نئی دہلی، ہندوستان نے برطانیہ میں برمنگھم کے میئر ذاکر چودھری کے کشمیر سے متعلق بیان کو مکمل طور پر مسترد کرتے ہوئے کہا ہے کہ پورا جموں و کشمیر اور لداخ ہندوستان کا اٹوٹ اور ناقابلِ تنسیخ حصہ ہیں۔

وزارتِ خارجہ کے ترجمان رندھیر جیسوال نے جمعہ کے روز یہاں ہفتہ وار میڈیا بریفنگ کے دوران میئر چودھری کے بیان پر پوچھے گئے ایک سوال کے جواب میں یہ بات کہی۔

ترجمان نے کہاکہ “کشمیر پر آپ کو ہندوستان کا موقف معلوم ہے۔ پورا جموں و کشمیر اور لداخ بھارت کا اٹوٹ اور ناقابلِ تنسیخ حصہ ہیں۔”

قابلِ ذکر ہے کہ برمنگھم کے میئر ذاکر چودھری، جو پاکستانی نژاد ہیں، انہوں نے گزشتہ ماہ پاکستان کے یومِ آزادی کی ایک تقریب کے دوران کہا تھا کہ “کشمیر پاکستان کا ہے”۔

یواین آئی۔ ظ ا

نئی دہلی، نیپال میں گزشتہ ماہ آئے تباہ کن سیلاب کے بعد ابھی بھی 275 ہندوستانی شہری لاپتہ ہیں جبکہ 166 کو بچا لیا گیا ہے اور چین کے علاقے سے 1907 ہندوستانی شہری نیپال پہنچ چکے ہیں اور اب کوئی ہندوستانی شہری وہاں نہیں پھنسا ہوا ہے۔

وزارت خارجہ کے ترجمان رندھیر جیسوال نے جمعہ کو یہاں ہفتہ وار میڈیا بریفنگ میں سوالات کے جوابات دیتے ہوئے یہ معلومات دی۔ انہوں نے کہا، “275 ہندوستانی شہری ابھی بھی لاپتہ ہیں۔ ہم نیپال حکومت، وزارت خارجہ اور متعلقہ ایجنسیوں نیز اپنی متعلقہ ریاستی حکومتوں کے ساتھ رابطہ بنائے ہوئے ہیں۔ ہم نے بچائے گئے شہریوں کے نام شیئر کیے ہیں اور اس سلسلے میں ہم نیپال حکومت کی کوششوں کی تعریف کرتے ہیں۔ اب تک 1907 ہندوستانی شہری چین سے نیپال آئے ہیں۔ ابھی چین میں تبت کے خود مختار علاقے میں کوئی ہندوستانی مسافر نہیں پھنسا ہوا ہے۔”

ترجمان نے کہا کہ ہندوستان نیپال کو اس کی ضرورت کے مطابق امداد جاری رکھے ہوئے ہے اور یہ آگے بھی جاری رہے گی۔ آنے والے دنوں میں ہندوستان نیپال کو فارنسک کٹ، بیلی برج اور دیگر سامان بھیجے گا۔

ہندوستان کے دو طیارے کل بھی 21 ٹن سامان لے کر نیپال گئے تھے، اب تک ہندوستان نے سات طیاروں کے ذریعے 95 ٹن امدادی سامان بھیجا ہے۔ اس کے علاوہ ماہرین اور بچاؤ کارکنوں کی 54 رکنی ٹیم بھی وہاں کام میں جٹی ہوئی ہے۔

یواین آئی ایف اے

نئی دہلی، کانگریس کے سینئر لیڈر جے رام رمیش نے سری ہری کوٹا سے جی ایس ایل وی-ایف 17 راکٹ سے ای او ایس-05 سیٹلائٹ کی کامیاب لانچنگ اور اسے مدار میں قائم کیے جانے پر انڈین اسپیس ریسرچ آرگنائزیشن (اسرو) کو مبارکباد دی ہے۔ انہوں نے اسے ملک کے لیے ایک اور تاریخی کامیابی قرار دیتے ہوئے کہا کہ اس سے ہندوستان کی اسٹریٹجک صلاحیتوں کو مزید مضبوطی ملے گی۔

مسٹر رمیش نے کہا کہ 2367 کلوگرام وزنی ای او ایس-05 سیٹلائٹ کی کامیاب لانچنگ اسرو کے لیے حوصلہ افزا ثابت ہوگی۔ انہوں نے کہا کہ حالیہ دنوں میں اسرو کو کئی اطراف سے حملوں کا سامنا کرنا پڑا ہے، ایسے میں یہ کامیابی اس کی غیر معمولی استقامت اور مشکلات سے ابھرنے کی صلاحیت کو ظاہر کرتی ہے۔ انہوں نے کہا کہ پورے ملک کو اسرو کی کامیابیوں اور اس کی صلاحیت کو سلام کرنا چاہیے نیز تنظیم کی آنے والی تمام مہمات کی کامیابی کی تمنا کرنی چاہیے۔

مسٹر رمیش نے مرکزی حکومت کو نشانہ بناتے ہوئے کہا کہ ایسے وقت میں، جب وزیر اعظم کے دفتر (پی ایم او) کی ہدایت پر اسرو کے کردار میں بنیادی تبدیلی کی جا رہی ہے، اس پر سنجیدگی سے غور کرنے کی ضرورت ہے۔ انہوں نے کہا کہ مجوزہ تبدیلیاں اس باعث تحریک عوامی ادارے کے بنیادی کردار کو متاثر کر سکتی ہیں۔ انہوں نے کہا کہ اسرو نے دہائیوں تک تمام تر مشکلات کے باوجود ملک کو فخر کا احساس دلایا ہے۔

یواین آئی ایف اے