تہران، ایران کے صدر مسعود پزشکیان نے کہا ہے کہ جب تک ’’جارحین‘‘ اپنے اقدامات پر مکمل طور پر پشیمان نہیں ہو جاتے تہران حملوں کے خلاف مزاحمت جاری رکھے گا۔

پزشکیان نے آج بروز منگل ایکس سے جاری کردہ بیان میں کہا ہے کہ ’’ایران ہمیشہ جنگ کی مخالفت کرتا رہا اور عوام کے مفادات اور علاقائی سلامتی کے تحفظ کے لیے جنگی جنون سے گریز کو اپنی ترجیح بناتا رہا ہے۔ تاہم، جس طرح ایران نے اب تک جارحیت کے خلاف بہادری سے اپنا دفاع کیا ہے اسی طرح اب کے بعد بھی اس وقت تک کرنا جاری رکھے گا جب تک کہ جارحین اپنے اقدامات پر مکمل طور پر پشیمان نہیں ہو جاتے۔ ہم، عظیم ایرانی قوم کے حقوق کا تحفظ کرتے رہیں گے۔‘‘

پزشکیان نے یہ بیانات امریکہ اور ایران کے درمیان جاری جنگ اور پورے خطے میں بڑھتی ہوئی کشیدگی کے ماحول میں جاری کئے ہیں۔

پاکستان اور قطر کی ثالثی کے بعد ایران اور امریکہ نے جون میں ایک مفاہمتی یادداشت پر دستخط کیے تھے، جس میں دشمنی ختم کرنے اور مستقبل میں مذاکرات کے لیے ایک فریم ورک تشکیل دینے کی بات کی گئی تھی۔

تہران نے واشنگٹن کو اس مفاہمت کی خلاف ورزی کرنے اور اپنی ذمہ داریوں میں کوتاہی کا قصوروار ٹھہرایا ہے۔ ایرانی حکام متعدد بار کہہ چکے ہیں کہ کشیدگی میں کمی کے لیے امریکہ کو اپنی فوجی کارروائیاں اور بحری ناکہ بندی ختم کرنا ہوگی۔

منگل کے روز مذکورہ بیان سے قبل ایرانی وزیر خارجہ عباس عراقچی نے اپنے جاپانی ہم منصب توشیمیتسو موتیگی کے ساتھ ٹیلی فونک ملاقات کی ۔ مذاکرات میں انہوں کہا ہے کہ واشنگٹن کا اسلام آباد مفاہمت کے تحت کیے گئے وعدوں پر واپس آنا کشیدگی میں کمی کی راہ ہموار کرے گا۔

عراقچی نے مزید کہا ہے کہ ایران اور عمان کے درمیان آبنائے ہرمز سے عارضی گزرگاہ کے قیام کے حوالے سے ہونے والی بات چیت میں اہم پیش رفت ہوئی ہے۔

یو این آئی۔ ع ا۔

موسکو، متحدہ عرب امارات نے نیپال میں تباہ کن سیلاب سے متاثرہ افراد کے لیے 38 ٹن انسانی امداد کے ساتھ چوتھا طیارہ روانہ کیا ہے۔ یہ معلومات اماراتی خبر رساں ایجنسی ڈبلیو اے ایم نے دی ہیں۔

منگل کو سامنے آنے والی رپورٹ کے مطابق، اس امداد میں دیگر سامان کے علاوہ 500 خیمے اور 108 انسانی امدادی کٹس شامل تھیں۔ اس سے قبل، یو اے ای نے نیپال میں 148 ٹن انسانی امداد اور ایک ریسکیو ٹیم کے ساتھ تین طیارے بھیجے تھے۔ مجموعی طور پر، یو اے ای نے ملک میں شدید سیلاب اور لینڈ سلائیڈنگ سے متاثرہ افراد کے لیے ایک کروڑ ڈالر کی فوری انسانی امداد دینے کا اعلان کیا ہے۔

قابلِ ذکر ہے کہ بھوٹے کوشی ندی میں پانی کے تیز بہاؤ کی وجہ سے 26 اگست کی صبح شمالی نیپال میں سیلاب آ گیا تھا۔ یہ سیلاب ایک گلیشیئر کے پیچھے ہٹنے اور اس کے باعث ہونے والی لینڈ سلائیڈنگ کی وجہ سے آیا تھا۔ ملک میں سیلاب سے مرنے والوں کی تعداد 1,300 سے تجاوز کر گئی ہے۔

یواین آئی۔الف الف

واشنگٹن، امریکی صدر ڈونلڈ ٹرمپ نے جرمنی کی خراب امیگریشن پالیسی کو سیکسُنی-انہالٹ میں اتوار کو ہونے والے ریاستی انتخابات میں دائیں بازو کی جماعت ‘الٹرنیٹو فار جرمنی’ (اے ایف ڈی) کی جیت کی وجہ قرار دیا ہے۔

مسٹر ٹرمپ نے ٹروتھ سوشل پر لکھا، “واہ! جرمنی میں پاپولسٹ پارٹی کے لیے کل کی رات بہت بڑی رہی۔ وہ بالآخر ان انتہائی خراب امیگریشن قوانین سے تنگ آ چکے ہیں جنہوں نے جرمنی کو بہت نقصان پہنچایا ہے۔ وہ تیزی سے آگے بڑھ رہے ہیں اور اب مزید برداشت نہیں کریں گے!”

انہوں نے “ایم جی جی اے” کا نعرہ بھی شامل کیا جس کا مطلب ہے ‘جرمنی کو پھر سے عظیم بنائیں’؛ یہ ان کی “ایم اے جی اے” تحریک کے تناظر میں تھا۔

اتوار کو سیکسنی-انہالٹ ریاستی اسمبلی کے انتخابات ہوئے، جس میں اے ایف ڈی نے 43.8 فیصد ووٹ حاصل کیے۔ جرمن چانسلر فریڈرک مرز کی قیادت والی کرسچن ڈیموکریٹک یونین (سی ڈی یو) 17.2 فیصد ووٹوں کے ساتھ کافی پیچھے رہتے ہوئے دوسرے نمبر پر رہی۔

یواین آئی۔الف الف