کووڈ ۔ 19کا قہر: مزید 3اموات ،تعداد194

Published

6 years ago

July 14, 2020

سی آر پی ایف اہلکار اور2خواتین کی کورونا رپورٹ بعد از مرگ مثبت
خبراردو:-
سرینگر:جموں وکشمیر میں کورونا وائرس سے منگلوار کو مزید3افراد کی موت ہوگئی جبکہ سی آر پی ایف اہلکار اور2خواتین کی کورونا رپورٹ بعد ازمرگ مثبت آئی ۔ اس طرح جموں وکشمیر میں مرنے والے افراد کی تعداد بڑھ کر 194ہوگئی ۔ وادی کشمیر میں ہلاکتوں کی تعداد 176تک پہنچ گئی جبکہ جموں میں یہ تعداد18ہوگئی ۔

کشمیر نیوز سروس کے مطابق شمالی کشمیر کے بارہمولہ ضلع کا60سالہ شہری منگل کو کورونا کی وجہ سے فوت ہوگیا ۔ نادی ہل علاقے کا رہنے والا مذکورہ شہری سکمز صورہ میں انتقال کرگیا، جہاں وہ9 روز سے زیر علاج تھا ۔ سکمز کے میڈیکل سپر انٹنڈنٹ پروفیسر فاروق جان نے بتایا کہ مذکورہ شہری نمونیا میں مبتلاء تھا اور وہ منگلوار کی علی الصبح 4 بجے انتقال کرگیا ۔ جموں کے تالاب تلو میں ایک شہری، جو پیشے سے ایگریکلچر آفیسر تھا ،منگل کے روز کورونا وائرس کی وجہ سے فوت ہوگیا ۔

جی ایم سی جموں کے پرنسپل ڈاکٹر نصیب چند ڈوگرہ نے بتایا کہ مذکورہ مریض کو12جولائی کے روز داخل کرایا گیا تھا اور اْسے فوراً وینٹی لیٹر پر رکھا گیا تھا، جس کے دوران منگلوار کی صبح7بجکر40منٹ پر اْس کی موت واقع ہوگئی ۔ معلوم ہوا ہے کہ ایگر یکلچر آفیسر کی عمر47برس تھی ۔ جنوبی ضلع شوپیان کا 65سالہ شہری کورونا وائرس کی وجہ سے جاں بحق ہوگیا ۔ یہ منگل کے روز ہونے والی ایسی تیسری موت ہے ۔

سکمز بمنہ کے میڈیکل سپر انٹنڈنٹ، ڈاکٹر شفا دیوا نے بتایا کہ مذکورہ شہری10جولائی سے زیر علاج تھا ۔ وہ نمونیا میں مبتلاء تھا اور اْس کی ایک سرجری بھی ہوئی تھی ۔ سی آر پی ایف اہلکار صدر اسپتال میں سوموار کو فوت ہوگیا تھا جسکی کورونا رپورٹ منگلوار کو مثبت آئی ۔

صدر اسپتال کے میڈیکل سپر انٹنڈنٹ ڈاکٹر نذیر چودھری نے بتایا کہ 35سالہ سی آر پی ایف اہلکار جو کہ66بٹالین سی آر پی ایف بٹالین سے وابستہ تھا ،کو سوموار کے روز اسپتال میں داخل کیا گیا اور چند گھنٹوں بعد ہی انتقال کرگیا ۔ ان کا کہناتھا کہ مذکورہ اہلکار کے کورونا ٹیسٹ کےلئے نمو نہ لیا گیا ،جس کی رپورٹ مثبت آئی ۔

معلوم ہوا ہے کہ مہلوک اہلکار کا تعلق نوشہری راجوری سے ہے اور اسکی آخری رسومات شمشان گھاٹ کرن نگر میں انجام دی گئی ۔ ادھرجی ایم سی اننت ناگ کے میڈیکل سپر انٹنڈنٹ ڈاکٹر ماجد مہراب نے کہا ہے کہ کولگام اور اننت ناگ اضلاع سے تعلق رکھنے والی2خواتین جن کی عمریں 60برس ہیں ،دونوں کی موت 10جولائی کو ہوئی تھی ۔ ان کا کہناتھا کہ دونوں خواتین کی نعشوں کو پروٹول کے مطابق آخری رسومات انجام دینے کےلئے ورثاں کے سپرد کی گئیں ۔ انہوں نے کہا کہ دونوں خواتین کی کورونا رپورٹس گزشتہ رات پازیٹیو آئیں ۔

جموں وکشمیر میں ان اموات کیساتھ ہی تعداد194تک پہنچ گئی ۔ وادی میں ہلاکتوں کی تعداد176ہوگئی جبکہ جموں میں اموات کی تعداد18ہے ۔ سرینگر میں ہلاکتوں کی تعداد46ہے اور یہ جموں وکشمیر کے کسی بھی ضلعے میں سے زیادہ اموات ہیں ۔ بارہمولہ میں 36،کولگام میں 22،شوپیان میں 17،اننت ناگ میں 15بڈگام میں 14،جموں اور کپوارہ میں 11،11ہلاکتیں ،پلوامہ میں 6،بانڈی پورہ میں 3،گاندر بل میں 4،ڈوڈہ میں 2،پونچھ ،ادھمپور ،راجوری اور کٹھوعہ میں ایک ایک ہلاک ہوا ہے ۔

دنیا

نیپال میں سیلاب سے تقریباً 470 افراد ہلاک، امدادی کارروائیاں جاری

Published

2 hours ago

August 28, 2026

Online Desk

کٹھمنڈو، نیپال کے دارالحکومت کھٹمنڈو کے حکام کے مطابق گلیشیئر کا ایک بڑا حصہ ٹوٹنے کے بعد مٹی اور چٹانوں کا ایک وسیع تودہ ہمالیائی دریا میں جا گرا، جس کے نتیجے میں آنے والے تباہ کن سیلاب سے نیپال اور چین کے تبت کے علاقے میں کم از کم 469 افراد ہلاک اور کم از کم 1,500 افراد لاپتہ ہیں۔

تباہ کن بھوٹی کوشی سیلاب نے نیپال اور تبت کے پہاڑی سرحدی علاقے کو اپنی زد میں لے لیا، جبکہ نیپال کے ضلع راسووا میں سب سے زیادہ تباہی ہوئی، جو چینی سرحد کے عین جنوب میں واقع ہے۔

ٹیلی ویژن پر نشر ہونے والی تصاویر میں تباہ شدہ مکانات، پانی میں بہتی گاڑیاں اور سیلابی ریلے میں بہہ جانے والا ایک دھاتی پل دکھائی دیا، جبکہ عینی شاہدین نے بتایا کہ سیلابی پانی نے پورے کے پورے دیہات کو اپنی زد میں لے لیا۔ امدادی اور تلاش کرنے والی ٹیمیں متاثرہ علاقے میں پانی میں چلتے ہوئے متاثرین اور لاپتہ افراد کو تلاش کر رہی ہیں، تاہم کارروائیوں میں شدید مشکلات پیش آ رہی ہیں کیونکہ سیلاب کے باعث متعدد سڑکیں اور پل بھی تباہ ہو گئے ہیں۔

حکام نے ابتدائی طور پر خیال ظاہر کیا تھا کہ بدھ کی صبح آنے والے سیلاب کی وجہ 4.4 شدت کا زلزلہ ہو سکتا ہے۔ تاہم متعدد ماہرین اور امریکی جیولوجیکل سروے (یو ایس جی ایس) نے تصدیق کی کہ ”زلزلاتی سرگرمی” دراصل گلیشیئر کے ٹوٹنے اور ملبے کے بہاؤ کا نتیجہ تھی، جس کے بعد دریا کے نچلے علاقوں میں تباہ کن اثرات مرتب ہوئے، نہ کہ زلزلے کی وجہ سے سیلاب آیا۔

گلیشیئر کا انہدام اس وقت ہوتا ہے جب برفانی تودے کا ایک بڑا حصہ اپنے بستر سے الگ ہو جاتا ہے۔ اس میں بعض اوقات لاکھوں مکعب میٹر برف، چٹانیں اور پانی شامل ہوتے ہیں، جو انتہائی تیزی سے حرکت کرنے والے برفانی تودے یا ملبے کے بہاؤ میں تبدیل ہو سکتے ہیں۔ گلیشیئر کا انہدام گلیشیئر سائنس میں باقاعدہ طور پر متعین سائنسی اصطلاح نہیں، تاہم ایسے واقعات کو بیان کرنے کے لیے یہ اصطلاح عام طور پر استعمال ہوتی ہے۔

نیپال کی نیشنل ڈیزاسٹر رسک ریڈکشن اینڈ مینجمنٹ اتھارٹی کے مطابق ”گلیشیئر سے آنے والا سیلاب” لہینڈے کھولا دریا میں نیپالی جانب برف اور چٹانوں کے تودے گرنے کے باعث آیا۔ اتھارٹی کے ماہر ارضیات پرکاش پوکھرل نے بتایا کہ ابتدائی سیلابی ریلا لہینڈے کھولا میں داخل ہوا، جو آگے بھوٹی کوشی اور پھر تریشولی دریاؤں میں شامل ہوتا ہے۔ اس کے نتیجے میں سیلابی پانی جنوب کی جانب نیپال میں پھیل گیا۔ اطلاعات کے مطابق صرف 30 منٹ میں تریشولی دریا کی سطح میں تقریباً 9 میٹر (27 فٹ) تک اضافہ ہوا۔

جاری۔ یو این آئیْ۔ ع ا۔

ہندوستان

پوروانچل ایکسپریس وے پر روڈویز بس ستون سے ٹکرائی، ڈرائیور سمیت دو ہلاک، 26 زخمی

Published

3 hours ago

August 28, 2026

Online Desk

اعظم گڑھ، اترپردیش کے اعظم گڑھ ضلع میں پوروانچل ایکسپریس وے پر جمعرات کی دیر رات تیز رفتار روڈویز بس کے ستون سے ٹکرانے کے سبب بس ڈرائیور سمیت دو افراد کی موت ہو گئی، جبکہ کئی مسافر زخمی ہو گئے۔

اطلاع ملتے ہی پولیس اور ایکسپریس وے کی ایمبولینس ٹیم موقع پر پہنچی اور راحت و بچاؤ کا کام شروع کیا۔

زخمیوں کو فوری طور پر ضلع اسپتال سمیت آس پاس کے اسپتالوں میں داخل کرایا گیا۔ کچھ زخمیوں کی حالت نازک بتائی جا رہی ہے۔

پولیس کے مطابق، بیلتھرا روڈ ڈپو کی روڈویز بس لکھنؤ سے بلیا جا رہی تھی۔ دیر رات پوی تھانہ علاقے میں پوروانچل ایکسپریس وے کے اسٹون نمبر 191 کے قریب بس کے آگے چل رہا پک اپ اچانک بے قابو ہو گیا۔

پک اپ کو بچانے کی کوشش میں بس کا توازن بگڑ گیا اور وہ ایکسپریس وے کے کنارے بنے گورکھپور لنک ایکسپریس وے کے ستون سے ٹکراگئی۔ حادثے میں بس ڈرائیور رجنی کانت (35)، ساکن مدھوبن، مئو اور ایک خاتون مسافر کی موقع پر ہی موت ہو گئی۔ حادثے کے بعد بس میں پھنسے مسافروں کو پولیس اور راحت رساں کارکنوں نے باہر نکالا۔ زخمیوں کو مختلف اسپتالوں میں داخل کرایا گیا۔

حادثے میں زخمی مسافروں میں انجو برنوال (54)، ہرش برنوال (25)، سَویکا (18)، سنیتا (22)، نِتھانجلی یادو (16)، رمبھَا (38)، آنند (19)، شبھم شیکر (12)، روچی (3)، رودل (45)، پرنس یادو، گنسن (23)، انوشکا (18)، سشیل (41)، شویتا (22)، کوشل کشور دوبے (62)، بھگوتی (38)، انکیتا (20)، سِرشٹی (21)، گولو (15)، سنجو (17)، پرینکا شریواستو (36)، سواتی شریواستو (14)، برجیش چوہان (20)، نشا یادو (30)، ارملا (30)، نِتیاوتی دوبے (45)، ستیش موریہ (21)، اکھلیش تیواری (28)، پرتیما پرجاپتی (18)، شریا یادو (19)، پون کمار شریواستو (50)، شوانی (21) اور کملیش (45) شامل ہیں۔

تمام زخمیوں کو اسپتال میں داخل کرایا گیا ہے۔ ضلع مجسٹریٹ رویندر کمار سمیت ضلع کے کئی افسران اسپتال پہنچے اور زخمیوں کے علاج اور راحت رسانی کے کام میں کسی بھی طرح کی لاپروائی نہ برتنے کی ہدایت دی۔ پولیس نے حادثے کا شکار بس کو ایکسپریس وے سے ہٹانے کی کارروائی شروع کر دی ہے۔ ابتدائی تفتیش میں حادثے کی وجہ پک اپ کے اچانک بے قابو ہونے اور اسے بچانے کی کوشش میں بس کا توازن بگڑنا بتایا جا رہا ہے۔

یو این آئی۔ این یو۔

جموں و کشمیر

اننت ناگ میں دھوکہ دہی اور فراڈ کے الزام میں بی جے پی لیڈر کے خلاف مقدمہ درج

Published

5 hours ago

August 28, 2026

Online Desk

سری نگر، بی جے پی کے اننت ناگ ضلع جنرل سکریٹری عابد ننگرو کے خلاف جموں و کشمیر پولیس نے سرکاری ملازمت دلانے اور امرناتھ یاترا کے دوران پہلگام میں خیمے لگانے کی اجازت دلانے کے نام پر مبینہ طور پر دھوکہ دہی اور فراڈ کرنے کے الزام میں مقدمہ درج کیا ہے۔

پولیس اسٹیشن اننت ناگ میں دھوکہ دہی اور فراڈ کی شکایت پر تحریری شکایت موصول ہونے کے بعد مقدمہ درج کیا گیا۔

پولیس نے بتایا کہ اسے وحید احمد ایتو، عیشمقام، جو فی الحال جی ڈی سی بوائز ہاسٹل، خانہ بل میں مقیم ہیں، کی جانب سے تحریری شکایت موصول ہوئی، جس میں الزام لگایا گیا کہ کرندی گام، بیج بہارا کے عابد ننگرو نے ان کے ساتھ دھوکہ کیا۔

پولیس کے مطابق شکایت میں کہا گیا ہے کہ ملزم نے شکایت کنندہ کو یہ یقین دلا کر اپنے جال میں پھنسایا کہ وہ محکمہ پولیس میں ایس پی او (اسپیشل پولیس آفیسر) کی حیثیت سے اسے سرکاری ملازمت دلوا سکتا ہے اور اپنے سیاسی اثر و رسوخ کی مدد سے شری امرناتھ جی یاتریوں کے لیے پہلگام میں خیمے لگانے کی اجازت بھی دلوا سکتا ہے۔

شکایت کنندہ نے مزید الزام لگایا کہ ان یقین دہانیوں اور دعووں کی بنیاد پر اس سے مجموعی طور پر 8,25,000 روپے لے لیے گئے۔

شکایت کا نوٹس لیتے ہوئے پولیس اسٹیشن اننت ناگ میں بی این ایس کی دفعات 318(4) اور 351(3) کے تحت ایف آئی آر درج کی گئی ہے اور تحقیقات شروع کردی گئی ہیں۔

اننت ناگ پولیس نے ایک بار پھر کہا ہے کہ دھوکہ دہی، فراڈ یا سرکاری ملازمت یا دیگر سرکاری فوائد دلانے کے جھوٹے وعدوں کے ذریعے لوگوں کا استحصال کرنے میں ملوث پائے جانے والے افراد کے خلاف سخت قانونی کارروائی کی جائے گی۔

یو این آئی، ایم جے