلہ کرنے کے علم و ہنر اور تحقیقاتی ہتھیاروں سے لیس ہوکر میدان میں مقابلے کی تیاری کرتی ہے۔