کورونا لاک ڈاؤن ۔ دوم کا 8واں دن،عید کی خوشیاں ماند ،معیشت تباہ

Published

6 years ago

July 20, 2020

معمو لات زندگی درہم برہم ،تجارتی وکاروباری ادارے ہنوز مقفل
خبراردو:-
سرینگر:وادی کشمیر میں جاری کورونا لاک ڈاؤن ۔ دوم کے آٹھویں روز سوموار کو معمولات زندگی درہم برہم رہے جبکہ تجارتی وکاروباری ادارے ہنوز مقفل ہیں ۔ نجی گاڑیوں کی آمد ورفت جاری ہے اور کئی ایک روٹوں پر سومو گاڑیاں بھی چلتی دیکھی گئیں ۔

کورونا کے سائے میں عید ِ قر بان کی خوشیاں ماند پڑ گئیں جبکہ کشمیر کی معیشت کی کمر مکمل طور ٹوٹ چکی ہے ۔ کشمیر نیوز سروس کے مطابق کورونا وائرس ( عالمی وبا ۔ کووڈ ۔ 19) مثبت معاملات اور اموات میں تشویشناک اضافہ کے پیش نظر انتظامیہ کی جا نب سے دوبارہ نافذ کئے گئے لاک ڈاءون کا دائرہ نہ صرف بڑھا دیا گیا بلکہ اس میں 25جولائی تک توسیع بھی کی گئی ۔

کورونا کیسز اور اموات کے حوالے ہاٹ اسپارٹ دارالحکومت سرینگر میں سوموار کو مسلسل آٹھویں روز بھی کورونا لاک ڈاءون ۔ دوم کے نتیجے میں دکا نات ،کاروباری ادارے اور تجارتی مراکز بند رہے جبکہ پبلک ٹرانسپورٹ مجموعی طور پر سڑکوں سے غائب رہا ۔ سرینگر میں صبح وشام بعض بازاروں میں دکانیں کھلی رہتی ہیں ،مجموعی طور پر یہاں جملہ سرگرمیاں ٹھپ ہیں ۔

انتظامیہ کی جانب سے ریڈ زون قرار دیئے گئے درجنوں علاقے ہنوز موٹی موٹی سلاخوں سے سیل ہیں جبکہ ان علاقوں کی ناکہ بندی کےلئے گلی کوچوں پر رکاوٹیں کھڑی کرکے لوگوں کی آزاد نقل وحرکت کو گھروں تک محدود رکھا گیا ۔ شہر میں چھاپڑی فروشوں کی تعداد میں ناکے برابر ہے ۔

تاہم دارالحکومت سرینگر میں سرکاری دفاتر کھلے رہے جبکہ بعض راستہ پر سومو گاڑیاں بھی چلتی ہوئی دیکھی گئیں ۔ اس کے علاوہ سیول لائنز علاقوں میں ٹاٹا مٹیاڈار مسافر گاڑیاں بھی نظر آئیں ،تاہم ان کی تعداد کم ہے ۔ نجی گاڑیوں کی آوا جاہی میں گزشتہ دنوں کے مقابلے میں اضافہ دیکھنے کو ملا ۔

کپوارہ ،بارہمولہ اور پلوامہ کیساتھ ساتھ اننت ناگ اضلاع میں کورونا پابندیوں اور بندشوں میں 25جولائی تک توسیع کی گئی ہے ۔ ان اضلاع میں بھی معمولات زندگی مکمل طور ٹھپ ہیں اور سڑکوں پر لوگوں کی آوا جاہی انتہائی قلیل ہے ۔ بڈگام میں بھی دفعہ 144کے تحت پابندیاں اور بندشیں عائد ہیں ۔

گاندر بل ،بانڈی پورہ ،شوپیان اور کولگام میں معمو لات زندگی کووڈ ۔ 19قواعد وضوابط (گائیڈ لائنز)کے تحت جاری ہے ،تاہم ان اضلاع میں کورونا کا سایہ فگن کی مانند چھایا ہوا ہے ۔ وادی کشمیر میں انتظامیہ کی جانب سے مرحلہ دوم کے تحت نافذ کئے لاک ڈاءون کے نتیجے میں عید ِ قربان کی خوشیاں ماند پڑ گئی ہیں ۔ عید کے آمد آمد پر بازاروں میں زبردست گہما گہما رہتی تھی ،تاہم یہ تیسری عید ہے کہ کشمیر کے بازاروں میں کوئی گہما گہمی نظر نہیں آرہی ہے بلکہ کورونا کے حالات میں بازار سنسان اور ویران نظر آرہے ہیں ۔

دکانوں کے افسر دہ شٹر نیچے ہیں جسکے نتیجے میں کشمیر کی معیشت پر منفی اثرات مرتب ہورہے ہیں ۔ ایک مقامی اردو روزنامہ کی رپورٹ کے مطابق لاک ڈاؤن کے چلتے وادی میں مسلسل تیسری عید کے موقعہ پر تاجروں کو300کروڑ روپے کے نقصانات کا خدشہ ہے،جبکہ تاجروں نے ایک آواز میں عید پر لاک ڈاؤن میں نرمی کامطالبہ کیا ہے ۔

تاجروں کا کہنا ہے کہ وادی میں عید کے موقعہ پر ہونے والے کاروبار کا حجم300کروڑ روپے ہیں اور عید سے10روز قبل عید کی خریداری شروع ہوتی ہے ۔

صورتحال کا دوسرا پہلو امسال عید الفطر پر دیکھنے کو ملا جب مارچ کے وسط سے ہی وادی میں کرونا لاک ڈاءون ہوا اور تاجروں و دکانداروں کی عید پر تجارت اور کاروبار کی رہی سہی امیدیں بھی بھر نہیں آئی ۔ کرونا کے خوف سے لوگوں نے ناہی بیکری کی خریداری کی،نا ہی ملبوسات اور نا ہی دیگر ساز و سامان کی خریداری ہوئی،جس کے نتیجے میں دکانداروں کو نقصان کا سامنا کرنا پڑا ۔

عید الضحیٰ میں اب جبکہ صرف11روز رہ گئے ہیں اور سرینگر سمیتوادی کے دیگر اضلاع میں کرونا کے کیسوں اور اموات میں اضافے کے پیش نظر سر نو لاک ڈاؤن کا اعلان کیا گیا ہے،تاجروں کو ایک بار پھر خدشہ ہے کہ مسلسل تیسری عید کو انہیں کچھ کمانے کو نہیں ملے گا ۔

کورونا کے خوف اور مسلسل لاک ڈاؤن کے نتیجے میں جہاں معیشت براہ راست نشانہ بن گئی ہے اور خریداروں کی قوت خرید بھی جواب دے چکی ہے،اس میں دکانداروں اور تاجروں کے ہاتھ سے عید کا سنہرا موقعہ بھی جا رہا ہے،جس کو وہ حسرت بھری آنکھوں سے دیکھ رہے ہیں ۔

ہندوستان

پوروانچل ایکسپریس وے پر روڈویز بس ستون سے ٹکرائی، ڈرائیور سمیت دو ہلاک، 26 زخمی

Published

3 minutes ago

August 28, 2026

Online Desk

اعظم گڑھ، اترپردیش کے اعظم گڑھ ضلع میں پوروانچل ایکسپریس وے پر جمعرات کی دیر رات تیز رفتار روڈویز بس کے ستون سے ٹکرانے کے سبب بس ڈرائیور سمیت دو افراد کی موت ہو گئی، جبکہ کئی مسافر زخمی ہو گئے۔

اطلاع ملتے ہی پولیس اور ایکسپریس وے کی ایمبولینس ٹیم موقع پر پہنچی اور راحت و بچاؤ کا کام شروع کیا۔

زخمیوں کو فوری طور پر ضلع اسپتال سمیت آس پاس کے اسپتالوں میں داخل کرایا گیا۔ کچھ زخمیوں کی حالت نازک بتائی جا رہی ہے۔

پولیس کے مطابق، بیلتھرا روڈ ڈپو کی روڈویز بس لکھنؤ سے بلیا جا رہی تھی۔ دیر رات پوی تھانہ علاقے میں پوروانچل ایکسپریس وے کے اسٹون نمبر 191 کے قریب بس کے آگے چل رہا پک اپ اچانک بے قابو ہو گیا۔

پک اپ کو بچانے کی کوشش میں بس کا توازن بگڑ گیا اور وہ ایکسپریس وے کے کنارے بنے گورکھپور لنک ایکسپریس وے کے ستون سے ٹکراگئی۔ حادثے میں بس ڈرائیور رجنی کانت (35)، ساکن مدھوبن، مئو اور ایک خاتون مسافر کی موقع پر ہی موت ہو گئی۔ حادثے کے بعد بس میں پھنسے مسافروں کو پولیس اور راحت رساں کارکنوں نے باہر نکالا۔ زخمیوں کو مختلف اسپتالوں میں داخل کرایا گیا۔

حادثے میں زخمی مسافروں میں انجو برنوال (54)، ہرش برنوال (25)، سَویکا (18)، سنیتا (22)، نِتھانجلی یادو (16)، رمبھَا (38)، آنند (19)، شبھم شیکر (12)، روچی (3)، رودل (45)، پرنس یادو، گنسن (23)، انوشکا (18)، سشیل (41)، شویتا (22)، کوشل کشور دوبے (62)، بھگوتی (38)، انکیتا (20)، سِرشٹی (21)، گولو (15)، سنجو (17)، پرینکا شریواستو (36)، سواتی شریواستو (14)، برجیش چوہان (20)، نشا یادو (30)، ارملا (30)، نِتیاوتی دوبے (45)، ستیش موریہ (21)، اکھلیش تیواری (28)، پرتیما پرجاپتی (18)، شریا یادو (19)، پون کمار شریواستو (50)، شوانی (21) اور کملیش (45) شامل ہیں۔

تمام زخمیوں کو اسپتال میں داخل کرایا گیا ہے۔ ضلع مجسٹریٹ رویندر کمار سمیت ضلع کے کئی افسران اسپتال پہنچے اور زخمیوں کے علاج اور راحت رسانی کے کام میں کسی بھی طرح کی لاپروائی نہ برتنے کی ہدایت دی۔ پولیس نے حادثے کا شکار بس کو ایکسپریس وے سے ہٹانے کی کارروائی شروع کر دی ہے۔ ابتدائی تفتیش میں حادثے کی وجہ پک اپ کے اچانک بے قابو ہونے اور اسے بچانے کی کوشش میں بس کا توازن بگڑنا بتایا جا رہا ہے۔

یو این آئی۔ این یو۔

جموں و کشمیر

اننت ناگ میں دھوکہ دہی اور فراڈ کے الزام میں بی جے پی لیڈر کے خلاف مقدمہ درج

Published

2 hours ago

August 28, 2026

Online Desk

سری نگر، بی جے پی کے اننت ناگ ضلع جنرل سکریٹری عابد ننگرو کے خلاف جموں و کشمیر پولیس نے سرکاری ملازمت دلانے اور امرناتھ یاترا کے دوران پہلگام میں خیمے لگانے کی اجازت دلانے کے نام پر مبینہ طور پر دھوکہ دہی اور فراڈ کرنے کے الزام میں مقدمہ درج کیا ہے۔

پولیس اسٹیشن اننت ناگ میں دھوکہ دہی اور فراڈ کی شکایت پر تحریری شکایت موصول ہونے کے بعد مقدمہ درج کیا گیا۔

پولیس نے بتایا کہ اسے وحید احمد ایتو، عیشمقام، جو فی الحال جی ڈی سی بوائز ہاسٹل، خانہ بل میں مقیم ہیں، کی جانب سے تحریری شکایت موصول ہوئی، جس میں الزام لگایا گیا کہ کرندی گام، بیج بہارا کے عابد ننگرو نے ان کے ساتھ دھوکہ کیا۔

پولیس کے مطابق شکایت میں کہا گیا ہے کہ ملزم نے شکایت کنندہ کو یہ یقین دلا کر اپنے جال میں پھنسایا کہ وہ محکمہ پولیس میں ایس پی او (اسپیشل پولیس آفیسر) کی حیثیت سے اسے سرکاری ملازمت دلوا سکتا ہے اور اپنے سیاسی اثر و رسوخ کی مدد سے شری امرناتھ جی یاتریوں کے لیے پہلگام میں خیمے لگانے کی اجازت بھی دلوا سکتا ہے۔

شکایت کنندہ نے مزید الزام لگایا کہ ان یقین دہانیوں اور دعووں کی بنیاد پر اس سے مجموعی طور پر 8,25,000 روپے لے لیے گئے۔

شکایت کا نوٹس لیتے ہوئے پولیس اسٹیشن اننت ناگ میں بی این ایس کی دفعات 318(4) اور 351(3) کے تحت ایف آئی آر درج کی گئی ہے اور تحقیقات شروع کردی گئی ہیں۔

اننت ناگ پولیس نے ایک بار پھر کہا ہے کہ دھوکہ دہی، فراڈ یا سرکاری ملازمت یا دیگر سرکاری فوائد دلانے کے جھوٹے وعدوں کے ذریعے لوگوں کا استحصال کرنے میں ملوث پائے جانے والے افراد کے خلاف سخت قانونی کارروائی کی جائے گی۔

یو این آئی، ایم جے

ہندوستان

وزیر اعظم مودی نے رکشا بندھن پر عوام کو مبارکباد دی

Published

3 hours ago

August 28, 2026

Online Desk

نئی دہلی، وزیر اعظم نریندر مودی نے جمعہ کو رکشا بندھن کے موقع پر عوام کو دلی مبارکباد پیش کی اور دعا کی کہ یہ ۔تہوار تمام شہریوں کی زندگیوں میں خوشی، خوشحالی اور کامیابی لائے۔

وزیر اعظم نے سوشل میڈیا پلیٹ فارم ایکس پر ایک پوسٹ میں اپنی نیک خواہشات کا اظہار کرتے ہوئے رکشا بندھن کو محبت اور مضبوط انسانی رشتوں کی علامت قرار دیا۔

مسٹر مودی نے کہا، ’’رکشا بندھن پر دلی مبارکباد۔ یہ تہوار آپ سب کی زندگیوں میں خوشی، خوشحالی اور کامیابی لائے۔‘‘

وزیر اعظم نے یہ امید بھی ظاہر کی کہ لوگوں کے درمیان محبت، اپنائیت اور باہمی اعتماد کے رشتے مضبوط اور پائیدار رہیں گے۔

انہوں نے کہا، ’’محبت، اپنائیت اور باہمی اعتماد کا دھاگا ہمیشہ اٹوٹ رہے، یہی میری دلی خواہش ہے۔‘‘

رکشا بندھن، جسے عام طور پر راکھی کے نام سے جانا جاتا ہے، پورے ہندستان میں محبت، خیال اور تحفظ کے رشتے کی عکاسی کرنے والے تہوار کے طور پر منایا جاتا ہے، خاص طور پر بھائی بہن کے درمیان۔

بہنیں روایتی طور پر اپنے بھائیوں کی کلائی پر راکھی کے نام سے معروف مقدس دھاگا باندھتی ہیں، جبکہ بھائی اپنی بہنوں کی مدد اور حفاظت کے عزم کی تجدید کرتے ہیں۔

یہ تہوار خاندانوں اور برادریوں کو بھی ایک دوسرے کے قریب لاتا ہے، جہاں لوگ تحائف، مٹھائیاں اور مبارکباد کا تبادلہ کرتے ہوئے محبت، اعتماد، اتحاد اور باہمی احترام کی پائیدار اقدار کا جشن مناتے ہیں۔

یو این آئی، ایم جے