نئی دہلی، کانگریس کے سابق صدر اور لوک سبھا میں قائد حزب اختلاف راہل گاندھی نے کہا ہے کہ جنتر منتر پر پرامن مظاہرے کے دوران ترنگا لہرانا کوئی جرم نہیں ہے اور اس کے لیے نوجوانوں کو جیل میں ڈالنا بزدلی ہے۔

مسٹر گاندھی نے بدھ کو سوشل میڈیا ‘ایکس’ پر کہا کہ طلباء، نوجوان، صحافی اور انڈیا اتحاد کے لوگ الگ الگ بینروں کے تحت مظاہرہ کر رہے ہیں اور ان سب کا مقصد ایک ہی ہے۔ یہ تمام مظاہرے ملک کے شہریوں کی جانب سے اپنے آئینی حقوق کے مطالبے کے حق میں کیے جا رہے ہیں۔

انہوں نے کہا کہ جنتر منتر ہندوستان کے عوام کا ہے اور اسے عوام کے حق کے دائرے میں دوبارہ لایا جائے گا۔

یو این آئی ایف اے

نئی دہلی، کانگریس نے مرکزی وزیر داخلہ امت شاہ سے اسپیشل انٹینسیو ریویژن (ایس آئی آر) کے تحت پکڑے گئے دراندازوں کی تعداد، ووٹر لسٹ سے ہٹائے گئے دراندازوں کی تعداد اور ملک سے نکالے گئے دراندازوں کی تعداد بتانے کا مطالبہ کیا ہے۔

کانگریس کے جنرل سکریٹری جے رام رمیش نے بدھ کے روز سوشل میڈیا ‘ایکس’ پر کہا کہ ملک کے 100 کروڑ لوگوں کو ایس آئی آر کے عمل سے گزرنا پڑا ہے اور انہیں اس کے نتائج جاننے کا حق ہے۔ انہوں نے سوال کیا کہ ایس آئی آر کا دفاع کرنے والے وزیر داخلہ بتائیں کہ کتنے دراندازوں کا پتہ لگایا گیا، کتنے لوگوں کے نام ووٹر لسٹ سے ہٹائے گئے اور کتنے دراندازوں کو ملک سے باہر نکالا گیا۔

مسٹر رمیش نے الزام لگایا کہ ایس آئی آر کے پیچھے کے ماسٹر مائنڈ بار بار دراندازوں کا معاملہ اٹھا کر تقریباً 14 کروڑ ہندوستانیوں کو ان کے آئینی حقِ رائے دہی سے محروم کیے جانے کے مسئلے سے توجہ ہٹانے کی کوشش کر رہے ہیں۔

انہوں نے کہا کہ وزیر داخلہ کو بتانا چاہیے کہ کیا ووٹر لسٹ سے ہٹائے گئے 14 کروڑ ہندوستانی درانداز ہیں اور کیا ان کے دورِ حکومت میں دراندازوں کی تعداد میں اتنا بڑا اضافہ ہوا ہے؟

یواین آئی۔الف الف

نئی دہلی، وزیراعظم نریندر مودی نے بدھ کے روز بہار کے ضلع ویشالی میں کشتی پلٹنے کے واقعے میں ہونے والی اموات پر گہرے رنج و غم کا اظہار کیا۔ حادثے میں جان گنوانے والوں کے لواحقین کو وزیراعظم کے قومی ریلیف فنڈ سے دو دو لاکھ روپے کی مالی امداد دی جائے گی، جبکہ زخمیوں کو پچاس پچاس ہزار روپے دیے جائیں گے۔

سوشل میڈیا پلیٹ فارم ‘ایکس’ پر ایک پوسٹ میں مسٹرمودی نے کہا، “بہار کے ویشالی میں کشتی الٹنے کے واقعے میں لوگوں کی موت انتہائی تکلیف دہ ہے۔ اس مشکل وقت میں میری تعزیت متاثرہ خاندانوں کے ساتھ ہے۔

میں تمام زخمیوں کے جلد صحت یابی کے لئے دعا گو ہوں۔” وزیراعظم نے کہا کہ مقامی انتظامیہ اس حادثے سے متاثرہ افراد کو مدد فراہم کر رہی ہے۔ انہوں نے سوگوار خاندانوں سے تعزیت کا اظہار کیا اور زخمیوں کی جلد شفایابی کی خواہش کی۔

قابل ذکر ہے کہ ویشالی ضلع کے راگھوپور بلاک میں منگل کے روز گنگا ندی میں کشتی الٹنے سے 13 افراہلاک اور کئی دیگر زخمی ہو گئے تھے۔

یواین آئی۔الف الف