منجمد گوشت ومرغ کی درآمد اور ترسیل ،2مقامی تاجروں کے لائسنس منسوخ
2بیرونی لیبارٹریوں میں بھیجے گئے گوشت، مرغ اور مچھلی کے نمونوں کے معیارسے متعلق جانچ رپورٹ کاانتظار ،عوام ہنوز تذبذب کاشکار
سرینگر : جے کے این ایس : جموں کشمیر میں ڈریسڈ گوشت، مرغ اورمچھلی کاروباریوں کیخلاف حکومتی کریک ڈاون کے دوران اس بات کا انکشاف ہوا ہے کہ کاروباری بغیر لائسنس اور مناسب کولڈ اسٹوریج سہولیات کے کام کر رہے ہیں۔ جے کے این ایس کے مطابق جموں و کشمیر خاص کرکشمیر وادی میں گلے سڑے گوشت کی بڑی مقدار میں ضبطی کے بعد جہاں فوڈ سیفٹی محکمہ کافی متحرت ہو چکا ہے، وہیں ڈریسڈ چکن اور گوشت کی برآمدگی، خرید و فروخت کے حوالے سے حکومت نے بڑی کارروائیاں انجام دیں جبکہ جمعرات کو FSSAIیعنی فوڈسیفٹی اینڈ اسٹنڈرڈزاتھارٹی آف انڈیا کے قوانین پرسختی کیساتھ عمل کرنے کے احکامات بھی جاری کئے گئے ہیں۔قریب80کوئنٹل سڑے گوشت کی ضبطی کے بعد جہاں لوگ درآمد کئے جا رہے منجمد گوشت اورمرغ پر عدم اعتماد کا اظہار کر رہے ہیں، وہیں حکومتی ادارے بھی متحرک ہوئے اور چھاپہ مار کارروائیوں کےساتھ ساتھ غیر لیبل شدہ پیکڈ فوڈ مصنوعات کی فروخت پر بھی مکمل پابندی عائد کر دی گئی ہے۔ جبکہ لائسنس حاصل کرنے والے افراد مناسب کولڈ اسٹوریج سہولیات ہونے کے بعد ہی یہ کاروبار انجام دے سکتے ہیں تاہم حکومتی معائنے کے دوران اس بات کا انکشاف ہوا ہے کہ یہاں گوشت اورمرغ کاکاروبار کرنے والے تاجران بغیر لائسنس اور مناسب اسٹوریج سہولیات کے ہی کاروبار کر رہے ہیں۔جموں و کشمیر فوڈ اینڈ ڈرگ ایڈمنسٹریشن کی کمشنر، سمیتا سیٹھی کا کہنا ہے کہ منجمد گوشت کو پروڈکشن سے لیکر فروخت تک ہر مرحلے میں منفی 18 ڈگری سینٹی گریڈ یا اس سے کم درجہ حرارت پر اسٹور کرنا لازمی ہے۔ انہوں نے مزید بتایا کہ ”فوری یعنی2سے4روز تک استعمال ہونے والے گوشت کو ہی 4 ڈگری سینٹی گریڈ والے اسٹوریج میں رکھنے کی اجازت ہے جبکہ منفی18ڈگری سینٹی گریڈ تک اسٹور کیے گئے گوشت کو بارہ مہینوں کے اندر اندر استعمال کرنا ضروری ہے۔“محکمہ فوڈ سیفٹی کے ایک اعلیٰ افسر نے ای ٹی وی بھارت کو بتایا کہ چھاپوں کے دوران یہ بات سامنے آئی کہ کسی بھی تاجر کے پاس کولڈ سٹوریج کا انتظام نہیں تھا اور نہ ہی ان کے پاس اس کے لیے درکار لائسنس تھی۔ ان کے مطابق ”یہ تاجر اشیاءکی فروخت کے لئے لائسنس رکھتے تھے، لیکن وہ بڑے پیمانے پر غیر قانونی طور پر منجمد گوشت کی درآمد اور ترسیل میں ملوث تھے۔“کشمیر میں فوڈ سیفٹی ڈیپارٹمنٹ کے اسسٹنٹ کمشنر ہلال احمد میر نے ای ٹی وی بھارت کو بتایا کہ سرینگر کے2بڑے تاجر اس غیر قانونی کاروبار میں ملوث پائے گئے، جن کے لائسنس فی الحال منسوخ کر دئیے گئے ہیں۔ پولیس نے ان تاجروں، زکورہ کے رہائشی عبدالحمید کوچھے (سن شائن فوڈز) اور باغات، برزلہ کے رہائشی عارف احمد شاہ کےخلاف بھارتیہ نیایہ سنہیتا (بی این ایس )کے تحت مقدمہ درج کر لیا ہے۔ فوڈ سیفٹی ڈیپارٹمنٹ کے اسسٹنٹ کمشنر نے مزید بتایا ہے کہ ان سبھی تاجروں اور ڈسٹری بیوٹرز کے لائسنس معطل کر دیے گئے ہیں جو سڑا ہوا گوشت اور مرغ فروخت کرتے ہوئے پائے گئے۔ اس کے ساتھ ہی گوشت، مرغ اور مچھلی کے نمونے 2بیرونی لیبارٹریوں میں بھیجے گئے ہیں تاکہ ان کے معیار اور اصل کی جانچ کی جا سکے۔افسران کا مزید کہنا ہے کہ یہ کاروباری غیر منظور شدہ طریقوں پر دہلی اور اس کے ملحقہ علاقوں سے ڈریسڈ چکن، گوشت درآمد کرتے ہیں۔ عوامی غم و غصے کے بعد، فوڈ سیفٹی ڈیپارٹمنٹ نے تمام فوڈ بزنس آپریٹرز کو سخت ہدایات جاری کی گئی ہیں کہ وہ 2006 کے فوڈ سیفٹی اینڈ سٹینڈرڈز ایکٹ اور 2020 کے پیکیجنگ اینڈ لیبلنگ ریگولیشنز کی مکمل تعمیل کو یقینی بنائیں۔دریں اثنا، وادی کی سب سے بڑی تجارتی تنظیم، کشمیر چیمبر آف کامرس اینڈ انڈسٹری (KCCI) نے درآمد شدہ منجمد گوشت پر عارضی پابندی کا مطالبہ کیا ہے۔ کشمیر چیمبر آف کامرس اینڈ انڈسٹری کے صدر جاوید احمد ٹینگہ نے کہا ہے کہ ”ملزمان کی شناخت اور انہیں سزا دینے کےلئے ایک فاسٹ ٹریک تحقیقات ضروری ہے، تاکہ مستقبل میں ایسی کوتاہیوں سے بچا جا سکے۔“