دفعہ370کو ہر حال میں ختم ہونا ہے: رام مادھو

Published

7 years ago

June 29, 2019

خبراردو: بی جے پی جنرل سیکرٹری رام مادھو نے کشمیر سے متعلق مرکزی وزیر داخلہ امیت شاہ کے بیان کی مکمل حمایت کرتے ہوئے کہا کہ دفعہ 370کو ہر حال میں ختم ہونا ہے۔

بھارتیہ جنتا پارٹی کے جنرل سیکرٹری رام مادھو نے سنیچرکو مرکزی وزیر داخلہ امیت شاہ کے کشمیر سے متعلق پارلیمنٹ میں دئے گئے بیان کی مکمل حمایت کرتے ہوئے میڈیا کو بتایا کہ دفعہ 370کو ہر حال میں ختم ہونا ہے۔رام مادھو نے کہا کہ ”جہاں تک دفعہ 370کا تعلق ہے ہماری نظریہ اور وعدہ سب کو یاد ہے، اس دفعہ کو مکمل طور پر ختم ہوکے رہنا ہے جیسا کہ وزیر داخلہ امیت شاہ نے بھی لوک سبھا میں واضح کردیا“۔بی جے پی لیڈر کا کہنا تھا کہ ہماری حکومت اس بات کےلئے وعدہ بند ہے کہ کشمیر کے سبھی مسائل حل کئے جائیں گے اور ہم اُس پر آگے بڑھ رہے ہیں۔

انہوں نے کہا کہ دفعہ 370ایک عارضی دفعہ تھی جب اس کو سابق وزیر اعظم پنڈت جواہر لعل نہرو نے متعارف کرایا تو انہوں نے بذات خود اس بات کا اعتراف کیا کہ مذکورہ دفعہ عارضی ہے اوریہ خود بہ خود ختم ہوجائےگی۔ بی جے پی جنرل سیکرٹری نے کانگریس اور نیشنل کانفرنس پر الزام عائد کیا کہ انہوں نے کشمیر میں دہشت گردی کے بیچ بوئے جس کے بعد پاکستان نے اس ساری صورتحال کا استحصال کرنا شروع کردیا۔ انہوں نے بتایا کہ کشمیر میں جو دہشت گردی جاری ہے اُس کی ذمہ دار کانگریس اور نیشنل کانفرنس ہے جس کے بعد پاکستان نے اس نازک صورتحال کا ناجائز فائدہ اُٹھا کر اسے اپنے حق میں استعمال کرنا شروع کردیا۔انہوں نے بتایا کہ ریاست جموں وکشمیر میں بی جے پی صرف ڈھائی سال کے عرصے تک اقتدار میں رہی اور یہ صرف کانگریس پارٹی تھی جو ملک کی مختلف ریاستوں میں کئی دہائیوں تک حکومت کرتی رہی اور فی الوقت جوغیر یقینی صورتحال کشمیرمیں جاری ہے اُس کےلئے کانگریس ہی ذمہ دار ہے۔رام مادھو کے مطابق کشمیر میں جو خراب صورتحال پائی جارہی ہے کانگریس اس میں برابر کی حصہ دار ہے۔بی جے پی لیڈر نے ملک کے پہلے وزیر اعظم اور کانگریس کے چوٹی کے لیڈر آنجہانی جواہر لعل نہرو کو تنقید کا نشانہ بناتے ہوئے کہا کہ نہرو کے دور اقتدار سے آج تک یہاں جتنے بھی مسائل رہے وہ کانگریس کی ناقص حکومت سازی کی دین ہے۔

ایک سوال کے جواب میں رام مادھو کا کہنا تھا کہ کشمیر میں جاری دہشت گردی اور انتہا پسندی کو پاکستان اور آئی ایس آئی ہر ممکن مدد فراہم کرتا رہا ہے جو کہ ایک مبرہن بات ہے تاہم جب ریاست جموں وکشمیر میں 1987میں ہوئے انتخابات میں کانگریس اور ڈاکٹر فاروق عبداللہ کی مشترکہ کوششوں سے دھاندلیاں عمل میں لائی، تو اُس وقت وہاں جاری بدامنی اور اضطرابی کیفیت تشدد آمیز واقعات میں تبدیل ہوئیں جس کا پاکستان اور آئی ایس آئی نے بھر پور فائدہ اُٹھایا۔انہوں نے بتایا کہ کانگریس پارٹی کشمیر میں وقوق پذیر ہوچکی غیر یقینی صورتحال سے اپنا دامن نہیں بچاسکتی۔ انہوں نے کہا کہ کانگریس نے ریاست جموں وکشمیر کو تباہی کے دہانے پر لاکھڑا کردیا اور آج جو خون خرابہ اور افرا تفری وہاں پائی جارہی ہے اس کی اصل وجہ کانگریس ہے۔

انہوں نے کانگریس پر الزام لگایا کہ کانگریس پارٹی نے ریاست جموں وکشمیر میں 1987کے دوران ہوئے انتخابات میں لوگوں کے منڈیٹ کو پوری طرح سے مسخ کردیا۔ کشمیرنیوز سروس کے مطابق رام مادھو کے بقول 1987میں منعقدہ انتخابات کے دوران ریاست جموں وکشمیر کے عوام نے اپنے پسندیدہ نمائندوں کا انتخاب کیا تاہم کانگریس اور ڈاکٹر فاروق عبداللہ نے لوگوں کے منڈیٹ پر کاری ضرب لگاکر دھوکہ دہی کی ایک نئی رقم تاریخ کی۔ انہوں نے برستے ہوئے کہا کہ یہ ایک تاریخی حقیقت ہے کہ 1987میں ہوئے انتخابات کے دوران بڑے پیمانے پر دھاندلیاں کی گئیں جس کے نتیجے میں لوگوں کے اندر ایک لاوے نے جنم لیا کیوں کہ کانگریس اور اُن کے معاونین نے دھوکہ دہی کی تاریخ رقم کرتے ہوئے لوگوں کے منڈیٹ کو ضائع کردیا۔رام مادھو کے بقول اس ساری صورتحال کا پاکستان اور آئی ایس آئی نے بھر پور فائدہ اُٹھاتے ہوئے کشمیر میں دہشت گردی اور انتہا پسندی کو مدد دے کر یہاں حالات خراب کروائے۔

دنیا

نیپال میں سیلاب سے تقریباً 470 افراد ہلاک، امدادی کارروائیاں جاری

Published

25 minutes ago

August 28, 2026

Online Desk

کٹھمنڈو، نیپال کے دارالحکومت کھٹمنڈو کے حکام کے مطابق گلیشیئر کا ایک بڑا حصہ ٹوٹنے کے بعد مٹی اور چٹانوں کا ایک وسیع تودہ ہمالیائی دریا میں جا گرا، جس کے نتیجے میں آنے والے تباہ کن سیلاب سے نیپال اور چین کے تبت کے علاقے میں کم از کم 469 افراد ہلاک اور کم از کم 1,500 افراد لاپتہ ہیں۔

تباہ کن بھوٹی کوشی سیلاب نے نیپال اور تبت کے پہاڑی سرحدی علاقے کو اپنی زد میں لے لیا، جبکہ نیپال کے ضلع راسووا میں سب سے زیادہ تباہی ہوئی، جو چینی سرحد کے عین جنوب میں واقع ہے۔

ٹیلی ویژن پر نشر ہونے والی تصاویر میں تباہ شدہ مکانات، پانی میں بہتی گاڑیاں اور سیلابی ریلے میں بہہ جانے والا ایک دھاتی پل دکھائی دیا، جبکہ عینی شاہدین نے بتایا کہ سیلابی پانی نے پورے کے پورے دیہات کو اپنی زد میں لے لیا۔ امدادی اور تلاش کرنے والی ٹیمیں متاثرہ علاقے میں پانی میں چلتے ہوئے متاثرین اور لاپتہ افراد کو تلاش کر رہی ہیں، تاہم کارروائیوں میں شدید مشکلات پیش آ رہی ہیں کیونکہ سیلاب کے باعث متعدد سڑکیں اور پل بھی تباہ ہو گئے ہیں۔

حکام نے ابتدائی طور پر خیال ظاہر کیا تھا کہ بدھ کی صبح آنے والے سیلاب کی وجہ 4.4 شدت کا زلزلہ ہو سکتا ہے۔ تاہم متعدد ماہرین اور امریکی جیولوجیکل سروے (یو ایس جی ایس) نے تصدیق کی کہ ”زلزلاتی سرگرمی” دراصل گلیشیئر کے ٹوٹنے اور ملبے کے بہاؤ کا نتیجہ تھی، جس کے بعد دریا کے نچلے علاقوں میں تباہ کن اثرات مرتب ہوئے، نہ کہ زلزلے کی وجہ سے سیلاب آیا۔

گلیشیئر کا انہدام اس وقت ہوتا ہے جب برفانی تودے کا ایک بڑا حصہ اپنے بستر سے الگ ہو جاتا ہے۔ اس میں بعض اوقات لاکھوں مکعب میٹر برف، چٹانیں اور پانی شامل ہوتے ہیں، جو انتہائی تیزی سے حرکت کرنے والے برفانی تودے یا ملبے کے بہاؤ میں تبدیل ہو سکتے ہیں۔ گلیشیئر کا انہدام گلیشیئر سائنس میں باقاعدہ طور پر متعین سائنسی اصطلاح نہیں، تاہم ایسے واقعات کو بیان کرنے کے لیے یہ اصطلاح عام طور پر استعمال ہوتی ہے۔

نیپال کی نیشنل ڈیزاسٹر رسک ریڈکشن اینڈ مینجمنٹ اتھارٹی کے مطابق ”گلیشیئر سے آنے والا سیلاب” لہینڈے کھولا دریا میں نیپالی جانب برف اور چٹانوں کے تودے گرنے کے باعث آیا۔ اتھارٹی کے ماہر ارضیات پرکاش پوکھرل نے بتایا کہ ابتدائی سیلابی ریلا لہینڈے کھولا میں داخل ہوا، جو آگے بھوٹی کوشی اور پھر تریشولی دریاؤں میں شامل ہوتا ہے۔ اس کے نتیجے میں سیلابی پانی جنوب کی جانب نیپال میں پھیل گیا۔ اطلاعات کے مطابق صرف 30 منٹ میں تریشولی دریا کی سطح میں تقریباً 9 میٹر (27 فٹ) تک اضافہ ہوا۔

جاری۔ یو این آئیْ۔ ع ا۔

ہندوستان

پوروانچل ایکسپریس وے پر روڈویز بس ستون سے ٹکرائی، ڈرائیور سمیت دو ہلاک، 26 زخمی

Published

51 minutes ago

August 28, 2026

Online Desk

اعظم گڑھ، اترپردیش کے اعظم گڑھ ضلع میں پوروانچل ایکسپریس وے پر جمعرات کی دیر رات تیز رفتار روڈویز بس کے ستون سے ٹکرانے کے سبب بس ڈرائیور سمیت دو افراد کی موت ہو گئی، جبکہ کئی مسافر زخمی ہو گئے۔

اطلاع ملتے ہی پولیس اور ایکسپریس وے کی ایمبولینس ٹیم موقع پر پہنچی اور راحت و بچاؤ کا کام شروع کیا۔

زخمیوں کو فوری طور پر ضلع اسپتال سمیت آس پاس کے اسپتالوں میں داخل کرایا گیا۔ کچھ زخمیوں کی حالت نازک بتائی جا رہی ہے۔

پولیس کے مطابق، بیلتھرا روڈ ڈپو کی روڈویز بس لکھنؤ سے بلیا جا رہی تھی۔ دیر رات پوی تھانہ علاقے میں پوروانچل ایکسپریس وے کے اسٹون نمبر 191 کے قریب بس کے آگے چل رہا پک اپ اچانک بے قابو ہو گیا۔

پک اپ کو بچانے کی کوشش میں بس کا توازن بگڑ گیا اور وہ ایکسپریس وے کے کنارے بنے گورکھپور لنک ایکسپریس وے کے ستون سے ٹکراگئی۔ حادثے میں بس ڈرائیور رجنی کانت (35)، ساکن مدھوبن، مئو اور ایک خاتون مسافر کی موقع پر ہی موت ہو گئی۔ حادثے کے بعد بس میں پھنسے مسافروں کو پولیس اور راحت رساں کارکنوں نے باہر نکالا۔ زخمیوں کو مختلف اسپتالوں میں داخل کرایا گیا۔

حادثے میں زخمی مسافروں میں انجو برنوال (54)، ہرش برنوال (25)، سَویکا (18)، سنیتا (22)، نِتھانجلی یادو (16)، رمبھَا (38)، آنند (19)، شبھم شیکر (12)، روچی (3)، رودل (45)، پرنس یادو، گنسن (23)، انوشکا (18)، سشیل (41)، شویتا (22)، کوشل کشور دوبے (62)، بھگوتی (38)، انکیتا (20)، سِرشٹی (21)، گولو (15)، سنجو (17)، پرینکا شریواستو (36)، سواتی شریواستو (14)، برجیش چوہان (20)، نشا یادو (30)، ارملا (30)، نِتیاوتی دوبے (45)، ستیش موریہ (21)، اکھلیش تیواری (28)، پرتیما پرجاپتی (18)، شریا یادو (19)، پون کمار شریواستو (50)، شوانی (21) اور کملیش (45) شامل ہیں۔

تمام زخمیوں کو اسپتال میں داخل کرایا گیا ہے۔ ضلع مجسٹریٹ رویندر کمار سمیت ضلع کے کئی افسران اسپتال پہنچے اور زخمیوں کے علاج اور راحت رسانی کے کام میں کسی بھی طرح کی لاپروائی نہ برتنے کی ہدایت دی۔ پولیس نے حادثے کا شکار بس کو ایکسپریس وے سے ہٹانے کی کارروائی شروع کر دی ہے۔ ابتدائی تفتیش میں حادثے کی وجہ پک اپ کے اچانک بے قابو ہونے اور اسے بچانے کی کوشش میں بس کا توازن بگڑنا بتایا جا رہا ہے۔

یو این آئی۔ این یو۔

جموں و کشمیر

اننت ناگ میں دھوکہ دہی اور فراڈ کے الزام میں بی جے پی لیڈر کے خلاف مقدمہ درج

Published

3 hours ago

August 28, 2026

Online Desk

سری نگر، بی جے پی کے اننت ناگ ضلع جنرل سکریٹری عابد ننگرو کے خلاف جموں و کشمیر پولیس نے سرکاری ملازمت دلانے اور امرناتھ یاترا کے دوران پہلگام میں خیمے لگانے کی اجازت دلانے کے نام پر مبینہ طور پر دھوکہ دہی اور فراڈ کرنے کے الزام میں مقدمہ درج کیا ہے۔

پولیس اسٹیشن اننت ناگ میں دھوکہ دہی اور فراڈ کی شکایت پر تحریری شکایت موصول ہونے کے بعد مقدمہ درج کیا گیا۔

پولیس نے بتایا کہ اسے وحید احمد ایتو، عیشمقام، جو فی الحال جی ڈی سی بوائز ہاسٹل، خانہ بل میں مقیم ہیں، کی جانب سے تحریری شکایت موصول ہوئی، جس میں الزام لگایا گیا کہ کرندی گام، بیج بہارا کے عابد ننگرو نے ان کے ساتھ دھوکہ کیا۔

پولیس کے مطابق شکایت میں کہا گیا ہے کہ ملزم نے شکایت کنندہ کو یہ یقین دلا کر اپنے جال میں پھنسایا کہ وہ محکمہ پولیس میں ایس پی او (اسپیشل پولیس آفیسر) کی حیثیت سے اسے سرکاری ملازمت دلوا سکتا ہے اور اپنے سیاسی اثر و رسوخ کی مدد سے شری امرناتھ جی یاتریوں کے لیے پہلگام میں خیمے لگانے کی اجازت بھی دلوا سکتا ہے۔

شکایت کنندہ نے مزید الزام لگایا کہ ان یقین دہانیوں اور دعووں کی بنیاد پر اس سے مجموعی طور پر 8,25,000 روپے لے لیے گئے۔

شکایت کا نوٹس لیتے ہوئے پولیس اسٹیشن اننت ناگ میں بی این ایس کی دفعات 318(4) اور 351(3) کے تحت ایف آئی آر درج کی گئی ہے اور تحقیقات شروع کردی گئی ہیں۔

اننت ناگ پولیس نے ایک بار پھر کہا ہے کہ دھوکہ دہی، فراڈ یا سرکاری ملازمت یا دیگر سرکاری فوائد دلانے کے جھوٹے وعدوں کے ذریعے لوگوں کا استحصال کرنے میں ملوث پائے جانے والے افراد کے خلاف سخت قانونی کارروائی کی جائے گی۔

یو این آئی، ایم جے