آٹھ دہائیوں بعد آیا صوفیہ مسجد میں نماز جمعہ کی ادائیگی

Published

6 years ago

July 25, 2020

ترک عوام کا ۸۶؍ سالہ انتظار ختم ہوا۔ صرف استنبول ہی نہیں دیگر شہروں سے ہزاروں کی تعداد میں آئے نمازیوں کی شرکت۔ صدر رجب طیب اردگان اور ان کے وزراء بھی نماز میں شریک ہوئے۔ آیا صوفیہ میں ۳؍ ائمہ کرام اور ۳؍موذنوں کاتقرر، اب سے پانچوں وقت کی نمازیں یہاں پابندی سے ہوں گی۔

یورپی ممالک کی مخالفت اور ترک عوام کی خوشیوں کے درمیان ترکی کے شہر استنبول میں واقع آیا صوفیہ مسجد میں تقریباً ۸؍ دہائیوں کے بعد پہلی مرتبہ نمازِ جمعہ ادا کی گئی۔ اس موقع پر ترکی کے صدر رجب طیب اردگان اپنے کئی اہم وزراء کے ساتھ موجود تھے۔ واضح رہے کہ اردگان نےجمعرات ہی کو یہاں آکر مسجد پر لگائی گئی تختی کی نقاب کشائی کرکے اس کا افتتاح کیا تھا۔ جمعہ کو نماز کے موقع پر ہزاروں کی تعداد میں لوگ موجود تھے۔ استنبول کے گورنر علی یار لیکایا نے کہا کہ ’’ہم نے لوگوں سے چار چیزیں اپنے ساتھ لانے کو کہا تھا ، ماسک، مصلیٰ، صبر اور سمجھداری‘‘ نماز کے دوران کورونا وائرس کے پیش نظر ۲؍ نمازیوں کے درمیان درکار فاصلے کا خاص خیال رکھا گیا۔ اس دوران عمارت میں موجود عیسائی دور کی علامتوں کو کپڑے سے ڈھانپ دیا گیا تھا۔ خواتین اور مردوں کیلئے نماز کا علاحدہ انتظام کیا گیا تھا۔ اس موقع پر سیکوریٹی اور طبی سہولیات کا خاص خیال رکھا گیا تھا۔ ۷؍سو طبی اہلکاروں کو خصوصی طور پر تعینات کیا گیا تھا جبکہ ہنگامی حالات کے مدنظر ۱۰۱؍ ایمبولنس بھی مسجد کے پاس موجود تھیں ۔ ساتھ ہی ایک ہیلی کاپٹر ایمبو لنس کا بھی انتظام کیا گیا تھا۔ کہا جا رہا ہے کہ مجموعی طور پر استنبول میں ۲۰؍ ہزار سیکوریٹی گارڈ کو تعینات کیا گیا تھا۔

ائمہ اور موذن کی تقرری
ایک روز قبل ہی ترکی حکومت کے مذہبی امور کے نگراں علی ارباز نے آیا صوفیہ مسجد میں ۳؍ ائمہ کرام کی تقرری کا اعلان کیا تھا۔ ان میں سے ایک استنبول کی مرامر یونیورسٹی میں اسلامک اسٹڈیز کے پروفیسر ہیں ۔ محمد بوئنو کالین یونیورسٹی میں اسلامی قوانین سے متعلق درس دیتے ہیں ۔ ان کے علاوہ بن یامین تبغلو اور فروخ مستر بھی یہاں نماز پڑھائیں گے۔ ان کے علاوہ ۳؍ موذنوں کا بھی تقرر کیا گیاہے لیکن ان کے نام حاصل نہیں ہو سکے۔ البتہ ان میں سے ۲؍ کا تعلق استنبول کی سب سے بڑی سلطان احمد مسجد سے ہے۔
آیا صوفیہ مسجد کے حکام نے بتایا کہ آئندہ ۲۴؍ گھنٹوں تک یہاں قرآن پاک کی تلاوت ہوگی۔اور اب سے یہاں پانچوں وقت کی نمازیں پابندی سے ادا کی جائیں گی۔ یہاں اب عوام کا داخلہ مفت ہوگا۔ واضح رہے کہ جب یہ عمارت میوزیم ہوا کرتی تھی تو عوام کو اس میں داخل ہونے کیلئے فیس ادا کرنی ہوتی تھی۔

چھیاسی سال کا انتظار ختم ہوا
جمعہ کو آیا صوفیہ میں نماز ادا کرنے کی غرض سے ہزاروں کی تعداد میں لوگ جمع تھے۔ ان میں صرف استنبول کے لوگ شامل نہیں تھے بلکہ دیگر شہروں کے لوگ بھی یہاں پہنچے تھے۔ انہی میں سے ایک نے کہا ’’ آج ہمارا ۸۶؍ سالہ انتظار ختم ہوا۔‘‘ انہوں نے کہا کہ لوگ اس عمارت کو میوزیم بنائے جانے کے بعد سے اس کے کھلنے کا انتظار کر رہے تھے۔ ایک اور نمازی نے کہا ’’ ہمارے صدر اور عدالت کا شکریہ جن کی وجہ سے آج ہم آیا صوفیہ میں جمعہ کی نامز ادا کر رہے ہیں ۔‘‘ بڑی تعداد میں یہاں خواتین بھی موجود تھیں جن میں سے ایک خاتون نے کہا ’’ میں چھٹی پر تھی اور شہر سے باہر گئی ہوئی تھی لیکن جیسے ہی مجھے علم ہوا کہ آیا صوفیہ کو دوبارہ نماز کیلئے کھولنے کا اعلان ہو چکا ہے میں نے اپنا پروگرام منسوخ کر دیا اور استنبول لوٹ آئی تاکہ یہاں نماز ادا کر سکوں ۔‘‘ واضح رہے کہ ترکی کے صدر رجب طیب اردگان نماز کے بعد عوام سے خطاب کرنے والے تھے لیکن خبر لکھے جانے تک ان کی تقریر سے متعلق کوئی اطلاع موصول نہیں ہوئی تھی۔ البتہ اطلاع کے مطابق یہاں موجود عوام میں کافی جوش وخروش دیکھا گیا۔ یاد رہے کہ اس ۱۵؍ سو سالہ عمارک کو جو کہ کوئی ۶؍ سال تک ایک مسجد رہی کمال اتارک نے ۱۹۳۱ء میں بند کر دیا تھا اور ۱۹۳۴ء میں اسے ایک میوزیم بنانے کا حکم دیا تھا ۔ جبکہ ۱۹۳۵ء میں اسے بطور میوزیم عوام کیلئے کھول دیا تھا۔ اس طرح کوئی ۸۹؍ سال سے یہاں نماز ادا نہیں کی گئی تھی۔ گزشتہ دنوں ترکی کی سب سے بڑی عدالتنے اس مسجد کو دوبار ہ نمازیوں کیلئے کھولنے کا حکم دیا جس کے بعد جمعہ ۲۴؍ جولائی سے یہاں نماز کا سلسلہ شروع کرنےکا فیصلہ کیا گیا۔
(انقلاب)

ہندوستان

مالی شمولیت میں جن دھن یوجنا کے یکسرتبدیلی لانے والے رول کی وزیرِ اعظم مودی نے کی ستائش

Published

14 minutes ago

August 28, 2026

Online Desk

نئی دہلی، وزیرِ اعظم نریندر مودی نے جمعہ کے روز پردھان منتری جن دھن یوجنا کی ستائش کرتے ہوئے اس کے سفر کو ” غیرمعمولی وسعت اورانقلابی نتائج” سے تعبیر کیا اور ملک بھر میں مالی شمولیت پر اس کے دور رس اثرات کو اجاگر کیا سوشل میڈیا پلیٹ فارم ایکس پر ایک پوسٹ میں وزیرِ اعظم نے کہا، ” غیرمعمولی وسعت اورانقلابی نتائج! جن دھن یوجنا کا ایک بے مثال اثر رہا ہے۔”

ان کے یہ تبصرے مالی شمولیت کی اس اہم اسکیم کے 28 اگست 2014 کو اپنے آغاز سے 12 سال مکمل ہونے پر سامنے آئے۔ پردھان منتری جن دھن یوجنا کو بینکنگ خدمات تک ہمہ گیر رسائی فراہم کرنے اور رسمی مالیاتی نظام سے باہر رہنے والے لاکھوں لوگوں کو بینکنگ نیٹ ورک میں لانے کے لیے شروع کیا گیا تھا۔

سرکاری اعداد و شمار کے مطابق، 19 اگست 2026 تک 59 کروڑ سے زیادہ جن دھن کھاتے کھولے جا چکے تھے، جن میں کل جمع رقم 3.16 لاکھ کروڑ روپے سے تجاوز کر گئی ہے۔ مستفیدین میں خواتین کا تناسب 55 فیصد سے زیادہ ہے، جبکہ تقریباً 78 فیصد کھاتے دیہی اور نیم شہری علاقوں میں ہیں۔ اس اسکیم کے تحت 41 کروڑ سے زیادہ روپے۔کارڈ بھی جاری کیے گئے ہیں۔

گزشتہ 12 برسوں میں، جن دھن یوجنا حکومت کی مالی شمولیت کی کوششوں کا ایک مرکزی ستون بن گئی ہے، جس نے مستفیدین کو بینکنگ، بچت، کریڈٹ، انشورنس، پینشن کی سہولیات اور ڈیجیٹل ادائیگی کی خدمات تک رسائی حاصل کرنے میں مدد کی ہے۔

اس اسکیم نے جن دھن-آدھار-موبائل، یا جے اے ایم، فریم ورک میں بھی ایک اہم کردار ادا کیا ہے، جس نے مستفیدین کے بینک کھاتوں میں سرکاری فوائد کی براہِ راست منتقلی کو ممکن بنایا ہے اور فلاحی امداد کی فراہمی میں خامیوں کو کم کرنے کی کوشش کی ہے۔

اب جب کہ یہ پروگرام اپنے 13 ویں سال میں داخل ہو رہا ہے، حکومت کا کہنا ہے کہ جن دھن یوجنا رسمی مالیاتی خدمات تک رسائی کو وسعت دے رہی ہے اور ان لوگوں کی معاشی شراکت کو مضبوط کر رہی ہے جو پہلے مین اسٹریم بینکنگ نظام سے باہر تھے۔

یو این آئی ایف اے

دنیا

نیپال میں سیلاب سے تقریباً 470 افراد ہلاک، امدادی کارروائیاں جاری

Published

2 hours ago

August 28, 2026

Online Desk

کٹھمنڈو، نیپال کے دارالحکومت کھٹمنڈو کے حکام کے مطابق گلیشیئر کا ایک بڑا حصہ ٹوٹنے کے بعد مٹی اور چٹانوں کا ایک وسیع تودہ ہمالیائی دریا میں جا گرا، جس کے نتیجے میں آنے والے تباہ کن سیلاب سے نیپال اور چین کے تبت کے علاقے میں کم از کم 469 افراد ہلاک اور کم از کم 1,500 افراد لاپتہ ہیں۔

تباہ کن بھوٹی کوشی سیلاب نے نیپال اور تبت کے پہاڑی سرحدی علاقے کو اپنی زد میں لے لیا، جبکہ نیپال کے ضلع راسووا میں سب سے زیادہ تباہی ہوئی، جو چینی سرحد کے عین جنوب میں واقع ہے۔

ٹیلی ویژن پر نشر ہونے والی تصاویر میں تباہ شدہ مکانات، پانی میں بہتی گاڑیاں اور سیلابی ریلے میں بہہ جانے والا ایک دھاتی پل دکھائی دیا، جبکہ عینی شاہدین نے بتایا کہ سیلابی پانی نے پورے کے پورے دیہات کو اپنی زد میں لے لیا۔ امدادی اور تلاش کرنے والی ٹیمیں متاثرہ علاقے میں پانی میں چلتے ہوئے متاثرین اور لاپتہ افراد کو تلاش کر رہی ہیں، تاہم کارروائیوں میں شدید مشکلات پیش آ رہی ہیں کیونکہ سیلاب کے باعث متعدد سڑکیں اور پل بھی تباہ ہو گئے ہیں۔

حکام نے ابتدائی طور پر خیال ظاہر کیا تھا کہ بدھ کی صبح آنے والے سیلاب کی وجہ 4.4 شدت کا زلزلہ ہو سکتا ہے۔ تاہم متعدد ماہرین اور امریکی جیولوجیکل سروے (یو ایس جی ایس) نے تصدیق کی کہ ”زلزلاتی سرگرمی” دراصل گلیشیئر کے ٹوٹنے اور ملبے کے بہاؤ کا نتیجہ تھی، جس کے بعد دریا کے نچلے علاقوں میں تباہ کن اثرات مرتب ہوئے، نہ کہ زلزلے کی وجہ سے سیلاب آیا۔

گلیشیئر کا انہدام اس وقت ہوتا ہے جب برفانی تودے کا ایک بڑا حصہ اپنے بستر سے الگ ہو جاتا ہے۔ اس میں بعض اوقات لاکھوں مکعب میٹر برف، چٹانیں اور پانی شامل ہوتے ہیں، جو انتہائی تیزی سے حرکت کرنے والے برفانی تودے یا ملبے کے بہاؤ میں تبدیل ہو سکتے ہیں۔ گلیشیئر کا انہدام گلیشیئر سائنس میں باقاعدہ طور پر متعین سائنسی اصطلاح نہیں، تاہم ایسے واقعات کو بیان کرنے کے لیے یہ اصطلاح عام طور پر استعمال ہوتی ہے۔

نیپال کی نیشنل ڈیزاسٹر رسک ریڈکشن اینڈ مینجمنٹ اتھارٹی کے مطابق ”گلیشیئر سے آنے والا سیلاب” لہینڈے کھولا دریا میں نیپالی جانب برف اور چٹانوں کے تودے گرنے کے باعث آیا۔ اتھارٹی کے ماہر ارضیات پرکاش پوکھرل نے بتایا کہ ابتدائی سیلابی ریلا لہینڈے کھولا میں داخل ہوا، جو آگے بھوٹی کوشی اور پھر تریشولی دریاؤں میں شامل ہوتا ہے۔ اس کے نتیجے میں سیلابی پانی جنوب کی جانب نیپال میں پھیل گیا۔ اطلاعات کے مطابق صرف 30 منٹ میں تریشولی دریا کی سطح میں تقریباً 9 میٹر (27 فٹ) تک اضافہ ہوا۔

جاری۔ یو این آئیْ۔ ع ا۔

ہندوستان

پوروانچل ایکسپریس وے پر روڈویز بس ستون سے ٹکرائی، ڈرائیور سمیت دو ہلاک، 26 زخمی

Published

3 hours ago

August 28, 2026

Online Desk

اعظم گڑھ، اترپردیش کے اعظم گڑھ ضلع میں پوروانچل ایکسپریس وے پر جمعرات کی دیر رات تیز رفتار روڈویز بس کے ستون سے ٹکرانے کے سبب بس ڈرائیور سمیت دو افراد کی موت ہو گئی، جبکہ کئی مسافر زخمی ہو گئے۔

اطلاع ملتے ہی پولیس اور ایکسپریس وے کی ایمبولینس ٹیم موقع پر پہنچی اور راحت و بچاؤ کا کام شروع کیا۔

زخمیوں کو فوری طور پر ضلع اسپتال سمیت آس پاس کے اسپتالوں میں داخل کرایا گیا۔ کچھ زخمیوں کی حالت نازک بتائی جا رہی ہے۔

پولیس کے مطابق، بیلتھرا روڈ ڈپو کی روڈویز بس لکھنؤ سے بلیا جا رہی تھی۔ دیر رات پوی تھانہ علاقے میں پوروانچل ایکسپریس وے کے اسٹون نمبر 191 کے قریب بس کے آگے چل رہا پک اپ اچانک بے قابو ہو گیا۔

پک اپ کو بچانے کی کوشش میں بس کا توازن بگڑ گیا اور وہ ایکسپریس وے کے کنارے بنے گورکھپور لنک ایکسپریس وے کے ستون سے ٹکراگئی۔ حادثے میں بس ڈرائیور رجنی کانت (35)، ساکن مدھوبن، مئو اور ایک خاتون مسافر کی موقع پر ہی موت ہو گئی۔ حادثے کے بعد بس میں پھنسے مسافروں کو پولیس اور راحت رساں کارکنوں نے باہر نکالا۔ زخمیوں کو مختلف اسپتالوں میں داخل کرایا گیا۔

حادثے میں زخمی مسافروں میں انجو برنوال (54)، ہرش برنوال (25)، سَویکا (18)، سنیتا (22)، نِتھانجلی یادو (16)، رمبھَا (38)، آنند (19)، شبھم شیکر (12)، روچی (3)، رودل (45)، پرنس یادو، گنسن (23)، انوشکا (18)، سشیل (41)، شویتا (22)، کوشل کشور دوبے (62)، بھگوتی (38)، انکیتا (20)، سِرشٹی (21)، گولو (15)، سنجو (17)، پرینکا شریواستو (36)، سواتی شریواستو (14)، برجیش چوہان (20)، نشا یادو (30)، ارملا (30)، نِتیاوتی دوبے (45)، ستیش موریہ (21)، اکھلیش تیواری (28)، پرتیما پرجاپتی (18)، شریا یادو (19)، پون کمار شریواستو (50)، شوانی (21) اور کملیش (45) شامل ہیں۔

تمام زخمیوں کو اسپتال میں داخل کرایا گیا ہے۔ ضلع مجسٹریٹ رویندر کمار سمیت ضلع کے کئی افسران اسپتال پہنچے اور زخمیوں کے علاج اور راحت رسانی کے کام میں کسی بھی طرح کی لاپروائی نہ برتنے کی ہدایت دی۔ پولیس نے حادثے کا شکار بس کو ایکسپریس وے سے ہٹانے کی کارروائی شروع کر دی ہے۔ ابتدائی تفتیش میں حادثے کی وجہ پک اپ کے اچانک بے قابو ہونے اور اسے بچانے کی کوشش میں بس کا توازن بگڑنا بتایا جا رہا ہے۔

یو این آئی۔ این یو۔