جموں، جموں و کشمیر پولیس نے بدھ کے روز ایک نامور ٹریول فرم کے نام پر جعلی بلوں کا استعمال کر کے ٹھہرنے اور ٹور پیکج کے نام پر عقیدت مندوں سے پیسے وصول کر کے ٹھگی کرنے کے ملزم ایک جعلی ٹریول ایجنٹ کو گرفتار کر لیا۔

پولیس اہلکار کے مطابق، یہ معاملہ کٹرا میں متیال پٹرول پمپ کے قریب واقع ایک ہوٹل کے سپروائزر کی جانب سے شکایت درج کرائے جانے کے بعد سامنے آیا۔ شکایت میں کہا گیا تھا کہ ایک شخص نے خود کو ٹریول ایجنٹ بتا کر عقیدت مندوں کے لیے کمرے بک کیے، لیکن پیسے وصولنے کے باوجود مسافروں کو ٹھہرنے کی سہولت فراہم نہیں کی۔ شکایت پر کٹرا تھانے میں معاملہ درج کر کے تفتیش شروع کی گئی۔ پولیس نے پایا کہ ملزم نے اتر پردیش کے ایک عقیدت مند خاندان سے ٹور پیکج کے لیے پیسے وصول کیے تھے اور کٹرا کی ایک ٹریول فرم کے نام کی بل سلپ جاری کی تھی، جبکہ وہ اس کمپنی سے وابستہ نہیں تھا۔

کٹرا تھانے کی ایک خصوصی ٹیم نے ملزم کو امبیکا چوک سے گرفتار کر لیا۔ ملزم کی شناخت اودھم پور ضلع کے گرنائی کے رہنے والے وویک شرما کے طور پر ہوئی ہے۔ ملزم کے قبضے سے 60,000 روپے نقد، ٹریول فرم کے نام کی کئی بل بکس اور فرم کے نام والے وزٹنگ کارڈز برآمد کیے گئے۔ اب تک کی تفتیش سے اشارے ملتے ہیں کہ ملزم اسی طرح کے طریقے استعمال کر کے کئی دیگر لوگوں کو بھی اپنا شکار بنا چکا ہے۔

یواین آئی۔الف الف

جموں، جموں و کشمیر کے ضلع اودھم پور میں ایک بس حادثے کا شکار ہوگئی، جس کے نتیجے میں دو مسافروں کی موت ہوگئی جبکہ 15 دیگر زخمی ہوگئے۔

پولیس کے مطابق، آج صبح ضلع اودھم پور میں بسنت گڑھ۔ رام نگر سڑک پر پیچونڈ سے رام نگر جاتے ہوئے ایک بس گلی گالا کے مقام پر سڑک سے پھسل کر گہری کھائی میں جاگری۔

حادثے کے فوراً بعد مقامی افراد، پولیس اور فوج کے اہلکاروں نے کارروائی کرتے ہوئے امدادی آپریشن شروع کردیا۔

حکام نے بتایا کہ بس میں سوار کم از کم 17 مسافر زخمی ہوئے، جن میں سے آٹھ کو رام نگر اسپتال منتقل کیا گیا۔

پولیس کے مطابق، سر پر شدید چوٹیں لگنے کے باعث ایک خاتون اور ایک کمسن لڑکی سمیت دو زخمیوں نے رام نگر اسپتال منتقل کیے جانے کے دوران دم توڑ دیا۔

مرکزی وزیر ڈاکٹر جتیندر سنگھ نے سوشل میڈیا پلیٹ فارم ایکس پر اطلاع دی کہ بدقسمتی سے حادثے میں دو افراد کی موت ہوئی ہے۔ انہوں نے بتایا کہ 10 زخمیوں کو سب ڈسٹرکٹ اسپتال (ایس ڈی ایچ)، رام نگر پہنچایا گیا ہے۔ ان میں سے تین کو گورنمنٹ میڈیکل کالج (جی ایم سی)، اودھم پور منتقل کیا جارہا ہے، جبکہ مزید تین ایمبولینسیں ایس ڈی ایچ رام نگر پہنچنے والی ہیں۔

انہوں نے مزید بتایا کہ انہوں نے دہلی میں بارڈر روڈز آرگنائزیشن (بی آر او) کے حکام کے ساتھ رام نگر سے بسنت گڑھ تک سڑک کی تعمیر کا معاملہ بھی اٹھایا ہے۔

ڈاکٹر جتیندر سنگھ نے اس سے قبل بتایا تھا کہ بس حادثے کی اطلاع ملنے کے بعد انہوں نے ضلع اودھم پور کے ڈپٹی کمشنر اننت دویدی سے بھی بات کی۔ انہوں نے کہا کہ مقامی باشندوں کی بروقت مدد سے تمام مسافروں کو فوری طور پر بس سے نکال لیا گیا۔

انہوں نے مزید کہا تھا کہ امدادی ٹیم جائے حادثہ پر پہنچ گئی ہے اور زخمی مسافروں کو سب ڈسٹرکٹ اسپتال، رام نگر منتقل کیا جارہا ہے۔

یواین آئی۔ ظ ا

سری نگر، جموں و کشمیر حکومت نے بدھ کے روز ایم بی بی ایس اور بی ڈی ایس کے انٹرنز، بشمول بیرونِ ملک سے میڈیکل کی تعلیم حاصل کرنے والے فارغ التحصیل طلبہ (ایف ایم جیز) کے ماہانہ وظیفے میں اضافے کا حکم جاری کیا ہے۔ ان کا وظیفہ 12,300 روپے سے بڑھا کر 25,000 روپے کردیا گیا ہے۔ اس اضافے کا اطلاق یکم اکتوبر سے ہوگا۔

محکمہ صحت و طبی تعلیم کی جانب سے جاری کردہ حکومتی حکم نامے کے مطابق، محکمہ خزانہ کی منظوری کے بعد وظیفے میں اضافے کی منظوری دی گئی ہے۔

یہ فیصلہ ایسے وقت میں کیا گیا ہے جب جموں و کشمیر بھر میں میڈیکل انٹرنز نے منگل کے روز دوبارہ احتجاج شروع کردیا۔ انٹرنز نے حکومت پر تحریری یقین دہانی پوری نہ کرنے کا الزام لگایا ہے، جس میں 30 دن کے اندر ان کے وظیفے میں اضافے کا وعدہ کیا گیا تھا۔

انٹرنز نے گزشتہ ماہ احتجاج شروع کیا تھا اور ماہانہ وظیفہ 12,300 روپے سے بڑھا کر 30,000 روپے کرنے کا مطالبہ کیا تھا۔

حکومت کی جانب سے ایک ماہ کے اندر ان کا مطالبہ پورا کرنے کی یقین دہانی کے بعد انہوں نے 9 ستمبر کو ہڑتال ختم کردی تھی۔ تاہم، انٹرنز نے منگل کے روز کہا کہ مقررہ مدت گزر جانے کے باوجود اس سلسلے میں کوئی فیصلہ نہیں کیا گیا، جس کے باعث انہیں دوبارہ احتجاج شروع کرنا پڑا۔

یواین آئی۔ ظ ا