نئی دہلی، ‘انڈیا’ اتحاد کے سرکردہ رہنماؤں نے جمہوریت کے تحفظ، ووٹر فہرستوں کی خصوصی تفصیلی نظرِ ثانی (ایس آئی آر) کی کارروائی روکنے اور چیف الیکشن کمشنر گیانیش کمار کے استعفیٰ کے مطالبے پر مکمل اتفاقِ رائے کا اظہار کرتے ہوئے اعلان کیا ہے کہ ان مطالبات کی منظوری تک اپوزیشن کی تحریک پورے جوش و خروش کے ساتھ جاری رہے گی۔

کانگریس کے سابق صدر اور لوک سبھا میں قائدِ حزبِ اختلاف راہل گاندھی نے منگل کے روز اپنی رہائش گاہ پر ‘انڈیا’ اتحاد کے رہنماؤں، اپوزیشن ارکانِ پارلیمنٹ اور طلبہ تنظیموں کے رہنماؤں کو چائے پر مدعو کیا تھا، جس میں یہ اہم فیصلہ کیا گیا۔ بعد ازاں، ان رہنماؤں نے میڈیا سے گفتگو کرتے ہوئے کہا کہ گزشتہ چار دنوں کے دوران احتجاجی مظاہروں نے ملک میں جمہوریت اور حقِ رائے دہی کے تحفظ کے لیے اپوزیشن کی اٹوٹ یکجہتی کو ثابت کر دیا ہے۔ جنتر منتر پر احتجاج کی اجازت نہ دینا اور مظاہرے کے مقامات کو دہلی کی سرحدوں پر منتقل کرنا حکومت کے اندرونی خوف کو ظاہر کرتا ہے۔ اتحاد نے ‘ووٹ چوری’ کے خلاف اپنی جنگ جاری رکھنے کا پختہ عزم ظاہر کرتے ہوئے کہا کہ ملک میں جمہوریت کو بچانے، ایس آئی آر کو روکنے اور چیف الیکشن کمشنر گیانیش کمار کے استعفیٰ کا مطالبہ پورا ہونے تک ان کی تحریک بلا تعطل جاری رہے گی۔

مسٹر گاندھی کی طرف سے دی گئی اس چائے پارٹی میں کانگریس پارلیمانی پارٹی کی صدر سونیا گاندھی، کانگریس صدر ملکارجن کھرگے، کانگریس جنرل سکریٹری پرینکا گاندھی واڈرا، کے سی وینوگوپال، کرناٹک کے وزیرِ اعلیٰ ڈی کے شیوکمار، ہماچل پردیش کے وزیرِ اعلیٰ سکھوندر سنگھ سکھو، آر جے ڈی رہنما تیجسوی یادو، ترنمول کانگریس کی رکنِ پارلیمنٹ ساگریکا گھوش، سی پی آئی کے جنرل سکریٹری ڈی راجہ، شیو سینا (یو بی ٹی) کے رکنِ پارلیمنٹ سنجے راوت، نشنلسٹ کانگریس پارٹی ( شردپوار) کی رکنِ پارلیمنٹ سپریہ سُلے، کانگریس کے رکنِ پارلیمنٹ گورو گگوئی ، جھارکھنڈ مکتی مورچہ کی رکنِ پارلیمنٹ مہوا مانجھی، سماج وادی پارٹی کی رکنِ پارلیمنٹ پریا سروج اور ‘ودوتھلائی چروتھائیگل کاچی’ کے رہنما تھول تھیروماولون سمیت ‘انڈیا’ اتحاد کے دیگر رہنما اور طلبہ رہنما شریک ہوئے۔

اس موقع پر مسٹر کھرگے نے کہا کہ گزشتہ چار دنوں میں ‘انڈیا’ اتحاد کے پروگراموں کو زبردست کامیابی ملی ہے۔ کانگریس رہنما راہل گاندھی اور دیگر سرکردہ رہنماؤں نے عوامی مسائل کو پوری سنجیدگی اور لگن کے ساتھ اٹھایا ہے۔ اتنی بڑی تعداد میں لوگوں کا جمع ہونا ایک غیر معمولی واقعہ ہے، اور دہلی میں یہ پہلا موقع ہے کہ نوجوان اور عام شہری اپنی ذاتی پہل پر اتنی بڑی تعداد میں ایک ساتھ سڑکوں پر آئے ہیں۔ اتحاد کے تمام اراکین وزیرِ اعظم نریندر مودی کی ‘ووٹ چوری’ کی مبینہ اسکیم کو بے نقاب کرنے کے لیے پوری طرح تیار ہیں۔

مسٹر راہل گاندھی نے وزیرِ اعظم نریندر مودی کو اس مبینہ سازش کا مرکزی کردار (ماسٹر مائنڈ)، وزیرِ داخلہ امت شاہ کو اس کا نفاذ کرنے والا اور چیف الیکشن کمشنر گیانیش کمار کو اس میں ملوث قرار دیتے ہوئے کہا کہ آئین کو پامال کر کے کوئی بچ نہیں سکتا۔ انہوں نے کہا کہ اپوزیشن کا یہ احتجاج کسی ایک سیاسی جماعت کی آواز نہیں، بلکہ ملک کی عام لوگوں کی آواز ہے۔ انہوں نے دہلی اور ملک بھر کے ان تمام شہریوں کا شکریہ ادا کیا جنہوں نے اس کٹھن جدوجہد میں ساتھ دیا۔ مسٹر گاندھی نے عزم ظاہر کیا کہ جمہوری عمل کو بحال کرنے کے لیے تمام جماعتیں مل کر آخری دم تک لڑیں گی اور اس کے لیے ذمہ دار عناصر کو کٹہرے میں لایا جائے گا۔

آر جے ڈی رہنما تیجسوی یادو نے کہاکہ جمہوریت کو بچانے کے لیے تمام اپوزیشن جماعتیں متحد ہیں اور اس کے لیے جو بھی قربانی دینی پڑی، وہ مل کر دیں گے۔ انہوں نے الزام عائد کیا کہ بھارتیہ جنتا پارٹی، مسٹر مودی اور مسٹر شاہ جمہوریت اور آئینی اداروں کو کمزور کرنے کی گھناؤنی سازش کر رہے ہیں۔ انہوں نے کہا کہ انفورسمنٹ ڈائریکٹوریٹ (ای ڈی )، سی بی آئی اور انکم ٹیکس ڈپارٹمنٹ جیسے اداروں کے بعد اب الیکشن کمیشن کے کردار پر بھی سنگین سوالیہ نشان لگ گئے ہیں۔ مسٹر یادو نے الزام لگایا کہ چیف الیکشن کمشنر گیانیش کمار نے ایک کٹھ پتلی کی طرح کام کیا ہے اور انہیں اس کا جواب دینا ہوگا۔

مسٹر یادو نے کہا کہ جنتر منتر تاریخی اہمیت کا حامل مقام ہے، جہاں روایتی طور پر احتجاجی مظاہرے ہوتے رہے ہیں۔ مظاہرے کے مقامات کو دہلی کی سرحدوں پر دھکیلنا حکومت کے خوف کی علامت ہے۔ انہوں نے کہا کہ ووٹ چوری اور انتخابات میں مبینہ دھاندلی کے ذمہ داروں کو ملک کی عوام کے سامنے جوابدہ ہونا پڑے گا۔ جمہوریت اور آئین کو بچانے کی اس لڑائی میں اپوزیشن متحد رہے گی اور اسے کامیابی ضرور ملے گی۔

ترنمول کانگریس کی رکنِ پارلیمنٹ ساگریکا گھوش نے کہا کہ ہر گزرتے دن کے ساتھ یہ بات واضح ہوتی جا رہی ہے کہ گیانیش کمار کی قیادت والا الیکشن کمیشن ہندوستان میں آزاد اور منصفانہ انتخابات کے انعقاد کے عمل کو شدید نقصان پہنچا رہا ہے۔ انہوں نے کہا کہ جب تک مسٹر کمار جیسے اشخاص الیکشن کمیشن کے منصب پر فائز رہیں گے، تب تک ملک میں شفاف انتخابات کا انعقاد ممکن نہیں ہے۔ انہوں نے اعلان کیا کہ ‘انڈیا’ اتحاد کی تمام جماعتیں مکمل طور پر متحد ہیں اور گیانیش کمار کو ہٹانے نیز ان کے خلاف فوجداری کارروائی شروع کرنے کا مطالبہ پورا ہونے تک جدوجہد جاری رہے گی۔ محترمہ گھوش نے ہریانہ، مہاراشٹر، مغربی بنگال اور بہار میں ہوئے انتخابات میں مبینہ ووٹ چوری کی غیر جانبدارانہ جانچ کرانے اور اس میں ملوث انتخابی حکام کے خلاف بھی قانونی کارروائی کرنے کا مطالبہ کیا۔ انہوں نے ایس آئی آر کے عمل کو فوراً روکنے، پرانی ووٹر لسٹوں کو بحال کرنے اور الیکشن کمیشن کو مکمل جوابدہ بنانے پر زور دیا۔

شیو سینا (یو بی ٹی) کے رہنما سنجے راوت نے کہاکہ راہل گاندھی نے تمام اپوزیشن رہنماؤں اور اراکینِ پارلیمنٹ کو چائے کی اس اہم میٹنگ میں مدعو کیا تھا، جہاں مستقبل کی حکمت عملی پر تفصیلی غور و خوض کیا گیا۔ انہوں نے کہا کہ چیف الیکشن کمشنر گیانیش کمار، مسٹر مودی اور مسٹر شاہ کے خلاف یہ جدوجہد صرف قومی دارالحکومت تک محدود نہیں رہے گی، بلکہ اسے ملک کے دوسرے حصوں میں بھی وسعت دی جائے گی۔

سی پی آئی کے جنرل سکریٹری ڈی راجہ نے کہا کہ میٹنگ میں ملک کی موجودہ سیاسی صورتحال اور چیف الیکشن کمشنر گیانیش کمار کے استعفیٰ کے مطالبے کو لے کر ملک بھر میں مہم چلانے کے طریقوں پر تبادلہ خیال کیا گیا۔ این سی پی (ایس پی) کی رکنِ پارلیمنٹ سپریہ سُلے نے کہا کہ ‘انڈیا’ اتحاد پوری طاقت اور آہنی عزم کے ساتھ ایک پلیٹ فارم پر موجود ہے۔ آئین کو پے در پے کمزور کیا جا رہا ہے اور جمہوریت خطرے میں ہے، لہذا پوری اپوزیشن ڈاکٹر بابا صاحب امبیڈکر کی عطا کردہ آئینی اقدار اور حقوق کے تحفظ کے لیے اپنی تحریک کو جاری رکھے گی۔ انہوں نے واضح کیا کہ گلی کوچوں سے لے کر پارلیمنٹ تک یہ جدوجہد مسلسل جاری رہے گی۔

کانگریس کے رکنِ پارلیمنٹ گورو گگوئی نے کہا کہ آج کی اس چائے کی میٹنگ کے بعد پورے ملک میں یہ واضح پیغام چلا گیا ہے کہ تمام اپوزیشن جماعتیں ایک مشترکہ اور اہم مدعے پر پوری طرح یکسو ہو کر احتجاج کر رہی ہیں۔

جھارکھنڈ مکتی مورچہ کی رکنِ پارلیمنٹ مہوا مانجھی نے کہا کہ وہ اس میٹنگ میں اپنی پارٹی کی باضابطہ نمائندگی کرنے کے لیے شریک ہوئیں اور پارٹی نے اس تحریک کی بھرپور حمایت کا اعادہ کیا ہے۔ سماجوادی پارٹی کی رکنِ پارلیمنٹ پریا سروج نے کہاکہ احتجاج کے مقامات کو بدلنے سے اپوزیشن کی توانا آواز کو دبایا نہیں جا سکتا۔ انہوں نے کہا کہ حکومت کے آمرانہ اور غیر جمہوری رویے نے اپوزیشن کے عزم کو مزید مضبوط کیا ہے۔

سی پی آئی (ایم ) کے رہنما ایم اے بیبی نے کہا کہ غیر جانبدار رہنے کی آئینی ذمہ داری نبھانے والے لوگ حکمران جماعت کے آلہ کار بن چکے ہیں۔ ان لوگوں نے پہلے عوامی ووٹ چرائے، پھر جمہوری حقوق چھینے اور اب پرامن احتجاج کا حق بھی سلب کرنے کی کوشش کی ہے۔ انہوں نے کہا کہ ‘انڈیا’ اتحاد ان ‘ووٹ چوروں’ کے خلاف مشترکہ طور پر فیصلہ کن جنگ لڑے گا۔

سینئر وکیل پرشانت بھوشن نے کہا کہ انصاف کے حصول کی اس تاریخی لڑائی میں ‘انڈیا’ اتحاد کی تمام اکائیاں سیسہ پلائی ہوئی دیوار کی طرح متحد ہیں۔ سماجوادی پارٹی کے رکنِ پارلیمنٹ ہریندرملک نے عزم ظاہر کیا کہ جمہوریت کا گلا گھونٹنے والے ‘ووٹ چوروں’ کے خلاف آخری سانس تک مؤثر جنگ لڑی جائے گی اور اس میں فتح سچی جمہوریت کی ہوگی۔

یواین آئی ایف اے