جموں، جموں و کشمیر انسداد بدعنوانی بیورو (اے سی بی) کے اہلکاروں نے راجوری ضلع میں محکمہ صحت کے ایک ریٹائرڈ ملازم سے 20000 روپے کی رشوت مانگنے اور قبول کرنے کے الزام میں ٹریژری دفتر کے ایک کلرک کو گرفتار کیا ہے۔

اے سی بی کے ترجمان کے مطابق، ملزم کی شناخت کالاکوٹ واقع ٹریژری دفتر میں تعینات کلرک خادم حسین کے طور پر ہوئی ہے۔ اس نے شکایت کنندہ سے اس کی 50000 روپے کی گریجویٹی رقم کی ادائیگی کی کارروائی آگے بڑھانے کے عوض 25000 روپے کا مطالبہ کیا تھا۔

ترجمان نے بتایا کہ محکمہ صحت کے ریٹائرڈ چوتھے درجے کے ملازم شکایت کنندہ اپنی 50000 روپے کی گریجویٹی رقم نکالنے کے لیے ٹریژری دفتر، کالاکوٹ پہنچے تھے، تبھی خادم نے ان کے معاملے پر کارروائی کرنے کے لیے رشوت کا مطالبہ کیا۔

شکایت کے مطابق، شکایت کنندہ اپنی گریجویٹی کی رقم نکلوانے کے سلسلے میں ٹریژری دفتر، کالاکوٹ گئے تھے اور خادم سے ملاقات کی تھی۔ بات چیت کے دوران ملزم افسر نے شکایت کنندہ کی گریجویٹی رقم کی ادائیگی کے معاملے کو آگے بڑھانے کے لیے غیر قانونی طور پر 25000 روپے کی رشوت طلب کی۔

رپورٹ کے مطابق، شکایت کنندہ نے خود کو غریب بتاتے ہوئے ملزم افسر سے اپنی مالی حالت پر غور کرنے کی درخواست کی، لیکن ملزم مسلسل 25000 روپے کی رشوت مانگنے پر اڑا رہا۔ اس کے بعد رشوت کی رقم پر بات چیت ہوئی اور یہ 20000 روپے میں طے ہوئی۔

ترجمان نے بتایا کہ “چونکہ شکایت کنندہ کوئی رشوت نہیں دینا چاہتا تھا اور اس غیر قانونی مطالبے کے آگے جھکنا نہیں چاہتا تھا، اس لیے اس نے انسداد بدعنوانی بیورو سے رابطہ کیا اور ملزم افسر کے خلاف قانونی کارروائی کا مطالبہ کرتے ہوئے تحریری شکایت درج کرائی۔” شکایت موصول ہونے کے بعد الزامات کی تصدیق کی گئی اور مقدمہ درج کرنے کے بعد جال بچھانے کے لیے اے سی بی پولیس اسٹیشن راجوری کے افسران اور اہلکاروں پر مشتمل ایک ٹیم تشکیل دی گئی۔ اس کارروائی کے دوران اے سی بی کی ٹیم نے خادم حسین کو شکایت کنندہ سے غیر قانونی رشوت کے طور پر 20000 روپے لیتے ہوئے رنگے ہاتھوں پکڑ لیا۔ ملزم افسر کو موقع پر ہی گرفتار کر لیا گیا۔ انہوں نے بتایا کہ اس کے بعد معاملے کے سلسلے میں راجوری میں واقع ملزم کے رہائشی احاطے کی بھی تلاشی لی گئی۔

یو این آئی۔این یو۔

سری نگر، جسٹس پشپیندر سنگھ بھاٹی نے بدھ کو یہاں منعقدہ ایک تقریب میں جموں و کشمیر اور لداخ ہائی کورٹ کے چیف جسٹس کی حیثیت سے حلف لیا۔

لداخ کے لیفٹیننٹ گورنر ونے کمار سکسینہ نے جسٹس بھاٹی کو عہدے کا حلف دلایا۔ مسٹر سکسینہ اس وقت جموں و کشمیر کے لیفٹیننٹ گورنر کا اضافی چارج بھی سنبھال رہے ہیں۔

عہدیداروں نے بتایا کہ حلف برداری کی تقریب شیرِ کشمیر یونیورسٹی آف ایگریکلچرل سائنسز اینڈ ٹیکنالوجی کے شالیمار آڈیٹوریم میں منعقد ہوئی۔ تقریب میں وزیر اعلیٰ عمر عبداللہ، اسمبلی کے اسپیکر عبدالرحیم راتھر، کئی کابینی وزرا، ہائی کورٹ کے جج اور سینئر سول و پولیس افسران شریک ہوئے۔

مرکزی حکومت نے 05 ستمبر کو جموں و کشمیر اور لداخ ہائی کورٹ کے چیف جسٹس کے طور پر جسٹس بھاٹی کی تقرری کا باضابطہ اعلان کیا تھا۔

یو این آئی۔ ایم جے

سری نگر، جموں و کشمیر میں وندے ماترم کے مکمل ورژن پر کانگریس اور اس کی اتحادی جماعت نیشنل کانفرنس (این سی) کے درمیان اختلافات سامنے آ گئے ہیں۔ سری نگر میں بین الاقوامی فلم فیسٹیول کی افتتاحی تقریب میں وندے ماترم کا مکمل ورژن گائے جانے پر کانگریس نے اعتراض کیا تھا۔ تقریب میں وزیرِ اعلیٰ عمر عبداللہ اور نیشنل کانفرنس کے صدر فاروق عبداللہ بھی موجود تھے۔

کانگریس کے جنرل سکریٹری اور تنظیمی امور کے انچارج کے سی وینوگوپال نے سوشل میڈیا پلیٹ فارم ’ایکس‘ پر تقریب کی ویڈیو شیئر کرتے ہوئے نیشنل کانفرنس سے اپیل کی کہ وہ کانگریس کے اس موقف کی حمایت کرے جس میں وندے ماترم کے صرف پہلے دو بند گانے پر زور دیا گیا ہے۔ انہوں نے کہا، ’’وندے ماترم کا مکمل ورژن اس ہم آہنگی اور کثرت پسندی کی روح کے مطابق نہیں ہے، جس کا تصور آزادی کے مجاہدین نے ہندستان کے لیے کیا تھا اور اسے فروغ دیا تھا۔‘‘

مسٹر وینوگوپال نے مہاتما گاندھی، جواہر لال نہرو، سردار ولبھ بھائی پٹیل، سبھاش چندر بوس، راجندر پرساد، آچاریہ نریندر دیو، مولانا ابوالکلام آزاد، سروجنی نائیڈو اور جے بی کرپلانی کا ذکر کرتے ہوئے کہا کہ اس گیت کے حوالے سے آزادی کے مجاہدین کا اجتماعی فیصلہ اہمیت رکھتا ہے۔ انہوں نے کہا کہ رابندر ناتھ ٹیگور کے مشورے نے بھی گیت کی موجودہ شکل طے کرنے میں اہم کردار ادا کیا تھا۔

انہوں نے کہا کہ کانگریس اپنی اتحادی جماعتوں سے اپیل کرتی ہے کہ وہ آزادی کے مجاہدین کے فیصلے کا احترام کریں اور اسی ورژن کو گائیں جسے انہوں نے اختیار کیا تھا۔ ان کے مطابق اس ورژن کا انتخاب سوچ سمجھ کر کیا گیا تھا تاکہ گیت کو فرقہ وارانہ رنگ نہ دیا جائے اور جمہوریہ کے سیکولر اور جامع کردار کو برقرار رکھا جا سکے۔ جموں و کشمیر کانگریس کے صدر طارق قرہ نے بھی وندے ماترم کا مکمل ورژن گائے جانے پر تشویش ظاہر کی۔ انہوں نے کہا کہ قومی علامات، قومی گیت اور روایات ہر ہندستان کے لیے خاص اہمیت رکھتی ہیں اور ان کی اصل طاقت ملک کے تنوع کو متحد کرنے میں ہے۔ انہوں نے کہا کہ اتحادی جماعتوں کی جانب سے وندے ماترم کا مکمل ورژن گانا تشویش کا باعث ہے، کیونکہ یہ آزادی کی تحریک سے لے کر جمہوریہ کے آئینی سفر تک اس گیت کے کردار میں آنے والی بتدریج تبدیلی کو نظرانداز کرتا ہے۔

مسٹر وینوگوپال کے بیان پر بی جے پی کی جانب سے سخت ردِعمل سامنے آیا۔ بی جے پی کی جموں و کشمیر یونٹ نے اسے کانگریس کے لیے ایک نئی نچلی سطح قرار دیا۔ بی جے پی کی جموں و کشمیر یونٹ نے ’ایکس‘ پر کہا، ’’…ان کی اپنی اتحادی جماعتوں کے مسلم رہنما فخر اور پورے اعتماد کے ساتھ وندے ماترم گا رہے ہیں اور کانگریس، جو خود کو مسلمانوں کی خود ساختہ ٹھیکیدار سمجھتی ہے، انہی رہنماؤں کو برا بھلا کہہ رہی ہے اور وندے ماترم کو مسلم مخالف قرار دے رہی ہے۔ آپ ہوتے کون ہیں؟ چاول کے بدلے مذہب تبدیل کرنے والے لوگ اب حقیقی مسلمانوں کو اسلام اور مسلم مخالف ہونے کا سبق دیں گے؟ آپ دو تین انتہا پسند ملاؤں کے تلوے چاٹنے کے لیے پوری برادری اور پورے ملک کو بیچ دیں گے؟ کانگریس سے زیادہ مسلم مخالف اور ملک دشمن کوئی پارٹی نہیں ہے۔ آپ کے لیے شرم کی بات ہے۔‘‘ قابلِ ذکر ہے کہ کانگریس ورکنگ کمیٹی نے گزشتہ ماہ وندے ماترم کے حوالے سے 1937 کی پارٹی قرارداد پر عمل کرنے کا فیصلہ کیا تھا۔ اس کے تحت مستقبل میں کانگریس کے پروگراموں میں گیت کے صرف پہلے دو بند گائے جائیں گے۔

یواین آئی ایم جے